Da Nga Mbori?

1. Tipagine si aida ani irisi Mbori ti ni?

Ndikidi Mbori nakusi ahe dunduko. Ko aadunga na tonatona ko ti ni te, na digido ko adunga ti ni a te. (Atambuahe 90:2) Ko du gu wene pangbanga du rogo Ziazia Kekeapai aye beko. (1 Timoteo 1:11) Wa duhe nga Mbori nga Baenge unga, si naida ani irisi kinako sa.​—Mo gedi Yugoti 4:11.

2. Wai gu du Mbori?

Boro ho naabi Mbori te mbiko ko nga Toro. Toro nga gu ngbatunga unga du kuari ti gaani. (Yoane 1:18; 4:24) Wa vura duhe wo, ani rengbe arengba ka ino asino Mbori ti agu ahe ko akusihe. Nikpiapai, ho ani abi wai ni du rago nimbakadimbakadihe na zukuzuku ahe ngba-arikoho na ambumbudo, ani naino pa ga Mbori nyemuse na tatamana. Bakio ngbangbaturũ na kpotosende nayugopa gako ome.​—Mo gedi ARomo 1:20.

Ani rengbe ka wirika kura apai tipa asino Mbori nigeda ani Ziazia Kekeapai. Nikpiapai, si nape gupai furani Mbori aida nani na gupai ko aidanga nani ya, wai ko amangapai na aboro, na wai ko amangapai ho aboro amanga wenepai ni watadu gbegberẽpai.​—Mo gedi Atambuahe 103:7-10.

3. Ya mo Mbori na rimoko ti ni?

Yesu ayaa: ‘Barani du ngbangbaturũ yo, ani irisi rimoro airisa.’ (Matayo 6:9) Wa vura duhe nga dungu afugo i ayamba Mbori nani, rimoko gbua kina sa. I ayambanga gu rimo re kina sa rogo afugo dunduko te. Rogo pa-Zande, si nga “Yekova.”​—Mo gedi Atambuahe 83:18.

I aima dia rimo Mbori kusayo rogo dungu aZiazia Kekeapai ki moi kina agu afugo kubaha nga Gbia watadu Mbori. Ono ho i ake Ziazia Kekeapai ni, rimo Mbori nga Yekova adu rogo yo wa bara 7,000. Yesu asa rimo Mbori aboro inihe nimangako sunge nani ho ko anaayugopai ni fu aboro tipa Mbori.​—Mo gedi Yoane 17:26.

Mo bi gu vidio re Ya mo Mbori na Rimoko Ti Ni?

4. Ya mo Yekova naberã parani?

Ya mo pa kio ome arungo nayugo gupai nga Yekova Mbori aberãnga parani te? Gu kura aboro naberãha nga Mbori nayena arungo niˈasada furani, ono rengo ngaha te.​—Mo gedi Yakoba 1:13.

Mbori afu gu ranirii fu aboro nga ga siapai. Ya mo si aidanga ani yugu gaani tambuahe mbiko du ani na ranirii ka sia ka mangasunge fu Mbori te? (Yosua 24:15) Ono dungu aboro sia kaa manga kina gbegberẽ apai fu akurayo, si kini sa gupai nga arungo moipai. Rago nagberã agberã ti Yekovaho ko abi gu iraira mangaapai re ni.​—Mo gedi Bambata Pai 6:5, 6.

Yekova nga gu Mbori naberã parani aberã. Ko naida ani gbia ngbarago rogo raka yo. Barambeda, ko nika nyasariipa gbegberẽ apai na agu aboro namangaha. Wa du rago tie re, Yekova gu duadu na wene ndupai beko ka mbugene fu arungo tipa wiri bete regbo. Mo nika ino gu ndupai re rogo gu 8 Wirikapai.​—Mo gedi 2 Petero 2:9; 3:7, 13.

5. Wai rengbe ani ka mbeda na Mbori?

Yekova nayamba rani tipa ani mbedi koyo du ko ni rogo kparakpee yo. Ko nakpinyemurani wadu ani nibasasa dunduko. (Atambuahe 65:2; 145:18) Ko na nyemu ka mbupai furani ti gaani aingapai. Ko ima inopa gu asadatise ani amangaha tipa ka manga gupai ngba tiko, si ki vura du vurũ nga ani nati ati ti mangaha ti kura aregbo. Wa vura du ani na zangarengba, ani ima rengba kadu na wene pagume dagbarani na Mbori.​—Mo gedi Atambuahe 103:12-14; Yakoba 4:8.

Wa duhe nga Yekova nafu unga furani, si naida ani kpinyemuko susi aboro dunduko. (Marako 12:30) Wa mo nika yugo ga nyemuse tipa Mbori niwirika mo pai tipa ko na kini mangi wa ko akpinyemuhe, si nika ka sa gupai nga mo mbedi na ko gbe.​—Mo gedi 1 Timoteo 2:4; 1 Yoane 5:3.