Gini Wene Pangbanga Duho Tipa Irisombori?

1. Ya mo apambori dunduko du nikina wenehe?

Aboro kinaho rogo apambori dunduko nakpinyemu ka iriso Mbori ngba ruru gene. Si niwene pangbanga nga Mbori nabi agu aboro re abi na ko naberãpayo aberã. Ono tie, dungu gbegberẽ apai aboro amangaha nirimo pambori. (2 AKorindo 4:3, 4; 11:13-15) Ringbisihe kuti agu apangbanga naye rogo zegino, kura apambori kinaho narimiso tihe kurogo gu mangaapai nga ga abamoi, imo kura ngbatunga aboro, avura, gbiati manga agude gbegberẽe na gberesapa agude. Nairiwo wai gipai re aba gberarago ti agu aboro nakpinyemu ka iriso Mbori ngba ruru gene!​—Mo gedi Matayo 24:3-5, 11, 12.

Baraho ndikidi pambori afu taarimo ni fu Mbori, zire pambori naba kina gberarago tiko. Si nayugo agu apai adunga rogo Ziazia Kekeapai ya, kodihe na zire ayugopai tipa Mbori na tipa kpikpi aboro. Ono Yekova naida aboro ini gu rengo duho tipa ko.​—Mo gedi Yezekere 18:4; 1 Timoteo 2:3-5.

2. Gini wene pangbanga duho tipa irisombori?

Mbori ima inopa gu biriki nga ga agu apambori nayawee si nakpinyemuko ono si kini kpi kina nyemu gi ga Satana zegino re nzunzu. (Yakoba 4:4) Ziazia Kekeapai nayamba zire pambori nga “Babera du ni bakere he.” Babera nangia gu bakporo zire pambori aenge rogoho tingbafuo gu Ime Akangbii naye ti rago Noa. Fuo regbo tooni, Mbori nika ye na digido agu apambori nananga he na kini rungosi aboro.​—Mo gedi Yugoti 17:1, 2, 5, 16, 17; 18:8.

Kura wene pangbanga kinaho berewe. Bangiri Yekova agonga ti agu aboro du rogo zire pambori rogo zegino dunduko nga aguyo duna nyemu ka irisoko ngba ruru gene te. Ko nayugo rengo fu ngbatunga agu aboro re i kini da nikodikodiyo sa.​—Mo gedi Mika 4:2, 5.

3. Ginipai si aida agu aboro nakpinyemu rengo mangihe?

Yekova naberãpa agu aboro aberã nakpinyemu gupai nga rengo na wenepai. Ko nazungodiyo ki ya i kuru kusayo rogo zire pambori. Agu aboro nakpinyemu Mbori, i na nyemu ka manga ariapai rogo gayo raka tipa ka sa ngbarago tiko.​—Mo gedi Yugoti 18:4.

Rogo bambata sa kama agarã, ho agu aboro nakpinyemu rengo agi wene pangbanga ni ngba amokedi, i aduna bakere ngbarago kisusi. I awiriki vovo gene raka be Yekova, nga gu gene raka ngba kisusi, na i ki gbia maabangirise. I nga wene kpiapai furani areme bambiko i agi wene pangbanga si ki sayo i peresi Yekova mbatayo rogo gayo raka.​—Mo gedi 1 ATesaroniko 1:8, 9; 2:13.

Yekova nadia agu aboro kugume nambu zire pambori kini ye kurogo ndikidi pambori. Ka mo di ga Yekova yambahe kugume, mo duadu nibakureako, ki rimi ku dagba agu airisiko duna nyemuse, na ki gbia nyenye unga.​—Mo gedi Marako 10:29, 30; 2 AKorindo 6:17, 18.

4. Wai Mbori nika ye na ngbarago kurogo arago dunduko?

Gu sapangbanga zire pambori naye nga wene pangbanga. Si nika ye na bata fu aboro be rungosiro. Zire pambori adunga ho berewe kaa ingisa aboro na kini kparakayo te. Agu aboro dunduko nikaa raka nikadu nikpamiakpamiayo kini irisi bangisa ndikidi Mbori.​—Mo gedi Yugoti 18:20, 21; 21:3, 4.