Wai Rengbe Oni Ka Gbia Ngbarago Rogo Gaoni Ramukporo?

1. Tipagine si aida ti ni kumba na dee rogatiyo kuti ndiko angianga ka zio kina badia gbua ya?

Gu wene pangbanga du rogo Ziazia Kekeapai naye be Yekova, nga Mbori ngbarago, na ko naida aborokporo dunduko duna ngbarago. Ko naatona pa rogatise. Si ninyanyakipa pai rogatise du kuti ndiko bambiko si nasa gupai nga kporo du na nyemuse gbiati ngbarago rogoho na avunguagude ki rengbe ka sonosa awiriyo wenengai. Si naida aKristano irisi agu andiko du rogo gayo ringara nibipa kepa rogatise.​—Mo gedi Ruka 2:1, 4, 5.

Mbori nabi rogatise wai? Ko naida si du nigu kodatise nika nyeanye kindi dagba kumba na dee. Yekova naida kumbakudee du sa fu kina diako, diako kidu sa fu kinako. (AEbere 13:4) Yekova ima soga pa mbutise. (Maraki 2:16) Kinagu ka guni mangi bäri, si ka fu gene tipa gu kurani mbuni ki di kura boro berewe.​—Mo gedi Matayo 19:3-6, 9.

2. Wai si aida kumbakudee nimangi diako na diakumba nimangi kumbari?

Yekova ambakadi kumba na dee tipa guni du nimoundo fu kurani. (Bambata Pai 2:18) Wadu kumba nga bari aborokporo, si naida ko ngbembatayo rogo paye na agu ahe nga ga borose fu gako aborokporo na kini yugupai fuyo tipa Mbori. Si naida ko yugu gako nyemuse fu diako nimbuko pa kura gako apai. Si naida kumbakudee na diakumba nikpinyemu tiyo na kini irisi tiyo dagbatiyo. Wa duhe nga akumbakuadee na dereakumba dunduko nga kpakpa aboro, si naida i wiriki wai ka mbupai dagbayo bambiko mbupai rengbe ka ye na ngbarago kurogo gayo ramukporo.​—Mo gedi AEfeso 4:31, 32; 5:22-25, 33; 1 Petero 3:7.

3. Ka si du nga mo agbianga ngbarago rogo gamo rogatise te, ya mo si naida mo mbu kumbamo watadu diaro?

Ka si du nga oni nagbia tironi na kpakaraapai rogo gaoni ramukporo, si naida oni dunduko ue asadi kaa mangapai dagbaroni ninyemuse. (1 AKorindo 13:4, 5) Fugo Mbori ayanga wee kparaka nga wene gene tipa ka mbakada gu kpakaraapai nakura dagba arogotise te.​—Mo gedi 1 AKorindo 7:10-13.

4. Agude, ginipai Mbori aidaha tipa roni?

Yekova naida oni duna ngbarago. Ko nafu wene arugute furoni tipa wai rengbe oni ka gbia ngbarago ti rago parangaroni. Ko naida oni gbia undo be gu tatamana na inohe dube avunguroni. (AKorosaio 3:20) Yekova naida aida a oni gbia gu ngbarago nga ga mangasunge fu Bakusironi na fu Wiriko.​—Mo gedi Batungusipai 11:9–12:1; Matayo 19:13-15; 21:15, 16.

5. Avunguagude, ginipai si aida oni mangihe tipa awironi gbia ngbarago?

Si naida oni mangisunge nyanyakii tipa ka gbia riahe, kporo, na rokoo tipa awironi. (1 Timoteo 5:8) Ono tipa awironi gbia ngbarago, si naida oni yugupai fuyo tipa i kpinyemu Mbori na kini wirikipai beko. (AEfeso 6:4) Gaoni kpiapai tipa yugo nyemuse tipa Mbori rengbe arengba ka sa awironi i kpinyemu Mbori gbe. Ho oni amaamburu gaoni arugute ni rii gupai du rogo Ziazia Kekeapai, agu arugute re rengbe arengba ka undo awironi gbe.​—Mo gedi Pa Fu Rugute ni Ue he 6:4-7; Asanza 22:6.

Agude nagbia undo ho oni angarasayo ni na kini tambuayo. Si naida oni zayo ti irairaapai na kini ruguyo. Ngbatunga gu rabahe re nabanda yo be gu sino mangapai rengbe ka dia gayo ngbarago kusayo. (Asanza 22:15) Ono tie, si aidanga gu rugute re du ngba iigira gene te.​—Mo gedi AKorosaio 3:21.

ADezire Yekova nakusa dungu abuku nga gudu tipa ka undo avunguagude na awiriyo. Agi abuku re dunduko mburuhe rii Ziazia Kekeapai.​—Mo gedi Atambuahe 19:7, 11.