Awetekapai Tipa Waraga Dunguratise Nga ga Gaani Raka na Sunge
BUZA 5-11
AŨKUMUKO ROGO FUGO MBORI YO | 2 TIMOTEO 1-4
“Mbori Aafunga Toro Gunde Furani Te”
(2 Timoteo 1:7)
Paranga Aboro, Oni Sa Gaoni Sona Kumbatayo Na Apai Si Du Niyuguyuguhe
9 Kusa, Pauro anyakasi Timoteo ki ya: ‘Mbori aafunga toro gunde furani te; ono gu nga ga ome na nyemuse na rugatinapai.’ (2 Tim. 1:7) “Rugatinapai” nga ka ino wai ka berã wenengai tipa pai. Si nakodapa hi boro gu fudifudiapai nagbia ní. Gu kura paranga aboro nidu na gu toro nga gunde na i kini idi ka diabe gu fudifudiapai nagbiayo nifuyo tiyó sa bakere rame watadu bi terevizioni, dia kere angua kutii kpotoseyo watadu bakere mbira buda, manga wiri apumbo dedede, gbiati kodaba. Ziazia Kekeapai naruga aKristano i ‘mbu agu apai zanga sinombori na gu nyemuahe nga ga zegino, kidu na rugatise, na rurupai, na sinombori, rogo gi zegino du awere re.’—Tito 2:12.
(2 Timoteo 1:8)
‘Mo Dú Nyanyaki Ki Du Na Bakere Erã!’
7 Nike Pauro waraga fu Timoteo, ko aya: “Mbori afu nga toro gunde fu rani te. . . . Were ka zee mángi nga ro mbiko . . . [manga dezirepai tipa] gaani Gbia ya.” (2 Timoteo 1:7, 8; Marako 8:38) Fuo geda ani agu afugo re, ani rengbe ka sana tirani ki ya: ‘Zee naamanga re amanga tipa gimi idapase, watadu mi naafura zanga gunde? Ba gimi sunge yo (watadu kangia mi nga gude sukuru), mi naasa agu aboro du pati re i ini gupai nga, mi nga guni sa dagba aDezire Yekova, watadu mi naa’asada tire ka oka gi rengo re aoka, kina zee ninaamanga re ka mi mangi tire kia ti kura aboro? Watadu mi nidu na ngbarago ka du kia ti kura aboro mbiko gu gimi pagume du dagba re na Yekova?’ Kangia boro ho na gbegberẽ aberã tipa tungusa wene pangbanga watadu tipa ka songoda gupai angbanga ti kura aboro ya, ni tingidi ga Yekova rugute fu Yosua, nga gu ko agumbaha ki ya: “Mo dú nyanyaki ki du na bakere erã.” Ka bangironi gonga ya, anga gupai nyakipaha gbe si nga gu berã nga ga gaani badiasunge watadu ga gu kuarani du ani na ni sukuru yo te, ono gupai nyakipaha gbe nga gu bipai nga ga Yekova na ga Yesu Kristo.—AGaratio 1:10.
Gbata gu Nyanyakipa Ahe Nga ga Toro
(2 Timoteo 2:3, 4)
Oni Gbata Ndikidi Aũkumuko
13 Timoteo angia gu kumba naadu na idapase tiko. Tingbafuo Pauro yambu Timoteo nga “ga Kristo Yesu wene banzengere,” Pauro ape gupai fuko nga: “A nga banzengere navoda tini na pa gi unga re ho du ni ni ti ngba vura wa sa te; ni ngba bangiri gu ni nasia ni ni du ni banzengere.” (2 Tim. 2:3, 4) Agu apefuo Yesu du areme kodihe na agu abanzengere namangasunge Kindo ti aregbo dunduko nga aguyo bangeyo naima susa mirioni sa, namangapai kuti gu ga Pauro rugute re ringbisihe kuti wai du apai tipa yo. I nasovura kuti sosodahe nga ga agu aboro natakapande bagibagiahe gbiati gu sosodahe nga ga gu zegino du yo rogoho ni tingidayo gu rengo nga: “Gu ni nga badibape nga kanga fu bafubape.” (Snz. 22:7) Pai ho Satana aidaha kparakusayo ti gu nga ani gberesi gaani regbo na omerani dunduko kuti du ni akanga fu gi zegino nga ga sunge marã re te. Kura adiaberã kinaho rengbe ka sarani ani du na bape kurirani tipa dungu agarã. Pa fu boro kpuni ni ngbanga, agu abape agude sukuru adiaha, tumo bakere marã tipa tarambiri, na zavura manga bambaiko pumbo rogatise ima rengba ka sa boro ni du ni fudifudi ni ni kerehe tipa ka gbia marã. Ani nayugo gupai nga ani na tatamana ho ani asa gaani raka ni si du taata na ki umbasi agu abape du rirani gbiati gu marã ani agberesaha, ani kidu zanga pai tirani tipa kadu ni akanga fu Mbori kuba du ni akanga fu gi zegino nga ga sunge marã re.—1 Tim. 6:10.
(2 Timoteo 2:23)
Ga Yekova Aboro “Gúari Pati Ingapai”
10 Ga Yekova aboro agbianga tiyo areme na abasamungu kuti ndikidi pambori dedede rogo dungurati te. Wa vura duhe wo, ka ani gbiatirani na gu yugopai adunga kuti gu nga ga Ziazia Kekeapai ya, ka si vura du nga ani gbiaha wari, si naida ani sogoho asoga. Gbegberẽpai du ngaha furani ka sakapai na abasamungu, singia ka sungo na yo rogo ba sa, keka awaraga fuyo, watadu kaa fura na yo ngba kura agene. Ka si vura du nga ani naida ka undo ni, gu ngbatunga sakapai re andunga sa na gupai ani nawisigihe rogo Ziazia Kekeapai te. Kurigure, wangia ani ga Yekova aboro, ani aidanga ka kodatirani na abasamungu te.
Geda Ziazia Kekeapai
(2 Timoteo 1:1-18)
BUZA 12-18
AŨKUMUKO ROGO FUGO MBORI YO | TITO 1–FIREMONA
“Sia Aboro ni Abaakumba”
(Tito 1:5-9)
w14-E 11/15 kpe. 28-29
Asanahe be Agedihe
Wa vura duhe nga Ziazia Kekeapai asakanga pai futufutu tipa wai i anaasia aboro bakuru kusayo te, ani nabi bete apai abi nga gu nayugo wai i anaamangaha. I nagumba gupai furani nga ho Pauro na Barunaba aayego ni gene gayo bambata nunguro yo nga ga amokedi, ‘i amoi abaakumba fu yo rogo akanisa dũ, ki nikpari nigina riahe, i ki fu yo ku be Gbia, nga gu ko i aidi pa ko.’ (Amo 14:23) Tingbafuo agarã kusa, Pauro akepai fu badiangbako nangia Tito ki ya: “Mbiko gi pai re mi ahe ro Kurete yo, ya mo mbakadi agu pai nakpa, ki moi abaakumba rogo akanisa rogo abaakporo yo dũ, a wa mi aasia pa ha foro.” (Tito 1:5) Wakina gure a, si nangera wa i afu kina gi bangisa pagbia re a fu Timoteo nga gu ko nanaandu anunguro na Pauro ti aregbo dũ. (1 Tim. 5:22) Si tie ziazia nga, agu ababiapai ninaata ata du nanaana sia aboro angianga amokedi na agu abaakumba naadu Yerusarema yo ya.
Na gi kpiapai nga ga Baibiri re berãseyo, Riigbu Bipasunge nga ga aDezire Yekova ima manga ariapai kuti wai i asia abaakumba gbiati amoundo abaakumba. Naatona rogo Mbirinvuo 1, 2014, i nasia aboro ngba gi gene re: Babi adungurati nafugöpai sirisiri tipa agu aboro i nafu rimoyo nga i rẽ arẽ tipa sunge rogo gako badona nga ga adungurati. Ti regbo gako nduge ku rogo agu adungurati re, ko nika manga ome tipa ka ino agu aboro i natambua rimoyo re, ni nduko nayo wa sa gene tungusapai yo ka rengba du. Tingbafuo ko sakipai na gu gbuu nga ga abaakumba tipa agu aboro i natambua rimoyo re, babi adungurati na pagbia beko ka sia aboro ni abaakumba na moundo abaakumba rogo agu adungurati du rogo gako badona nga ga adungurati. Ngba gi gene re, gi mbakadapai re kini du mbembedi na wai i anaamangaha rogo bambata sa kama agarã.
Da du nangera fuo agu apai dunduko du rogo gi mbakadapai re? A wa si nidu ti aregbo dũ, “kangara moyambu” du du na gu tindiro nga ga riga aborokporo. (Mat. 24:45-47) Si nakoda weteka Ziazia Kekeapai na gu undo nga ziazia toro tipa gupai nga ka fu arugapai tipa wai ka mangapai rogo mangimangipai yo kuti gu bangua arengo nga Baibiri nga gu du na maapai kurii wai i amangapai rogo agu adungurati du rogo zegino dunduko. Kangara moyambu nasia ababi adungurati dunduko gbiati agu aboro du rogo gu Rondo nga ga Be-Basunge. Abe-basunge tigaha ni basasa, kini fu undo tipa wai ka mangapai kuti gu rugapai ye be Riigbu Bipasunge. Abaakumba ni basasa rogo gu gbuu nga ga abaakumba du na gu tindiro nga ga fugöpai sirisiri tipa gu pa rẽ tipa sunge nga ga agu awirina i atambua rimoyo tipa i siayo rogo ga Mbori dungurati. Ababi adungurati dunduko ni basasa du na gu nyanyakipa tindiro nga ka wisigo agu aboro abaakumba natambua rimoyo ki mangi kparakpee na fuoho, i ki sia agu aboro rẽ tipa sunge.
Gbata gu Nyanyakipa Ahe Nga ga Toro
(Tito 1:12)
w89-E 5/15 kpe. 31 genewa. 5
Asanahe be Agedihe
Nirengo, ko aaidanga kuti ai ngbatunga gbegberẽ bipai tipa kura aboro watadu gbegberẽ afugo tipa ngbatunga nibipa aKureto te. Ani rengbe kadu na kido nga wo du si adu mbiko, Pauro aima ino gupai nga rogo gu ringara nangia Kurete, wene aKristano adu kina yo nga aguyo Mbori aima ida nayo na ki mbediyo ni ziazia toro. (Amokedi 2:5, 11, 33) AKristano aima du yo ni badunguyo nga aguyo naima rengba ka kusa dungurati rogo ‘abaakporo dũ.’ Kina rengo nga agi aKristano re aangianga rengberengbe aboro te, ani ima rengba kadu na kido nga i aangianga airaziree, aira nyomoro na airaangbu te; wa ka si adu wo, ka Yekova aandunga kumbatayo kaa ida na yo te. (AFiripoio 3:18, 19; Yugoti 21:8) A wa ani abihe ti agu aboro du rogo zegino areme, si nawira wa kura aboro nga aguyo nakpinyemu rurupai adu kina ho rogo gu ringara nga Kurete nga aguyo rago anaagberã tiyo na gu gbegberẽ mangapai naadu patiyo na naadu regerege tipa ka mangapai kuti gu pangbanga nga ga aKristano.—Yezekere 9:4; mo ringbisihe na Amokedi 13:48.
(Firemona 15, 16)
Fugo Yekova Niungaha
Memeapai Rogo agu Awaraga Pauro Akekehe fu Tito, fu Firemona, na fu AEbere
15, 16—Tipagine Pauro aasananga Firemona ti ni ko zaki Onesima ti sunge akanga ya? Pauro aaida ka nye kina kuti gako sunge nga ga ‘tungusapa ga Mbori ngbii, niyugupai tipa Gbia Yesu Kristo.’ Sidu, ko aaidanga ka rimiso tiko ku rogo agu apai nabipa wai aboro asungo na akurayo wa gu du tipa sunge akanga te.—Amo 28:31.
Geda Ziazia Kekeapai
(Tito 3:1-15)
BUZA 19-25
AŨKUMUKO ROGO FUGO MBORI YO | AEBERE 1-3
“Oni Kpinyemu Rurupai na ki Sogo Irairapai”
(AEbere 1:8)
w14 2/15 kpe. 5 genewa. 8
Oni Taasirimo Kristo Nga Bakindo Taarimo!
8 Yekova amoi Wiriko ni Bakindo kurii ga Masiya Kindo ngbangbaturũ yo rogo 1914. Gu “ngbondo” nga ga ga Yesu zogarago, si nga “ngbondo rurupai,” si du rengbe ani ti ni kadu na kido nga gako zogarago nika du ni wenehe na ni ruruhe. Gako pagbia rẽarẽ mbiko ‘Mbori nga gako mbatabakindo.’ Gure nga Yekova nga mburu gako zogarago. Kurigure, ga Yesu mbatabakindo nika “nyeanye kindi.” Ya mo mo na ngbarago ka iriso Yekova tiibe gu bakere Bakindo ko namoiko te?
(AEbere 1:9)
w14 2/15 4-5 ¶7
Oni Taasirimo Kristo Nga Bakindo Taarimo!
7 Oni gedi Atambuahe 45:5. Bakindo naora ri pusi farasi nga gu narukuba gu vura du ni ziaziaha na ni ruruhe bangiri Yekova. (Yugo. 6:2; 19:11) Kupati basape, ko a na mboto beko. Ani nagedapai nga: “Oni ngére, mi ki bi farasi ni pusi ru, mboto ki du be gu ko nasungu auru ru; i ki fu kpakpari fu ko. Ko ki ta kura nidi be apai, ki ndu ka dia be apai.” Basape gbiati mboto narukuba guhe Kristo nika mangasunge na ni tipa ka gbarasa avurako.
Gbata gu Nyanyakipa Ahe Nga ga Toro
(AEbere 1:3)
it-1-E kpe. 1185 genewa. 1
Kpia Bako
Ya mo Yesu aayugo kpia Bako kina wai ko ayugoho awere?
Bambata Wiri Mbori, nga guko naada kusa ni gu kumba nga Yesu, ko rogo kpia Bako yo. (2Kor 4:4) Nirengo, kina boro gu Wiri re du Mbori aafura fuko ho ko ayani wẽ, “Ani fú boro ni kpiarani,” padu gi Wiri re rogo kpia Bako yo, Bakusiahe, aima duho tona ti kina gu regbo i akusi gi Wiri re. (Bam 1:26; Yo 1:1-3; Koro 1:15, 16) Ho ko adu ni auru kpotosende ni rengberengbe boro, ko aima yugo asino Bako ni bakerehe gbe wa rengbe boro ka mangaha, si du ko arengbe ti ni ka ya, “gu ni bi re ni bi Buba.” (Yo 14:9; 5:17, 19, 30, 36; 8:28, 38, 42) Ono tie, gi yugo kpia Bako re, akii berewe kumbatayo ti gu regbo Yesu azingibekpio ku rogo gu unga nga ga toro na ti gu regbo Bako nga Yekova Mbori ‘aˈasia pa ahe dunduko ku ngbangbaturũ yo na ku sende no’ fuko. (1Pet 3:18; Mt 28:18) Wa duhe nga Mbori aima kiisopa Yesu “gbe,” Wiri Mbori nayugo kpia Bako awere ni bakerehe gbe kisusi gu ko aayugoho mbata fu ko guari ngbangbaturũ yo ka ye ku auru kpotosende ane. (Frp 2:9; Eb 2:9) Ko awere nga “ndikidi kpiako [Mbori].”—Eb 1:2-4.
(AEbere 1:10-12)
it-1-E kpe. 1063 genewa. 7
Ngbangbaturũ
Agu fugo du rogo Atambuahe 102:25, 26 si tipa Yekova Mbori, ono gu mokedi nangia Pauro amangisunge na ni nibipa Yesu Kristo. Si wo mbiko gupai nga bangisa Wiri Mbori nangia gu boro naarukuba Mbori nga guko i afu gu sunge fuko nga ga mbakada zegino dunduko. Pauro ayugu gu kparakparapai du bangbanda padu Wiri nyeanye kindi na gu kusikusiahe Mbori ambakadihe nga gu ko naima rengba ka ‘mína ha amina wa gbanga remu’ na ki moihe kusayo.—Eb 1:1, 2, 8, 10-12; mo ringbisihe na 1Pet 2:3.
Geda Ziazia Kekeapai
(AEbere 1:1-14)
BUZA 26–MBIRINVUO 1
AŨKUMUKO ROGO FUGO MBORI YO | AEBERE 4-6
“Oni Mangi Ome Tipa ka Rimo ku Rogo ga Mbori Ongoda”
(AEbere 4:1)
(AEbere 4:4)
w11 7/1 kpe. 24-25 genewa. 3-5
Gine Nga Ga Mbori Ongoda?
3 Nduapai ue nasa rani ani dakuti gupai nga ga Yekova uru ongoda aandu kindi rogo bambata sa kama agarã. Ni bambatapai, ani makianga gupai Yesu agumbaha fu agu asogoko naabira ko tipa husa boro Rago Sabiti. Ko aya fuyó wẽ: ‘Buba namanga sunge amanga kindi a wa du rago re, mi nimangi sunge a.’ (Yo. 5:16, 17) Ginipai nzunzu Yesu aaida ka gumbaha? I akitingbanga Yesu nga ko namangasunge Rago Sabiti. Gupai ko agumbaha fuyo nga, “Buba namanga sunge amanga kindi,” si adu nikaragapai kuti gu gayo kitangbangase re. Boro gupai nzunzu Yesu aaida ka gumbaha nga: ‘Mi na Buba, ani namanga kina bangisa sunge. Wa duhe nga Buba aima digo nimangisunge rogo gako uru ongoda nga gu naima susa akutu agarã, si rẽarẽ a fere mi naamangasunge kindi, zavura Rago Sabiti.’ Agu afugo Yesu re nayugo gupai nga ti gu regbo re, gu saba uru, du nga ga Mbori uru ongoda ti kusa ahe auru kpotosende re aandu kindi. Yekova aamangasunge kindi tipa ka digiso gako ringbisapai tipa aboro na kpotosende.
4 Gu ue ndupai nayugo gupai nga ga Mbori uru ongoda aandu kindi rogo bambata sa kama agarã nga gupai gu mokedi nangia Pauro agumbaha. Ho ko afura ni tipa ga Mbori uru ongoda nga gu gumbayo paha rogo Bambata Pai 2:2, ko akepai ki ya: ‘Ani nga agu yo naima ida paha ani narima ku rogo gu ongoda yo re.’ (Eb. 4:3, 4, 6, 9) Sidu, gu saba uru re aandu kindi ti rago Pauro. Gini regbo gu uru ongoda re nika digo?
5 Tipa ka karagapai kuti gu sanahe re, si naida ani tingidi gu ringbisapai naadu berã Mbori yo tipa gu saba uru re. Bambata Pai 2:3 nagumba gupai nga: ‘Mbori ki fu maku ku ri saba uru ki kpara ha ziazia.’ Yekova akpara gu uru re ni ziaziaha tipa ka digiso gako ringbisapai rogoho. Gu gako ringbisapai re nga kpotosende hi be ruru aboro nga aguyo nika ngerafuoho na gu unga ahe du rogoho. (Bam. P. 1:28) Pa gu ringbisapai re du Yekova gbiati Yesu Kristo nga “gbia sabiti” ‘amangasunge ti ni kindi’ da ku awere. (Mt. 12:8) Ga Mbori uru ongoda nika ndu da kuho ko nika digiso gako ringbisapai ni ti digido gu ga Yesu zogarago nika du tipa agarã kutu.
(AEbere 4:6)
Gine Nga Ga Mbori Ongoda?
6 Mbori aima sakapai tipa gako ringbisapai wenengai fu Adamu na Eva, ono i aamanganga pai kutini te. Adamu na Eva tigu nangia gu bambata aboro nasamungu kuti Mbori, ono tona ti gu regbo re ka da ku awere, dungu amirioni aboro samungu kuti Mbori. Zavura gu ga Mbori siasia rikaaboro nangia awiri aYisaraere, i aima samungu kutiko. Pauro aima zinahe a fu agu aKristano naadu rogo bambata sa kama agarã ki ya i bi tiyo i andu ka ti ku rogo gu kpia basapai yo nangia ga aYisaraere. Ko akepai fuyo ki ya: “Si du ani ka fu tirani ti ni nyanyaki ka rima ku rogo gu ongoda re, ka boro ti nga ku rogo kpia gu basapai re ya.” (Eb. 4:11) Oni makia gupai nga Pauro akodi basapai na zanga rimo ku rogo ga Mbori ongoda. Rogo gipai re yo nga gine furani? Ya mo rogoyo nga ka ani samungu kuti ga Mbori ringbisapai, ani rimingo ku rogo gako ongoda te? Nirengo, gu karagapai du kuti gu sanahe re na nyanyakipaha furani gbe, na ani nika makiapai tipaha ni bakerehe. Ono mbata fu gure, ani wirikinga gu kura apai berewe tipa rimo ku rogo ga Mbori ongoda ni wisigo ani gu gbegberẽ kpiapai nangia ga aYisaraere.
(AEbere 4:9-11)
Gine Nga Ga Mbori Ongoda?
16 Ndikidi Kristano ho areme nakakuti gupai nga tipa boro gbia bata, ní duwa ka ní pekefuo ga Moize aNdiko te. Gupai ga Mbori toro adu kugii Pauro tipa ko kehe fu agu awirina nadu Efeso yo, si ziazia. Ko aya: “Oni abati mbiko undahe mbiko idapase; mbiko roni tigaoni te, ga Mbori gamunihe du; mbiko mangapai te, gu boro ka abia tini.” (Ef. 2:8, 9) Ginipai tie rengbe aKristano ka mangaha areme tipa ka rimo ku rogo gu ongoda nga ga Mbori? Yekova asia gu saba uru, nga gako uru ongoda tipa ka digiso gako ringbisapai tipa kpotosende na gu ruru aboro du rogoho. Ani rengbe ka rimo ku rogo ga Yekova ongoda ka ani agiasangbako gbiati gako riigbu.
17 Ka ani abingo agu arugute ani agbiaha be ‘ruru kangara moyambu’ na nyanyakipaha ya, ono kini bi kina gupai ngba tirani na nyanyakipaha, ani mangingo pai ringbisihe kuti ga Yekova ringbisapai te. Gipai re rengbe ka gbarasapa gu ngbanya du dagbarani na Yekova. Rogo gu kekepai naye fuo gere, ani nika fura tipa agu apai nagbia ga Mbori aboro, na wai agu adiaberã i amangaha nibi agu apai re ayugo singia i nga aboro basasangba watadu aboro giasangba, na singia i rimi ku rogo ga Mbori ongoda watadu i atarimongo te.
Gbata gu Nyanyakipa Ahe Nga ga Toro
(AEbere 4:12)
Asanahe Be Agedihe
Ginihe nga “gu pai nga ga Mbori” AEbere 4:12 aya tipaha wẽ si “du na unga, ki du na tandu”?
▪ Agu apai gu veresi re afura tipaha nayugo gupai nga gu mokedi nangia Pauro aafura tipa gu pangbanga, watadu agu apai du tipa ga Mbori ringbisapai a wa duhe rogo Ziazia Kekeapai yo.
Dedede, wo i naake AEbere 4:12 rogo gaani awaraga yo tipa ka yugo gupai nga Ziazia Kekeapai na kina ome behe tipa ka aria ga aboro raka, na si rẽarẽ tipa i fura tipaha ngba gu gene re. Ono tie, si angba gbe ka ani asadi ka bi AEbere 4:12 rogo gu kura gene berewe. Pauro aazungodi agu aKristano nangia aEbere tipa i mangipai kuti ga Mbori ringbisapai. Gu dungu aringbisapai re aima du rogo Ziazia Kekeapai yo. Pauro amangisunge na gu kpiapai nangia ga agu aYisaraere Mbori abatasi yo Ezipeta yo. I adu na maabangirise tipa gu mokido naadu tipa gu ringara “du adu na mamuanya na nzeme anyege kpaima,” nga gu i arengbe ka gbia ndikidi ngbarago rogoho.—Gate 3:8; Pa Rug. 12:9, 10.
Gere nangia ga Mbori ringbisapai tipa yo. Ono wa si avura du wo, aYisaraere anyakasi kpotoyo yo kusa na ka i adu nga na idapase ya, sidu, badunguyo aarimongo ku rogo gu ongoda re te. (Geda 14:30; Yos. 14:6-10) Ono tie, Pauro ape kurapai nga i adu kindi na gene beyo tipa “kidohe tipa rima ku rogo [ga Mbori] ongoda yo.” (Eb. 3:16-19; 4:1) Gu “kidohe” re ziazia nga gu papara ga Mbori ringbisapai ko agumbaha. A wa si adu tipa agu aKristano nangia aEbere, ani rengbe ka gedapai tipa gu gako ringbisapai re na kini mangipai kutini. Tipa Pauro yugu na ni nga gi kidohe re mburuhe adu rii Ziazia Kekeapai, ko adipai rogo Bambata Pai 2:2 na Atambuahe 95:11.
Nirengo, si naida si fõngbaduraniyo ani ini gupai nga “kidohe tipa rima ku rogo [ga Mbori] ongoda yo” ata digongo te. Ani na kido nga gu kidohe du rogo Ziazia Kekeapai yo tipa ka rimo ku rogo ga Mbori ongoda yo amanga amanga, na ani ima diandue tipa ka rimo koyo. Ani amanganga gipai re ni manga ani ome tipa ka kakuti ga Moize aNdiko watadu ka sa Yekova ko idi na ani ni manga ani gu kura asunge te. Kuba gure, mbiko idapase ani ima mangapai kuti gako ringbisapai na ngbarago na ani nikaa ndu kindi kumbatayo tipa kaa mangapai na gu ga Mbori ringbisapai du ni yuguyuguhe. Kurigure, awa ani nifura tipaha mbata, akutu aboro rogo zegino dunduko ima tona ka wisigo Ziazia Kekeapai na ka wirikapai tipa ga Mbori ringbisapai ko nafura tipaha. Badunguyo naima aria gayo gene raka tipa kadu na idapase na ki da ni agu aKristano naima zio bapatiza. Gu gene gipai re amanga ariapai na gayo raka ngbaha nga gu gopai nayugo gupai nga “gu pai nga ga Mbori du na unga, ki du na tandu.” Ga Mbori ringbisapai a wa gumbayo ho rogo Ziazia Kekeapai yo ima manga ariapai na gaani raka, na si nika ndu kumbatayo kindi kadu na ome kurii gaani raka.
(AEbere 6:17, 18)
it-1-E 1139 kpe. 2
Maabangirise
Gi maabangirise tipa nyenye unga re gbiati zanga zirã, si fu agu aboro nga “adi gu yambahe nga ga ngbangbaturũ” (Eb 3:1) mburuhe rii rengo na si nga guhe rengbe boro kadu na kido kuti ni. Ahe ue nasongodaha nga gu Mbori arengba nga na gumba ziree rogo ho ya, du nga, gako kidohe gbiati zungahe, na maabangirise gudu be Yesu nga gu ko du awere ngbangbaturũ yo na gu kpoto kaa kpingo ya. Sidu, i nafura tipa gi maabangirise re nga, si nga “ũzada mbisimo du ni nyanyaki he nganganga, si ki rimi ku rogo gu he du gii remu yo Yekaru yo [a wa gbiamotumo anaarimo ku rogo Kparakpara Ziazia Ba Kisusi ti rago Uru Dada Ingapai]; yo Yesu arimi ku ho ni ni bandumbatayo fu rani, ki ima du ni gbiamotumo nye anye kindi dagba gu rika nga ga Marekisedeke.”—Eb 6:17-20.
Geda Ziazia Kekeapai
(AEbere 5:1-14)