Agedi Gaani Awaraga Nasanahe . . .

Ya mo ruru aKristano dunduko naga ku ngbangbaturũ yo?

▪ Badungu aboro aima geda agu afugo wasa Yesu agumbaha nga: ‘Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.’ (Yoane 3:16) Ya mo gupai nadu berã Yesu yo nga ruru airisi Bako dunduko nga Yekova Mbori nika ga ku ngbangbaturũ yo ka raka yo nyeanye kindi rogo ndikidi ngbarago?

Oni bingo gupai Yesu agumbaha nga: “A nga boro sa naga ku ngbangbaturũ yo te, kina gu ko nazoro ngbangbaturũ yo, nga Wiri boro, du ngbangbaturũ yo.” (Yoane 3:13) Gipai re nayugo gupai nga gu ruru airisi Mbori nadumbata wa Noa, Abarayama, Moize, gbiati Davide, i aaganga ku ngbangbaturũ yo te. (Amokedi 2:34) Wari tie i andu kuhoni? Ka pepai niguruhe: Gi ga Mbori ruru amoyambu re, i murã yo naongoda rogo kpioyo, i ainongo pai te na i napido kina zingabekpio.​—Batungusipai 9:5, 6; Amokedi 24:15.

Yesu nangia gu bambata boro nagumba gupai nga kura aboro nika ga ku ngbangbaturũ yo fuo kpioyo. Ko aya fu gako amokedi wee, ko nika mbakada ba tipa yó ngbangbaturũ yo. (Yoane 14:2, 3) Gipai re adu nivovopai fu ga Mbori aboro. Kusa, gu mokedi nangia Pauro asakirogoyo ki ya wee, tingbafuo kpio Yesu na i ki zingisiko bekpio ku ngbangbaturũ yo, Yesu ‘ambakadi vovo gene nga ungaha tipa gako abawiriki,’ nga gu gene kura boro aandunga mbata ngbaha ya.​—AEbere 10:19, 20.

Ya mo gipai re nayugo gupai nga tona ti gu regbo re kida ku awere, ruru aboro dunduko naga ku ngbangbaturũ yo? Oó, bambiko agu aboro i azingisa yó ku ngbangbaturũ yo, i nandu ka mangasunge yo, na gu sunge re, i fuhe gbua fu bete aboro. Rogo gu yangara nyemu Yesu asungu na gako amokedi, ko aya fuyó wee i “asùnga auru ambataabakindo nisapu ngbanga” rogo gako Kindo ngbangbaturũ yo. Sidu, gayo sunge nga ka zogarago na Yesu ngbangbaturũ yo.​—Ruka 22:28-30.

Kura aboro kinaho a berewe kupati amokedi, si adu nga i nika fu gi wene sungu re fuyó. Rogo gu yugoti i ayuguhe fu gu mokedi nangia Yoane, ko abi Yesu na gu rimbasa aboro i azingisiyó bekpio na ko ngbangbaturũ yo, i aringbisipa yó wa ‘abakindo na aboromotumo nga aguyo nika zogo rago auru kpotosende.’ (Yugoti 3:21; 5:10) Bange yó adu wai? A wa si nidu tipa zogarago, kina wiri bete aboro gbua ninaazogarago. Kina gu bangisapai re a du tipa gu Kindo nga ga ngbangbaturũ. Yesu, nga gu Wiri Kandoro nga ga Mbori ru, nazogarago na agu aboro du bangeyo nga 144,000, “i atumo agi yo dagba aboro yo re.”​—Yugoti 14:1, 4, 5.

Rengo ngaha nga, 144,000 nga umba namba ka i ringbisihe kuti bange gu ruru amoyambu nadumbata na aguyo du awere. Ono si daada bangeyo du gbua nga 144,000, bambiko i nandu koyo tipa gu kparakpara sunge nga ka zogarago. Nikpiapai, ka mo aida ka dua bambu, ya mo mo dungura agu aboro dunduko inipai tipa meka bambu rogo ga dagbarago? Oó. Mo sia kina agu aboro si aida yó tipa gu sunge re. Wakina gure a, anga ruru aboro dunduko Mbori nasia yó tipa gu kparakpara momu nga ga zogarago na Kristo ngbangbaturũ yo te.

Gi zogarago nga ga ngbangbaturũ re nika digiso ga Mbori bambata ringbisapai tipa aboro. Yesu na agu aboro du bangeyo nga 144,000 nika ngerakurii sunge sa kpotosende dunduko niparadizo, nga gu ba bakere rimbasa ruru aboro nika raka rogoho na ngbarago nyeanye kindio. (Yesaya 45:18; Yugoti 21:3, 4) Gipai re nakoda agu aboro nakpiki Mbori nika zingisayo i moi idapase kuti Yesu.​—Yoane 5:28, 29.

Ruru airisi Yekova dunduko, aguyo nadumbata na aguyo du awere rengbe ka gbia gi wene gamahe nga nyenye unga re. (ARomo 6:23) Bete aboro gbua nika ga ku ngbangbaturũ yo tipa kparakpara sunge, gu bakere rimbasa aboro tigayo nika gbia nyenye unga auru kpotosende ane rogo paradizo.