Mbakada Gaani Gene Tungusapai​—Undo Agu Aboro ‘i Aima Ringbisa yo’ Tipa i da ni Abawiriki

NDU GUPAI DUHE TI NI NA NYANYAKIPAHA: Yekova nasa gu tunga nga ga rengo si sono ngbadu “agu yo i aima ringbisa yo sa nyenye unga.” (Amo 13:48; 1Kor 3:7) Ani namangasunge na ko wa sa ni maa ani berãrani gene tungusapai yo fuo agu aboro namangapai kuti gupai i awirikaha. (1Kor 9:26) Si naida abawiriki Ziazia Kekeapai rugutiyo na gupai nga, gu bapatiza nga ga aKristano na nyanyakipaha tipa ka gbia bata. (1Pet 3:21) Ani naundo yo tipa i da ni abawiriki niyugo ani pai fuyo i mangi ariapai rogo gayo raka yo, i tungusipai na kini yugupai, na i kpara gayo raka fu Yekova.​—Mt 28:19, 20.

WAI RENGBE BORO KA MANGAHA:

• Mo tingidi gamo abawiriki Ziazia Kekeapai na gupai nga, ndu gupai i awirikapai ti ni nga ka ‘ino’ Yekova na ka sa ngbarago tiko.​—Yo 17:3

• Mo undo yo i mangi sonakumbatayo rogo toro yo ni dia yo be akpakarapai, wa gu nga, gbegberẽ mangaapai na gbegberẽ kodatise

• Mo nyakasiyo na ki ngarasiyo mbata fu zio yo bapatiza na tingbafuoho.​—Amo 14:22

ONI MOI GU VIDIO NGA, YEKOVA MBORI NIKA UNDORO AUNDO, NA FUOHO, ONI KI KARAGAPAI KUTI AGI ASANAHE DU KUSENDE RE:

• Gini gunde rengbe ka ga na boro kusayo ti kparatise na bapatiza?

• Wai gu rengbe abaakumba ka undo abawiriki Ziazia Kekeapai i mangi sonakumbatayo rogo toro yo?

• Ginipai Yesaya 41:10 ayugoho furani tipa Yekova?

• Gini asino nika undo rani tipa Yekova idi na ani, wa vura du ani ni kpakpa aboro?