Mo Irisi Yekova na Gamo Aborokporo

A wa wiriki mo ho rogo gi waraga re, Ziazia Kekeapai na badungu apai rogoho nga gu rengbe ka undo ro na gamo aborokporo. Yekova naida oni du na ngbarago. Ko nakidohe nga ka mo peresi pa irisoko mbatayo, ko ‘nika kpamia kura ahe dunduko foro kuti ni.’ (Matayo 6:33) Ko naida gupai nzunzu nga mo du ni bakureako. Mo nimangisunge na agu amomu mo agbiaha ka sonosa wene pagume na Mbori. Gure nga gu bakere momu rengbe boro ka gbiaha.​—Matayo 22:37, 38.

1 MO NYAKASI GAMO PAGUME NA YEKOVA

GUPAI ZIAZIA KEKEAPAI AGUMBAHA: “‘[Mi adu] fu roni ni Baroni, oni ki du fere ni awire nga akumba na ade,’ wo poi Gbia du na tandu apai dũ.” (2 AKorindo 6:18) Mbori naida mo du ni bawene bakureako. Kparakpee nga he sa rengbe ka undo ro mo mbedi na Yekova gbe. Yekova naya foro wẽ ka mo “pírigi nga ti kpara kpe ya.” (1 ATesaroniko 5:17) Ko na nyemu ka gia agu apai du kpotoroyo ho mo apehe ni fuko. (AFiripoio 4:6) Ho mo akpara ni fu Yekova na gamo aborokporo sa, i nabi gu pagume du dagbaro na ko.

Mo ta kpara fu Mbori mo kini degeturo adega a fuko. Mo rengbe ka manga gipai re ni wisigo mo Fugoko nga Ziazia Kekeapai gbiati agu awaraga du mburuhe riihe. (Atambuahe 1:1, 2) Mo berẽkurii agu apai mo awirikaha. (Atambuahe 77:11, 12) Degatue fu Mbori a nga kaa ndu tipa agu adunguratise nga ga irisombori dedede.​—Atambuahe 122:1-4.

Fura na kura aboro tipa Yekova nga kura gene berewe rengbe mo ka nyakasa gamo pagume na ko ngbaha. Ka mo amanga gipai re wenengai gbe, mo nika mbeda na ko a wenengai gbe.​—Matayo 28:19, 20.

GUPAI RENGBE MO KA MANGAHA:

• Mo nidi regbo na aˈuru dũ ka geda Ziazia Kekeapai na ka kpara fu Yekova

• Mo na gamo aborokporo, oni peresipa agu apai nga ga toro mbatayo fu aũngbarago na ambaro

2 ONI MANGI GU IRISOMBORI NGA GA ABOROKPORO

GUPAI ZIAZIA KEKEAPAI AGUMBAHA: “Oni mbédi na Mbori, ko ki mbedi na oni.” (Yakoba 4:8) Oni sia regbo nga gu oni kaa manga gaoni irisombori nga ga aborokporo ti ni na aposo dunduko na oni kini ndu kuti gu mbakadapai oni namangihe. (Bambata Pai 18:19) Ono si naida kurapai berewe. Si naida Mbori du rogo gaoni raka na aˈuru dunduko. Oni nyakasi gu pagume nga ga gaoni aborokporo na Mbori ni fura oni tipa ko “ho oni ka nisungu ni rogo gaoni bambu, ho oni ka nita ni gene a, ho oni ka nipi ni sande a, na ho oni ka niguari ni ku ari a.” (Pa Fu Rugute ni Ue he 6:6, 7) Oni diberã ka du wa Yosua, naya: “Ono mi ni tire na gimi aborokporo, ani amánga kina pa Yekova.”​—Yosua 24:15.

GUPAI RENGBE ONI KA MANGAHA:

• Oni mangi mbakadapai nga ga wirikapai nga gu aborokporo dunduko nikaa gbia undo ti ni