Mi Ima bi gu Idapase Nga ga ga Yekova Aboro

Mi amomu mbiko mi aaberãnga gupai nga bakureami nga boro pambori te. Mi asanako nga, “Ginipai mo nainihe tipa Baibiri?” Ko aakaraganga pai fere nibasa te. Ni yangaraha, ko ape gupai fere nga nako nga Dezire Yekova; ko ima wirika bete apai beri. Mi adu na nyemu ka ino apai, mi asanako ko peke dungu apai fere.

Ani aima fura ni bakerehe rogo gu yuru re. Bakureami ape gupai fere nga, Baibiri naya Satana nga bazogo gi zegino re. (Yo. 14:30) Isoke, mo aima ino gipai re tigamo bakuruyo, ono tipa re tigimi, gipai re ni vovoho fere na ni wenehe. Mi aima digo nigi gupai ti aregbo dunduko nga, wenesino Mbori du nazoga zegino. Ono gipai re aadunga na rogoyo ti ni fere te mbiko agu apai mi nabihe rogo raka yo. Wa si avura du nga garã re adu gbua 26, mi aima bi dungu apai nga gu naafuda re.

Buba angia bakama tiyara nga ga agu abanzengere nga ga Amerika yo i ayamba yo nga United States Air Force. Sidu, ho mi adu ni ni gude, mi aima rugatire na gupai nga, vura bombu aima rengba ka manga, abanzengere aima du regerege ka ba bombu ti ai regbo. Gu vura namangi Vietnam yo amangi ti agu agarã mi aawirikapai California yo. Mi akodi tire kuti agu agude sukuru nakuru ku bangirigene ka yugo gayo gberãrago. Banzengere aado fuo rani na wiringua ngbondo beko, na ani aoro, gene aadunga tipa ka ngera wenengai te mbiko i aazumo gu bundu boro akpingo akpi behe ya ono namanga boro wa siata. Si angia regbo baguzoro na regbo samungu. Abarumbatayo rogo birĩ-zogarago aaimo aboro, aboro kini kuru ku bangirigene kaa yugo gayo gberãrago, na aboro kini mangipai rogo zuu yo. Aboro adu na aberãpai ni bakiakia tipa gupai si aaida si mangi. Apai dunduko aima du ni vunduvunduhe.

Rogo gu garã nangia 1970, mi atona ka mangasunge Alaska ku nodiyo na mi aagbia bakere marã. Tifuo gure, mi agu na tiyara ku London yo, ki ngbe motoro na mi aoro riru ku Alaska ku sudiyo zanga pa ba du adu rire yo nga gu mi aandu ku rogoho. Tifuo adiwi kusa, mi ada Afirika yo. Wa mi aandu gene, mi agbia aboro nga aguyo a naaida ka zubo be gayo akpakarapai dunduko.

Sidu, mbiko agu apai mi abihe na ki gihe, gu yugopai nga ga Baibiri nga gu naya gbegberẽ toro du du na maapai kurii agu apai du rogo zegino aima ye kadu na rogoyo ti ni fere. Ono ka si angianga Mbori du nazoga zegino ya, ginipai tie ko amangaha? Mi aida aida ka ino karagapai.

Rogo agu adiwi nangbefuo gure, mi agbia karagapai. Na wa regbo aandu, mi aye a ka ino dungu agu akumba na adee nga aguyo nadu ni ruruyo fu bangisa ndikidi Mbori rogo ngbatunga akpakarapai yo dunduko na mi ki kpinyemu yo.

IRELAND KU NODIYO—“GU RINGARA NGA GA BOMBU GBIATI WIRIMBIA WE”

Ho mi akaraga tire ni ku London yo, mi andu fuo nabakureami na ri afu Baibiri fere. Kusa, ho mi andu ni ku Amsterdam yo, Nadarand yo, Dezire Yekova abi re mi nasungu tii gu we du bangirigene kini gedi Baibiri, na ko aundo re mi wiriki dungu apai. Fuo gure, mi andu ku Dublin yo, Ireland yo, na mi abi be-basunge yo nga ga aDezire Yekova. Mi angoka ngbadimo. Ho mi arimi ni mi agbia Arthur Matthews, nga gu wirina naima du na bakere tatamana gbiati inohe. Mi asanako tipa ka wirika Baibiri, na ko aima ida ka wirikaha na mi.

Mi atona ka manga wisigopai na bakere nyemuhe, na mi aima du na nyemu ka geda agu abuku na amagazini aDezire Yekova aakusaha. Na ni rengo, mi aima geda Baibiri ni tihe. Si aima du ni bawenepai! Ba agu adunguratise yo nga ga dungurati, mi abi gupai nga zavura agude, i ima ino akaragapai kuti agu asanahe zavura agu aboro niima wirikapai aima digo ni bakibangiriyo tipaha tipa kama agarã: ‘Tipagine du gbegberẽ apai ti ni? Da nga Mbori? Ginipai namanga ho boro akpi ni?’ Abakureami dunduko angia aDezire Yekova. Si adu taata mbiko mi aainongo kura boro berewe rogo gu ringara re te. I aundo re mi kpinyemu Yekova na ki idi ka manga gupai ko akpinyemuhe.

Mi azi bapatiza rogo gu garã nangia 1972. Fuo garã sa kusa, mi atona ka mangasunge abazakigene, na mi andu kurogo wiri tooni dungurati du Newry yo, Northern Ireland yo. Mi aatumo tipa bambu mbia nadu nisaha pavuru gangara. Abagara adu kinaho mbembedi kpangba rago, na mi aawirika manga gimi agumbapai ku bara bangiira. Si aawiraha wa ami aadegatura wenengai wa ami aafugo ri ga ami riahe. Ami aarengbanga ka fu rugapai te, ono ami aundo re mi naabi agu aboro mi amanga gumbapai fuyo ho mi aamanga agumbapai ni. Rogo gu garã nangia 1974, i asia re ni kparakpara bazakigene na i akedi Nigel Pitt fuo re nga guko naye kada ni gu bakureami ani aima dia gbanga regbo na ko gbe.

Ti gu regbo re, bakere zuu aima du Northern Ireland yo. Kura aboro aayamba Northern Ireland nga “ringara bombu gbiati wirimbia we.” Gupai nanaamanga amanga dedede nga ka bi aboro i nita kpata bangiri agene, nofa aboro na bundu, na atarambiri kini sumbu. Akpakarapai anaaye gbe be aboro birĩ-zogarago gbiati apambori. Ono tie, Agarasisi gbiati aKatoriko aini gupai nga aDezire Yekova angbenga na aboro birĩ-zogarago te, sidu, ani adu na rengba ka tungusapai na ranirii na kidu ni bandabanda rani. Dedede airakporo aniima ino gini regbo na wari zuu anirengbe ka manga ni, na i aniima fu zahe furani tipa ani rengbe ka ne kerepai.

Wa si avura du wo, kereapai adu kinaho kindi. Rogo kura uru sa, ani aatungusapai na Denis Carrigan, nangia bazakigene a, rogo gu gbata nadu mbembedi nga gu aDezire Yekova aadunga rogoyo ya na ani andu koyo bara sa gbua mbata. Kura dee akitingbanga rani nga ani nga agu abanzengere nga ga aNgirisi yo du rogo gbuko yo, isoke mbiko boro ho dagbarani yo naafura wa boro Ireland te. Ani aima gunde be gu kitangbangase re ni kerehe. Ka si du nga boro anidu gbua na abanzengere wenengai, i aniima rengba ka no ni ni ki kpi watadu ka no ni ti nduni. Wa ani aru zegi rogo zere na ki ru nisarani kaa pido tarambiri, ani abi tarambiri naye ki ru rogo gu ba i ambira buni rogoho nga gu ba gu dee re akitingbanga rani rogoyo. Ri akuru ku zegi na kini fura na akumba ue rogo tarambiri, na kini ya beri kuti rani na ngbarago. Fuo gure, agu akumba re akama tarambiri yee ki ye fuo rani na i asana rani na bete asanahe tipa gu regbo tarambiri nika guari ti ni. Ho tarambiri ada ni, i afura fu bakama tarambiri. Ani aagianga agu apai i apehe te. Aboro aadunga vuruhe yo te, na ani aima ino gupai nga i nimangi mbakadapai amanga tipa ka manga furani gbegberẽ ho ani nika kura ni kusayo vuru gbata. Ono i aamanganga furani gbegberẽ te. Ho mi ada ni vuru tarambiri yo, mi asana bakama tarambiri nga: “Agu akumba nidu yo re, ya mo i naasanahe tipa rani?” Ko akaragapai ki ya: “Mi ima ino ada nga oni, na mi niima pehe fuyo. Ka oni bakingo bangironi ya. Oni ni bandabanda roni.”

Rogo gu garã nangia 1976 ti regbo bakere dunguratise rogo gu gbata nga Dublin, mi agbia Pauline Lomax, nangia kparakpara nazakigene naye ringara aNgirisi yo. Ri angia ruru wirina, ni boro umbasitise na ni boro nyemuse. Ri gbiati kawiri nangia Ray, i avunguyo na i ki sono kina ku rogo rengo yo. Fuo garã sa kusa, ani amangi rogatise na Pauline na ani aandu kindi kumbatayo kaa mangasunge ni kparakpara abazakigene rogo gu gbata nga Ballymena, Northern Ireland yo.

Ani amangisunge biko adungurati tipa bete regbo, na ani amangisunge Belfast yo, Londonderry yo, na rogo kura aba nadu ni kerehe. Ani aima gbia ngarasaro ti gu idapase nga ga agu awirinarani nambu agu aida nga ga agu apambori i adu rogoyo, ki mbu soga kura ngbatunga aboro, na gu sogote i agbiatiyo na ni tipa iriso Yekova. Ni rengo, ko aima fu maku fuyo na ki banda yo!

Ani araki Ireland yo tipa agarã bawe. Fuo gure, rogo gu garã nangia 1981, i ayambu rani ku Girada yo tipa ani mangi gu riko nangia namba 72. Tifuo nyasa ani sukuru, i akedi rani ku Sierra Leone yo, West Africa yo.

SIERRA LEONE YO—AWIRINA ADU NI RURUYO SI KI VURA DU VURŨ NGA I ANGIA AIRA RUNGO

Ani aaraka rogo gu kporo nga ga amokedi na wene sino aboro 11. Madaba adu berani sa, abambu ageno kidu biata, abambu ba mbida ime kidu ue, terefuni kidu sa, gu masini nga ga zunda aroko kidu sa na ga ugusa ha kidu sa a. Ima we anaadunga ho ti aregbo dunduko te. Akuri aga kurii bambu yo na kere awo ki gbe tira ku rogo gu vuru bambu nadu sende yo.

Wa si avura dunga apai aima du ni kpakarakpakaraha, ani aagbia ngbarago ti sunge tungusapai ni bakerehe. Aboro aima du na irisa tipa Baibiri na i aadegatuyo wenengai. Dungu aboro awiriki Baibiri na ki da ni aDezire Yekova. Aboro gu rago re anaayamba re nga “Baramu Robert.” Pauline kingia “Dia baramu Robert.” Tingbafuo bete regbo, wa sunge adu ni bakerehe be-basunge yo, ka gene adunga berewe bere tipa mi ni ndu tipa tungusapai gbe ya, aboro atona kaa yamba Pauline nga “Naramu Pauline.” I kini tona kaa yamba re tigimi nga “Kumbaku Naramu Pauline.” Gupai re aima ngba ti Pauline!

Dungu awirina angia airarungo, ono Yekova ti aregbo dunduko anaangera angera fuo gayo azingo, ti kura aregbo, ngba iiriwo agene. (Mt. 6:33) Mi natingida pa kura wirina sa ni dee nadu na marã beri sa tipa ka ngbe kina riahe fuyo na awiri rogo gu uru re, ono ri afu gu marã re fu gu wirina naawoka marã aadunga beko tipa ka ngbe dawa mararia na ni ya. Kusa, rogo gu uru re, dee aye na riri na ki fu marã fu gu wirina re tipa ri mbakadihe furi nga gupai ri aainongoho nga si nika manga ya. Dungu apai naamanga wakina gure.

WIRIKA VOVO SINO RAKA—NIGERIA YO

Ani adi agarã ribua ku Sierra Leone yo. Fuo gure, i akedi rani ku rogo gu Betere nga ga Nigeria. Ani adu awere rogo bakiki be-basunge. Mi aamanga kina bangisa ngbatunga gu sunge mi aamangaha Sierra Leone yo, ono tipa Pauline, si angia bakere ariapai furi na niba kpakarakpakaraha. Ri anaadia aregbo nga 130 rogo adiwi yo dunduko gene tungusapai yo, na ri aima du na wene aboro beri ri aawirika Baibiri na yo. Awere, i akedi ri kurogo gu bambu nga ga rungo ahe, yo du ri anaati auru kuoni kaa rungo agu aroko naasipo. Si adi ri adia na bete regbo tipa ri inidi tiri na ni, ono ri aye ka ino gupai ni nga, aboro aima du na bakere tambuahe tipa gu sunge ri aamangaha, na ri amoiberã ri gbe tipa ka mangaha wenengai na kini ngarasi akurari aboro Betere.    

Gu sino nga ga Nigeria adu ni vovo ho furani, na badungu apai si aaida ani wirikihe. Rogo kura uru sa, wirina ni kumba aye ku rogo gimi makatabu ka yugo gu wirina i adi ri ku Betere yo barambeda. Wa mi aaida ka fu sene furi, ri ati pati ndu re. Kina ngbare nazere! Pa averesi ue naye kurire yo niipo: Amokedi 10:25, 26 na Yugoti 19:10. Mi aberẽ gupai nga, ‘Ya mo si naida mi ya furi ka ri mangingo gupai re?’ Ti kina gu bangisa regbo re, mi aberẽ gupai nga i aima dia ri ku Betere yo; na ri aima ino agu apai Baibiri ayugoho.

Zee aima zio re, ti gu yangara regbo dunduko ani afura, na tifuo gure, mi amangi bete wetekapai. Mi aye ka bi gupai nga gu wirina re aamangapai kuti gu sino mangapai i aamangaha ti gu regbo re kindi rogo kura apapara gu ringara re. Kina gu bangisa pai re a akumba aamangaha. Si angia gu gene nga ga yugo irisa. Si angianga gu iriso i afuhe fu Mbori te; akpiapai kinaho rogo Baibiri yo du wa kina gure. (1 Sam. 24:8) Mi aima du na ngbarago nga wa mi aavura nga inoho ya, mi aapenga ai pai narengbe ka ba gberãngo ti wirinina te.

Ani aima gbia dungu aboro Nigeria yo nga aguyo naima du ni ruruyo tipa dungu agarã. Oni bingo gu kpiapai nga ga Isaiah Adagbona.a Ko awiriki rengo ho ko adu ni ni paranga, ono fuo gure, ngbataka aziko. I ki kedi ko ku rogo ba aboro ngbataka, kina ko nadu yo sa nga yangara Dezire Yekova. Wa si avura du nga sogote adu kinaho, ko aima undo aboro ngbataka naima susa 30 i di rengo kugume na ki sigira dungurati yo.

KENYA YO—AWIRINA ADU NA ZERANGBADUSE NA MI

Rogo gu garã nangia 1996, i akedi rani kurogo gu be-basunge du Kenya yo. Gere nga gu bambata regbo mi akaraga tire kurogo gu ringara re tingbafuo gu ye mi aye mbata nga gu mi nipepa ha ti tonatona gi kekeapai re. Ani aaraka Betere yo. Na dungu angarängarä nanaaye kurogo gu ba re. Ami anaadĩ zuzu angua be agu awirina ni ade nana tindaha. Rogo kura uru sa, kura wirina Betere yo ambu gari bangiri bambu ni zakizakihe. Ho ri ayego ni ku kporo, ri abi dungu angarängarä ami niri gu riahe ri ambuhe dimo kpuri yo. Ri atangba ri na ki kuru gu zegiyo. Ami atangba ra na ki guku ku zegino yo ti bangiri bambu.

Ani na Pauline aga kurogo gu dungurati naape Swahili. Tifuo bete regbo kusa, i afu gu sunge fere nga ga nungusa Wisigo Buku Nga ga Dungurati (i ayamba ha awere nga Wisigo Ziazia Kekeapai Nga ga Dungurati). Ono tie, mi aarengbanga ka pe Swahili wenengai te. Mi aniima wisigo gupai ani nika mangaha mbu regbo koyo, sidu, mi aduadu na rengba kaa geda asanahe wenengai. Ono tie, ka si anidunga agu akaragapai aboro anaafuhe anidu tooni kia ti gupai nadu ni kekehe, mi anaaruganga tire na ni te. Si aima du nipa zee! Rago aima gberã tire tipa awirina. Gupai iriwoho ati tire nga, i adu na zerangbaduse gbiati umbasitise ki mbu kina re mi naanungusa ha.

WA KUMUKO AVURA DU AMERIKA YO —ABORO AIMA DU A NA IDAPASE

Ani aadianga garã sa ku Kenya yo te. Fuo gure, rogo 1997 i ayambu rani ku Betere yo Brooklyn yo, New York yo. Awere, ani adu rogo gu ringara aboro aima du na kumuko rogoho nga gu naima rengba ka ye na gaha akpakarapai. (Snz. 30:8, 9) Ono tie, zavura rogo ringara wa gure, awirina aima yugo bakere nyemuse. Awirinarani amangisunge na gayo regbo gbiati gayo ahe angianga ka gbia undo tipa tiyo ya, ono tipa ka songoda gu wene sunge nga ga ga Yekova riigbu.

Vuru dungu agarã yo, ani ima bi gu idapase nga ga akuarani aDezire Yekova rogo dungu apai ni bakiakia. Ireland yo, ani abi gu idapase nga ga awirinarani zuu ki vura du vurũ. Afirika yo, awirina aima du na idapase rungo ki vura du na agu akurayo ki vura du rogo agu aba aDezire Yekova adunga rogoho ya. Amerika yo awirina aima du na idapase aboro ki vura du na kumuko vurũ. Nairiwo gu ngbarago du Yekova na ni ho ko angera ni kusende no na ki bi agu aboro nayugo nyemuse fuko rogo ngbatunga apai yo dunduko!

Agarã aasusa niipo—“wa ga abaturoko gbangu” watadu wai gire ninaaora ti wiringua niipo. (Eyo. 7:6) Ani awere namangasunge rogo rii-basunge nga ga zegino Warwick yo, New York yo, na ani na gu ngbarago nga kaa ndu kindi kumbatayo kaa mangasunge na agu aboro nzunzu niima kpinyemu akurayo. Ani na ngbarago, na rengbabepai tipa ka manga gupai rengbe omerani na ni tipa ka songoda gaani Bakindo nga, Kristo Yesu, nga guko nika fu maku barambeda fu badungu ruru aboro.—Mt. 25:34.