Ginipai Baibiri Apehe Tipa Ngerafuo Sosono Avunguse?

Gu karagapai nga ga Baibiri

Sosono agude na gu nyanyakipa tindiro nga ga ngerafuo avungu yo wenengai. Baibiri nape gupai nga, si naida sosono agude “moi gayo pa Mbori kurogo mangimangipai yo ni ngera yo fuo gayo aborokporo, na ni mangayo agu apai avungu yo anaamangaha fuyo mbata. . . , bambiko gi ngba bangiri Mbori re.” (1 Timoteo 5:4, New International Version) Ho sosono agude angera ni fuo avunguyo ngba wene gene, gure nayugo gupai a nga, i nayugo iriso kuti gu zinahe nga ga Baibiri du tipa i yugu irisa fu avungu yo.—AEfeso 6:2, 3.

Baibiri afunga kparakpara arugapai nibipa wai agude narengbe ka ngerafuo sosono avunguyo te. Wa vura duhe wo, si na agu akpiapai rogoho nga ga agu akumba na adee naima manga gipai re. Si nafu wene arugute a rogo mangimangipai yo nga gu rengbe ka undo agu aboro nangerafuo sosono aboro.

• Waigu gu kura aboro angerefuo sosono avungu yo ti agu aregbo i ake Ziazia kekeapai ti ni?

• Gini wene arugute rogo mangimangipai yo nga gu rengbe ka undo agu aboro nangerafuo sosono aboro?

• Ya mo Baibiri nagumba gupai nga si naida agude ngerefuo sosono avunguyo kina rogo akpuyo?

Waigu gu kura aboro angerefuo sosono avungu yo ti agu aregbo i ake Ziazia kekeapai ti ni?

I amangihe ngba dungu agene ringbisihe kina kuti wai apai adu ti gu regbo re.

• Yosefa aaraka tuturũ ti gbinza bako nangia Yakobo. Ho rengba adu ni be Yosefa, ko amangi mbakadapai tipa Yakobo ye ka du mbembedi na ko. Sidu, Yosefa adua bambu fu bako, kini rigi ko na kini bandako.—Bambata Pai 45:9-11; 47:11, 12.

• Ruta aga ku rogo gu ringara nangia ga nakumbari na kini mangisunge nyanyaki tipa ka ngerafuo ri.—Ruta 1:16; 2:2, 17, 18, 23.

• Yesu, ngbutuko mbata fu ko kpi, ko asia gu boro nikaa ngerafuo nako nga Maria nga guri si awira wa ri adu ni dekurugbo ti gu regbo re.—Yoane 19:26, 27.a

Gini wene arugute rogo mangimangipai yo nga gu rengbe ka undo agu aboro nangerafuo sosono aboro?

Baibiri na wene bangua arengo rogoho nga gu rengbe na undo agu aboro nangerafuo sosono aboro, i mangipai kuti agu akpakarapai nga ga kpotose watadu ga berãseyo nga gu rengbe yo ka gbiatiyo na ni ho i angerani fuo sosono avungu yo.

• Oni irisi avunguroni.

  Gupai Baibiri agumbaha: “Mo niirisi bamo na namo.”—Gate 20:12.

  Waigu rengbe mo ka mangapai kuti gu bangua rugute re? Mo yugu irisa fu avunguro ni mbu mo gene fuyo i du na rengba ka du na pagbia kurii gayo raka wa rengbe omeyo na ni. Ka rengba duadu, mo mbu yo kina yo mangi gayo diaberã nibipa ngerafuo yo. Ti kina gu bangisa regbo re, mo yugo irisa fuyo ni manga mo ai gupai rengbe ome ro na ni ka ngerafuoyo.

• Mo du ni gu boro nagia rogopai yo agia na kini mbupai.

  Gupai Baibiri agumbaha: “Wene berã namanga boro ni du ni bayee ni tipa zinga, ngba ha angba ti ni ka mbu pa tiandika.”—Asanza 19:11.

  Waigu rengbe mo ka mangapai kuti gu Bangua arugute re? Ka sidu nga sosono vunguro gumba gupai angbanga ya, watadu gu nangera wa ni ayugongo tambuahe tipa gu undo mo afuhe te, mo sananga tiro nga, ‘Waigu ka mi nidu ka si ni du nga mi du du apai tipa re wa gu du tipa ni re na mi du du rogo gu gberãrago du ni rogoho?’ Ka si du nga mo ni gu boro nagia rogopai yo na kini mbupai mo ima rengba ka ne sa gbegberẽpai si gberẽ berewe ki susi.

• Mo fura na gu kura aboro.

  Gupai Baibiri agumbaha: “Yo adu nga rugapai ni ya, apai yo na kina gberãrago, ono bambiko rimbasa aboro rondo apai ni nyakasinyakasi he wenengaĩ.” —Asanza 15:22.

  Waigu rengbe mo ka mangapai kuti gu bangua rugute re? Mo mangi wetekapai tipa wai rengbe mo ka mangapai kuti gu kpakarapai nga ga kpotose avunguro narengbe ka du na ni. Mo gbata agu aba nga gu du rogo gamo dagbarago nga gu rengbe ka undo na pa ngerafuo yo. Mo fura na agu aboro nga aguyo nangerafuo sosono avunguyo. Ka sidu nga gu kura awirinamo kina ti ni, oni mangi dunguratise nga ga aborokporo ka sakapai tipa agu azingo nga ga avungu roni, wai ka ngerafuoyo, na wai ka kparaka gu tindiro nga ga ngerafuo yo.

  

• Mo du na ruru bipai.

  Gupai Baibiri agumbaha: “Tatamana du fu agu yo du ni bayee yo.”—Asanza 11:2.

  Waigu rengbe mo ka mangapai kuti gu bangua arugute re? Mo ini pa agu apai nga gu adunga mo na rengba ka mangaha ya. Ni kpiapai, aboro dunduko du na kina wiri bete regbo beyo gbua gbiati ome. Gi zanga rengba na pai re ima rengba ka du na maapai kuri wai rengbe mo nzunzu ka ngerafuo avunguro. Ka sidu nga gu tindiro nga ga ngerafuo sosono avunguro ima asada ka fu rii omero, mo asadi ka gbia undo be gu kura agume watadu gu kura wene abawirikipai tipa gipai re.

• Mo ningere angerafuo tiro.

  Gupai Baibiri agumbaha: “A nga boro sa nasoga boroni te, kina mbu ti ni na banda ha.”—AEfeso 5:29.

  Waigu rengbe mo ka mangapai kuti gu bangua arugute re? Wa vura duhe nga mo na gu tindiro bero nga ga ngerafuo avunguro, si naida aida a mo ngerefuo agu azingo nga ga gamo aborokporo ka si du nga mo ima manga rogatise. Si naida mo ni rihe wenengai. Si ni kaa ida mo ongodi wenengai na kini ra wenengai. (Batungusipai 4:6) Na si naida mo ongodi ho du rengba ni. Ka mo mangi agi apai re, mo nika du zezeredi berãro yo na ti kpotoro tipa ka ngerafuo avunguro wenengai.

Ya mo Baibiri nagumba gupai nga si naida agude ngerefuo sosono avunguyo kina rogo akpuyo?

Baibiri afunga kparakpara arugapai nibipa wai si aida agude naangerafuo avungu yo te. Gu kura bete rii akporo nasia ka mbu sosono avunguyo kina kporo da kuti gu bagizo regbo nika da. Ringbisihe kuti gupai du tipa avunguyo, gu kura agude ima rengba ka sia, ka ndu na avunguyo kurogo gu ba i angerafuo sosono aboro rogoho. Aborokporo ima rengba ka manga dunguratise tipa ka diaberã tipa ginipai nika du ni wenehe tipa agu aboro dunduko gipai re abiyo.—AGaratio 6:4, 5.