Ga Mbori Kindo nga gu bangua riipai du rogo Baibiri yo. Yekova nika mangasunge na gu Kindo re tipa ka digiso gako ringbisapai tipa kpotosende nga gu nadu ti tonatonaha. Ginihe nga Kindo? Waigu ani aino gupai nga si nazogarago azoga awere? Gini apai si naima mangaha? Na gini apai si nika mangaha kumbatayo? Gi wirikapai re gbiati agu akuraha ue ngbefuoho nika karagapai kuti agu asanahe re.

1. Ga Mbori Kindo nga gine, na da nga gaha Bakindo?

Kindo nga zogarago Yekova Mbori nitiko nasigiraha. Yesu Kristo nga gaha Bakindo nazogarago ngbangbaturũ yo. (Matayo 4:17; Yoane 18:36) Baibiri nape gupai tipa Yesu nga: ‘Ko adu ni Bakindo . . . ko ki zogo rago azoga kindi.’ (Ruka 1:32, 33) Wangia Yesu Bakindo ga Mbori Kindo, ko nika zogarago kurii aboro dunduko auru kpotosende.

2. Ada nazogarago na Yesu?

Yesu azoganga rago nisako te. Aboro ‘dagba angbatungayo, na angbatunga afugoyo, na aboro, na arikaaboro nika zogarago ni abakindo ku auru kpotosende.’ (Yugoti 5:9, 10) Bange aboro wai nika zogarago na Kristo? Natona kina ti gu regbo Yesu aye ku auru kpotosende, amirioni aKristano aima da ni apefuoko. Ono tie, bange aboro gbua nga 144,000 dagba yo yo nika ga ku ngbangbaturũ yo ka zogarago na Yesu. (Mo gedi Yugoti 14:1-4.) Ono gu kura aKristano dunduko du auru kpotosende, nika ngia avuru gu Kindo re.—Atambuahe 37:29.

3. Tipagine ngba ga Mbori Kindo ti ni ki susi gu zogarago nga ga wiri aboro?

Zavura ho agu abazogo nga aboro aida aida ka manga wene apai ni, ome ti yo tipa ka manga agu apai dunduko i aida ka mangaha te. Niyangaraha, kura abazogo naye ki di bayo nga aguyo aberãnga pa gayo azogo ya. Ono tie, bazogo ga Mbori Kindo nga Yesu, kura boro ho nika diabako berewe te. Mbori ima ‘máa gu ngbi nga gu ka i agbárasa nga ha wa sa ya.’ (Daniere 2:44) Yesu nika zoga kpotosende naabaha, na ko adunga na kparakaro te. Ko na nyemuse, weneringise, gbiati rurupai, na ko nika yugopai fu aboro i naamanga fu akurayo kina rogo gu bangisa gene re—rogo nyemuse, weneringise, gbiati rurupai.—Mo gedi Yesaya 11:9

4. Ga Mbori Kindo nika zogorago ku auru kpotosende dunduko

Yesu Kristo du na bakere ome tipa ka zogarago kisusi ai bazogo rogo gu pangbanga nga ga aboro. Mo gedi Matayo 28:18, na tifuoho, mo ki sakipai tipa gi sanahe re:

• Wai du ga Yesu zogarago ni wenehe ki susi gu zogarago nga ga aboro?

Gu zogarago nga ga aboro na’aria tihe dedede, na abazogo nibasasa nazoga kina wiri papara zegino gbua. Na ginipai tigaha du tipa ga Mbori Kindo? Mo gedi Daniere 7:14, na tifuoho, mo ki sakipai tipa agi asanahe re:

• Tipagine duhe ti ni ni wenepai nga ‘i agbarasa nga’ ga Mbori Kindo te?

• Tipagine duhe ti ni ni wenepai nga si nika zogarago ku auru kpotosende naabaha?

5. Gu zogarago nga ga aboro du wa ka i dihe kusayo

Tipagine si aida ga Mbori Kindo diba gu zogarago ti ni nga ga wiri aboro? Mo bi gu VIDIO re, na tifuoho mo ki sakipai tipa gu sanahe ngbefuo ho.

VIDIO: Ga Mbori Kindo Nga Gine?—Paparaha (1:41)

• Sangbana ga aboro zogarago ningia gine?

Mo gedi Batungusipai 8:9, tifuoho, mo ki sakipai tipa agi asanahe re:

• Ya mo mo naberãha nga si naida gu Kindo nga ga Mbori diba gu zogarago nga ga aboro? Tipagine mo aberãha ti ni wo?

6. Ga Mbori Kindo na agu abazogo rogoho niima rugatiyo na ani

Mbiko gupai nga Yesu nga gaani Bakindo aima raka ni boro, ko ima rengba ka “rungo na ani tipa gaani rungbura.” (AEbere 4:15) Yekova aima digo ni sia ruru akumba na adee nga aguyo nika zogarago na Yesu du bangeyo nga 144,000 “dagba angbatungayo, na angbatunga afugoyo, na aboro, na arikaaboro dunduko.”—Yugoti 5:9.

• Ya mo mo abingo ho ni pa wasa nga Yesu gbiati agu aboro dunduko ko nika zogarago na yo ima rugatiyo na ani gbiati agu akpakarapai ani andu rogoyo te? Tipagine mo abihe ti ni wo?

7. Ga Mbori Kindo na wene arugute rogoho

Azogarago namaa agu andiko si aida si fu undo na ki banda avuruhe. Kina gu bangisapai re du tipa ga Mbori Kindo a, si na andiko rogoyo si aida avuruhe pekefuoho. Mo gedi 1 AKorindo 6:9-11, na tifuoho, mo ki sakipai tipa agi asanahe re:

• Mo nabihe nga zegino rengbe ka du wai ho ka aboro dunduko apekafuo ga Mbori arugute ni?a

• Ya mo mo nabihe nga si rẽarẽ fu Yekova ko idi gupai nga avuru gako Kindo nipekefuo agi arugute re? Tipagine mo abihe ti ni wo?

• Ginipai nayugo gupai nga agu aboro agianga sangba agi andiko re ya ima rengba ka manga ariapai?—Mo bi veresi 11.

GINIPAI MO NAWIRIKIHE?

Ga Mbori Kindo nga ndikidi zogarago du ngbangbaturũ yo nika zogarago ku auru kpotosende naabaha.

Fugöpai

• Ada nga abazogo ga Mbori Kindo?

• Wai du ga Mbori Kindo ni bawenehe ki susi ai gu zogarago nga ga aboro?

• Gini bete apai Yekova aidaha be avuru Kindo?

MO WETEKE GU KURA APAI

Mo bingo gupai Yesu ayuguhe tipa gu ba du Kindo rogoho.

“Ya Mo ga Mbori Kindo Ngbaduro Yo?” (Gu kekeapai du rogo gaani bangiriba nga ga Internet)

Tipagine aDezire Yekova nasia ka du ti ni niruru yo fu ga Mbori Kindo kuba gupai nga i du niruru yo fu gu zogarago nga ga aboro?

I Nafu Tiyo Tipa ga Mbori Kindo 1:43

Mo wisigingo pai tipa gupai Baibiri nayuguhe tipa agu aboro du bangeyo nga 144,000 nga aguyo Yekova nasia yo i zogorago na Yesu.

“Ada Naga ku Ngbangbaturũ Yo?” (Gu kekeapai du rogo gaani bangiriba nga ga Internet)

Ginipai nasa kura dee sa nadu bambukiso yo, ri idi kuti gupai nga kina Mbori sa rengbe ka ye na ruru sarangbanga kurogo zegino?

“Wai Mi Agbia Akaragapai Kuti Iraira Sarangbanga” (Awake!, Ngbangba 2011)

Ga Mbori Kindo atona zogarago ngbangbaturũ yo rogo gu garã nangia 1914. Gure du a nga gu regbo gu yangara arame nga ga gu zogarago nga ga wiri aboro atona. Waigu ani ainoho? Ani nika bi agu asangbaanebi nga ga Baibiri, gupai namanga rogo zegino, na wai du sino aboro naatona rogo 1914.

1. Ginipai gu sangbaanebi du rogo Baibiri ayugoho?

Gu buku nga Daniere du rogo Baibiri nayugo gupai nga si adu nga ga Mbori Kindo nika tona zogarago ti digido ringbisiringbisi rago wa ‘bara saba.’ (Daniere 4:16, 17) Fuo kama agarã kusa, Yesu afura tipa gu regbo re nga ‘rago aGendiria,’ na ko ayugu gupai nga si ata digongo te. (Ruka 21:24) A wa ani nika bihe, gu ringbisiringbisi rago du wa bara saba re adigi rogo gu garã nga 1914.

2. Ginipai namanga rogo zagino na waigu du sino aboro naatona rogo 1914?

Ga Yesu abawiriki asana ko nga: “Gine i ka ina pa ga ye ti ni, na pa digida rago?” (Matayo 24:3) Rogo ga Yesu karagapai, ko afura tipa gu dungu apai nga gu narengbe ka tona manga ti ngbafuo ko tona zogarago ngbangbaturũ yo ni Bakindo ga Mbori Kindo. Bete agi apai re nakoda avura, angbongi, gbiati abazigizo. (Mo gedi Matayo 24:7.) Baibiri aima pe gupai kumbatayo a nga, sino aboro rogo ‘kusa rago’ nika sa raka ni ‘gbegberẽhe.’ (2 Timoteo 3:1-5) Agi akpakarapai re gbiati sino aboro aima du ni yuguyuguhe natona rogo 1914.

3. Tipagine apai agberã ti ni kina kumbatayo natona kinaho ga Mbori Kindo atona zogarago ni?

Ngbutuko, tifuo Yesu da ni Bakindo ga Mbori Kindo, ko asovura ngbangbaturũ yo na Satana gbiati adaimona. Satana aadunga na diabese rogo gu vura re te. Baibiri nape gupai nga, ‘i ki niba ko ku sende yo na gako amaraika a’ (Yugoti 12:9, 10, 12) Satana na bakere zinga mbiko ko ima ino gupai nga i nika gbarasa ko agbarasa. Sidu, ko du naye na aigirã gbiati arungo rogo zegino dunduko. Sidu nga ndu gupai apai agberã ti ni ni kerehe rogo zegino! Ga Mbori Kindo nika nyasariipa agu akpakarapai re dunduko.

MO WIRIKI KURA DUNGU APAI

4. Geda aregbo ringbisihe kuti wai du he rogo Baibiri, nayugoho nga ga Mbori Kindo atona zogarago rogo 1914

VIDIO: Ga Mbori Kindo Atona Zogarago Rogo 1914 (5:02)

Mbori asa Bakindo Nebukadenesara nadu Babera yo ko rari musumo ni sangbanebi. Gu musumo re gbiati gu saka rogoyo Daniere afuhe nayugo gupai nga si adu tipa ga Nebukadenesara zogarago gbiati ga Mbori Kindo.—Mo gedi Daniere 4:17.a

Mo gedi Daniere 4:20-26, na ki mangisunge na gu gbakigbaki he du na asura rogoho re ka karagapai kuti agi asanahe re:

• • (A) Ginipai Nebukadenesara abihe rogo gako musumo?—Mo bi averesi 20 na 21.

• • (B) Si adu nga ginipai nika manga tipa gu ngua re?—Mo bi veresi 23.

• • (D) Si adu nga ginipai nika manga ti digido gu ringbisiringbisi rago du wa ‘bara saba’?—Mo bi veresi 26.

Gu ngbanya du dagba gu musumo nga ga ngua re na ga Mbori Kindo

SANGBANEBI (Daniere 4:20-36)

Zogarago

(A) Bakikii ngua

Pa wai zogarago agberẽ

(B) “I de gu ngua re ki gbarasi he,” na ringbisiringbisi rago susi “wa bara saba”

Zogarago akaragatihe

(D) “Ga ngbi adu foro berewe”

Rogo bambata digisidigisi gi sangbanebi re . . .

• (E) Da du gu ngua re aarukuba ni?—Mo bi veresi 22.

• (F) Gini regbo gako zogarago adigi?​—Mo gedi Daniere 4:29-33.

• (G) Ginipai namangi tipa Nebukadenesara ti digido ringbisiringbisi rago “wa bara saba”?—Mo gedi Daniere 4:34-36.

BAMBATA DIGISIDIGISI GU SANGBANEBI RE

Zogarago

(E) Nebukadenesara, Bakindo Babera

Pa wai zogarago agberẽ

(F) Tifuo 606 M.B.K., Nebukadenesara apopo na ko aarengbanga ka zogarago te tipa agarã saba

Zogarago akaragatihe

(G) Berã Nebukadenesara akaragatihe na ko ki tona zogarago berewe

Rogo ue digisidigisi gi sangbanebi re . . .

• (H) Da du gu ngua re aarukuba ni?​—Mo gedi 1 Pekapai 29:23.

• (I) Wai gu gayo zogarago adigi? Waigu ani aino gupai nga i aazoganga rago ti gu regbo Yesu adu auru kpotosende te?—Mo gedi Ruka 21:24.

• (K) Ti gini regbo na wai gu zogarago re akaragatihe?

UE DIGISIDIGISI GU SANGBAANEBI RE

Zogarago

(H) Agu aBakindo nga ga Yisaraere nga aguyo naarukuba ga Mbori zogarago

Pa wai zogarago agberẽ

(I) I agbarasi Yerusarema si ki sa gupai nga gu gene zogarago nga ga agu abakindo nangia aYisaraere ru tipa agarã 2,520

Zogarago akaragatihe

(K) Yesu atona zogarago ngbangbaturũ yo ni Bakindo ga Mbori Kindo

5. Zagino aima ariatihe natona rogo 1914

Mo bi gu VIDIO re.

VIDIO: Zagino Aima Ariatihe Natona Rogo 1914 (1:10)

Yesu aima gumbapa agu apai si adu nga si nika manga rogo zegino tifuo ko da ni Bakindo. Mo gedi Ruka 21:9-11, na tifuoho, mo ki sakipai tipa gi sanahe re:

• Gini apai dagba agi apai re mo nabihe si nimangi watadu mo agia paha?

Gu mokedi nangia Pauro aima fura tipa wai aboro nika du ti gu yangara arame nga ga gu zogarago nga ga aboro. Mo gedi 2 Timoteo 3:1-5, na tifuoho, mo ki sakipai tipa gi sanahe re:

• Gini asino dagba agi asino re mo abihe ti aboro areme?

6. Si naida gu Zogarago nga ga ga Mbori Kindo fõ ngbadurani yo

Mo gedi Matayo 24:3, 14, na tifuoho, mo ki sakipai tipa agi asanahe re:

• Gini nyanyakipa sunge nayugo gupai nga ga Mbori Kindo nazogarago awere?

• Wai rengbe mo ka fubee tipa gi sunge re?

Ga Mbori Kindo nazogarago awere, na gu regbo si nika zoga kpotosende naabaha ima mbeda. Mo gedi AEbere 10:24, 25, na tifuoho, mo ki sakipai tipa gi sanahe re:

• Ginipai si aida ani mangihe wa du ani nibasasa ‘wa bi ani he ya gu uru re nambeda’?

GINIPAI MO NAWIRIKIHE?

Gu sangbaanebi nga ga Baibiri, wai si ageda gaha aregbo na agu apai namanga rogo zegino nayugoho nga ga Mbori Kindo nazogarago awere. Ani nayugoho nga ani ima ida kuti gipai re ni tungusa ani pai tipaha, na nidu ani pati adunguratise.

Fugöpai

• Ginipai namangi ti digido gu ringb- isiringbisi rago du wa bara saba i aima fura tipaha rogo gu buku nga Daniere rogo Baibiri yo?

• Ginipai sa ro mo idi kuti gupai nga ga Mbori Kindo atona zogarago rogo 1914?

• Waigu rengbe mo ka yugoho nga mo ima ida kuti gupai nga Kindo nazogarago awere?

MO WETEKE GU KURA APAI

Mo bingo gupai apangbanga ape gbiati kura aboro tipa agu aariapai namanga rogo zegino natona rogo 1914.

“Gu Regbo Sino Aboro Atona ka Gberã Kisusi” (Awake!, Zerekpe 2007)

Mo gedinga wai gu sangbaanebi du rogo Matayo 24:14 adu na maapai ku rii gu raka nga ga gu kura kumba sa.

“Mi Akpinyemu Ngi Kandi Nga ga Bee Kisusi Ahe Dunduko!” (Ngbaõbambu Sinziri Na. 3 2017)

Waigu ani aino gupai nga gu sangbaanebi du rogo Daniere kapita 4 nabipa ga Mbori Kindo abi?

“Gini Regbo ga Mbori Kindo Atona Zogarago Ti Ni? (Bambata Paparaha)” (Ngbaõbambu Sinziri, Tanvuo 1, 2014)

Ginipai nayugo gupai nga gu ringbisiringbisi rago du wa “bara saba” i nape paha rogo Daniere kapita 4 adigi rogo 1914?

“Gini Regbo ga Mbori Kindo Atona Zogarago Ti Ni? (Ue Paparaha)” (Ngbaõbambu Sinziri, Ngbangba 1, 2014)

Ga Mbori Kindo nazogarago azoga awere. Barambeda, si nika manga bakere aˈariapai auru kpotosende. Ani bingo gu bete weneapai rengbe mo ka ngera tipa ha kumbatayo tiibe gu zogarago nga ga Kindo.

1. Waigu ga Mbori Kindo nika karaga zereda gbiati rurupai ku auru kpotosende?

Yesu, nga Bakindo ga Mbori Kindo, nika gbarasa gbegberẽ aboro gbiati azogarago rogo gu vura nga Aramegido. (Yugoti 16:14, 16) Ti gu regbo re, agi akidohe nga ga Baibiri du re nika digiso tihe dunduko: ‘Fuo rago ngbutuko, gbegberẽ boro adú nga ho berewe te.’ (Atambuahe 37:10) Vurube gu Kindo re, Yesu nika sa gupai nga zereda gbiati rurupai hiisi kpotosende.—Mo gedi Yesaya 11:4.

2. Raka nika du wai ho gupai Mbori akpinyemuhe nikaa mangaha ni auru kpotosende?

Tii gu zogarago nga ga ga Mbori Kindo, ‘ruru aboro adía kumbo ringara, ki nyeanye kindi.’ (Atambuahe 37:29) Mo berẽnga gupai nga mo naraka rogo gu zegino du aboro dunduko ni ruru yo na i dunduko nakpinyemu Yekova na kini kpinyemu akurayo! Boro ho nika woka te, na aboro dunduko nika raka nyeanye kindi.

3. Ginipai ga Mbori Kindo nika mangaha tingbafuo gbarasa yo gbegberẽ aboro?

Tingbafuo i gbarasi gbegberẽ aboro, Yesu nika zogarago ni Bakindo tipa agarã 1,000. Ti gu regbo re, ko gbiati agu aboro nika zogarago nako du bange yo nga 144,000 nika undo aboro auru kpotosende i da ni rengberengbe yo zanga ingapai. Ti digido gu regbo re, i nika sa kpotosende kurogo bawene paradizo, nga gu nika hii be aboro ngbarago nga aguyo nika gbia undo mbiko giayo sangba ga Yekova andiko. Tifuo gure tie, Yesu nika karaga zogarago berewe fu Bako, nga Yekova. Rimo Yekova nika du ni ‘irisi irisihe’ susi gu nidu mbata. (Matayo 6:9, 10) Si nika yugotihe ayugo nga Yekova nga wene bazogo nangera angerafuo gako azogo. Si du tie, Yekova nika gbarasa Satana, adaimona, gbiati ai agu aboro nasia ka samungu kuti Gako zogarago. (Yugoti 20:7-10) Gu weneapai nika ye vurube ga Mbori Kindo nika nyeanye kindi.

MO WIRIKI KURA DUNGU APAI

4. Ga Mbori Kindo nika digiso ga aboro zogarago

‘Boro nidu ni gbia ku ri kura ni ka imisa ni.’ (Batungusipai 8:9) Yekova nika mangasunge na gako Kindo tipa ka digiso iraira mangaapai.

Mo gedi Daniere 2:44 na 2 ATesaroniko 1:6-8, na tifuoho, mo ki sakipai tipa agi asanahe re:

• Ginipai aYekova na Yesu nika mangaha na gu zogarago nga ga aboro gbiati agu aboro nasongodaha?

• Waigu agu apai mo nawirikihe tipa Yekova gbiati Yesu akido ro nga gayo mangapai nika du ni ruruhe na ni wenehe?

5. Yesu nga wene Bakindo

Wangia Yesu Bakindo ga Mbori Kindo, ko nika manga dungu apai tipa ka undo aboro auru kpotosende ane. Mo bi gu VIDIO re tipa ka bi wai Yesu ayugo gupai nga ko na nyemu ka undo aboro na Yekova ima fu ome fuko tipa ko mangihe wo.

VIDIO: Yesu Ayugu Gupai ga Mbori Kindo Nika Mangaha (1:13)

Ho Yesu adu ni auru kpotosende, ko ayugu gu bete apai Kindo nika mangaha. Gini amaku i natangara paha ane mo angera tipa ha gbe kumbatayo? Mo gedi agu averesi ngbefuo agu amaku re nga gu naundo rani ani ini dungu apai tipa agu amaku re.

6. Ga Mbori Kindo nika ye na weneapai kumbatayo

VIDIO: Gu Mboimboi pai Nayugo Wai Apai Nika Ngba Kumbatayo (4:38)

Mo gedi Atambuahe 145:16, na tifuoho, mo ki sakipai tipa gi sanahe re:

• Pa ino mo gupai nga Yekova nika ‘mbisa gu nyemuhe nga ga unga ahe dunduko’ nasa ro mo du wai?

GINIPAI MO NAWIRIKIHE?

Ga Mbori Kindo nika manga gupai amanga ko aida si mangihe. I nika sa kpotosende naabaha kurogo paradizo nga gu nika hii be wene aboro nga aguyo nikaa iriso Yekova nyeanye kindi.

Fugöpai

• Waigu ga Mbori Kindo nika ziasi rimo Yekova?

• Tipagine rengbe ani ka ida ti ni kuti gupai nga ga Mbori kindo nika digiso agu akidohe nga ga Baibiri?

• Dagba agu apai Kindo nika mangaha, ginigu mo angera kumbatayo gbe tipaha?

MO WETEKE GU KURA APAI

Mo bingo gupai gu fugo nga Aramegido yo ayugoho.

“Gine Nga gu Vura Nga Aramegido?” (Gu kekeapai du rogo gaani bangiriba nga ga Internet)

Mo wisigingo agu apai Yesu aya si nika manga ti regbo “bakere gberãngbi“—Matayo 24:21.

“Ginihe Nga Bakere Gberangbii?” (Gu kekeapai du rogo gaani bangiriba nga ga Internet)

Mo bingo wai rengbe aborokporo ka berã kina sa kurii agu amaku nga ga Kindo du kumbatayo.

Mo Bingo Tiro Paradizo Yo (1:50)

Mo bingo wai boro-birĩ zogarago ni basamungu kuti ringara agbia karagapai kuti gupai ko aagbataha, ko aya, “Mi Adu ni Fudifudi Re be Dungu Asanahe.”

“Ziazia Kekeapai Rengbe Arengba ka Aria Gaoni Raka” (Ngbaõbambu Sinziri, Ngi 1, 2012)