[garebee yo ku kumbabee yo] Marcelo, Yomara, gbiati Hiver. I dunduko ni basasa zadi gu Baibiri nga New World Translation nga ga airavurari du rogo Spanish
I Abi Nyemuse Rogo Mangaapai Yo
YOMARA na akawiri nga Marcelo na Hiver naraka rogo wiri tooni gbaria Guatemala yo. Yomara atona wirika Ziazia Kekeapai na aDezire Yekova, na ni yangaraha, akawiri atona wirika Ziazia Kekeapai a. Ono kpakarapai adu kinaho. I dunduko biata nga airavurari, na i aadunga na rengba ka geda gu kekeapai nga ga airavurari te. Sidu tie, gayo bayugu Ziazia Kekeapai anaageda agenewaraga gbiati averesi rogo Baibiri yo fuyo.
Si aima kpakara fuyo a tipa i naandu tipa adunguratise. I aarengbanga nitiyo ka ndu tipa aminiti 40 ku rogo gu Bambu Kindo naadu mbembedi na yo te. Ono awirina rogo dungurati amangi mbakadapai tipa kaa ndu na yo tipa adunguratise dunduko. Na ho i atona manga gu paparaha ni nga ga agude sukuru ti regbo gu dunguratise du bebere poso, awirina aundo yo i zi agu apaparaha i adu na ni kuriyo yo.
Rogo Merekoko 2019, i atona manga agu adunguratise nga ga dungurati rogo gayo gbaria. Ti gu regbo re, arogotise ni abazakigene aima ga ku rogo gu gbaria re. I aainongo wai ka geda gu kekeapai nga ga airavurari na kini kehe te, ono, i aaida ka yugo wai fu agi abawiriki Ziazia Kekeapai nangia airavurari re tipa wai ka mangasunge na ni. Sidu, i andu ku ba awaraga yo na ki rogo abuku nga gu du tipa gu kekeapai nga ga airavurari na i awiriki wai rengbe yo ka yugo wai fu kura aboro rengbe yo ka mangasunge na ni.
Marcelo nafu karagapai ti regbo gu dunguratise nga ga dungurati
Vuru bete adiwi yo, agu awirina biata re adu na rengba ka geda gu kekeapai nga ga airavurari taata, si naundo yo i mangi bakere sonakumbatayo rogo toro yo.a Yomara, Marcelo, na Hiver namangasunge awere ni abazakigene. Marcelo nga moundo abaakumba. Rogo aposo yo dunduko, i na dungu apai i amangaha tingba iriso Yekova. I nairiso Yekova zaaza na si ima sa agu aboro du yo dagbayo i naairisoko zaaza a.
Agu awirina du biata re ima du na bakere tambuahe tipa gu undo nga ga nyemuse dungurati afuhe fuyo. Yomara aya, “Natona kina ti gu bambata regbo ani agbia aDezire Yekova, i ima yugo ndikidi nyemuse nga ga aKristano furani.” Marcelo agbia kurapai kutini nga, “Ani na bawene abakure berani rogo gaani dungurati, na ani nga papara agu awirina du rogo zegino dunduko du na nyemuse.” Yomara gbiati akawiri napido gu uru na bakere nyemuhe ho i nika bi wai ni Yekova nika sa kpotosende ni paradizo.—Tam. 37:10, 11; Yes. 35:5.
a I ambakadi gu burosua nga Learn to Read Braille tipa si undo gu boro nga iravurari watadu gu boro angeranga wenengai ya tipa ni wiriki wai ka geda gu kekeapai nga ga airavurari na kini kehe.