Bakio Gaoni Nyemuse Ndu Ki Da Wari?

“Mo nikpí nyemu kuaro wa mo akpi nyemu tiro.”—MATAYO 22:39.

1. Ka ani akpinyemu Yekova, tipagine du ani tini a wa ka ani aakpinyemu akuarani?

HO I asana Yesu ni ya gini rugute kiipaha gbe, ko akaragapai ki ya: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ.” Fuo gure, ko ki di fugo gu ue rugute du wa kina gu bambataha, niyaa: “Mo nikpí nyemu kuaro wa mo akpi nyemu tiro.” (Matayo 22:37, 39) Ii, nyemuse tipa akurase nga gupai i aino Kristano ti ni. Nirengo, ka ani akpinyemu Yekova, ani du wa ka ani kpinyemu akuarani. Tipagine? Bambiko ani nayugo gaani nyemuse tipa Mbori ni irisa ani Fugo ko, na Fugo ko naruga rani ya ani kpinyemu akuarani. Sidu, ka ani akpinga nyemu awirinarani ya, gaani nyemuse tipa Mbori arengbanga ka duni ndikidihe te.—ARomo 13:8; 1 Yoane 2:5; 4:20, 21.

2. Gini ngbatunga nyemuse si aida ani kpinyemu akuarani nani?

² Ho Yesu aya ni wee si naida ani nikpinyemu akuarani, anga ko aafura gbua tipa kina pabakure te. Ko aafura tipa gu nyemuse du kia ti gu nidu dagba aborokporo watadu dagba kumba na dee. Ko aafura tipa ngbatunga gu nyemuse du Yekova nani koyo du gu gako amoyambu ima kparatiyo fuko na gu nyemuse du yo nani tipa ko. (Yoane 17:26; 1 Yoane 4:11, 19) Gu bakeapai nangia Yuda—nga guko naafura ni tatamana, a wa Yesu akpariaha—aidi ga Yesu pai ya si naida ga boro nyemuse tipa Mbori duna ‘ngbaduniyo dunduko, na mbisimo ni dũ, na gani berã dũ.’ (Marako 12:28-34) Gako pai aru aru. Gu nyemuse Kristano asonosaha tipa Mbori na tipa kurani nakoda ngbaduniyo na gani berã. Gu nyemuse re ngbaduseyo na berã boro kini rugu ni ni mangihe.

3. (a) Waigu Yesu ayugupai fu “bainiparugute” ya si aidanga ko duna fitikiri bipai tipa gu boro nga kurako te? (b) Waigu du ga Yesu sanza tipa aKristano areme?

³ A wa Ruka atingidihe, ho Yesu agumba gupai ni nga si naida ani kpinyemu akuarani, “bainiparugute” asanahe ki ya: “Da nga kuare?” Yesu akaragapai na sanza. Ko ayaa, i ata kumba, ki gburi gako ahe, ki mbuko he namako pangba gene. Boromotumo asusi mbata ngba gu gene re, fuoho boro Revi ki susi. I dunduko ue naaberãnga pa gu kumba re ya. Ni yangaraha, boro Somorona ki ye, ki bi gu kumba nadu na aoro ti kpotoko re, na ki mangi fuko na bakere weneringise. Tipa gu kumba i aogo ko re, gini guni nangia kurako? Karagapai adu ziazia. (Ruka 10:25-37) Isoke gu kumba nadu na bakere inohe rogo Ndika re avura kiga ka gia gupai ngba Yesu nga boro Somorona nga wene kurako susi boromotumo na boro Revi. Si ziazia nga, Yesu aaundo gu kumba re ko nikpinyemu akurako rogo gu gene duni bakerehe gbe. AKristano nakpinyemu akurayo a kina rogo gu gene re. Ani wisiginga pa agu aboro gayo nyemuse akoda yo.

Nyemuse Dagba Aborokporo

4. Gini rago nibambataha Kristano amanga nyemuse rogo?

⁴ AKristano nakpinyemu gayo aborokporo—adee nakpinyemu akumbaayo, akumba kini kpinyemu adiayo, avunguagude kini kpinyemu awiriyo. (Batungusipai 9:9; AEfeso 5:33; Tito 2:4) Rengo ngaha, gu dada nga ga ndikidi nyemuse gudu rogo dungu akporo. Ono tie, agu atingidapai du tipa agu akporo nagburuwa, du tipa manga gbegbereapai dagba arogatise, na tipa agu agude i agindigo yo watadu i amanga fuyo gbegberee nayugo gupai nga aborokporo rogo nyanyaki rungo areme, na kiinga ndikidi nunga dagba aborokporo nga gu rengbe ka sa yo i du kina sa te. (2 Timoteo 3:1-3) Tipa ka sa gayo ramukporo si du wenengai, si naida aKristano nimangi ngbatunga gu nyemuse du ti Yekova na Yesu.—AEfeso 5:21-27.

5. Avunguagude nangera kube da tipa sonosa awiriyo, na asangbanaha ningia gine tipa dunguyo?

⁵ Agu aKristano nga avunguagude nabi awiriyo ni gu nyanyakipa he fu Yekova ha fuyo, na i nangera kubeko tipa undo ka sonosa yo. (Atambuahe 127:3-5; Asanza 22:6) Rogo gi gene re, i nasonosa gu nyemuse nga ga aKristano, nga gu naundo yo i banda awiriyo be gu gbegbere apai rengbe paranga aboro ka zio tini areme. Ni sangbanaha, dungu agu avunguagude nga aKristano abi ngbatunga gu ngbarago du wa ga gu naagude du Netherlands yo. Fuo bi ri gu bapatiza nga ga wiiri—nangia guni sa dagba agu aboro 575 nazi bapatiza Netherlands yo rogo gu garã susi—ri ake gipai naye re: “Wa du rago re, gu mosoro mi aima digo niigihe tipa agu agarã 20 susi ima kusa zuzuhe. Agu aregbo dunduko mi anaadiaha na gu ome si adihe bere—wa sa na agu aima nadu ho, na asadatise, na rungo—bangire ima go tini awere.” Nga gu ngbarago du ri nani tipa gupai nga wiiri, kina boro nisako, siapa ndusunge Yekova. Gu bange abatungusipai nangia 31,089 naafu gayo ripoti Netherlands yo rogo gu garã susi nakoda dungu aguyo nawiriki wai ka kpinyemu Yekova be avunguyo.

6. Waigu rengbe gu nyemuse nga ga aKristano ka nyakasa gu dada nga ga rogatise?

⁶ Pauro ayambu nyemuse nga ‘rengberengbe dada tipa kpamiatise,’ na si rengbe ka banda gu kpamiatise nga ga rogatise, zavura ti kpakarakpakara aregbo vurũ. (AKorosaio 3:14, 18, 19, NW; 1 Petero 3:1-7) Ho kumba atona wisigo Baibiri ni na aDezire Yekova Rurutu yo, nga wiri umba kisanga wa akirometere 700 kusayo ti Tahiti, diako asogo gupai re nikerehe. Ni yangaraha, ri arogodi agude, ki mbuko, na ki ndu kaa raka Tahiti yo. Si ki vura du wo, ko anayugo gako nyemuse kindi nikeda ko marã furi dedede na kini yambu ri rogo terefuni ka sana ri singia he ho ri watadu agude aduna zingoho. Ni manga ko ho were, ko a’asadi tiko na omeko dunduko ka manga gako asunge nga ga aKristano. (1 Timoteo 5:8) Ko anakparakpee zanga piriga ya gako aborokporo kpamiatiyo berewe, na ni yangaraha, diako akaraga tiri. Ho ri akaraga tiri ni, ko atona kaa manga ri na “nyemuse, zadapase, [na] zera.” (1 Timoteo 6:11) Rogo 1998, ko azi bapatiza na kusa, rago ki ngba tiko susi ho diako aidipa wisigo Baibiri ni. Gu dee re angia guni sa dagba agu aboro 1,351 i aawisigo Baibiri na yo rogo gu rago du tii gu be-basunge nga ga Tahiti rogo gu garã susi.

7. Kuti sangba kura kumba sa Germani yo, gine nanyakasi gako rogatise?

⁷ Germani yo, kumba asogo gu nyemu rengo nga ga Baibiri diako adu nani na ki duna gupai bangiriko zanga kapa nga aDezire Yekova nakpinyemu ka nanga ri. Ono tie, kusa, ko akepai fu gu bambata Dezire nafura na diako: “Tambuahe foro tipa yugo mo diare fu aDezire Yekova. Mbata, mi anabakabangire abaka mbiko mi agi dungu gbegbere apai tipa yo. Ono awere, fuo ndu mi ku pati gayo adunguratise na diare, mi bi wai mi aduna ingahe. Mi ini gupai nga rengo du mi agiaha, na si sa gaani rogatise ni banyanykihe.” Agu aDezire 162,932 nga ga Yekova yo du Germani yo—na agu aboro 1,773 du rogo agu akisanga du tiibe gu be-basunge nga ga Tahiti—nakoda dungu aborokporo nga aguyo duni kpamiakpamiayo rogo gu nyemuse nga ga Mbori.

Nyemuse Tipa agu Awirinarani Nga AKristano

8, 9. (a) Da nayugopai fu rani tipa ani kpinyemu awirinarani, na nyemuse nafõngbaduraniyo ani mangi ginipai? (b) Oni funga gu kpiapai nayugo wai nyemuse narengbe ka fõngbadu awirinayo i undo tiyo dagbayo.

⁸ Pauro ayaa fu agu aKristano nangia aTesaroniko wee: “Mbori nayugo pa [kpi]nyemu akuaroni fu roni tigaoni.” (1 ATesaroniko 4:9) Ii, aguyo ‘Yekova ayugopai fuyo’ nakpinyemu akurayo. (Yesaya 54:13) I nayugo gayo nyemuse rogo mangapai, a wa Pauro ayuguhe ho ko agumba gupai ni nga: ‘Oni mangipa akuaroni mbiko nyemuse.’ (AGaratio 5:13; 1 Yoane 3:18) Gere nga gupai i amangaha, ni kpiapai, ho i andu ni kaa biko agu awirina duna akaza, kini ngarasi aguyo duna gberarago tiyo, na kini undo aguyo du rurungburaa. (1 ATesaroniko 5:14) Gaani ndikidi nyemuse nga ga aKristano nafubee sa pa sona gaani paradiso nga ga toro.

⁹ Rogo gu Dungurati nga Ancón—nga gu sa dagba agu adungurati 544 du Ecuador yo—awirina ayugu gayo nyemuse rogo mangapai. Rungo nga ga zingo marã ambuyo zanga sunge watadu zanga marã, sidu agu abatungusipai re kini mo ka diaberã ka sonosa marã ni baga yo riahe fu agu abazi atĩo nadu rogo gayo dagbarago ho agiyo re anaayego ni ku kporo yo fuo zio yo atĩo yuru. Aboro dunduko nafubee tipa gipai re, kodihe na agude. Si aidi i nitona sunge saa sa nga ga yuru tipa riahe duho saa biama pangbanangbawiso ho agu abazi atĩo re ka karagatiyo ni. Gu marã awirina aasonosaha re, i anakparakaha dagba tiyo ringbisihe kuti gayo azingo. Ngbatunga gu undotise re nayugopa gu ndikidi nyemuse nga ga aKristano.

10, 11. Waigu rengbe ani ka yugo nyemuse tipa agu awirina ani ainonga yo ya?

¹⁰ Ono tie, anga gaani nyemuse nadigo kina kuti agu aKristano nga aguyo ini ani yo te. Gu mokedi nangia Petero ayaa: “Oni kpí nyemu [“gu kpamiatise dunduko nga ga,” “NW” ] awirina.” (1 Petero 2:17) Ani nakpinyemu awirinarani dunduko bambiko ani na yo dunduko nga airisi Yekova Mbori. Aregbo nga ga rungo rengbe ka fu mamu fu rani ani yugo gi nyemuse re. Ni kpiapai, rogo gu garã sunge nangia 2000, aime ahikisi arago nikerehe ki gbarasipa gu ringara nga Mozambique, na gu vura du dagba aboro ringara Angola yo ambu dungu aboro ni airarungo. Agi apai re amangi dungu agu awirinarani 31,725 du Mozambique yo na aguyo 41,222 du Angola yo. Sidu, agu aDezire du South Africa yo, nga gu ringara du pati yo ima keda dungu ahe koyo tipa si akpurasi gu gberango nga ga agu awirina du rogo agu aringara re. Padu yo na nyemu ka gama bete agu ‘ahe nange beyo’ fu agu awirinayo nadu na zingo ayugu gayo nyemuse.—2 AKorindo 8:8, 13-15, 24.

¹¹ Ani nabi nyemuse a, ho awirina agama ahe ni rogo dungu aringara tipa kaa dua Abambu Kindo na Abambu Kikindigi Adunguratise rogo agu aringara akumukonga ya. Kpiapai tipa gipai re amangi Solomon Islands yo. Zavura gu gbäräkägbäräkä apai nadu yo, kio bange abatungusipai ada yo nga 6 rii kama rogo gu garã susi, bakere bangeyo nabaha ki du nga 1,697. I asogima dua Bambu Bakere Dunguratise. Wa vura duhe nga dungu aboro gu kisanga re aakura kusayo rogo gu ringara re, abaundosunge aye Australia yo ka undo sunge dua gu bambu re. Ni yangaraha, si aidi agu abaundosunge re ga, ono angianga mbata fu yugo yo wai ka nyasa mburu bambu fu agu awirina du rogo gu ringara re ya. Agu angboongbo marã na awagiro nga ga gu bambu re, i akedihe Australia yo, na pa nyasa gi wene bambu nga ga irisombori re—ti gu regbo aboro aima gindigo sunge agu abambu dunduko i aaduaha—nikangia wene dezirepai tipa rimo Yekova na tipa gu nyemuse nga ga awirina.

Wa Kina Mbori, Ani Nakpinyemu Zegino

12. Waigu ani awirika Yekova rogo gaani berã tipa agu aboro adunga na ani rogo gaani idapase ya?

¹² Ya mo gaani nyemuse digi kina kuti gaani aborokporo na awirinarani? Oó, si wo te kangia ani nga “[a]wíriki Mbori.” Yesu ayaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (AEfeso 5:1; Yoane 3:16, pigipigi kekeapai nga gaani.) Wa kina Yekova Mbori, ani namangapai na nyemuse fu aboro dunduko—kodihe na aguyo adunga na ani rogo gaani idapase ya. (Ruka 6:35, 36; AGaratio 6:10) Gbe rogo gi gene re, ani natungusa gu wene pangbanga nga ga Kindo na kini fura fu kura aboro tipa ga Mbori bakere mangapai nga ga nyemuse tipa yo. Sangbana gere rengbe ka du nga bata fu aguyo dunduko nadega tuyo.—Marako 13:10; 1 Timoteo 4:16.

13, 14. Gini bete atingidapai duho tipa agu awirina nayugu nyemuse fu agu aboro angianga aDezire ya, zavura ho apai aadunga ni wenengai kubarayo yo vurũ ya?

¹³ Ani berẽnga gupai nadu tipa kparakpara abazakigene biama rogo gu ringara nga Nepal. I afu sunge fu gu kparakpara abazakigene re bangbanda sodiyo na dioyo nga ga gu ringara re, na tipa agu agarã bisue susi, i ayugu gayo nyemuse ni manga yo dezirepai na zerangbaduse rogo gu bagbata re na rogo agu agbaria duho mbembedii pati ni. Tipa ka nyasa gu gayo rago fu yo ho fuyo tipa tungusapai, i nandu nunguro dedede na angbagida tipa dungu asaa, rogo kere gbitiri uru, du bafaaha nga 100 degrees Fahrenheit. Gayo nyemuse na gayo ‘zerangbaduse rogo manga gupai ngba angba’ akusi wene zuzuhe ho i atona wisigo buku ni na rimbasa aboro rogo gbaria sa dagba gure. (ARomo 2:7) Rogo Marungu rogo 2000, aboro 32 aye ka gia gu gumbapai gbayaga gu babiapai ninaata ata amangihe ho ko aye ni ka biyo. Bange abatungusipai dunduko adu Nepal yo 430 rogo gu garã susi—nga kio bangeyo 9 rii kama. Nirengo, Yekova nafu maku ziazia kurii gu ngara na nyemuse nga ga agu awirina du rogo gu ringara re.

¹⁴ Colombia yo, kparakpara abazakigene tipa regbo ngbutuko andu ka tungusapai dagba agu aboro i ayambayo nga Wayuu Indians. Tipa ka manga gere, si aidi i wiriki vovo fugo, ono i agbia maku tipa gayo nyemuse ho aboro 27 aduni pati gumbapai gbayaga, kpuakpua mai ki vura na ti gu regbo re vurũ. Gu ngara nga ga nyemuse wa ngbatunga gu agu abazakigene re ayuguhe afubee tipa gu kio bange abatungusipai nga 5 rii kama Colombia yo na gu bakere bange abatungusipai nga 107,613. Denmark yo, sosono wirinarani nga dee aaida ka tungusa wene pangbanga fu kura aboro, ono kaza aziri kubari. Zanga karaga tiri kusayo, ri atona kaa fura fu agu aboro duna nyemu rengo tiyo ni keka ri awaraga fuyo. Wa du rago re, ri nakeka awaraga fu aboro 42 na kini wisigi Baibiri na aguyo 11 dagbayo. Ri nga guri sa dagba gu bange abatungusipai 14,885 nga aguyo naafu gayo ripoti Denmark yo rogo gu garã susi.

Oni Kpinyemu Avura Roni

15, 16. (a) Yesu ayaa si naida bakio gaani nyemuse ndu ki da wari? (b) Waigu agu awirina nangerakurii apai amangi na gu kumba nakitingbaanga aDezire Yekova?

¹⁵ Yesu aya fu bainiparugute wee, ko rengbe ka bi boro Somorona ni wene sino kurako. Rogo gako Tungusapai rii Bagangara yo, Yesu agumba kurapai a nga: “Oni agi he wa i agumba ha ya, ‘Mo kpí nyemu kuaro, ki sogo vuraro.’ Ono ya mi fu roni wẽ, Oni kpí nyemu avuraroni, ki kpari tipa aguyo narungosi roni; oni, ki du ni awiri gu Baroni du ngbangbaturũ yo.” (Matayo 5:43-45) Zavura ho boro asoga rani ni, ani na’asada ka “[dia] be gbegberẽpai ni wenepai.” (ARomo 12:19-21) Ka si rengbe, ani nafu gu nyanyakipa he du berani funi, nga rengo.

¹⁶ Ukraine yo, papara kekepai sa rogo gu waraga pangbanga nga Kremenchuk Herald ayaa aDezire Yekova nga aboro kere be-pambori. Gere angia kerepai mbiko Putu yo, aboro nafura bara aDezire Yekova ngba gi gene re ka zomia kura aboro ya agu asunge nga ga aDezire Yekova, si naida i za yo ti mangaha watadu i ka na pa mangaha beyo. Si ki ta du were, awirina kini mo ka ndu fuo bakusi gu waraga pangbanga re na ki sana ko ya i naida gupai nga gako bakusa awaraga pangbanga kusi gu papara kekepai nika ruga gu iraira paparaha i akusihe mbata re. Ko aidi gupai re, ono ho i akusi gu uehe ni re, ko ake gupai nayaa, i amoi mburu gu bambataha i akusihe re rii rengo. Sidu agu awirina nangerakurii apai ki ndu berewe fuo ko na kura tingidapai. Ni yangaraha, gu bakusi awaraga apangbanga re aye ka bi gupai nga gu bambataha adu niirairaha, sidu ko kini mo ka kusa gu kuraha nadu na hõmbupai rogo tipa gu i akusihe mbata. Mangapai na ko ngba gi gene nga ga pe kina rengo re na rogo gu gene nga ga weneringise angia gu gene nga ga nyemuse tipa nyasa gipai re, na si andu sa wene sangbanaha.

Waigu Rengbe Ani ka Sonosa Nyemuse?

17. Gine nayugo gupai nga anga si dedede ni taatapai kaa mangapai na nyemuse koyo du kura aboro ni te?

¹⁷ Ho i abatika gude ni, avunguru natona ka kpinyemu ru ni kina ipo. Mangapai rogo nyemuse na sosono aboro naayenga dedede nisaha te. Si nawira gere nga ndu gupai Baibiri agumba gupai tini fu rani berewe na berewe nga ani kpinyemu akuarani—si nga gupai si aida ani sonosihe asonosa. (1 Petero 1:22; 4:8; 1 Yoane 3:11) Yesu aima ino gupai nga gaani nyemuse aduni asadiasadihe ho ko agumba gupai ni nga ani mbupai fu wirinarani dati “bara saba bawe bara saba.” (Matayo 18:21, 22) Pauro angarasi rani a ani ‘nihipai fu akuarani.’ (AKorosaio 3:12, 13) Si airiwonga te, si du Pauro agumba gupai tini fu rani nga: “Oni péke fuo nyemuse.” (1 AKorindo 14:1) Waigu rengbe ani ka manga gere?

18. Ginipai nika undo rani ani sonosi nyemuse tipa kura aboro?

¹⁸ Ni bambatapai, ani rengbe ka bandapa gu nyemuse berãraniyo dedede du ani nani tipa Yekova Mbori. Gi nyemuse re nga gu nyanyaki sino nangarasa rani ani kpinyemu akuarani. Tipagine? Bambiko ho ani amangaha ni wo, gere nayugo sino gu Barani nga ga ngbangbaturũ ko wenengai na si kini ye na taarimo fuko na kini sambua ko. (Yoane 15:8-10; AFiripoio 1:9-11) Ni ue pai, ani rengbe kaa bi apai wa gu Yekova abihe. Agu aregbo dunduko ani aingapai, ani naingapai kuti Yekova; si ki vura du wo, ko nambupai fu rani berewe na berewe na kini kpinyemu rani kindi. (Atambuahe 86:5; 103:2, 3; 1 Yoane 1:9; 4:18) Ka ani duna ga Yekova bipai, ani ambakada tirani ka kpinyemu akuarani na kini mbupai fuyo tipa gayo aingapai kuti rani. (Matayo 6:12) Ni biata pai, ani rengbe ka manga kura aboro wa kinagu ani aida i nimangi rani. (Matayo 7:12) Wa du ani nga aboro zangarengba, ani naida i nimbupai fu rani dedede. Ni kpiapai, ho ani agumba agu apai ni naimisa kura aboro, ani namaabangirani nga i atingida gupai atingida nga aboro dunduko namanga ingapai amanga na mirãyo ti kura aregbo. (Yakoba 3:2) Ka ani aida kura aboro nimangi rani na nyemuse, si naida ani mangi yo a na nyemuse.

19. Waigu rengbe ani ka gbata gu undo nga ga ziazia toro rogo sonosa nyemuse?

¹⁹ Ni biama pai, ani rengbe ka gbata gu undo nga ga ziazia toro mbiko nyemuse nga papara zuzu toro. (AGaratio 5:22, 23) Pabakure, nyemuse dagba aborokporo, na nyemuse dagba kumba na dee dunduko naye dedede nisaha. Ono ani naida gu undo nga ga ga Yekova toro tipa ka sonosa ngbatunga gu nyemuse nga ga Yekova, nga dada tipa kpamiatise. Ani rengbe ka gbata gu undo nga ga ziazia toro ni geda ani Baibiri nga gu naye be toro. Ni kpiapai, ka ani aawisigopa ga Yesu raka, ani abi wai ko anamanga aboro, na ani ki rengbe ka wirika ko. (Yoane 13:34, 35; 15:12) Kurii gure, ani rengbe ka sana Yekova tipa ziazia toro, gbe nga rogo agu apai nasaha fu rani ni kpakarakpakaraha ani mangipai rogo gu gene nga ga nyemuse. (Ruka 11:13) Ni yangaraha, ani rengbe ka pefuo gu gene nga ga nyemuse ni nye ani mbembedii na gu dungurati nga ga aKristano. Padu ani na agu awirina duna nyemuse tiyo naundo rani ani sonosi nyemuse.—Asanza 13:20.

20, 21. Gini iiriwo yugo nyemuse aDezire Yekova amangihe rogo gu garã sunge nangia 2000?

²⁰ Rogo gu garã susi, bange abatungusi wene pangbanga rogo zegino dunduko adu nga 6,035,564. ADezire Yekova adi bange asaa dunduko nga 1,171,270,425 kaa gbata aboro tipa ka tungusa wene pangbanga fuyo. Nyemuse du nasa yo i hi faarago, ki hi mai, na zerarago wa i aamanga gi sunge re. Nyemuse du nafõngbaduyo yo i fura fu akurayo sukuru yo na i fura na gayo abadiasunge na i fura na gu kungbo aboro i aabingo yo mbata ya bangiri agene na rogo kura aba. Dungu agu aboro aDezire andu ka biyo aadunga na nyemu giapai te, beteyo dagbayo aati kina kango. Ono tie, akurayo aduna nyemu giapai, sidu bange agu aboro dunduko ani aakaraga tirani ka biko yo adu nga 433,454,049, na kini wisigi Baibiri na aboro 4,766,631.a

²¹ Nairiwo wai agi apai dunduko re ayugu gu nyemuse du aDezire Yekova nani tipa gayo Mbori na tipa akurayo! Gu nyemuse re azeranga wa gu sa te. Ani nakido nga gu garã sunge nga 2001 abi bakere sunge dezirepai fu ngbatunga aboro kisusi gure. Ga Yekova maku dunga tie kindi na ruru ngangara airisi ko wa i ‘kaa manga gayo apai dunduko rogo nyemuse yo’!—1 AKorindo 16:14.

[Gu rukutu kekepai du bandu kpewaraga yo]

Oni Rengbe ka Sakarogoyo?

• Da ani awirika ni ho ani akpinyemu akuarani ni?

• Si naida bakio gaani nyemuse ndu ki da wari?

• Gini bete apai dagba agu namangi nayugopa ga aKristano nyemuse?

• Waigu rengbe ani ka sonosa gu nyemuse nga ga aKristano?

[gu kekeapai du dagba gbakigbaki agene ti kpewaraga 28-30]

TINGIDAPA SUNGE NGA GA GARÃ NGA GA ADEZIRE YEKOVA ROGO ZEGINO DUNDUKO ROGO 2000

[Gu kpiaahe du ti kpewaraga 25 na 26]

Gu nyemuse nga ga aKristano rengbe ka kpamia aborokporo sa

Nyemuse nafõngbaduraniyo ani gumbapa gaani maabangirise fu kura aboro