Awetekapai Tipa Waraga Dunguratise Nga ga Gaani Raka na Sunge
BAMBURU 6-12
AŨKUMUKO ROGO FUGO MBORI YO | GATE 6-7
“Awere Mo Nikabi gu Pai Mi Ayé ka Manga fu Faro”
(Gate 6:1)
(Gate 6:6, 7)
it-2-E kpe. 436 genewa. 3
Moize
Ariapai aima manga a ti agu abarumbatayo nangia ga aYisaraere yo. Ti tonatonaha i aima ida na ga Moize pai, ono fuo i gbiatiyo na kere nyanyaki sunge kuti gu sangba rugapai nangia ga Faro, i akitingbanga Moize si ki da ti gupai nga kpotokoyo zere na ko ki zungodi Yekova nga tipagine ko arungosi agu aboro re ti ni. (Gate 4:29-31; 5:19-23) Gu Mbori nga Bahe kisusi anyakasi ko ti gu regbo re ni yugoko gupai fuko nga Ko nandu ka digiso gupai Abarayama, Yisaka, na Yakobo aangera tipaha, nangia pa yugo Yekova rogo rimoko yo ni Batasa ko aYisaraere na ki sigira yo ni bakere rikaaboro rogo ringara mokido. (Gate 6:1-8) Zavura na agi apai re, agu akumba nga ga aYisaraere yo aadeganga tuyo fu Moize te. Ono awere, tingbafuo ribua gberãngbi, i aru kugiiko nyanyaki, kini mangipai sa na ko tipa gupai nga ko mbakadi yo tingbafuo bawe gberãngbi na ki kusiyo wa “aboro naandu kuba vura yo”. —Gate 13:18, NW.
(Gate 7:4, 5)
it-2-E kpe. 436 genewa. 1-2
Moize
Barabangiri Faro Nga ga Ezipeta. AMoize na Arona angia meme aboro rogo gu ‘vura yo nga ga ambori.’ Faro aye na aboro binza, nga aguyo si narengbe ka du nga i ayamba rimo abaira yo nga Yane na Yamabure (2Tim 3:8), Faro adungura agu ambori dunduko naadu na ome tiyo Ezipeta yo tipa i sovura kuti ga Yekova ome. Gu bambata iiriwopai Moize aya fu Arona ko mangihe barabangiri Faro aima yugo gupai nga Yekova du na ome tiko kisusi agu ambori nga ga Ezipeta yo, wa si avura du wo, kpoto Faro yo adu kindi ni nyanyakihe. (Gate 7:8-13) Kusa, ho biata gberãngbi amangi ni, zavura aboro binza aima ida kuti gupai nga, “Be Mbori nga gere!” Na anzia aima kura ti kpotoyo ni kerehe ka i arengbanga ka ru barabangiri Faro ka tikango na Moize ti regbo gu gberãngbi re ya.—Gate 8:16-19; 9:10-12.
Agberãngbi asa kura aboro i kpinyemu Yekova na ki sa aguyo i sogoko kisusi. AMoize na Arona natakipande pa agu Agberãngbi naadu Bawe. Agu agberãngbi re aye kina wai i atakipandehe, kini yugu ga Moize sunge nga ga fura kuba Yekova. I atakipande rimo Yekova na ki fura tipaha Ezipeta yo, kini sa aYisaraere na kura aEzipeto i kpinyemu Yekova na aguyo kini sogo ko na ki sa aFaro na gako abafurugute na agu aboro naangbe na ko i sogo Yekova. (Gate 9:16; 11:10; 12:29-39) Kuba gupai nga aEzipeto idi kuti gupai nga i aye na zee kuti gayo ambori, i aima ino gupai nga Yekova du naasapangbanga gayo ambori. Tingbafuo ribua gberãngbi, Moize aima da ni “bahe rogo gu ringara nga Ezipeta ku bangiri ga Faro amoyambu, na ku bangiri aboro a.”—Gate 11:3.
Gbata gu Nyanyakipa Ahe Nga ga Toro
(Gate 6:3)
it-1-E kpe. 78 genewa. 3-4
Tanduapai Dũ
Yekova amangisunge na gu rimo nga ga sunge nga “Mbori du na tandu apai dũ” (ʼEl Shad·daiʹ) ho ko aamanga gako kidohe ni fu Abarayama nibipa vunga Yisaka, nga gu kidohe naaida Abarayama du na bakere idapase kuti ga Mbori ome ka digiso gu kidohe re. I amangisunge na ni berewe ho i afura ni tipa Mbori nga ko nika fu maku fu Yisaka na Yakobo i dikumbo ga Abarayama mozunga.—Bam. P 17:1; 28:3; 35:11; 48:3.
Na ngbanya kuti gipai re, Yekova agumba gupai fu Moize kusa nga: “Mi nayugu tire fu Abarayama, na fu Yisaka, na fu Yakoba, wa Mbori du na tandu apai dũ [beʼElʹ Shad·daiʹ], ono i aina nga re ti gu rimore nga Yekova te.” (Gate 6:3) Gipai re ayugongo gupai nga i aainongo gu rimo nga Yekova te te, wa duhe nga i anaamanga sunge amanga na gu rimo re dedede, na zavura agu aboro naadu mbata fuyo anaamangasunge amanga a na ni. (Bam. P 4:1, 26; 14:22; 27:27; 28:16) Nirengo, rogo gu buku nga Bambata Pai, nga gu nafura tipa atita aYisaraere, gu fugo nga “Tanduapai Dũ” kuru gbua bara 6, ono gu rimo nga Yekova i akehe bara 172 rogo gu kekeapai naadu rogo pa-Ebere. Ono wa si avura duwo, agi atita aYisaraere re aima ye kadu na tambuahe mbiko agu apai namangi fuyo nga gu naayugo gupai nga Mbori aima rẽ tipa gu rimo nga ga sunge nga “Mbori Tanduapai Dũ,” ono i aadunga na momu ka rugatiyo na pa agu apai dunduko rogo gu rimo yo nga Yekova arukubaha gbiati agu apai si amangaha te. Nibi gipai re, gu buku nga The Illustrated Bible Dictionary (Vol. 1, kpe. 572) naya: “Gu pa yugo tise naadu fu atita aYisaraere aayugopa agu akidohe si adu nga si nika manga kumbatayo; si adu nga i du na gu kido nga Ko, Yahweh, angia gu ngbatunga Mbori (ʼel) naadu na rengba (rogo gu fugo nga sadday) ka digisoho. Gu pa Yugotise naadu nvuo yo aima du ni bakerehe na si adu rogo gu ba naadu zezeredi, ga Mbori ome na pa du Ko ho kindi na yo adu ni yuguyuguhe rogo gu rimo aboro aima inopai dunduko tipaha nga Yahweh.”—J. D. Douglas nafugu he berewe rogo, 1980.
(Gate 7:1)
it-2-E kpe. 435 genewa. 5
Moize
Padu Moize ni Boro zee aakanga na ko ti rẽ bangiri Yekova te. Ono Moize adu na zee, ko ki zungodihe nga ko ainongo wai ka fura wenengai te. Gi Moize re adu kia ti gu ko naafu tiko nisako tipa ka kusa awiri aYisaraere 40 agarã kusayo. Ko aandu kumbatayo kaa sakapai na Yekova, ni yangaraha ko ki sana Yekova ka ko fu nga gu sunge re fuko ya. Wa vura duhe nga gipai re aima ba gberãrago ti Mbori, ko aakanga Moize te ono ko afu Arona nangia wiriba Moize ko ni fura kubako. Sidu, wa Moize angia gu boro naarukuba Mbori, Moize ada ni “Mbori” fu Arona, nga gu ko naafura kuba ko. Ti regbo gu dunguratise ko amangihe na agu abaakumba nga ga aYisaraere tipa ka ndu fuo Faro, si nangera wa Mbori afu arugapai na andiko fu Moize, na tipa Moize tigako, ko ki tingidihe fu Arona, tipa gupai nga Arona fura na Faro (gu Faro nadiba gu Faro Moize aoro beko agarã 40 kusayo). (Gate 2:23; 4:10-17) Kusa, Yekova afura tipa Arona nga ko angia ga Moize “nebi,” nayugo gupai nga, wa Moize angia ga Mbori nebi, nga gu ko Mbori aafu arugapai fuko, sidu Arona aagbia rugapai be Moize. Berewe a, Mbori agumba gupai fu Moize nga ko nika maa ko wa “Mbori fu Faro,” nayugo gupai nga Mbori afu ome na pagbia fuko kurii Faro, tipa gupai nga ka ndupai ya dunga ho tipa ko gunde be bakindo Ezipeta ya.—Gate 7:1, 2.
Geda Ziazia Kekeapai
(Gate 6:1-15)
BAMBURU 13-19
AŨKUMUKO ROGO FUGO MBORI YO | GATE 8-9
“Gu Irarukö Nangia Faro Ainongo ho Nga Ko Aaundo na Digiso ga Mbori Ringbisapai Te”
(Gate 8:15)
it-2-E kpe. 1040-1041
Nyakarii
Rogo ga Yekova Mbori mangapai yo na aboro, ko aima mbugene ni zerangbaduse fu aboro nibasasa watadu fu rikaaboro nga aguyo naima rẽ tipa kpio i naandu kindi kumbatayo kaa raka. (Bam. P 15:16; 2Pet 3:9) Baraho kura aboro aima mangapai ni kuti gako zerangbaduse na ki moi tiyo ngba gu gene nga ga gbia inapai (Yos 2:8-14; 6:22, 23; 9:3-15), agu akurayo aima du na sogote ni bakerehe gbe kuti Yekova na kuti gako aboro. (Pa Rug. 2:30-33; Yos 11:19, 20) Wa duhe nga Yekova akanga na boro ti du ni na nyakarii te, si du i afura tiní tipa ko nga ‘ko nambugene fuyo i du na nyakarii’ watadu ‘ko na nyakasa kpotoyo yo.’ Ho ko adiaberã ni ni yangaraha ka irabape ti aira nyakarii, sangbanaha nayugo gako mangapai nga ga ome na ki sa aboro i takipande pa rimoko.—Mo ringbisihe na Gate 4:21; Yo 12:40; Rom 9:14-18.
(Gate 8:18, 19)
(Gate 9:15-17)
it-2-E kpe. 1181 genewa. 3-5
Gbegberẽ apai
Kurigure, Yekova namangasunge na apai ngba gu gene nasa gbegberẽ aboro ni tiyo i digisi gako ringbisapai zanga i inihe. Wa vura duhe nga i nasoga Mbori, ko ima rengba ka ká nayo wa re he tipa ka banda gu kakuti ruru mangaapai nga ga gako amoyambu, na ko ima rengba ka sa gu mangaapai nga ga agu aboro re si sa gako ruru mangaapai si du na nyanyakipaha. (Rom 3:3-5, 23-26; 8:35-39; Tam 76:10) Gi berãpai re gudu ni yuguyuguhe rogo Asanza 16:4: “Yekova amangi ahe du tipa kina pa gaha sunge, na gbegberẽ boro a tipa rago fudifudipai.”
Bawene kpiapai tipa gipai re nga Faro nga guko Yekova amangisunge na ko ka kusa aYisaraere tiibe sunge kanga vurube aMoize na Arona. Anga Mbori nasa gi bakindo nga ga aEzipeto re ko du ni gbegberẽ boro te, ono ko ambugene fuko ko naandu kindi kumbatayo kaa raka na ko aye na apai nga gu nasa Faro ko yugu tiko gbaiga nga gbegberẽ boro na ki rẽ tipa kpio. Gu ndupai Yekova aamangapai gipai re ti ni gudu ni yuguyuguhe rogo Gate 9:16: “Tipa kina gi pai re mi aidi he ti ni mo nye ni ungaro, nga ka yugo pa gi tandu, i ki taki pande pa rimore rogo kpotosende yo dunduko.”
Agu agberãngbi bawe naye kurii Ezipeta, nga gu nadigi na pa gbarasa yo Faro na gako riivura Zamba Baime yo, angia gu iiriwo gene Yekova amangisunge na gako ome ngbaha. (Gate 7:14–12:30; Tam 78:43-51; 136:15) Gu rikaaboro naadu mbembedi aafura kindi tipa gipai re tipa dungu agarã, na rogo gi gene re, i atakipande pa rimo Mbori rogo zegino dunduko. (Yos 2:10, 11; 1Sam 4:8) Wa ka Yekova aimi Faro ni basa, pa yugoko gako ome tipa taasarimoko na tipa batasa Gako aboro, ka si adunga taata te.
Gbata gu Nyanyakipa Ahe Nga ga Toro
(Gate 8:21)
it-1-E kpe. 878
Wangu Azii
Bete akapa gudu ho tipa gu ngbatunga agbiro i ayamba rimo ra na gu pa-Ebere du rogo Ziazia Kekeapai yo nga gu nafura tipa gu biama gberãngbi naaye kurii Ezipeta, gu bambata gberãngbi i abatasi agu aYisaraere behe naadu Gosene yo. (Gate 8:21, 22, 24, 29, 31; Tam 78:45; 105:31) Gu fugo nga ʽA·rovʹ i naayambaha dedede nga “wangu azii” (JB, NW, Ro), “gu gbiro du wa kpikoro” (Yg), “azii” (AS, KJ, RS), “anzari” (AT), na “gbõ” (LXX).
Gu fugo nga “wangu azii” i namangisunge na ni rogo Pazande nakoda ngbatunga agu azii nga anganga na kura kikindigi azii. Gu zii du wa nganga narunda kpoto anya kodihe na ga aboro na ki gbe kure. Ho du ũ ni kindi ni para ũ naraka tii kpoto anya yo na aboro; agu ra nazio aboro ami gbe rogo agu aringara du ni fofoi he. Gu gberãngbi nga ga wangu azii aima rengba ka ye na bakere rungo fu aEzipeto na gayo anya, rogo kura abangiriba, si aima rengba ka ye na kpio.
(Gate 8:25-27)
Memeapai Rogo gu Buku Nga Gate
8:26, 27—Tipagine Mose aya ti ni wẽ agu amotumo nga ga aYisaraere adu ni “anyakorokpa bangiri aEzipeto”? Dungu anya ni bakiakia aEzipeto anaairiso ra, sidu, ka pa tumo aYisaraere na anya arunga bangiriyo te. Pa fura Mose tipa tumo na amotumo afu wene ndupai fuko ko kakuti zomiahe tipa guari aYisaraere ka ndu ka tumo fu Yekova.
Geda Ziazia Kekeapai
(Gate 8:1-19)
BAMBURU 20-26
AŨKUMUKO ROGO FUGO MBORI YO | GATE 10-11
“AMoize na Arona Ayugu Bakere Wingbaduse”
(Gate 10:3-6)
Oni Tungusi Wene Pangbanga Zanga Gunde
Oni berãnga pa gu wingbaduse a Moize adu na ni wa ko afura fu Faro, nga gu ko aboro anaabi ko ni mbori, ni wiri gu mbori nga ga Ezipeta ko rimoko angia Ra. Si rengbe kadu nga ko anaairisa kina kpiako nitiko, a wa gu kura aFaro anaamangaha. Gupai nanaakura ngba Faro yo angia kina ndiko. Ko angia ira-ome, irarukö, na iranyakarii. Ko anaaidanga aboro fu arugute fuko te. Gi kere boro re du gu bangerefuo anya nangia Moize adogodi kubara bangirini, zanga i yambu ko ayamba, na zanga ko diko kugume. Ginipai Moize agumbapaha fu Faro? Ko agumba paye bakere agberãngbi kurii Ezipeta. Ko asana Faro ko idihe fuko ko kusi badungu amirioni ga Faro akanga kusayo rogo ringara. Ya mo Moize aadunga na wingbaduse te? Ko aima du na ni nirengo!—Geda 12:3; Eb. 11:27.
(Gate 10:24-26)
(Gate 10:28)
(Gate 11:4-8)
it-2-E kpe. 436 genewa. 4
Moize
Si aaida na wingbaduse gbiati idapase tipa ka ru barabangiri Faro. Amoize na Arona arengbe ka manga gu sunge naadu fuyo kumbatayo mbiko ga Yekova toro naadu kurii yo. Mo moingo kpia ga Faro Bambu ngbanga ku berãro yo, nga gu ko nangia gu Bakindo naadu na ome ti ni ti gu regbo re rogo zegino dunduko. Gu ba re adu ni bakikii he, gu irarukö nga Faro adu kinaho, nga gu ko aboro anaabi ko ni mbori, gako abafurugute, abarutiriivura, ababanda rago, gbiati akanga ki du patiko. Kurii gure, abarumbatayo rogo pambori, aboro binza, nga gu bangua aboro naasoga Moize adu kinaho. Agi akumba re kpara kusayo ti Faro angia agu akumba naadu na ome tiyo kisusi rogo gu zogarago re. Agi aboro dunduko naadu na ome re adu kugii Faro tipa ka songoda agu ambori nangia ga Ezipeta. Na Moize na Arona aandunga ku barabangiri Faro yo bara sa gbua te ono i andu bara dunguhe, kpoto Faro yo kini nyaki kina kumbatayo, mbiko ko aima diaberã ka banda gako nyanyakipa akanga nangia aEbere kutiibe ko. Nirengo, tingbafuo aMoize na Arona pepa muambe gberãngbi, i ado yo kusayo barabangiri Faro, na tingbafuo ribua gberãngbi i afu zahe fu yo nga ka i yengo berewe kubara bangiri Faro ya, ka i mangihe wo i nika imo yo kusayo.—Gate 10:11, 28.
Gbata gu Nyanyakipa Ahe Nga ga Toro
(Gate 10:1, 2)
w95-E 9/1 kpe.11 genewa. 11
Adezire Kuti Ziree Mbori
Ti gu regbo aYisaraere adu Ezipeta yo, Yekova akedi Moize fuo Faro ki ya: “Mo ndú koyo du Faro ni; bambiko mi nyakasi kpotoko yo na kpoto gako amoyambu yo a, ya mi yúgu gimi yuguyuguapai dagba yo yo, mo agúmba ha fu awiro na fu atitaro waĩ mi amangi aEzipeto, na pa gimi yuguyuguapai mangi mi he ku dagba yo yo; ya oni ini he ya mi nga Yekova.” (Gate 10:1, 2) Si adu nga agu aYisaraere du na giasangba nika gumba pa agu apai Yekova namangihe fu awiriyo. Awiriyo tigayo ki gumbaha fu awiriyo, na sidu, ngbatunga rikaaboro dunduko ki gi he. Sidu, si adu nga i nika tingida pa ga Yekova nyanyaki mangaapai ngba gi gene re. Wakina gure areme, avunguagude na gu tindiro beyo nga ga manga dezirepai fu awiriyo.—Pa Fu Rugute ni Ue he 6:4-7; Asanza 22:6.
(Gate 11:7)
it-1-E kpe. 783 genewa. 5
Gate
Sidu, ni manga Yekova sunge na gako ome ngba iiriwo gene ko ataasi rimoko na ki kusi awiri aYisaraere. Ho i adu ni ti ngba Zamba Baime ku mbitiyo ni bandabanda yo, Moize angbe kumbatayo fuyo na bia, Miriama nangia dawiriko, ni dee nebi, ki di gaza ku beri na ki ngbe kumbatayo fu agu adee dunduko nadu na agaza ki ni do gbere, ni karagayo bia kuti gu akumba aabihe. (Gate 15:1, 20, 21) I aima kparatiyo ti agu aboro naarungosiyo. Ho i akuru ni Ezipeta yo i aambunga boro watadu nyarinde si imisi yo te; ango ho nagi fuo aYisaraere watadu ka mbeda na mirã ru koyo du yo ni te. (Gate 11:7) Wa vura duhe nga gu pangbanga re agumbanga gupai nga Faro nitiko andu na gako riivura ku ime yo na i ki gbarasi ko te, Atambuahe 136:15 nagumba gupai nga Yekova “abafu aFaro ku Zamba Baime yo na gako rikavura.”
Geda Ziazia Kekeapai
(Gate 10:1-15)
BAMBURU 27–BUZA 2
AŨKUMUKO ROGO FUGO MBORI YO | GATE 12
“Pumbo Susiri na Nyanyakipaha fu AKristano”
(Gate 12:5-7)
‘Oni Du Na Ngbarago Kpaima’
Yesu akpi rogo gu diwi nangia Nisana ti rameru 14, rogo gu garã nangia 33 F.B.K. Rogo gu ringara aYisaraere nadumbata, Nisana ti rameru 14 angia rago ngbarago nga ga Pumbo Susiri. Rogo agarã nibasasa rogo gu uru re, aborokporo anaari riahe nga gu nanaakoda pasipasi gu wiri kandoro séro aadunga tiru ya. Rogo gi gene re, i anaatingidapa gupai kure wiri kandoro amangihe rogo batasa bambata awiri aYisaraere ho gu maraika nga ga kpioko aimi bambata awiri aEzipeto ni rogo Nisana ti rameru 14 rogo gu garã nangia 1513 M.B.K. (Gate 12:1-14) Gu wiri kandoro nangia ga Pumbo Susiri ru re aayugopai tipa Yesu, nga guko gu mokedi nangia Pauro afura tipa ko ki ya: “I atumo ni gaani kandoro susiri a, nga Kristo.” (1 AKorindo 5:7) Wakina kure gu wiri kandoro nangia ga Pumbo Susiri ru, kure Yesu nabatasa dungu aboro.—Yoane 3:16, 36.
(Gate 12:12, 13)
it-2-E kpe. 583 genewa. 6
Pumbo Susiri
Yesu nadigisi gu kura apapara Pumbo Susiri. Bambata digisidigisihe riimburu gupai nga gu kure naadu ti angbadimo Ezipeto yo abatasi bambata vungu ti gbarasaha be gu maraika nga ga gbarasahe. Pauro afura tipa mbedimbedi aKristano ni gu dungurati nga ga bambata vungu (Eb 12:23), na Kristo ki ngia batasi yo vurube kure. (1Tesa 1:10; Ef 1:7) Si anaaidanga i kuo meme gu wiri kandoro nga ga Pumbo Susiri ru te. I apepai ni sangbanebi nga i akuongo meme Yesu te, na gipai re adigisitihe ti regbo kpio ko. (Tam 34:20; Yo 19:36) Sidu, gu Pumbo Susiri aYudo abandaha tipa dungu akama agarã angia pai sa dagba agu apai yo nga gu Ndiko ayuguhe ni kpia agu apai nika manga kumbatayo na nga gu naringbisi tihe kuti Yesu Kristo, “gu Wiri kandoro nga ga Mbori ru.”—Eb 10:1; Yo 1:29.
(Gate 12:24-27)
w13 12/1 kpe. 21 genewa. 13-14
‘Gere Adú Ni Tingidapai Furoni’
Abaagude anaayugo nyanyakipa pai tipa Pumbo Susiri fu agu awiriyo i anaavunga ra. Gu sa anidu tipa wai rengbe Yekova ka banda airisiko. Agude anaawirika gupai nga Yekova nga ndikidi boro na ko nangera angera fuo gako aboro na kini bandayo. Ko ayuguhe nga ko ima rengba ka bandayo kina wai ko abanda bambata awiri aYisaraere “ho ko aimi aEzipeto ni.”
Agu avunguagude nga aKristano atingidanga awiriyo na agarã dunduko tipa gupai Pumbo Susiri ayugoho te. Ya mo mo naayugo ngbatungapai wa gure fu awiro nga Yekova nabanda gako aboro abanda? Ya mo mo naasada ka sayo i bi gupai nga mo ima ida kuti gupai nga Yekova kindi nabanda gako aboro? (Tam. 27:11; Yes. 12:2) Ya mo mo naayugo ngbatunga agi apai re ti gu regbo sungu oni kaa fura angianga ka sunguso yo asunguso sande tipa ka yugopai fuyo ya? Mo mangi ome tipa ka rimiso ngbatunga gi yugupai re wa ka si fõ kpoto gamo aborokporo yo i sono rogo toro yo.
Gbata gu Nyanyakipa Ahe Nga ga Toro
(Gate 12:12)
it-2 kpe. 582 genewa. 2
Pumbo Susiri
Gu Bawe Gberãngbi naye kurii Ezipeta angia sapangbanga kurii agu ambori nga ga Ezipeta, gbe, gu bawe he, pakpio bambata vungu. (Gate 12:12) Mbiko kandoro (gu ru nga bara) adu ni ziazia ru bangiri gu mbori nga Ra, sidu, pa migido kure gu kandoro nga ga Pumbo Susiri ru ti angbadimo arengbe ka du ni pa gberã ngbayo ku bangiri aEzipeto. Berewe a, gu bagara nga bara adu ni ziazia ru, na pa gbarasa bambata vungu nga ga gu bagara re angia kerepai fu gu mbori nga Osiris. Faro nitiko aabi tiko nga ko nga wiri Ra. Pakpio bambata wiri Faro arengbe ka yugo gupai nga ome ti Faro gbiati Ra te.
(Gate 12:14-16)
it-1-E kpe. 504 genewa. 1
Bakere Dunguratise
Gupai naadu ni kparakparaha tipa gi ‘ziazia dunguratise’ re, angia si anaaidanga boro mangi sunge te. Ni kpiapai, bambata uru Pumbo gu Kpakuto Naadunga na Agbooro Ya na saba uru angia ‘ziazia dunguratise,’ nga gu Yekova ape gupai tipaha nga: “A nga sunge ho sa boro ka manga rogo agu auru te re; ono kina gu he aboro ka ri he, kina ha ka oni mángi he.” (Gate 12:15, 16) Ono tie, ti regbo ‘ziazia dunguratise’ aboro motumo anaamangasunge ni fuyo amotumo fu Yekova (Pa Mot 23:37, 38), si aangianga kuo gu ndiko nga ga manga kura kungbo asunge te. Agu aregbo re aangianga regbo sungo gbua zanga mangasunge te ono regbo gbia undo rogo toro yo. Ti regbo agu aSabiti nga ga aposo dunduko, aboro anaadunguratiyo tipa irisombori na tipa ka gbia arugapai. I anaagbia arugapai vurube geda Ziazia Kekeapai gbaiga na sakarogo Fugo Mbori yo, a wa si anaamanga bambutiria yo. (Amo 15:21) Sidu tie, wa vura duhe nga aboro anaamanganga sunge ti rago Sabiti watadu ti regbo ‘ziazia dungurati’ te, i anaakpara regbo tipa ka futiyo sa kparakpee watadu ka berãkuriipa Bakusiahe na gako ringbisapai.—Mo bi ASSEMBLY.
Geda Ziazia Kekeapai
(Gate 12:1-20)