Yekova Nabanda Rani Tipa Bata

“I nabanda roni ni gu tandu nga ga Mbori, mbiko idapase, tipa gu bata i amangi he ka kusa ha rogo yangara rame.”—1 PET. 1:5.

GAONI KARAGAPAI NGA GINE?

Wai Yekova agbe rani kurogo ndikidi irisombori?

Wai rengbe ani ka mbugene fu Yekova tipa ko ngbe furani kumbatayo rogo gako arugute yo?

Wai Yekova afu ngarasaro furani?

1, 2. (a) Gini kido du ani nani nga Mbori nika undo rani aundo tipa ani kakuti gaani ruru mangapai? (b) Wai gu Yekova naini rani nibasasa dunduko?

“GU NI nikaru ki da ho ragoho ka diga ni, ni abáta abata.” (Mt. 24:13) Agu afugo Yesu re nayugo gupai furani gbaiga nga, ka ani aida ka bata ho Mbori nika gberesa gi ga Satana zegino re ni, ani duwa ka ani kakuti gaani ruru mangapai dati digidoho. Ono gipai re ayugongo gupai nga Yekova naida ani hipai nigaani tatamana watadu nigaani ome te. Ziazia Kekeapai nakido rani nga: “Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.” (1 Kor. 10:13) Ginipai agu afugo re ayugoho?

² Tipa Yekova undo rani ka asada funga rii ome rani ya, ko du wa ka ko ini agu apai dunduko du tipa rani, kodihe na agu akpakarapai ani agbiatirani nani, gini ngbatunga boro nga ani, na ani rengbe ka hipai kida ku wari. Ya mo Mbori inipai tipa rani sirisiri wa gure? Ii. Ziazia Kekeapai nagumba gupai nga Yekova ima inipai tipa rani nibasasa dunduko wenengai. Ko ima ino agu apai ani amangaha na aʹuru dunduko gbiati asino rani. Ko rengbe a ka ino agupai du berãrani yo na gu du ngbadurani yo.—Oni gedi Atambuahe 139:1-6.

3, 4. (a) Wai gu kpiapai du tipa Davide ayugo gupai nga Yekova namaa berãko amaa fuo aboro nibasasa? (b) Gini iiriwo pa sunge Yekova amangaha areme?

³ Ya mo boro Mbori na nyemu ka inopai tipa aboro wa gure? Gu bake papara Atambuahe nangia Davide aberẽ kurii gipai re na ki ya fu Yekova: “Ho mi nangana gamo angbangbaturũ ni, nga gu mangaapai nga ga wirinzagaro, na gu diwi mo amoi ru na akerekuru; gini he nga boro, mo naaberã pa ni?” (Tam. 8:3, 4) Isoke, si rengbe kadu nga Davide asana gi sanahe re nibi wai Yekova ayugu nyemuse fuko. Ho Davide adu ni nitooni gude, Yekova abi ko nigu boro “ngbaduko aida” na ní na ki di ko ‘ti pekafuo akandoro, ko da nibazogo kurii’ aYisaraere. (1 Sam. 13:14; 2 Sam. 7:8) Oni berẽnga kina pa gu ngbarago Davide adu nani ho ko aini gupai ni nga, Bakusi Zegino berẽ pako wa vura du ko gbua nga bangerefuo akandoro!

⁴ Gu nyemuse Yekova ayugoho furani areme, si ima iriwo ka ani berẽ kuriihe. Ko nadungura “agu ahe ngba bangiri arikaaboro dunduko” kurogo ndikidi irisombori, na kini undo gako amoyambu i kakuti gayo ruru mangapai. (Agai 2:7) Tipa ani rugutirani wenengai na wai Yekova aundo rani ani kakuti gaani ruru mangapai, ani berẽnga mbata kurii wai ko aye na aboro kurogo ndikidi irisombori.

MBORI NAMBEDISA RANI

5. Rogo gini gene Yekova agbe aboro koyo du Wiriko ni? Oni funga kpiapai tipa gipai re.

⁵ Yesu ayaa: “A nga boro sa ka ye kono du mi ni gbua te, kina Buba nakedi re ka gbe ni.” (Yo. 6:44) Agu afugo re nayugo gupai nga, si naida Mbori undo rani aundo ani kini ru ka da ni ga Kristo abawiriki. Wai gu Mbori agbe agu aboro du wa akandoro koyo du Wiriko ni? Ko nagbe yó vurube sunge tungusapai yo na vurube gu undo nga ga ziazia toro. Nikpiapai, ho aPauro na agu abadiangbako nangia amokedi adu ni Firipoi yo, i agbia dee yo rimori angia Rudia na ki tona ka tungusapai furi. Gu pangbanga re nayaa: “Gbia ki za kpotori yo, ri di agu apai Pauro agumba ku gume.” Ii, Mbori afu gako ziazia toro furi tipa si undo ri ri girogo gu pangbanga re, na sangbanaha angia ri gbiati gari aborokporo dunduko nazi bapatiza.—Amo. 16:13-15.

6. Wai gu Yekova agbe rani dunduko nibasasa sa ndikidi irisombori?

⁶ Ya mo gipai re amangi fu kina Rudia sa? Oó. Kangia oni nga gu Kristano naima kpara gani raka fu Mbori, Mbori aima gbe roni a tipa ndikidi irisombori. A wa gu barani du ngbangbaturũ yo re abi wenepai ku ngbadu Rudia yo, ko aima bi wenepai a ngbaduroni yo. Ho oni atona kaa degaturoni ni sa wene pangbanga, Yekova amangisunge na gako ziazia toro tipa ka undo roni oni girogoyo. (1 Kor. 2:11, 12) Ho oni aamanga nyanyaki asadatise ni tipa ka manga gupai oni awirikaha, ko afu maku kurii gaoni asadatise tipa oni mangi gupai ko akpinyemuhe. Ho oni akpara gaoni raka ni fuko, ko angi angi ngbaduko yo. Nirengo, natona ho oni atona nduge ni ngbagene unga, Yekova aima digo niundo roni ti aregbo dunduko.

7. Wai gu ini anihe nga Mbori nika undo rani aundo tipa ani nye niruru rani fuko?

⁷ Fuo Yekova undo rani tipa ani tona ta naako, ko ambunga rani ani mangi ome nitirani tipa ka nye niruru rani te. Ko ima inoho nga wa ani ayengo nitirani kurogo rengo ya, ani arengbanga ka nye kurogo rengo nitirani a te. Gu mokedi nangia Petero ake waraga fu mbedimbedi aKristano ki yaa: “I nabanda roni ni gu tandu nga ga Mbori, mbiko idapase, tipa gu bata i amangi he ka kusa ha rogo yangara rame.” (1 Pet. 1:5) Agu afugu re fu aKristano dunduko na si naida si du nigupai rago angbaangba tirani nani areme. Tipagine? Mbiko ani dunduko naida na gu undo nga ga Mbori tipa ka nye niruru rani fuko.

KO NABANDA RANI KA ANI INGINGA YA

8. Tipagine si aida ani bandatirani ti ni ti manga gbegberẽpai?

⁸ Agu asoapai nga ga raka gbiati gaani zangarengba rengbe ka sa rani ani zanga ngera rogo toro yo na ani ki tona kaa manga gbegberẽapai zanga ani inihe. (Oni gedi AGaratio 6:1.) Ani rengbe ka ringbisaha na gupai namangi Davide.

9, 10. Wai gu Yekova abanda Davide ti manga gbegberẽpai, na ginipai ko amangaha furani areme?

⁹ Ho Bakindo Saura aagbata Davide ni, Davide adu na zatise ki zanga irabape ti Saura. (1 Sam. 24:2-7) Ono fuo gure ngbutuko, ga Davide zangarengba adi beko. Ko aida na riahe gbiati ime tipa tiko na gako aboro, na ko ki sana wirinako ni Yisaraere nangia Nabara ngba wene gene tipa undo. Ho Nabara akaraga gbegberẽ fugo ni fuko, Davide azingi nikerehe na ki mbakadi tiko tipa ka ndu ka irobape gupai re ti Nabara gbiati gako aborokporo dunduko. Davide aberãnga gupai nga pa imoko aboro-wenesa arengbe ka ye na bape kure kuriko bangiri Mbori te. Fuo Abigaira nangia dia Nabara rimisi tiri kurogo gipai re, ri abatasi Davide ti gu kerepai ko aida ka mangaha re. Fuo Davide rugutiko na gupai nga Yekova nasa gupai re si mangi wo, ko ayaa: “I sámbua Yekova, ga aYisaraere Mbori, nga gu ko nakedi ro areme mo ye ka gbia re! Maku dú foro tipa ga tatamana, maku dú foro naza re areme ti uka kure, naza re ti ira bape re ni tire!”—1 Sam. 25:9-13, 21, 22, 32, 33.

¹⁰ Ginipai rengbe ani ka wirikaha ti gi pangbanga re? Yekova ima rengba ka banda rani ti manga gbegberẽpai. Rengo ngaha nga, ani arengbanga ka berã gupai nga Mbori nikaa keda aboro akeda ti agu aregbo dunduko ani aida ka manga gbegberẽpai tipa i za rani te. Na ani arengbanga ka ino wai nzunzu Mbori nika mangapai tipa gupai du ani rogoho watadu gu ko nika mangaha tipa gako ringbisapai digisitihe te. (Batu. 11:5) Ono wa vura duhe wo, ani rengbe kadu naa kido nga Yekova ima ino agu apai du tipa rani ti aregbo dunduko na ko nika undo rani aundo tipa ani nye niruru rani fuko. Ko nakido rani nga: “Mi arába ro ki yugu pai foro ngba gu gene mo ka ndu ngba ha; mi arúga ro ni maa bangire ti ro.” (Tam. 32:8) Wai gu Yekova afu arugute furani? Wai rengbe ani ka gbia undo behe? Na wai rengbe ani kadu naa kido nga Yekova nangbembatayo fu gako aboro areme? Oni kparia wai karagayo pai kuti agi asanahe re rogo gu kitabu nga Yugoti.

ARUGUTE NABANDA RANI

11. Wai gu ini Yekova agu apai dunduko namanga rogo agu adungurati nga ga gako aboro?

¹¹ Rogo gu yuguyugupai du rogo Yugoti kapita 2 na 3, Yesu Kristo awisigi agu adungurati saba naadu Asia Minor yo. Gu yuguyugupai re nayugo gupai nga anga Kristo abi kina agu apai naadu tipa agu adungurati re gbua te, ono agu apai naabipa ha nibasasa dunduko. Rogo gu kura aba, ko afura tipa aboro nibasasa, ki ta tambua aguyo kini fu arugute fu agu akurayo. Ginipai gipai re ayugoho? Rogo digisidigisi gu yuguyugupai re, gu saba adungurati re narukuba gu mbedimbedi aKristano natona rogo 1914, na agu arugute ko afuhe fu agu adungurati naadu saba re, si fu agu adungurati nga ga ga Mbori aboro du areme auru kpotosende. Sidu, si rẽarẽ tie ani dakuti gupai nga, Yekova nangbembatayo fu gako aboro areme vurube Wiriko. Wai rengbe ani ka gbia undo ti gu gako ngbe kumbatayo re?

12. Wai rengbe ani ka mbugene fu Yekova tipa ko ningbe furani kumbatayo?

¹² Gene sa rengbe ani ka gbia undo be ga Yekova rugapai ngbaha nga vurube wisigopai nisase. Yekova nafu bakumu arugute furani vurube agu awaraga nga ga ruru kangara moyambu. (Mt. 24:45) Ono tie, ka ani aida ka gbia undo behe, ani duwa ka ani di regbo ka wisigoho na ki mangi agu apai ani awirikaha rogoho. Wisigopai nisase nga gu gene rengbe Yekova ‘ka banda rani be tigo’ ngbaha. (Yuda 24) Ya mo oni awisiginga pai rogo gaani awaraga na si kidu nzunzu wa ka i ya i akehe kina boro tipa roni? Oni di agu arugute re kugume na ki bihe nga si naye be Yekova. A wai ka bakurearoni paka giironi yo tipa ka gbe berãroni sa gupai ní agumbaha, Yekova rengbe a ka mangasunge na gako ziazia toro tipa ka gbe berãroni sa gaoni mangapai watadu sinoroni nga gu si aida oni mangi ariapai rogoho, zanga kapa, si aida dungu aboro mangi ariapai rogoho rogo gayo raka yo. Ho ani adegaturani ni sa gu ngbembatayo nga ga ziazia toro re, gure nazaka gene fu Yekova ko ningbe furani kumbatayo. (Oni gedi Atambuahe 139:23, 24.) Rogo gi bangiriba re, si angba wapai ka ani wisigi gu gene ani awisigopai nisase ngbaha.

13. Tipagine duhe ti ni nipatatamana ani wisigi gu gene ani naawisigopai ngbaha?

¹³ Dia bakere regbo kina ku gene aũngbarago yo rengbe ka gbarasa pa gu regbo ka ani dihe tipa wisigopai nisase. Kura wirina sa ayaa: “Si nitaatapai tipa boro mbu gani wisigopai nisase. Aũngbarago ima nge awere kisusi wai si anidu mbata, na kiingo genoho berewe wa si adu mbata te. Si rogo aterevizioni, kompiuta, na rogo aterefuni. Si ima ke rani ake kirikiri.” Ka ani adunga na rubangirise ya, gu regbo si aida ani dihe kuti wisigopai dudunguro rengbe ka nyasa naabaha berani zanga ani inihe. (Ef. 5:15-17) Ani dunduko nibasasa si aida ani sana tirani nga: ‘Bara wai mi naadia regbo tipa ka wisigopai dudunguro rogo Fugo Mbori yo? Ya mo mi naamangaha kina ho sa du mi ni na gumbapai watadu ho mi ambakada adunguratise ni?’ Kingia wo duhe, si adu niwenepai ka ani mangisunge na gu nyemu ani asiaha tipa irisombori nga ga aborokporo watadu wisigopai nisase tipa ka wetekapai tipa gu tatamana Yekova afuhe furani tipa si banda rani ani gbia bata.—Snz. 2:1-5.

NGARASARO NAUNDO RANI ANI HIPAI

14. Wai Ziazia Kekeapai ayugo gupai nga Yekova namaa berãko amaa fuo gaani aberãpai?

¹⁴ Davide agbiatiko na dungu fudifudiapai rogo gako raka yo. (1 Sam. 30:3-6) Ziazia Kekeapai nayugo gupai nga Yekova aima rugatiko na agu aberã ko adu nani. (Oni gedi Atambuahe 34:18; 56:8.) Mbori ima rugatiko na gaani aberãpai a. Ho du ‘kpotoraniyo ni na rungo’ na ho ‘tororani aima’ ni, ko rengbe ka gberani koyo du ko ni. Gipai re nisaha rengbe ka fu wasa furani a wa si adu tipa Davide nabibia ki yaa: “Mi adú pusiapusia ki ningi tipa ga weneringise, bambiko mo abi gi gberãngbi, mo aini pa ga mbisimore fudifudiapai.” (Tam. 31:7) Ono Yekova namanga dungu apai furani susi bi kina gaani fudifudiapai sa gbua. Ko nafu wasa furani na kini ngarasi rani. Gu gene ko amanga gipai re ngbaha nga agu adunguratise nga ga aKristano.

15. Ginipai rengbe ani ka wirikaha ti gupai namangi Asafa?

¹⁵ Gu undo du ti du pati adunguratise, ani nabihe ti gu kpiapai naadu tipa gu bake papara Atambuahe nangia Asafa. Pa berã Asafa kurii iraira sarangbanga asako ko bi gupai nga nyakingo pa iriso Yekova te. Bakere gberarago aziko. Ko afura tipaha ki yaa: ‘Mbisimore arungo, pai ki rũ re kpotoreyo.’ Nisangbana gipai re, ko ambedi ka mbu iriso Yekova. Ginipai naundo Asafa tipa ko rugu gako berãpai? Ko ayaa: ‘Mi arimi ku rogo ga Mbori kparakpara ziazia ba.’ Ko atona kadu na wene bipai kina fuo da ko dagba akurako airisi Yekova. Ko abi gupai nga gu diabese gu gbegberẽ aboro re adu nani, si adu tipa kina guru regbo gbua, na ki bi gupai nga Yekova nika ruga apai aruga. (Tam. 73:2, 13-22) Kina gu bangisapai re du tipa rani. Asadatise ka sovura kuti gu iraira sarangbanga du rogo gi ga Satana zegino re rengbe arengba ka nyasa riipa omerani. Dungura ani tirani na akuarani rengbe ka ngarasa rani na ki undo rani ani banda pa gu ngbarago du ani nani tipa ka mangasunge fu Yekova.

16. Wai rengbe ani ka gbia undo ti gu kpiapai nangia ga Ana?

¹⁶ Ono ginipai rengbe ka manga ka si du nga pai kinaho rogo dungurati nasaha nikpakarapai tipa oni nindu tipa adunguratise? Isoke, si rengbe ka du nga oni mbu gu sunge oni anaamangaha rogo dungurati mbata na zee kini mangi roni, watadu zanga giatise gu du dagbaroni na wirina. Kangia wo duhe, gu kpiapai nangia ga Ana ima rengba ka undo roni. (Oni gedi 1 Samuere 1:4-8.) Gu pangbanga re nagumba gupai nga ri adu nifudifudi ri gbe be gu iwari nangia Penina. Na gupai re aagberã na agarã dunduko ti agu aregbo gayo aborokporo anaandu tipa ka fu motumo fu Yekova Siro yo. Gipai re anaafuda Ana nikerehe ri kini ‘kpari zanga ri riahe.’ Ono wa si avura duwo, ri ambunga nduge tipa ka iriso Yekova te. Yekova akparia padu ri niruru ri na ki fu maku furi.—1 Sam. 1:11, 20.

17, 18. (a) Rogo gini gene ani agbia ngarasaro pati agu adunguratise nga ga dungurati? (b) Gini bipai du oni nani tipa gu ga Yekova bandahe nga ga nyemuse ko afuhe furani tipa ani gbia bata?

¹⁷ Wene ndupai kinaho areme be aKristano si aida i wiriki gu kpiapai nangia ga Ana ti ni nibipa nduge tipa adunguratise dedede. A wa bi ani he dunduko, adunguratise nafu ngarasaro furani. (Eb. 10:24, 25) Gu wasa nga ga akuarani aidipase nangarasa rani angarasa. Boro ima rengba ka gumba gupai rengbe ka undo rani rogo karagapai watadu rogo gumbapai yo. Wirina ima rengba ka degatuni watadu ka gumba gupai nika fu ngara furani mbata fu dunguratise watadu tifuoho. (Snz. 15:23; 17:17) Ho ani abibia ni na fugo rani kuari, si nangarasa rani angarasa. Gbe, ani naida na gu ngarasaro ani naagbiaha ba dunguratise yo ho du ani ni na ‘sakapai kpotoraniyo,’ mbiko yo Yekova ariga rani ni na ‘gako wasawasa apai’ na kini songodi rani tipa ani nye niruru rani.—Tam. 94:18, 19.

¹⁸ Gu ga Yekova bandahe nga ga nyemuse nasa rani ani du nibandabanda rani wa gu Asafa adu ho ko abibia ni fu Yekova ki yaa: “Mo nazada kumbabere. Mo nagasa re na sangbaro.”—Tam. 73:23, 24.

[Gu sura du ti kpewaraga 29]

Kina Yekova nagbe roni koyo du ko ni a

[Gu sura du ti kpewaraga 30]

Banda ani ga Yekova arugute nasa rani ani du nibandabanda rani

[Gu sura du ti kpewaraga 31]

Gu ngarasaro ani agbiaha naundo rani ani hipai