Waigu ADezire Yekova Abi Mbutise?
Ani nakakuti kina gu bipai du Baibiri na ni tipa rogatise na mbutise. Mbori asigira rogotise si du ni nyeanye kodatise dagba kumba na dee. Gu yangara ndupai sa rengbe arogotise ka mbutiyo riipaha nga bari.—Matayo 19:5, 6, 9.
Ya mo aDezire Yekova nafu undo fu agu arogotise du na kpakarapai rogo gayo rogatise?
Ii, ngba badungu agene:
Awaraga. Si dedede na agu apai rogoyo nga gu rengbe ka nyakasa rogatise, zavura gu nangera wa ka i mbakadingo ho te. Ni kpiapai, mo bi gu kekeapai nga “Futise” na “Mbupai,” du rogo Awake! Na. 2 2018
Adunguratise. Ani nasakapai tipa gu ga Baibiri rugute nga ga tatamana du tipa rogatise, ani namangaha wo ba gaani adunguratise yo, na ba gaani bakere adunguratise yo.
Abaakumba. Abaakumba nga ga dungurati nafu undo fu arogotise, ka gbeberã yo kuti averesi wa gu nga AEfeso 5:22-25.
Ya mo abaakumba nga ga dungurati yo du si aida i idipa mbutise fu Dezire Yekova?
Oó. Zavura ho i asana abaakumba ni i undo arogotise nga aguyo du na kpakaraapai rogo gayo rogatise, i aruganga yo i pe gupai fu arogotise si aida i mangihe te. (AGaratio 6:5) Ono tie, gu boro nasia ka manga mbutise zanga riimburu gupai du rogo Ziazia Kekeapai, ni na ranirii ka manga rogatise te ringbisihe kuti Ziazia Kekeapai.—1 Timoteo 3:1, 5, 12.
Waigu aDezire Yekova abi kparaka?
Baibiri nangarasa arogotise i nisungu kina sa zavura ho du apai ni ni kpakarakpakaraha tooni. (1 AKorindo 7:10-16) I rengbe ka mbakada badungu kpakaraapai ni mangayo dudunguro kparakpee, ni mangapai kuti abangua rengo nga ga Baibiri, na ni yugoyo nyemuse.—1 AKorindo 13:4-8; AGaratio 5:22.
Wa vura duhe wo, bete kura aKristano ima manga diaberã ka kparaka na gayo badiarogatise, ho du ga boro raka ni ngbapai yo wa gu nga:
Ho boro aidanga ka undo gani aborokporo ni ya ni wia.—1 Timoteo 5:8.
Pa du boro na zuu nga gu nasa gupai nga kpoto kurani na gani unga du ngbapai.—Atambuahe 11:5.
Pa maa ga kura boro raka ngbapai yo rogo toroyo. Ni kpiapai, badiarogatise rengbe ka asada ka zio guni nga Dezire Yekova ngbaome ni kuo ga Mbori andiko ngba kura gene, guni du gani raka ngbapai yo re ima rengba ka sia kparaka tipa ka ‘gia sangba Mbori susi ga aboro.’—Amokedi 5:29.