Oni Naandu Kindi Kumbatayo Kaa Pekafuo ga Yekova Ngbembatayo

1. Tipagine ani aida na ga Yekova ngbembatayo ti ni? Oni funga kpiapai.

MO BERẼNGA gupai nga mo ingi ngbakungbo yo. Rago ima kpakara yo bambiko anya rinde kina yo, gu kurukuru ahe du na siimi ti ni, na kerekere agbiro. Mo ima rengba a ka ti kurogo adue. Mo ima rengba kadu na ngbarago ka si dunga boro kinaho niima ino gu rago re wenengai na nga gu boro naima ino gu ba du kerepai rogoho na ni ki undo ro ka mo gbianga tiro na ni ya! Gi zegino re wakina gu ngbakungbo re. Si ima hi be dungu kereapai nga gu niima rengba ka gbarasa gaani pabakure na Yekova. Ono ani na rengberengbe Bangbembatayo nga​—Yekova. Ko nadia rani kusayo ti kerepai na kini ngbe furani kumbatayo ku rogo gu ba ani andu ku rogoho nga​—ka gbia nyenye unga rogo vovo zegino.

2. Waigu Yekova angbe furani kumbatayo?

² Waigu Yekova angbe furani kumbatayo? Gu bambata gene ko angbe furani kumbatayo ngbaha nga, vurube Fugoko nga Baibiri. Wa vura duhe wo, ko namangasunge amanga a na aboro tipa ka ngbe kumbatayo furani. Ni kpiapai, ko namangasunge na ‘ruru kangara moyambu’ tipa kaa fu agu ariahe furani nga ga toro nga gu naundo rani ani nimangi agu adiaberã nga ga tatamana. (Mt. 24:45) Yekova namangasunge amanga a na gu kura akumba naima rẽ tipa i ngbe furani kumbatayo. Ni kpiapai, ababi adungurati na abaakumba rogo dungurati nafu angarasa ro na arugapai nga gu rengbe ka undo rani ani susi kidu na diabese be akpakarapai. Ani na bakere tambuahe nga Yekova nangbe furani kumbatayo wenengai ti gi kere aregbo re mbata fu digidoho da! Gipai re naundo rani ani nye ni abakurea Yekova wa ka ani gbia ngbarago awere rogo raka yo na kumbatayo nyeanye kindi.

3. Gini apai ani nika sakapai tipaha rogo gi kekeapai re?

³ Ono ti kura aregbo, si ima rengba kadu furani ni kpakarakpakaraha ani pekefuo ga Yekova arugapai, gbe, ka si dunga kpakpa aboro du nafuhe furani. Tipagine? Si rengbe kadu nga gu rugapai i nafuhe re nga gupai ani aida ka giaha te. Watadu ani rengbe ka bihe nga gu rugute i nafuhe re, si nipa tatamana te na ani ki da kuti gu digisopai nga gu rugute re ayengo be Yekova te. Ti ngbatunga aregbo wa gure, si naida ani du na gu kido nga Yekova du nangbe kumbatayo fu gako aboro, na pekafuo gako arugapai naye na dungu amaku. Tipa ka undo rani ani nyakasi gaani kido, gi kekeapai re nika sakapai tipa (1) wai Yekova angbe kumbatayo fu gako aboro ti gu regbo i aake Baibiri ti ni, (2) wai ko angbe kumbatayo areme furani, na (3) wai ani agbia undo ho ani anye ni kaa pekafuo gako ngbembatayo.

WAI YEKOVA ANGBEMBATAYO FU GU RIKAABORO NANGIA AYISARAERE

4-5. Waigu Yekova ayuguhe nga ko aamangasunge na Moize tipa ka ngbembatayo fu aYisaraere? (Oni bi gu sura duti kpotoho.)

⁴ Yekova asia Moize tipa ko ngbe kumbatayo ka kusa awiri aYisaraere Ezipeta yo. Na ko afu ndikidi gopai fu aYisaraere tipa ka yugo gupai nga Ko aangbe fuyo kumbatayo vurube Moize. Ni kpiapai, Ko afu bakamikami dubo naangbe fuyo kumbatayo uru na bakamikami we tipa si nahasa rago fuyo yuru. (Gate 13:21) Moize apekefuo gu bakamikami dubo re, nga gu nangbe fuko na aYisaraere ku Zamba Baime yo. Ono aEzipeto adofuo aYisaraere. Sidu, aYisaraere adu na bakere gunde bambiko i aberẽ gupai nga aEzipeto nika imo yo. I ada kuti gu digisopai nga Moize du nangia ingahe naye na yo ku Zamba Baime yo. Ono ingahe nangiaha te. Yekova du nasia Moize ko ngbe kumbatayo fu gako aboro. (Gate 14:2) Sidu, Mbori abatasi yo ngba iiriwo gene.​—Gate 14:26-28.

⁵ Tingbafuo agarã 40 fuo gure, Moize aandu kumbatayo kindi kaa pekafuo gu bakamikami dubo Yekova aamangasunge na ni kaa ngbe fu gako aboro ngbakungbo yo.a Tipa bete regbo, Yekova anaamaa bakamikami dubo pangba ga Moize ngbadimo nga gu ba aYisaraere dunduko arengbe arengba ni ka bihe. (Gate 33:7, 9, 10) Yekova anaafura na Moize rogo bakamikami dubo, nga gu ko nanaape gupai Yekova anaapehe fu aYisaraere. (Tam. 99:7) AYisaraere aima bi gu gopai nzunzu naayugoho nga Yekova aamangasunge na Moize tipa ka ngbe fuyo kumbatayo.

6. Waigu aYisaraere amangipai kuti gu ngbembatayo nangia ga Yekova? (Pa Geda Aboro 14:2, 10, 11)

⁶ Si nipa gberãrago nga, badungu aYisaraere aima ká gu gopai naayugoho nga Yekova aamangasunge na Moize kaa ngbembatayo fu yo. (Oni gedi Pa Geda Aboro 14:2, 10, 11.) Bara dunguhe, i aká gupai nga, Yekova aamangasunge na Moize ko naangbe fuyo kumbatayo. Ni sangbanaha, Yekova aaidanga ha fu gu rikaaboro nangia aYisaraere re i rimi ku rogo Ringara Mokido te.​—Geda 14:30.

7. Oni funga kpiapai nga ga agu aboro napekefuo ga Yekova ngbembatayo. (Pa Geda Aboro 14:24) (Oni bi sura a.)

⁷ Wa si avura duwo, kura aYisaraere aima pekafuo ga Yekova ngbembatayo. Ni kpiapai, Yekova ape gupai nga: “Kareba . . . ki nipeke re na kpotoko yo dunduko.” (Oni gedi Pa Geda Aboro 14:24.) Mbori afu mosoro fu Kareba na zavura ki idihe fuko ko sia wari ko aaida ka raka ni rogo Ringara Mokido. (Yos. 14:12-14) Agu aYisaraere i aidihe fuyo i rimi ku rogo Ringara Mokido amoi wene kpiapai a nga ga pekafuo ga Yekova ngbembatayo. Ho i amoi Yosua ni ni bangbembatayo kurii aYisaraere kuba Moize, i ‘agunde ti ko, ti gako arame dunduko.’ (Yos. 4:14) Ni sangbanaha, Yekova afu maku fuyo nindu ko na yo ku rogo gu ringara ko akido paha.​—Yos. 21:43, 44.

8. Oni sakingo pai tipa wai Yekova aangbembatayo fu gako aboro ti regbo abakindo. (Oni bi sura a.)

⁸ Tingbafuo agarã kusa, Yekova asia abasapungbanga tipa i naangbembatayo fu gako aboro. Tingbafuo gure, ti regbo abakindo, Yekova asia anebi tipa i naangbembatayo fu gako aboro. Agu abakindo nadu ni ruruyo aapekafuo gu rugute nangia ga anebi. Ni kpiapai, Bakindo Davide aidi gu rugute gu nebi nangia Natana afuhe fuko. (2 Sam. 12:7, 13; 1 Peka 17:3, 4) Bakindo Yosafata apekefuo gu rugapai gu nebi nangia Yaziere afuhe na ki ngarasi agu aboro nadu Yuda yo tipa i “idi pa ga [Mbori] anebi.” (2 Peka 20:14, 15, 20) Ho Bakindo Izikiya adu ni rogo bakere gberãrago, ko asana gu nebi nangia Yesaya tipa undo. (Yes. 37:1-6) Agu aregbo dunduko abakindo anaapekafuo ga Yekova ngbembatayo, i anaagbia maku na gu rikaaboro re kidu ni bandabanda yo. (2 Peka 20:29, 30; 32:22) Aboro dunduko si aima rengba ka du fuyo gbaiga nga Yekova namangasunge na anebi tipa ka ngbembatayo fu gako aboro. Wa si avura duwo, badungu abakindo na kura aboro aima ká ga Yekova anebi.​—Yere. 35:12-15.

WAI YEKOVA ANGBEMBATAYO FU AGU AKRISTANO NADU MBATA

9. Da Yekova amangisunge na ni ka ngbe kumbatayo rogo bambata sa kama agarã? (Oni bi sura a.)

⁹ Rogo bambata sa kama agarã Fuo Batikayo Kristo, Yekova asigira gu dungurati nga ga aKristano. Waigu ko aangbembatayo fu agu aKristano nadu mbata re? Ko amoi Yesu ni rii kanisa. (Ef. 5:23) Ono Yesu aapenga gupai fu gako abawiriki dunduko ni basasa si aida i mangihe te. Ko amangisunge na amokedi gbiati agu abaakumba nadu Yerusarema yo i naangbembatayo rogo apai. (Amo. 15:1, 2) Berewe a, i asia abaakumba tipa i naangbembatayo rogo adungurati.​—1 Tesa. 5:12; Tito 1:5.

10. (a) Waigu dungu agu aKristano nadu rogo bambata sa kama agarã amangipai kuti gu rugapai i agbiaha? (Amokedi 15:30, 31) (b) Tipagine kura aboro ti agu aregbo i aake Baibiri ti ni aká agu aboro ti ni Yekova aamangasunge na yo i naangbembatayo? (Oni bi gu sanduki nga, “Gu Ndupai Kura Aboro Naká Ndikidi Gopai Ti Ni.”)

¹⁰ Waigu agu aKristano nadu rogo bambata sa kama agarã amangipai? Badunguyo adu na bakere ngbarago ka pekafuo agu arugapai i agbiaha. Ni rengo, “rago ki ngba ti yo mbiko gu pa wasa” i afuhe fuyo. (Oni gedi Amokedi 15:30, 31.) Waigu tie Yekova angbembatayo fu gako aboro ti gi gaani regbo re?

WAI YEKOVA ANGBE FURANI KUMBATAYO AREME

11. Oni funga gu kpiapai nayugopa wai Yekova angbembatayo fu agu aboro nangbembatayo rogo apai yo ti gi gaani regbo re.

¹¹ Yekova nangbe kumbatayo kindi fu gako aboro areme. Ko aima digo nimangihe wo vurube Fugoko na Wiriko nga rii dungurati. Ya mo ani rengbe ka bi gu gopai a nayugoho nga Yekova nandu kumbatayo kindi kaa mangasunge na aboro ti gi gaani regbo re? Ii. Ni kpiapai, oni berẽnga pa gupai namangi tingbafuo gu garã nangia 1870. Charles Taze Russell na abakureako atona ka rugatiyo na gupai nga gu garã nangia 1914 nika ngia nyanyakipa garã tipa ga Mbori Kindo. (Dan. 4:25, 26) I aini gipai re mbiko i amangi wetekapai rogo Baibiri yo na kidu na gu kido nga i nika bi gaha sangbaanebi abi si ni digisitihe. Ya mo Yekova angbe fuyo kumbatayo na gayo wetekapai rogo Baibiri yo? Zanga kapa, ko aima ngbe kumbatayo fuyo. Rogo 1914, agu apai naamanga rogo zegino aima yugoho nga ga Mbori Kindo ima tona zogarago. Bambata Vura Nga ga Zegino amangi, na agberãngbi ki tona kaa manga, abazigizo, na angbongi. (Rk. 21:10, 11) Yekova aamangasunge amanga nzunzu na agu akumba nangia aKristano re tipa ka undo gako aboro.

12-13. Ginipai agu awirina nangbembatayo rogo apai yo amangihe ti regbo gu Ue Vura Nga ga Zegino tipa ka kiiso sunge tungusapai?

¹² Oni bingo gupai a namangi ti regbo gu Ue Vura Nga ga Zegino. Agu awirina naangbembatayo rogo rii-basunge nga ga zegino awisigi Yugoti 17:8. Ringbisihe kuti gayo wisigopai, i arugutiyo na gupai nga gu Ue Vura Nga ga Zegino nika ndu kuti Aramegido te. Sidu, i aima ino gupai nga zereda nika duadu tingbafuo gu vura re nga gu aDezire Yekova naima rengba ka tungusapai fu dungu aboro rogoho. Wa vura duhe nga gipai re aangeranga wa rengo ti gu regbo re te, agu awirina naangbembatayo atona gu sukuru nga Girada tipa ka fu rabahe fu amokedi nibipa wai ka tungusapai na ka yugopai rogo zegino dunduko. I aima keda amokedi zavura ti regbo vura. Kurigure, ruru kangara moyambu atona manga kparakpara sukuru nangia Wirikapai Tipa Manga gu Sunge Tungusapai Nga ga Siokrasiab tipa ka raba aboro dunduko rogo adungurati tipa i du ni wene abatungusipai na abayugupai. Ngba agi agene re, ga Mbori aboro aambakadatiyo tipa gu sunge tungusapai naadu kumbatayo.

¹³ Areme, ani ima rengba ka bi gupai ziazia nga, Yekova aangbembatayo fu gako aboro ti kpakarakpakara aregbo. Natona ti regbo gu Ue Vura Nga ga Zegino, ga Yekova aboro aima du na ranirii ka tungusapai rogo dungu aringara. Nirengo, badungu aboro ima ye ka ino Yekova, na gako amoyambu natungusapai rogo zegino dunduko.

14. Tipagine rengbe ani kadu na kido ti ni kuti agu arugapai naye be ga Yekova riigbu na be agu abaakumba i nasia yo afuhe? (Yugoti 2:1) (Oni bi sura a.)

¹⁴ Areme, agu awirina du rogo Riigbu Bipasunge nandu kindi kumbatayo kaa ngera tipa gu ngbembatayo nga ga Kristo. I naida agu arugapai i afuhe fu awirinayo yugu gu gene Mbori gbiati Kristo abi apai ngbaha. Na i namangasunge na ababi adungurati gbiati abaakumba tipa kaa fu arugapai fu adungurati.c Agu abaakumba nga mbedimbedi aKristano kodihe na agu abaakumba du rogo adungurati rogo “kumbabe” Kristo yo. (Oni gedi Yugoti 2:1.) Kina rengo ngaha nga, agi abaakumba re nga kpakpa aboro na i namanga aingahe amanga. AMoize na Yosua aima manga aingahe ti kura aregbo kina wai amokedi amangihe. (Geda 20:12; Yos. 9:14, 15; Rom. 3:23) Ono ani ima rengba ka bi gupai ziazia nga, Yesu nangbembatayo fu ruru kangara moyambu na agu abaakumba ga Mbori toro asia yo, na ko nikaa mangaha wo kindi “ti arago dũ, ki da ti digida zegino.” (Mt. 28:20) Sidu tie, ani na nduapai dunduko berani tipa kadu na kido kuti gu ngbembatayo ko afuhe furani vurube agu aboro ko naasia yo i naangbembatayo.

ANI NAGBIA UNDO HO ANI AKA NI KUTI PEKAFUO GA YEKOVA NGBEMBATAYO

15-16. Ginipai mo nawirikihe ti agu akpiapai nga ga agu aboro napekefuo gu ngbembatayo nga ga Yekova?

¹⁵ Ho ani anye ni kaa pekafuo ga Yekova ngbembatayo, ani nagbia badungu amaku zavura kina awere. Ni kpiapai, Andy na Rosed amangipai kuti gu rugapai naye be ruru kangara moyambu. (Mt. 6:22) Ni sangbana gipai re, i adu na rengba ka undo na meka aBambu Kindo gbiati kura abambu nga ga aDezire Yekova. Rose ape gupai nga: “Ti kura regbo, ani araki rogo tooni abambu nga gu ba aadunga rogoho tipa manga riahe ya. Na mi abagi badungu akamera na agu ahe i adia sura na ni wa si avura du nga mi aima kpinyemu dia asura. Mi akpari niaume ho mi abagihe ni. Ono wakina dia Abarayama nangia Sara, mi adiberã ka zanga du na gberãrago tipa agu apai mi ambu paha na kadu na ngbarago tipa agu apai rengbe mi ka mangaha fu Yekova awere.” (Eb. 11:15) Waigu Andy gbiati Rose agbia undo? Rose ape gupai nga: “Ani na bakere ngbarago mbiko gupai nga ani nafu agu ahe dunduko fu Yekova du berani. Ho mi na kumbami amanga gu sunge ni Yekova afuhe furani ani mangihe, ani na bi kpia wai raka nika du rogo vovo zegino.” Andy aidi kuti gupai re na ki pe gupai nga: “Ani na bakere ngbarago mbiko gupai nga ani nafu gaani regbo na ome ka manga ga Yekova sunge.”

¹⁶ Gini kura gene berewe ani agbia undo ngbaha ho ani apekafuo ga Yekova ngbembatayo ni? Marcia ape gupai nga, tingbafuo mi nyasi sinia (secondaire), mi aidi ka pekafuo gu rugapai mi agbiaha ka tona mangasunge abazakigene. (Mt. 6:33; Rom. 12:11) Ri ape gupai nga: “Mi aima rengba ka wirikapai gbua yunivasiti yo tipa agarã biama. Ono mi aaida ka mangasunge ni bakerehe fu Yekova. Sidu, kuba gupai nga mi idi ka wirikapai yunivasiti yo gbua, mi asia ka wirika wai ka baga ahe nga gu narengbe ka undo re mi gbia gu marã rengbe arengba tipa wa ka mi mangisunge abazakigene. Gure angia bawene diaberã sa dagba agu adiaberã yo mi amangihe. Mi awere nga gu nazakigene du na ngbarago, na wa duhe nga mi ima rengba ka diaberã tipa bakio wai mi nika mangasunge, mi na rengba awere ka undo na sunge Betere yo na ka manga kura dungu weneapai fu Yekova.”

17. Gini kura amaku ani agbiaha ho ani andu ni kindi kumbatayo kaa pekafuo ga Yekova ngbembatayo? (Yesaya 48:17, 18)

¹⁷ Ti kura aregbo, ani nagbia arugapai be ga Yekova riigbu nga gu rengbe ka banda rani. Ni kpiapai, i naza rani tipa kpinyemu marã na tipa manga agu apai nga gu rengbe ka ndu na ani tipa ani kuo ga Mbori aNdiko. Rogo agu abangiriba re, ani nagbia undo ho ani apekafuo ga Yekova ngbembatayo ni. Ani nabanda gigiri sangbakpotoseyo na kini ne agu apai rengbe ka ye na dungu akpakarapai furani. (1 Tim. 6:9, 10) Ni sangbaha, ani ima rengba ka iriso Yekova na ngbaduraniyo dunduko, nga gu naye na bakere ngbarago furani, zereda, gbiati rengbabepai.​—Oni gedi Yesaya 48:17, 18.

18. Tipagine mo nadiberã ti ni kaa pekafuo ga Yekova ngbembatayo?

¹⁸ Zanga kapa, Yekova nikaa ndu kindi kumbatayo kaa mangasunge na wiri aboro tipa i ngbe kumbatayo ti regbo bakere gberãngbi na ti regbo Zogarago Tipa Agarã Kutu. (Tam. 45:16) Ya mo ani anye kaa pekafuo gu rugapai re zavura ho apai nikaa dunga ni wagu ani aidaha ya? Si rengbe kadu taata ani pekefuo gu rugapai re ka si dunga ani napekafuo gu ga Yekova ngbembatayo du awere. Sidu tie, ani naapekanga fuo ga Yekova arugapai ti aregbo dunduko, kodihe na gu rugapai naye be agu akumba i nasia yo i naangera kurii rani. (Yes. 32:1, 2; Eb. 13:17) Wa ani kaa mangaha wo, ani nika du na ndu apai berani dunduko tipa ka kido kuti gaani Bangbembatayo nga Yekova, nga gu ko nadia rani kusayo ti gupai rengbe ka gbarasa gaani pabakure na ko na kini ndu na ani kurogo gu ba ani andu ku rogoho nga​—ka gbia nyenye unga rogo vovo zegino.