Ada Naga ku Ngbangbaturũ Yo?
Gu Karagapai nga ga Baibiri
Mbori nasia bete bange agu aKristano nga aguyo du ni ruruyo, i nazingisa yo i raka ngbangbaturũ yo. (1 Petero 1:3, 4) Nibasa kindi ko nasia yo, si naida i naandu kumbatayo kindi ka banda gayo idapase sidu ni nyanyakihe na gayo mangapai kidu ni gigirihe tipa gupai nga ka i zanganga gbia gu gayo mosoro nga ga ngbangbaturũ ya.—AEfeso 5:5; AFiripoio 3:12-14.
Ginipai agu aboro nandu ku ngbangbaturũ yo nikaa mangaha yo?
I nika mangasunge sa na Yesu ni abakindo na ni aboromotumo tipa agarã 1,000. (Yugoti 5:9, 10; 20:6) I nika du ni papara “vovo angbangbaturũ,” watadu gu zogarago du ngbangbaturũ yo, nga gu nika zogarago kurii “vovo kpotosende,” watadu kurii gu vovo rikaaboro nikaa raka auru kpotosende. Agu abazogo nika du ngbangbaturũ yo re nika undo ka sa aboro i du ni ruruyo berewe wa gu Mbori aida aboro du ti tonatonaha.—Yesaya 65:17; 2 Petero 3:13.
Aboro wai i nika zingisayo i ga ku ngbangbaturũ yo?
Baibiri nayugo gupai nga aboro 144,000 i nika zingisayo i raki ngbangbaturũ yo. (Yugoti 7:4) Rogo gu yuguyugupai du paha ni kekehe rogo Yugoti 14:1-3, gu mokedi nangia Yoane abi “Wiri Kandoro, ko ru ri gu Bagangara nga Siona, agu yo ki du na ko 144,000.” Rogo gi yuguyugupai re, “Wiri Kandoro” narukuba Yesu nga guko nazingi be kpio. (Yoane 1:29; 1 Petero 1:19) “Bagangara nga Siona” narukuba gu nyanyakipa bangiriba nga ga Yesu gbiati agu 144,000 nika zogarago na ko ngbangbaturũ yo.—Atambuahe 2:6; AEbere 12:22.
Agu aboro “i ayambu yo, du ni siasia yo” i zogorago na Yesu rogo gako Kindo, i nayamba yo nga “umba rika aboro.” (Yugoti 17:14; Ruka 12:32) Gipai re nayugo gupai nga i nika du ni umbayo ringbisihe kuti bange ga Yesu kura akandoro.—Yoane 10:16.
Iraira berãpai tipa agu aboro nandu ku ngbangbaturũ yo
Iraira berãpai: Wene aboro dunduko naga gu ngbangbaturũ yo.
Rengo: Mbori ima kidohe tipa nyenye unga auru kpotosende tipa dungu wene aboro.—Atambuahe 37:11, 29, 34.
Yesu aya: “A nga boro sa naga ku ngbangbaturũ yo te.” (Yoane 3:13) Rogo gi gene re, ko ayugu gupai nga gu wene aboro nakpiki mbata fuko, wa Abarayama, Moize, Eyobo, na Davide, aaganga ku ngbangbaturũ yo te. (Amokedi 2:29, 34) Kuba gure, i na gu maabangirise nga i nika zingisayo i raki auru kpotosende ane.—Eyobo 14:13-15.
Gu zingabekpio du ku ngbangbaturũ yo i nayambaha nga “bambata zingabekpio!” (Yugoti 20:6) Gipai re nayugo gupai nga kura zingabekpio kinaho nika manga berewe. Gu re nika manga auru kpotosende ane.
Baibiri nayugo gupai nga tii vuru gu zogarago nga ga ga Mbori Kindo, “kpio adú nga berewe te.” (Yugoti 21:3, 4) Gi kidohe re nzunzu tipa gupai nika manga auru kpotosende, mbiko aboro akpingo ngbangbaturũ yo te.
Iraira berãpai: Ai boro nasia singia ni naida ka raka ngbangbaturũ yo watadu auru kpotosende no.
Rengo: Mbori du na diaberã tipa gini ruru Kristano nika “dia gu mosoro du ti ga Mbori yambahe,” du nga gu maabangirise nga ga raka ngbangbaturũ yo. (AFiripoio 3:14) Ga boro nyemupai ho du na maapai kuriipa siayo ni te.—Matayo 20:20-23.
Iraira berãpai: Gu maabangirise nga ga raka auru kpotosende ane si na paha kusende, i nafuhe fu kina agu aboro arẽnga tipa ka raka ngbangbaturũ yo ya.
Rengo: Mbori nayamba agu aboro nika gbia nyenye unga auru kpotosende nga “gimi aboro,” “gimi siasia aboro,” na “agu aboro maku nga ga Yekova yo.” (Yesaya 65:21-23) I nika du na gu momu nga ka digiso gu ga Yekova mbakadapai nadu ti tonatonaha tipa aboro—nga i raki nyeanye kindi ni rengberengbe yo auru kpotosende.—Bambata Pai 1:28; Atambuahe 115:16; Yesaya 45:18.
Iraira berãpai: Gu bange aboro i nafura tipaha rogo Yugoti du nga 144,000, narukuba kurapai, anga ndikidi bange aboro ngaha te.
Rengo: Wa vura duhe nga gu buku nga Yugoti na anamba rogoho nga gu narukuba kurapai, gu kura anamba kinaho si namangisunge na ni nga ndikidi anamba. Ni kpiapai, si fura tipa “rimo bawe na ue nga ga agu amokedi bawe na ue nga ga Wiri Kandoro yo.” (Yugoti 21:14) Mo bingo agu agopai rengbe ka saro mo da kuti gu digisopai nga gu bange aboro nga 144,000 si naida ani bihe nga ndikidi namba aboro du.
Yugoti 7:4 ake “pa bange agu yo i anogodi he ti yo [watadu, i aidihe nga i nika raka ngbangbaturũ yo], 144,000.” Rogo agu apai nibasa ngbefuo gi veresi re, i fura tipa ue badona: “bakere rimbasa aboro, ka boro ageda nga yo wa sa ya.” Agu aboro nika ngia “bakere rimbasa aboro” nika gbia bata agbia a be Mbori. (Yugoti 7:9, 10) Ka si du nga gu bange aboro nga 144,000 narukuba kurapai kia, naida ka ya si narukuba gu badona ka i agedanga yo ya, ka si du nga wo kura aboro aberãha, gu ringbisapai du tipa bambata badona na ue he du nga na rogoyo ti ni te.a
Kurii gure, gu bange aboro nga 144,000 i nasakapai tipa yo nga “i atumo agi yo dagba aboro yo re, i du ni amakawa.” (Yugoti 14:4) Gu fugo nga “amakawa” watadu bambata zuzuhe, narukuba bete umba siasia ahe. Si nasakapai tipa gu bange aboro nika zogarago ngbangbaturũ yo na Kristo kurii agu aboro nika du auru kpotosende ka i aageda nga yo ya.—Yugoti 5:10.
a Wa kina gu re a, Gu bakere bayugupai nga Robert L. Thomas ake gupai tipa gu bange aboro nga 144,000 i nafura tipaha rogo Yugoti 7:4 ki ya: “Si nga ndikidi bange aboro ho i aringbisaha ni na gu bange aboro du rogo 7:9 nga gu ka i agedanga ha ya. Ka si dunga aboro nabihe nga si narukuba kurapai, gure nga namba ho zaatu du rogo buku si aida i bihe nga ndikidi namba nga ha te.”—Yugoti 1-7: An Exegetical Commentary, kpewaraga 474.