Bawene Waraga Tipa Wirika Baibiri

Rogo Ngi 2021, Riigbu Bipasunge atingidipa kusa gu waraga du tipa wirika Baibiri nga, Mo Raki Nyeanye Kindi na Ngbarago!a Waigu mo amangipai kuti gu tingidapai re? Matthew, du Kanada yo, aya: “Mi adu na bakere ngbarago! Na gimi ngbarago akii berewe gbe ti regbo agu agumbapai na avidio naasakapai tipa ndu gupai i akusi gu waraga re ti ni na wai i asadihe ki bihe. Mi aapidoho na bakere ngbarago tipa ka bihe na ka tona mangasunge na ni.”

Gu waraga nga Mo Raki Nyeanye Kindi na Ngbarago! akusi vovo gene wai ka wirika Baibiri na aboro. Ono tie, anga gu re nga gu yangara kparakparapai du dagba gi buku re na agu ani aawirika Baibiri mbata kusayo na aboro na ni te. Ka si du nga mo namangasunge na gu waraga nga Mo Raki Nyeanye Kindi na Ngbarago! si nawira gupai nga mo ima bihe nga si kia ti gu du rogo aterefuni. Ani wirikinga pai ni bakerehe tipa wai i ambakadi gu buku re.

Gu Vovo Buku du Kia

Nyanyaki akpewaraga. Tipagine si aaida gipai re aida ti ni? Bange wenewene rangi asura rogo gu waraga nga Mo Raki Nyeanye Kindi na Ngbarago! ima susa 600, si ima nge kisusi wai si adu rogo gu buku nga Gini Apai Rengbe Baibiri ka Yugoho Furani? Gi vovo buku re a na dungu pusi akpewaraga rogoho—nga gu i aakenga pai rogoho watadu adunga asura rogoho ya. Agi apai du ue re naye na kpakarapai: Ho du kpewaraga ni na umba kpoto ngbaha, mo ima rengba ka bi asura ku rogo kura kpewaraga kubani. Tipa ka ne gipai re, agu awirina namangasunge rogo International Printing Department (IPD), du Wallkill yo, New York, Amerika yo aasadi angbatunga akpewaraga biama nga gu i aamangasunge na ni ti gu regbo re ba gbingbida awaraga yo. Gu Rondo Nabipa Sunge Kekeapai awisigi agu akpewaraga i aʹasadihe re ni basasa na ki sia gu ka boro arengbanga ka ngera ti ni kuba ni ya. Wa vura duhe nga gi kpewaraga re nadia marã wa bara 16 kisusi wai gu kura akpewaraga ani ninaamangasunge na ni adia marã tipa kura gaani awaraga, si nambu bawiriki Baibiri tipa ni gedapai rogo Mo Raki Nyeanye Kindi na Ngbarago! ka agu asura du rogo kura kpewaraga agbenga berãni kusayo ya.

Guhe i adiko kpotoho na ni nga gu naima du kia. Kpoto gi vovo buku re kia ti kpoto kura abuku mbiko i nadiko ho na gu ũdikohe du kia watadu guhe na banda kpotoho nga gu du kia. Kuba gupai nga i mangihe na gu ũdikohe i naamanga kpoto waraga na ni, i amangi gi vovo buku re na gu wene ũdikohe nga gu nasa gupai nga boro naabi gu sura abi wenengai du ti kpotoho. Gi he i adiko kpotoho na ni re naundo ho a tipa ka banda gi buku re ka si gberẽnga ya ka si du nga i namangasunge na ni dedede. Ono tie, gu wene ũdikohe re nadia marã wa bara bisue kisusi wai gu kura ũdikohe adia marã. Dungu agu abasunge namangasunge na awaraga ninaamangasunge na kina gu ũdikohe adianga bakere marã ya.

Tipagine ani asia agi ahe ti ni na dia bakere marã re? Gu wirina namangasunge rogo International Printing Department aya: “Ani nakpinyemu aboro mangisunge na gi buku re wenengai, sidu, ani naida kpotoho naangera wenengai ka si vura du vurũ nga boro ima mangasunge na ni ni bara dunguhe.” Eduardo, nga gu ko namangasunge na gu Biroo Nga ga Gbingbida Abuku du rogo gu be-basunge du Brazil yo aya: “Ani na bakere ngbarago ka bi wai ga Yekova riigbu amangasunge na bawene aũsunge tipa ka kusa gi bawene buku re, du na nyanyaki kpotoho, na kidu nibawene he tipa kaa mangasunge na ni, wa i amangasunge ni bawenehe na agu agamahe ani afuhe.”

Gbingbida Awaraga ti Regbo gu Ririkaza Nga Korona

Ani atona gbingbida gu waraga nga Mo Raki Nyeanye Kindi na Ngbarago! rogo Marungu 2021. Gipai re adu ti regbo gu ririkaza nga Korona, nga gu naima ye na akpakarapai. Ni sangbana gupai nga i aima kiso Betere ka i aidanga ha boro ru zegiyo ka ye ku Betere yo ya, ba gbingbida awaraga aagbianga gu undo nga ga agu abamangisunge namangasunge tipa bete auru rogo poso yo te, na gene aadunga tipa ka yamba vovo awirina tipa i ye ka mangasunge Betere yo a te. Nisangbana gipai re, gu kura aba gbingbida awaraga aadunga na aboro rogoho rengbe arengbe te, na i aima kiso gu kura aba gbingbida awaraga tipa bete regbo mbiko gu zinahe nangia ga irangbii tipa ka rugusa bete apai.

Waigu ani adibe agi akpakarapai re? Ho rengba adu ni tipa ka zaka aba gbingbida awaraga, i anaadia awirina rogo kura abasunge vuru Betere tipa i naandu kaa undo sunge ba gbingbida awaraga yo tipa bete regbo. Joel nga guko namangasunge rogo International Printing Department aya, “Gayo sino gbiati du na nyemu ka wirika vovo sunge aima saha furani taata tipa ani mangi gu sunge si aaida ani mangihe.

Wa akpakarapai avura du vurũ, ani ima gbingbida amirioni gu waraga awere nga Mo Raki Nyeanye Kindi na Ngbarago! Tipa ka kusa gi waraga re, si aaida na dungu ahe, kodihe na agu ahe i agbingbida he na ni tipa sura kuru ti waraga, guhe i adiko kpotoho na ni, kpewaraga, ime kepai, gbiati gu dada na zio he. Vuru gu bambata adiwi yo naadu bisue, i amangi sunge na adorari naima susa amirioni 2 na biata bawe akama kuriihe tipa kina aũhe gbua. Tipa ka banda marã, ani na rubangirise tipa kaa kusa kina bange agu abuku dungurati aidaha nzunzu.

“Si Nga Sunge Nga ga Bambakadi Ahe”

Waigu abayugu Ziazia Kekeapai gbiati gayo abawiriki Ziazia Kekeapai abi gi vovo ũsunge nga ga wirika Baibiri re? Paul nga wirina Australia yo aya: “Gu waraga nga Mo Raki Nyeanye Kindi na Ngbarago! ima ngba nikerehe tipa ka mangasunge na ni, si naasa re mi du na ngbarago ka wirika Ziazia Kekeapai na aboro. Bibi wai i nambakadihe ima ngba ni bawenehe na si nasa gupai nga fugodagbase du. Si na bawene apangbanga rogoho nga gu du ziazia, agu asanahe nazio ngbadu boro yo, avidio, asura, gbakigbaki kpiarago, gbiati asasa fu bawiriki Ziazia Kekeapai. Wai i ambakadi gu waraga re du nasa re mi mbakadi gimi gene yugopai.”

Bawiriki Ziazia Kekeapai Amerika yo aya: “Mi ima kpinyemu gu vovo buku re nzunzu. Agu asura du rogoho naundo re mi rugutire na memeapai. Agu avidio du rogoho nazio ngbadureyo na kini sa re mi mangipai.” Gi bawiriki Ziazia Kekeapai re nawirikapai bara ue rogo poso yo na kini ye dedede tipa agu adunguratise nga ga dungurati.

Amirioni gu waraga kindi nga Mo Raki Nyeanye Kindi na Ngbarago! nye koyo tipa i kusihe ku rogo dungu afugo. Da ku awere, Riigbu Bipasunge ima ida gupai nga i kusi gi waraga re rogo afugo du bangehe nga 710, si ima nge kisusi bara 340 kisusi wai i aidi gupai nga i kusi gu buku nangia Gini Apai Rengbe Baibiri ka Yugoho Furani?

Waigu ani agbia marã tipa kaa gbingbidaha? Vurube agu agamahe ani afuhe tipa gu sunge namanga rogo zegino duduko, i nafu badungu agi agamahe re rogo donate.jw.org. Ani na bakere tambuahe tipa gaoni toro nga ga fu gamahe, nga gu naundo rani ani kusi agu awaraga naundo na wirika Ziazia Kekeapai fu agu aboro naida ka wirikapai tipa Yekova na ki gbia ‘nyenyé unga.’—Atambuahe 22:26.