Ani Nisarani Te

1-2. (a) Tipagine rengbe ani ka ya ti ni wẽ, ani nisarani te ho ani agbiatirani ni na aˈasada? (b) Ginipai ani nika sakapai tipaha rogo gi kekeapai re?

HO ANI agbiatirani ni na akpakarapai, ani ima rengba kaa bi tirani wa ani rogo kere ngbakungbo na ka gene adunga berani wa ka ani kuru rogoho ya. Ono tie, anga ani namangapai kuti gu asada re nisarani te. Gu Barani du ngbangbaturũ yo nabi agu akpakarapai abi ani asusa rogoyo na ko nakidohe nga ko nika undo rani aundo. Rogo nyemuse yo, Yekova nakido rani nga: “Mi aúnda ro.”​—Yes. 41:10.

² Gi kekeapai re nika sakapai tipa wai Yekova aundo rani (1) ni ngbe ko furani kumbatayo, (2) nifu ko agu ahe furani ani aidaha, (3) ni banda ko rani, na (4) ni fuko wasa furani. Yekova nakido rani nga, ka ani vura kaa gbiatirani na kina gini kpakarapai rogo raka yo, bangiriko agonga tirani te. Ko ambunga rani te. Sidu, ani nisarani te.

YEKOVA NANGBE FURANI KUMBATAYO

3-4. Waigu Yekova angbe furani kumbatayo? (Atambuahe 48:14)

³ Oni gedi Atambuahe 48:14. Yekova ima ino gupai nga ka ani ngbenga kumbatayo fu tirani te, si naida ko ngbembatayo furani. Waigu ko angbe kumbatayo areme fu gako ruru amoyambu? Gene sa ko amanga gipai re ngbaha nga vurube Fugoko nga Baibiri. (Tam. 119:105) Vurube Fugo Yekova nga gu gako toro adu kugii pa kehe, ko naundo rani ani mangi wene adiaberã na ki sonosi agu asino nga gu nika sarani ani gbia ngbarago awere na nyenye unga kumbatayo.a Ni kpiapai, ko nayugopai furani tipa ani mbupai fu akuarani na ki zanga du nazinga na yo, ani naagumba rengo rogo agu apai yo dunduko ani amangaha, na ani kpinyemu kura aboro kina boro ngbadurani yo. (Tam. 37:8; Eb. 13:18; 1 Pet. 1:22) Ho ani ayugo agi asinombori re ni, ani nada ni wene avunguagude, wene abadiarogatise, na wene abakure.

⁴ Rogo Baibiri yo, Yekova napeka pangbanga yo nga ga agu aboro naadu rogo aˈasada na apai adu tipa yo wakina gaani. (1 Kor. 10:13; Yak. 5:17) Ho ani agedapai ni tipa gu raka nangia ga agi aboro re na kini mangi agu apai rogo gaani raka yo ani awirikaha, ani nagbia undo rogo agene ue. Ni bambataha, ani naye ka ino gupai nga ani nisarani te​—gu kura aboro aima gbiatiyo na kina ngbatunga agu akpakarapai re na ki hipai kidu na diabese. (1 Pet. 5:9) Ni uehe, ani nawirika gupai rengbe ka undo rani ani hi gaani akpakarapai na ngbarago.​—Rom. 15:4.

5. Ada Yekova amangasunge na yo tipa i undo rani ngbagene unga?

⁵ Yekova namangasunge a na awirinarani aidipase tipa i undo rani.b Ni kpiapai, ababi adungurati ninaabiko adungurati dedede tipa kaa ngarasa rani. Gayo agumbapai nanyakasa gaani idapase na kini undo rani ani du ni kodikodi rani. (Amo. 15:40–16:5) Abaakumba a namangasunge nyanyaki tipa ka undo rani nibasasa ani nye mbembedi na Yekova. (1 Pet. 5:2, 3) Avunguagude nayugopai fu awiriyo a tipa i kpinyemu Yekova, kini mangi agu adiaberã du na tatamana na kidu na wene asino. (Snz. 22:6) Na agu awirina nga adee naima nyaka rogo toro yo naundo gu paranga awirina nga adee nimaa yo wene kpiapai, kini fu agu arugapai du ni wenehe na kini fu ngarasaro.​—Tito 2:3-5.

6. Ginipai si aida ani mangihe tipa ka gbia undo ti ga Yekova arugute?

⁶ Yekova ima fu agu ahe furani dunduko si aidaha tipa ani mangi wene adiaberã na kidu na ngbarago rogo raka yo. Waigu rengbe ani ka yugoho nga ani na tambuahe tipa agu apai ko namangihe furani? Asanza 3:5, 6 naya: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya.” Ho ani amangaha ni wo, ‘ko arúga gaani apai furani nzunzu,’ du rogoyo nga ko nika undo rani ani ne dungu akpakarapai na ki raki gu raka du na ngbarago. Ani na bakere ngbarago nga Yekova ima ino rani wenengai na ko ima kpinyemu rani ni bakerehe si du ko afu agu arugute ti ni furani dunduko nga gu ani aidaha nibasasa!​—Tam. 32:8.

YEKOVA NAFU GUHE FURANI ANI AIDAHA

7. Gini bete agene duho Yekova agamahe furani ngbaha? (AFiripoio 4:19)

⁷ Oni gedi AFiripoio 4:19. Kupati gupai nga Yekova naangbe furani kumbatayo rogo toro yo, ko nafu maku a kurii gu ome ani amangaha tipa ka gbia riahe, roko, na gu ba ka ani raki rogoho. (Mt. 6:33; 2 Tesa. 3:12) Gbegberẽpai ho tipa kaa bakabangirani tipa wai ani nika gbia agi ahe re te. Ono Yekova aidanga ani naabakabangirani ni bakerehe tipa agi ahe re te. Tipagine? Bambiko Barani arengbanga ka mbu ruru airisiko ti regbo kpakarapai te. (Mt. 6:8; Eb. 13:5) Ani ima rengba ka kido kutiko na ngbadurani yo dunduko ho ko aya ni wẽ ko nika ngerafuo gaani azingo.

8. Ginipai Yekova amangihe fu Davide?

⁸ Oni berẽnga pa wai Yekova aundo Davide. Ti gu kpakarakpakara agarã Davide azubo be Bakindo Saura, Yekova afu agu ahe Davide na gako akumba aaidaha tipa ka raka. Ho Davide aberẽ ni kurii wai Yekova angerefuo ko ti gu regbo re, ko aya: “Mi adu mbata ni parangare, mi gbinza awere; ono mi ata bi nga ruru boro i nambu ni te, na ngbatungani i nio riahe a te.” (Tam. 37:25) Wakina Davide, si nawira wa mo aima bi Yekova ko ni ngerefuo ro watadu awirina ti kpakarakpakara aregbo.

9. Waigu Yekova angerafuo gako aboro areme ti regbo gberãngo? (Oni bi asura a.)

⁹ Yekova nangera angera a fuo gako aboro ti regbo gberãngo. Ni kpiapai, ti gu regbo zingo riahe adu rogo bambata sa kama agarã, aKristano rogo kura arago akedi ariahe fu agu awirinayo naadu rogo zingo. (Amo. 11:27-30; Rom. 15:25, 26) Ga Mbori aboro areme a naundo awirinayo ho du yo ni rogo zingo. Ho gberãngo amanga ni, Yekova nafõngbadu gako aboro yo tipa i fu agu ahe fu awirinayo i azingo tipaha wa gu nga riahe, ime, roko, na dawa fu agu awirina du rogo gu dagbarago gberãngo namangi rogoho. Agu awirina namangasunge meka arago nambakada agu akporo na aBambu Kindo paha nagberẽ. Na ga Yekova amoyambu regerege tipa ka fu wasa rogo Baibiri yo fu agu aboro zanga gayo akporo watadu agumeyo rogo kpio yo.c

10-11. Ginipai mo awirikaha ti gu kpiapai nga ga Borys?

¹⁰ Yekova nafuhe esuesu a fu agu aboro ata tonanga irisoko ya. Ani nawirika Yekova na kini gbata gene tipa kadu na nunga koyo du agu aboro ni airisongo ko ya. (Gara. 6:10) Ho ani amanga gipai re ni, ani ima rengba ka undo yo i wiriki dungu apai tipa rani na tipa Yekova. Oni bingo gu kpiapai nga ga Borys nga gu ko naraka Ukraine yo, na kidu ni bangerekurii abayugupai sukuru yo. Wa vura duhe nga Borys nga Dezire Yekova te, ko namangapai na awiri aDezire Yekova rogo nunga yo na kidu na irisa tipa gayo aida. Mbiko vura, ko adiberã ka zubo rogo gu gbaria ko aaraka rogoho na ki ndu kurogo gu papara ringara adunga vura rogoho ya, na awirinarani aundo ko yo. Kusa, Borys andu tipa Tingida Pakpio Kristo. Ho Borys aberã ni kurii agu apai dunduko awirina amangihe fuko, ko aya: “ADezire Yekova ayugu nunga fere na ki ngerefuo re wenengai. Mi na bakere tambuahe fu aDezire Yekova.”

¹¹ Ani dunduko naima rengba ka wirika gu Barani du ngbangbaturũ yo nga boro inapai niyugo ani nyemuse fu agu aboro du rogo zingo singia i na ani rogo idapase yo watadu i na ani te. (Rk. 6:31, 36) Ani namaabangirani nga gu nyemuse ani ayugoho fuyo nika sa yo i du na nyemu ka wirikapai tipa Yekova na ki tona ka irisoko na ani wa sa. (1 Pet. 2:12) Singia i sia ka iriso Yekova watadu i asianga ka irisoko te, ani nika du na ngbarago bambiko “fu he ngba ti dia ha.”​—Amo. 20:35.

YEKOVA NABANDA RANI

12. Gini ngbatunga bandahe Yekova akidopaha fu gako aboro wangia yo badona? (Atambuahe 91:1, 2, 14)

¹² Oni gedi Atambuahe 91:1, 2, 14. Areme, Yekova nakidohe nga ko nika banda gako aboro abanda be ai guhe rengbe ka gbarasi gayo pabakure na ko. Ko ambunga gene fu Satana ko rugusi aboro ti iriso Ko ngba gu gene Ko aidaha te. (Yo. 17:15) Na ho “bakere gberãngbi” nika tona ni, ani ima rengba kadu na gu kido nga Yekova nika digiso gako kidohe adigiso tipa banda gako aboro angianga kina rogo toro yo sa ya ono rogo borose yo a.​—Yugo. 7:9, 14.

13. Ngba gini agene Yekova abanda rani wa du ani ni basasa?

¹³ Waigu Yekova abanda rani wadu ani nibasasa? Yekova ima fu Baibiri furani nga gu naundo rani tipa ani ini gupai nga ruruhe na gu nga irairaha. (Eb. 5:14) Ho ani amangapai ni kuti gupai ani awirikaha rogo Baibiri yo, ani nabanda gaani pagume na Yekova na kini mangi agu adiaberã du ni wenehe nga gu nasarani ani du na ngbarago na gaani raka kidu wenengai. (Tam. 91:4) Na kupati gure a, Yekova ima fu dungurati furani nga gu naundo rani tipa ani nye niruru rani. (Yes. 32:1, 2) Awirinarani rogo dungurati ima kpinyemu Yekova na i nagiasangba ko agia. Ho ani adia regbo ni na yo ba adunguratise yo, gene tungusapai yo, na ti regbo gbia ngbarago, i nangarasa rani na kini undo rani ani zanga manga gupai du ni gbegberẽhe.​—Snz. 13:20.

14. (a) Tipagine Yekova abatasanga rani ti ni be aˈasada dunduko ya? (b) Ginipai Atambuahe 9:10 akido rani na paha? (Oni bi rukutu kekeapai a.)

¹⁴ Bakuru kusayo, Yekova ti kura aregbo anaabanda gako aboro abanda be kerepai watadu kpio. Ono tie, anga aregbo dunduko ko anaamangaha wo te. Baibiri nayugo gupai nga gu kura regbo kinaho gupai du ni gbegberẽhe narengbe ka manga ai boro. (Batu. 9:11) Na berewe a, Yekova aima mbu gako amoyambu i gbiatiyo na arungosiro na zavura ki kpi tipa ka yugo na ni nga Satana nga iraziree. (Eyo. 2:4-6; Mt. 23:34) Kina gu bangisapai re du areme a. Wa vura duhe nga Yekova adianga gaani asada kusayo te, ani ima rengba kadu na gu kido nga ko ambunga agu aboro nakpinyemu ko te.d​—Tam. 9:10.

YEKOVA NAFU WASA FURANI

15. Waigu ani agbia wasa vurube kparakpee, Fugo Mbori, na awirinarani aKristano? (2 AKorindo 1:3, 4)

¹⁵ Oni gedi 2 AKorindo 1:3, 4. Ti kura aregbo, ani narungo tipa pakpio gaani boro, bakabangirise, watadu gupai naba gberãrago tirani. Isoke mo nasusa rogo kerepai awere nga gu nasa gupai nga mo naabi tiro nga mo ni sa ro. Ya mo boro ho ini gupai mo asusa rogoho? Yekova ima inoho. Ko ainongo kina pa agu aigirã gbua ani asusa rogoho sa te, ono ko “nafu wasa fu rani rogo gaani gberãngbi yo dunduko.” Ngba gini gene? Ho ani akusuko kpotorani yo ni fu Yekova rogo kparakpee yo, ko nafu “gu zereda nga ga Mbori nagasi rugatinapai dunduko.” (Frp. 4:6, 7) Ani nagbia wasa a ho ani ageda agu afugo Yekova ni du furani rogo Baibiri yo. Rogo yo du ko apepa wai ni furani ko nakpinyemu rani, kini yugu wai furani rengbe ani kadu na tatamana, na kini fu maabangirise furani. Ani nagbia wasa a ba adunguratise yo, yo ani awirika agu apai ni nafu wasa furani rogo Baibiri yo na ani kidu dagba agu awirinarani nakpinyemu rani.

16. Ginipai mo nawirikihe ti gu kpiapai nga ga Nathan na Priscilla?

¹⁶ Tipa ka yugo gipai re na kpiapai nibipa wai Yekova afu wasa na ngarasaro furani vurube Fugoko, oni bingo gu kpiapai nga ga Nathan na Priscilla, nga aguyo naraka Amerika yo. Bete agarã kusayo, i adiberã ka ga kurogo gu ba naadu na zingo abatungusipa Kindo rogoho. Nathan aya: “Ani adu na gu kido nga Yekova nika fu maku afu kurii gu diandue ani amangihe.” Ono tie, ho i ada ni rogo gu rago re, i agbiatiyo na kpakarapai nga ga kaza na zingo gu sunge ka i agbia marã ti ni. Ni yangaraha, agi arogotise re akaraga tiyo ku kpuyo yo, na i aagbiatiyo a kindi na zingo marã. Nathan ape gupai nga: “Mi aabaka kina bangire nga tipagine Yekova aundo nga rani ti ni wa gu ani aberẽhe nga ko nika mangaha ya. Mi atona ka bakabangire singia mi aima manga gupai du ni irairaha.” Fuo bete regbo, Nathan na Priscilla aye ka ino gupai nga Mbori aambunga yo ti gu regbo i aaida na gako undo te. Nathan ape gupai nga, “Ti gu kpakarakpakara aregbo re, Baibiri adu furani wa gu wene bakurearani du na tatamana naafu wasa na kini rugu rani. Ho ani amaaberã rani ni kuti wai Yekova naundo rani ani hi akpakarapai kuba gupai nga ka maaberã rani kina kuti agu akpakarapai re, si ima mbakada rani tipa wai rengbe ani ka mangapai kuti agu akpakarapai du kumbatayo na idapase.”

17. Waigu gu wirina du rimori nga Helga agbia wasa? (Oni bi sura a.)

¹⁷ Awirinarani ima rengba ka fu gu kura wasa furani. Ngba gini gene? Oni bingo gu kpiapai nga ga Helga, du naraka Hungary yo. Tipa dungu agarã, ri aagbia tiri na dungu akpakarapai nga gu nasa ri ri du na bakere bakabangirise na kini bi tiri nga sunge ti ri te. Ono ho ri angera ni kusayo, ri ima rengba ka bi gupai nga Yekova aamangasunge na awirina rogo dungurati tipa i naafu wasa furi. Ri ake gupai nga: “Yekova aima digo ni undo re ho ko abi gupai ni nga ome apai ima fu ri re mbiko sunge marã, ngerafuo bangisa wire na agu akura aˈasada. Rogo aˈuru dunduko nibasasa, rogo agu agarã 30 susi kusayo re, ko aima digiso gako kidohe tipa kafu wasa fere. Ko naanyakasa re dedede vurube gu wene afugo nga ga awirina. Wo mi naagbia kekeapai rogo terefuni, awaraga, na wenewene afugo tambuahe kina boro ti gu regbo mi aidaha ti ni.”

18. Waigu rengbe ani ka fu wasa fu kura aboro?

¹⁸ Ani na gu mamu nga ga wirika Yekova gaani Mbori kaa fu wasa fu kura aboro. Waigu rengbe ani ka mangaha wo? Ani ima rengba ka degaturani fuyo, kini fura fuyo ngba gu gene si nika fu wasa fuyo, na ki undo yo rogo mangimangi pai yo. (Snz. 3:27) Ani namanga ome ka undo agu aboro narungo, kodihe na aguyo ata tonanga iriso Yekova ya. Ho gaani amurakporo azanga gayo borokporo ni rogo kpio yo, kaza, watadu bakabangirise, ani nandu ka biyo, kini dege turani fuyo, na kini ngarasi yo na averesi rogo Baibiri yo. Ho ani awirika Yekova ni “nga Mbori wasa dunduko” ani aundongo kina bete awirinarani aidipase sa te, ono ani ima rengba ka undo gu kura aboro airisongo Yekova awere ya tipa i du na nyemu ka wirikapai tipa ko.​—Mt. 5:16.

YEKOVA NIKA UNDO RANI AUNDO TI AREGBO DŨ

19. Ginipai Yekova amangaha furani, na waigu rengbe ani ka wirika ko?

¹⁹ Yekova naberãpa agu aboro aberã dunduko nakpinyemuko nyanyaki. Ko ambunga rani ho du ani ni rogo akpakarapai te. Kina wai gu baagude du na nyemuse koyo du awirini ni ninaangerafuo awirini, Yekova nangera kinawo a fuo gako ruru amoyambu. Ko nangerafuo rani, kini fu agu ahe furani ani aidaha, kini banda rani, na kini fu wasa furani. Ani nawirika gu Barani du ngbangbaturũ yo nga Mbori nyemuse ho ani angarasa kura aboro ni ti regbo aˈasada. Rogo gi zegino re, ani ima rengba ka gbiatirani na akpakarapai na arungo, ono ani ima rengba kadu na gu kido nga Yekova na kina rani. Ko nakidohe nga: “Ka mo gúnde nga ya, mbiko mi du na mo.” (Yes. 41:10) Gi kidohe re nafu gu maabangirise furani nga Yekova na kina rani.