“Mbori Nga Nyemuse”

“Gu ni adu nga na nyemuse ya, ni aina nga Mbori te; bambiko Mbori nga nyemuse.” —1 Yoane 4:8.

1-3. (a) Ginipai Ziazia Kekeapai agumbaha tipa gu sino Yekova nga nyemuse, na rogo gini gene du gipai re ti ni kia ti akuraha? (b) Tipagine Ziazia Kekeapai aya ti ni wee “Mbori nga nyemuse”?

ASINO Yekova naabaha dunduko nibawenehe kisusi, nirengberengbehe, na ki ngba angba ti aboro. Ono gu sino Yekova ngba kisusi gbe nga nyemuse. Anga kurahe ho naye na ani gbe koyo du Yekova ni susi gako nyemuse te. Si ni pa ngbarago nga, nyemuse nga bangua sinoko. Wai ini ani gupai nga wo duhe?

² Ziazia Kekeapai napepai tipa nyemuse nga gu si agumbanga ha tipa ga Yekova kura bangua asino ya. Ziazia Kekeapai ayanga wee Mbori nga ome watadu Mbori nga ruru sarangbangaa watadu Mbori nga tatamana te. Ko na agi asino re beko na ko nga mburu engaha dunduko wa duhe biata re. Ono tipa nyemuse tigaha, si nape gupai duni dudunguroho tipaha rogo 1 Yoane 4:8 nga: “Mbori nga nyemuse.” Ii, nyemuse rimi kurogo asino Yekova yo dũ. Si nga bangbasia sinoko. Rogo kungbo fugo, ani rengbe ka fura tipaha wa gere: Ga Yekova ome nasa ko ko mangipai. Gako ruru sarangbangaa gbiati gako tatamana nayugo gu gene ko ka mangapai ngbaha. Ono tie, ga Yekova nyemuse nafõngbadukoyo ko mangipai. Na gako nyemuse niyuguyuguhe dedede rogo gu gene ko amangasunge na gu kura gako bangua asino ngbaha.

³ I naafura tipa Yekova dedede ya ko nga nyemuse. Sidu, ka ani aida ka wirikapai tipa nyemuse, si naida ani wirikipai tipa Yekova. Ani wisiginga bete apapara ga Yekova nyemuse tie nga gu ka kura boro arengbanga ka du nani ya.

Gu Babakere Mangaapai Kisusi Nga ga Nyemuse

4, 5. (a) Gine nga gu babakere mangaapai nga ga nyemuse kisusi i ayuguhe wa rago aenge kindi? (b) Tipagine rengbe ani ka ya ti ni wee Yekova gbiati Wiriko nikpamiakpamia yo na gu nyanyaki kpamiatise nga ga nyemuse naadunga be kura aboro berewe ya wa rago aenge kindi?

⁴ Yekova yugu nyemuse fu aboro rogo dungu agene, ono gene ho sa yugu ko ho ngbaha nga gu gbaarii akuraha dunduko. Gini gene du ngaha? Si nga pa keda ko Wiriko ko rungo na ki kpi tipa rani. Sidu tie, ani rengbe ka gumbaha ni gaani ndikidi rengo ya gi gako mangaapai re nga babakere mangaapai kisusi nga ga yugo nyemuse wa rago aenge kindi. Tipagine rengbe ani ti ni ka gumba gupai re?

⁵ Ziazia Kekeapai nayamba Yesu nga “bambata vungu fu agu ahe dũ i afu.” (AKorosaio 1:15) Oni berẽnga gipai re, Wiri Yekova aima digo niraki mbata i nika kusa gu haurago duna akerekuru rogoho. Bagizo regbo tie wai Mbori adihe na Wiriko mbata fu kusa ko ahe? Gu kura aboro birĩ-inohe nafu gu berã nga, gu haurago duna akerekuru rogoho re garãha nga abirioni 13. Ono, ka gi berãpai re vurangia rengo, bagizo gi regbo re nigbangaha gbe ki rengbe kuti bagizo agarã gu Wiri Yekova nga gako bambata vungu te! Gini apai ko aamangaha vuru gu regbo re naabaha dunduko? Gi Wiri Mbori re aamangasunge fu Bako na ngbarago ni “bangbasia boro sunge.” (Asanza 8:30; Yoane 1:3) Yekova gbiati Wiriko akodi beyo ka mangasunge sa ka kusa gu kura ahe dunduko si du ti ni. Nairiwo gu ngbarago i avura gbiaha be gayo kodatise! Gini boro du dagbarani tie rengbe nzunzu ka ruga tini na pa bakio gu kpamiatise nadu dagbayo vuru gu bagbanga regbo re? Si tie ziazia nga, Yekova Mbori gbiati Wiriko nikpamiakpamia yo na gu nyanyaki kpamiatise nga ga nyemuse naadunga be kura aboro berewe ya wa rago aenge kindi.

6. Gini apai Yekova agumbaha ho i abapatizi Yesu ni?

⁶ Wa i avura du na gi ngbatunga nyemuse re dagbayo, Yekova akedi Wiriko ku auru kpotosende i batika ko nifogo wiri boro. Pa manga Yekova gupai re, ayugu gupai nga, ko aidi ka sungo nisako ngbangbaturũ yo tipa bete abawe agarã giibangiri gu Wiriko ko akpinyemu ko gbe. Ko aduna bakere ngbarago tiko wa ko asungu ngbangbaturũ yo kaa bi Yesu ko nisono ka dani rengberengbe kumba. Ho garã Yesu adani wa 30, ko azi bapatiza. Ti gu regbo re, kina Bako nitiko afura ngbangbaturũ yo ki ya: “Wire du re, nyemuko namanga re, ngba ko ti re gbe.” (Matayo 3:17) Mbori avura duna bakere ngbarago ka bi gupai nga, Yesu aima manga agu apai dunduko anebi agumbaha tipa ko, na agu apai dunduko Ko aida ko mangihe!—Yoane 5:36; 17:4.

7, 8. (a) Ginipai Yesu ahihe rogo Nisana ti rameru 14 rogo gu garã nangia 33 ti Gaani Regbo, na wai si afudi Bako du ngbangbaturũ yo? (b) Tipagine Yekova ambu Wiriko ti ni ko rungo na ki kpi?

⁷ Ono tie, wai Yekova aaberã rogo Nisana ti rameru 14, rogo gu garã nangia 33 ti Gaani Regbo, wa i akusi Yesu fu ndurumo aboro na i ki zi ko? Wa aboro aasawia Yesu, kini suku sure kuti ko, na kini taki ko na minomino abeyo? Wa i aataka ko na dupö, si kini mangi amandoro giiko yo? Wa i abanga abeko na anduko kuti ngbunduru ngua na ki asi ko kuari aboro nisawia ko? Wai Bako aaberã, ho gu Wiriko ko akpinyemu ko gbe akpari ni fuko ho ko aduni rogo bakere ima nga ga rungo? Wai Yekova aaberã, ho Yesu agbe yangara onga ko ni ki kpi, si kingia gu bambata regbo wa rago aenge kikiipa Wiriko ago kusayo rogo zegino ka ko adunga ti ni ya?—Matayo 26:14-16, 46, 47, 56, 59, 67; 27:26, 38-44, 46; Yoane 19:1.

⁸ Wa duhe nga Yekova nga gu boro apai afõngbaduniyo afõ, gu ima ko avura rungo behe be pa kpio Wiriko, si ni gupai arengbanga ome gaani afugo ka ringbisapaha ya. Gupai rengbe ani ka gumbaha ninduhe nga, si nangia gupai Yekova aaida ka mangaha. Tipagine Yekova ambu gu eegirãpai re ti ni si mangi ko? Ko nayugo wenepai fu rani du ninduhe rogo Yoane 3:16, nga gu veresi nga ga Ziazia Kekeapai nyakipaha gbe si ki sa kura aboro i yambuhe nigurusigurusi Wene Pangbangaa. Si nayaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” Sidu, gupai nasa Mbori ko mangihe nga: nyemuse. Anga boro ho nayugunga babakere nyemuse wa gure mbata te.

Gu Gene Yekova Akido Rani Rogoho Tipa Gako Nyemuse

9. Gine Satana aida ani idi kuti ni tipa ga Yekova bipai tipa rani, ono gine Yekova akido rani tipaha?

⁹ Ono tie, nyanyakipa sanahe nakura: Ya mo Mbori nakpinyemu rani wa du ani nibasasa? Gu kura aboro rengbe ka ida kuti gupai nga, Mbori nakpinyemu aboro dunduko ni rikaaboro a wa duhe rogo Yoane 3:16. Ono i naberã gupai nga, ‘Mbori arengbanga ka kpinyemu re nga mi nisare te.’ Gupai du nirengo nga, Satana Bakitingbanga naida ka sa rani ani idi kuti gupai nga, Yekova akpinga nyemu rani te na kiinga pa rani bangiriko a te. Ono tie, ani tingidi gupai nga, ka ani vura berãpa tirani ya ko akpinga nyemu rani te na wiri undo ho tirani tee, Yekova nakido rani ya gako ruru amoyambu dunduko nibasasa kii payo akio bangiriko.

10, 11. Wai gu ga Yesu yugopai na kpiapai du tipa abavurukporo ayugo gupai nga, kii parani akio bangiri Yekova?

¹⁰ Nikpiapai, ani kparianga gu ga Yesu afugo du nikekehe rogo Matayo 10:29-31. Niyugo Yesu kiopa gako abawiriki, ko ayugupai na kpiapai ki ya: “I nabaga[nga] abavurukporo ue tipa rukutu marã sa, te? a nga gu ru sa dagba ra ka ti nga ku sande gi bangiri Baroni te. Ono mangerironi tigaha ni gedigedi he dunduko. Were ka oni gúnde nga ya; genoroni susi geno dungu abavurukporo.” Oni kparianga wai agu aboro nadu rogo bambata sa kama agarã nanadegatuyo kuti afugo Yesu agirogo agu afugo re.

¹¹ Rogo agu a’uru nangia ga Yesu, abavurukporo angia agu azire geno ra aumba kisusi dagba agu azire i anabaga ra niriahe. I anangbe ra ue tipa wiri tooni zende-marã sa paha akionga ya. Ono Yesu agumba gupai kusa, wa duhe rogo Ruka 12:6, 7, nga, ka boro afu zau-marã ue, anga abavurukporo biama ka i afu ra funi te, ono ka i afu ra bisue. I anafu gu kura zire re si ki du wa geno ru ti ni wa gu tooni te. Isoke ngbatunga agu azire re avura du wa kina kungbo ahe bangiri aboro, ono wai Bakusiahe anabi ra? Yesu ayaa: “Bangiri Mbori ago nga ti gu ru wa sa te,” zavura gu bisue ru i anagbia ru kuti akura ra re vurũ. Awere tie, ani rengbe ka giarogo gupai Yesu aaida ka gumbaha. Wa Yekova abi bangisa bavurukporo na kikii paru wa ngbatunga gure, angbatika aboro kii payo gbe ti agu azire re! A wa Yesu agumbaha, Yekova ima ino apai tipa rani na afutufutuhe. Nirengo, ko ima ino bange mange rirani!

12. Tipagine rengbe ani ka sa gupai ti ni niboro rengo Yesu aagumbaha ho ko aafura ni tipa geda Mbori mange rirani?

¹² Gu kura aboro rengbe ka duna gu berã nga Yesu akiisopai akiiso herẽ. Ono tie, oni berẽnga tipa gupai du tipa zingabekpio. Si ima iriwo ka ino wai si aida Yekova ini rani wenengai gbe tipa ka kusa rani berewe rogo gu gene nga ga zingabekpio! Ko nabi rani na nyanyaki parani si ki da ti gupai nga, ko tingidi parani na gu futufutuapai dunduko du tipa rani, kodihe na gu kpakarakpakara asino ani adikumboho rogo gu gene-ngbatunga nga ga atitarani na agu apai dunduko ani arengbe ka berãha rogo gaani raka gbiati agu naamanga rani. Pa geda ko mange rirani, nga gu rengbe bangehe ka du ti rii boro sa nga 100,000, nga kungbo wiri taata sunge gbua ka i ringbisihe kuti gu nga ka tingidapa agu apai dunduko du tipa boro kini mo ka ruho ka zingisa ni bekpio. Nangbaa wai afugo Yesu akido rani ya Yekova nangera angera fuo rani wa du ani nibasasa!

13. Wai gupai nadu tipa Bakindo Yosefate ayugo gupai nga, Yekova nangera angera tipa gu weneapai du tirani ani ki vura du nikpakpa aboro vurũ?

¹³ Ziazia Kekeapai nayugo gu kurapai berewe nga gu nasa gupai fu rani nirengo du tipa ga Yekova nyemuse tipa rani. Ko nangereka tipa gu wene apai ani amangaha na kini bihe na kikiipaha. Nikpiapai, ani bingo gupai nadu tipa gu wene sino Bakindo nangia Yosefate. Ho gu bakindo re amangi mumungo ingahe ni, ga Yekova nebi aya fuko wee: “Bambiko gi pai [mangi mo he] re, zinga ye be Yekova ku ri ro.” Nga gupai nasa boro ni berẽ! Ono ga Yekova afugo adigonga kina kuho te. Ko agbia kurapai kuti ni ki ya: “Ono i abi bete wenepai ti ro.” (2 Pekapai 19:1-3) Sidu, ga Yekova ruru zinga avurasinga bangiriko ti gu “wenepai” nadu ti Yosefate te. Anga si ni gupai nafu ngbarago fu rani ka ino gupai nga, gaani Mbori nangereka tipa gu wene apai du tirani ani ki vurangia kpakpa aboro vurũ tee?

Gu Mbori “Du Zaza Tipa Vu Aboro”

14. Ho ani amanga ingapai ni, gini ngbatunga aberã rengbe ka fuda rani, ono wai rengbe ani ka gbia undo be ga Yekova mbupai?

¹⁴ Ho ani amanga ingapai ni, gu gberarago du ani nani, gu zee zi rani, na gu ingapai ini ani he nga ani mangihe, rengbe ka sa rani ani bi tirani wa ani arẽnga ka mangasunge berewe fu Yekova te. Ono tie, ani tingidi gupai nga, Yekova “zaza tipa vu aboro.” (Atambuahe 86:5) Ii, ka ani sa gaani berã ti gaani ingapai na ki mangi asadatise nyanyakii ka zanga fugö gupai re, ani rengbe arengba ka gbia undo be ga Yekova mbupai. Ani wisiginga wai Ziazia Kekeapai aringbisapa gi papara ga Yekova iiriwo sino nga nyemuse re.

15. Wai Yekova aturuso gaani ingapai kusayo tirani?

¹⁵ Gu bake Atambuahe nangia Davide aringbisipa ga Yekova mbupai zukazuka ki ya: “Wa turũ ku uroyo na dioyo, wo ko naturũsa gaani tiandika ti rani a.” (Atambuahe 103:12, gu kekepai duni pigipigihe re, ani du pigihe.) Wai turu uroyo ti dioyo? Gu rago turu ti kuraha kisusi nga uroyo ti dioyo; agu aba du ue re, arengbanga ka gbiatihe wagusa te. Gu kura wene bawirikipai sa naya wee rogo gi gumbapai yo re nga, “a wa rengbehe ka du; a wa rengbe ani ka berãha.” Agu afugo Davide naye be ga Mbori toro re naya fu rani wee, ho Yekova ambupai ni fu rani, ko naturusoho tirani tutuurũ a wa rengbe ani ka berãpa gu rago turu gbe.

16. Ho Yekova ambupai ni fu rani ti gaani aingapai, tipagine rengbe ani ka ino gupai ti ni nirengo nga, ko nabi rani tingbafuo gu regbo re ni gigiri aboro?

¹⁶ Oni a’asadinga ka giriso gu rokoo duna rangihe nzaranzara he atogo kuti ni? Isoke ka oni avura manga bakere asadatise, guhe natogo re anye kindi ti gu rokoo re. Oni kparianga wai Yekova aringbisapa bakio gako mbupai fu aboro: “Ka gaoni ingapai vura du ni zamba ha vurũ, si adú adu kpau wa morogumba; ka si vura zama ititi, si adú adu wa zau remu.” (Yesaya 1:18, gu kekepai duni pigipigihe re, ani du pigihe.) Gu “zamba” rangi gumba yo paha herẽ, si nga guhe zamu getekpere.a Guhe ‘zamu ititi,’ si nga gu rangi du dagba zamba he na mbimbimbi he. Mbiko gaani asadatise nisarani, ani arengbanga ka dia gaani ingapai kusayo te. Ono tie, Yekova tigako rengbe arengba ka dia agu aingapai kusayo zamu getekpere na gu zamu ititi ki saha wa fäkäfäkä morogumba nga guhe du nipusihe watadu wa gu pusi mange-nyaa i ambedanga ha na rangi ya. Sidu tie, ho Yekova ambupai ni fu rani ti gaani aingapai, si aidanga ani bi tirani wa gu ingapai re aima mbu fuöho tirani nyeanye kindi tipa gaani yangara raka te.

17. Rogo gini gene Yekova azumo gaani aingapai kusayo kugii ko yo?

¹⁷ Rogo gu bia nga ga tambuahe nga gu nafõngbadu boro yo Izikiya asarihe fuo batasa yo ko be kere kaza, ko aya fu Yekova wee: “Mo ba gimi ingaapai dunduko ku giiro yo.” (Yesaya 38:17, gu kekepai duni pigipigihe re, ani du pigihe.) I naringbisapa Yekova herẽ nigu boro nadia gu ingapai kusayo nga ga gu boro sa gani berã na kini baha kusayo kugii Ko yo, yo Ko arengbanga ka bihe ni berewe watadu ka berãpaha ya. Kuti sangba kura buku sa, si naya wee gupai i aida ka gumbaha rogo agi afugo re nga: “Mo sa gimi aingapai si ki du wa mi amanganga ha te.” Ya mo gupai re afunga wasa fu roni tee?

18. Wai afugo gu nebi nangia Mika ayugo gupai nga, ho Yekova ambupai ni fu rani, Ko nadia gaani ingapai kusayo nyeanye kindi?

¹⁸ Rogo gu kidohe nadu tipa karaga aYisaraere berewe kuba yo, gu nebi nangia Mika agumbapa gu kido ko adu nani nga Yekova ambupai ambu fu gako aboro fuo sa yo gayo berã: “Da du ni Mbori wa mo, . . . [na]mbu pa samungu mbiko pa yangara gako aboro? . . . Mo abá gaani ingaapai dunduko ku dudungura baime yo.” (Mika 7:18, 19, gu kekepai duni pigipigihe re, ani du pigihe.) Oni berẽnga pa gupai nangia rogo agi afugo re fu agu aboro naaraka ti agu aregbo i aakeka Ziazia Kekeapai ti ni. Ya mo wiri mamu aduho tipa boro di guhe berewe i abaha “ku dudungura baime yo”? Sidu, afugo Mika nayugo gupai nga, ho Yekova ambupai ni fu rani, ko nadia gaani ingapai kusayo nyeanye kindi.

“Gu Zezeredi Nunga Nga ga Gaani Mbori”

19, 20. (a) Gine nga rogo gu fugo aEbere i ayambaha nga “yugo inapai” watadu “ka duna nunga”? (b) Wai Ziazia Kekeapai amangasunge na gu nunga nga ga nagude tipa fogo wiiri ka yugopai nani fu rani tipa ga Yekova nunga tipa rani?

¹⁹ Nunga nga gu kura papara ga Yekova nyemuse. Gine nga nunga? Rogo Ziazia Kekeapai, nunga nga wirina inapai. Dungu afugo aEbere na afugo Giriki duho nafu gu berã nga ga nunga. Nikpiapai, dedede i naasa gu fugo Ebere nga ra·chamʹ nigu fugo nga “yugo inapai” watadu “ka duna nunga.” Gi fugo aEbere Yekova amangasunge nani ka fura tipa tiko re, si nga wirina gu fugo du tipa “rukumbu” na i rengbe ka ringbisapaha wa gu “nunga nga ga nagude koyo du fogo wiiri ni.”

²⁰ Ziazia Kekeapai namangasunge na gu nunga nga ga nagude koyo du fogo wiiri ni ka yugopai fu rani tipa gu nunga du Yekova nani tipa rani. Yesaya 49:15 naya wee: “Ka bangiri de go ti gari gude ngbamai, ya ka nunga [ra·chamʹ] gu wiriri nga ga rukumburi du nga ti ri ya? Ii, bangiri agi yo re rengbe [arengba] na go, ono bangire nga Gbia agó nga ti ro te.” Si nikpakarakpakarapai ka berã gupai nga, bangiri nagude rengbe arengbe ka go ti mbuti fogo wiiri na ka ngera fuo ru, nga gu wiiri naida aida i mbutiru. Nirengo, fogo gude nigu boro naida i naaundo ni aundo; si naida nai naangera angera fuo ru uru na yuru. Ono tie, si nafu kina gberarago nga, kura adee kina ti ni nagindigo awiriyo, gbe, rogo gi ‘gbegbere aregbo’ re. (2 Timoteo 3:1, 3) Ono tipa Yekova, ko nayaa: “Bangire . . . agó nga ti ro te.” Gu zezeredi nunga du Yekova nani tipa gako amoyambu nibakerehe na ki nyaki kisusi gu bakere nunga du nagude nani tipa fogo wiiri, nga gu nunga rengbe paha ka ye ku berã rani yo.

21, 22. Ginipai namangi aYisaraere bakuru kusayo Ezipeta yo, na ginipai Yekova amangihe tipa gayo akpee?

²¹ Wai Yekova ayugo nunga wa gu vunguagude naayugoho fu agu awirini du ni na nyemu yo tini? Ani nabi gi sinoko re ziazia ti gu gako mangaapai ko amangihe na agu aYisaraere nadu mbata. Bara ti digido 16 kama agarã Mbata fu Gaani Regbo, dungu amirioni aYisaraere angia akanga Ezipeta yo, nga gu rago i arungosi yo rogoho nikerehe gbe. (Gate 1:11, 14) Rogo gayo rungo, i akparikpee fu Yekova. Wai gu Mbori nga ga nunga ko akaragapai fuyo?

²² Rungo yo azi Yekova. Ko ayaa: “Mi bi gu imisiri nga ga gimi aboro du Ezipeta yo ni rengo, ki gi gayo kpe . . . bambiko mi ini pa gayo aima.” (Gate 3:7) Yekova arengbanga ka bi gako aboro i nirungo watadu ka gia gayo akpee zanga nunga yo mangi ko te. Yekova nga gu Mbori naberãpa gu ima aberã namanga kura aboro. Na gi sino nga ga berãpa gu ima namanga kura aboro re, si kina sa wa nunga. Ono tie, anga kina nunga ga Yekova aboro gbua nazi ko sa te; ono si afõko ko ki guari ka mangapai ka batasa yo. Yesaya 63:9 nayaa: “Ko atumo yo mbiko gako nyemuse na [mbiko] gako nunga.” Ko abatasi aYisaraere Ezipeta yo ‘ninyanyaki bee.’ (Pa Fu Rugute ni Ue he 4:34) Ngbutuko fuo gupai re, ko afu riahe fuyo ngba iiriwo gene na ki ndu na yo kurogo gu ringara ko afuhe fuyo nigayo nga gu ringara ahe aaida rogoho kpaima.

23. (a) Wai afugo bake Atambuahe anyakasa gupai fu rani nirengo ya Yekova naberãpa rani aberã wa du ani nibasasa? (b) Rogo gini agene Yekova aundo rani?

²³ Yekova ayugonga nunga fu gako aboro wa du yo nikina badona sa te. Gaani Mbori nga boro nyemuse naberãpa rani aberã wa du ani nibasasa. Ko naruga tiko aruga zukazuka na pa agu arungo rengbe ani kaa mbu behe. Bake Atambuahe ayaa: “Bangiri Yekova du ti ruru aboro, tuko ni haha ha tipa gayo kpe ku ari. Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.” (Atambuahe 34:15, 18) Wai Yekova aundo rani wa du ani nibasasa? Anga si nidingisoro fuko ko di gupai kusayo naye na rungo fu rani te. Ono ko aima mbakadapai kpaima tipa agu aboro nakpara fuko tipa undo. Fugo ko nafu agu arugute rengbe ka fu undo. Rogo dungurati, ko nafu agu ababiapai ima rẽ ka fu undo nga aguyo na’asada tiyo ka yugo gako nunga rogo undo kura aboro. (Yakoba 5:14, 15) Nidu Yekova nigu boro “ninagia kpetambuahe,” ko “na gama Ziazia Toro fu agu [aboro] . . . nasana ko” tipaha. (Atambuahe 65:2; Ruka 11:13) Gu ngbatunga ambakadapai re dunduko nga yuguyugu gu “ngbadu weneringise nga ga gaani Mbori.”—Ruka 1:78.

24. Wai oni ka karagapai kuti ga Yekova nyemuse?

²⁴ Anga si niwenepai ani berẽkurii gu nyemuse nga ga gu Barani du ngbangbaturũ yo tee? Rogo gu papara kekepai ye mbata fu gere, i atingidi rani yo ya Yekova amangisunge na gako ome, ruru sarangbangaa, na tatamana rogo agu agene nga ga nyemuse tipa ka undo rani. Na rogo gi papara kekepai re, ani bi gupai nga, Yekova ayugu gako nyemuse ngburungburu tipa ngbatunga aboro, na tipa rani wa du ani nibasasa rogo iiriwo agene. Awere tie, wa du ani nibasasa, si naida ani sana tirani ki ya, ‘Wai mi nika karagapai kuti ga Yekova nyemuse?’ Oni karaganga pai ni kpi oni nyemu ko na ngbaduroniyo dunduko, na gaoni berã dũ, na mbisimoroni dũ, na ome roni dũ. (Marako 12:29, 30) Oni rakinga na a’uru dunduko ngba gu gene nayugo gupai nga, oni na nyemu gupai ngbaduroniyo nga ka mbeda koyo du Yekova ni susi gu nidu mbata. Na Yekova, nga gu Mbori nga nyemuse, mbedinga koyo du oni ni, nyeanye kindi!—Yakoba 4:8.

[Gu rukutu kekeapai du bandu kpewaraga yo]

Oni Natingidaha?

• Wai ani aino gupai nga, nyemuse nga bangbasia sino Yekova?

• Wai rengbe ani ka ya wee pa keda Yekova Wiriko ko rungo na ki kpi tipa rani nga babakere yugo nyemuse kisusi wa rago aenge?

• Wai Yekova anyakasa gupai fu rani nirengo nga, ko nakpinyemu rani akpi wa du ani nibasasa?

• Rogo gini wene agene Ziazia Kekeapai aringbisapa ga Yekova mbupai fu aboro?

[Gu kpiahe du ti kpewaraga 24]

“Mbori . . . afu bangisa Wiriko”

[Gu kpiahe du ti kpewaraga 25]

“Genoroni susi geno dungu abavurukporo”

[Gu kpiahe du ti kpewaraga 25 aye be]

© J. Heidecker/VIREO

[Gu kpiahe du ti kpewaraga 26]

Gu nunga du nagude nani tipa wiiri rengbe ka yugopai fu rani tipa gu nunga du Yekova nani tipa rani