Ginipai Namanga Ho Ani Akpi Ni?

Ya mo mo azanganga ga boro rogo kpio yo? Rogo gi ngbatunga kpakarakpakara regbo re, mo ima rengba ka bakabangiro nga: ‘Ginipai namanga ho ani akpi ni? Ya mo maabangirise ho tipa ka bi gu gaani aboro naima kpiko re berewe?’ Rogo gi wirikapai re na gu nika ngbefuoho, mo bingo agu akaragapai nga ga wasa Baibiri afuhe.

1. Ginipai namanga ho ani akpi ni?

Yesu aringbisi kpio kuti dudunguro rame. Gu boro du rogo dudunguro rame ainongo gupai namanga pati ni te. Waigu du kpio wakina rame? Tingbafuo boro kpi, ni aigirãnga berewe te. Ni abingo ho nga ni nisani te, ka si vura du vurũ nga ni aima kpinyemu abakureani gbiati agumeni gbe. Baibiri nagumba gupai nga: ‘Kpikpi aboro aina nga pai te.’—Mo gedi Batungusipai 9:5.

2. Gini undo ani agbiaha ho ani aino gu rengo ni du tipa kpio?

Badungu aboro nagunde agunde be kpio—zavura be gu boro naima kpi! Ono mo ima rengbe ka gbia wasa be gupai Baibiri apehe tipa kpio. Yesu aya: Oni ara ‘ni rironi be rengo.’ (Yoane 8:32) Gu kura apambori nayugo gupai nga kura paboro kinaho naraka araka fuo kpio ni ono anga wo Baibiri ayugoho te. Rogo gi gene re, boro ho narungo fuo kpio ni te. Na berewe a, wa duhe nga kpikpi aboro ainongo pai te, i arengbanga ka imisa rani te. Si du si aida nga ani nairiso kpikpi aboro watadu ka mangapai fuyo kini berẽhe nga i andu ka du na zinga na ani te.

Gu kura aboro nape gupai nga i ima rengba ka fura na kpikpi aboro. Ono ka pai mangingo wo te. A wa ani nawirikihe “kpikpi aboro aino nga pai te.” Agu aboro naberã gupai nga i nafura afura na gu gayo aboro naima kpiko i rengbe kaa fura nzunzu na kina boro adaimona nga agu ra namanga tira nga ami du nga agu aboro nakpiki re. Sidu, ino ani gu rengo du tipa kpio nabanda rani be adaimona. Yekova naza rani ti asada ka fura na agu aboro naima kpiko, bambiko ko ima ino gupai nga fura na adaimona ima rengba ka imisa rani.—Mo gedi Pa Fu Rugute ni Ue he 18:10-12.

3. Mo wiriki gu ndikidi rengo du tipa kpikpi aboro

Rogo zegino dunduko, ga aboro aida nibasasa tipa gupai namanga ho ani akpi ni. Kina rengo ngaha nga, anga agu aida re dunduko rengbe kadu ni rengo te.

• Gini apai aboro naidi kuti ni rogo gamo dagbarago ni bipa kpikpi aboro?

VIDIO: Ginipai du Tipa Akpikpiyo?—Paparaha (1:19)

Mo gedi Batungusipai 3:20, na tifuoho, mo ki sakipai tipa agi asanahe re:

• Ringbisihe kuti gi veresi re, ginipai namanga ho boro akpi ni?

• Ya mo gu kura barapa boro kinaho naraka araka fuo kpio?

Baibiri nagumbapa kpio Razaro furani, nangia mbembedi bakurea Yesu. Wa mo nikaa geda Yoane 11:11-14, mo bingo gupai Yesu apehe tipa pakpio Razaro. Tifuoho, mo ki sakipai tipa agi asanahe re:

• Yesu aringbisi kpio kuti gine?

• Ginipai gi ringbisapai re ayugoho furani tipa kpio?

• Ya mo mo nabihe nga ga Baibiri sakapai tipa kpio rẽarẽ?

4. Gu rengo du tipa kpio naundo rani aundo

Pa ino ani gu rengo du tipa kpio nasarani ka ani gundenga be kpikpi aboro ya. Mo gedi Batungusipai 9:10, mo ki sakipai tipa gi sanahe re:

• Ya mo kpikpi aboro rengbe ka imisa rani?

Agu arengo nga ga Baibiri nabanda rani ti agu ida du wa gu nga si naida i mangipai amanga fu kpikpi aboro tipa ka i imisi nga rani ya, watadu zavura ka iriso yo. Mo gedi Yesaya 8:19 na Yugoti 4:11, na tifuoho, mo ki sakipai tipa gi sanahe re:

• Mo naberãha nga waigu du Yekova ho ko abi boro ni ni niirisi watadu ni nigbata undo be gu boro naima kpi?

5. Gu rengo du tipa kpio nafu wasa furani

I ima yugo gupai fu dungu aboro nga ho i nika kpi ni, i nika mbusa yo ambusa tipa gu gbegberẽ apai i amangihe kusayo. Si nafu kina wasa ka ino gupai nga boro ho nambu tifuo kpio tezavura gu boro naima manga dungu gbegberẽ apai vurũ. Mo gedi ARomo 6:7, na tifuoho, mo ki sakipai tipa gi sanahe re:

• Baibiri nape gupai nga ho boro akpi ni Mbori ambusanga ni berewe tipa agu aingapai ni amangihe te, si du ya mo mo naberãha nga ai agu aboro naima kpiko nambu ambu be agu aingapai i amangihe kusayo?

Wa ani kaa ino Yekova ni bakerehe gbe, kina wo a ani ka ino gupai nga ka ko mbusi nga kpikpi aboro te. Mo gedi Pa Fu Rugute ni Ue he 32:4 na 1 Yoane 4:8, na tifuoho, mo ki sakipai tipa agi asanahe re:

• Ya mo gu Mbori du na agu asino ti ko i napeke paha rogo agi averesi re rengbe ka ida kaa mbusa agu aboro naima kpiko?

• Ya mo mo nabi gu rengo du tipa kpio ni pa wasa? Tipagine mo abihe ti ni wo?

GINIPAI MO NAWIRIKIHE?

Ho boro akpi ni, gani raka ima digo. Kpikpi aboro arungongo te, na ka i imisinga agu aboro du ni unga yo a te.

Fugöpai

• Ginipai namanga ho ani akpi ni?

• Waigu gu rengo du tipa kpio aundo rani?

• Waigu gu rengo du tipa kpio afu wasa furani?

MO WETEKE GU KURA APAI

Mo bingo gupai rogo gu fugo yo nga “mbisimo” ayugoho rogo Baibiri.

“Ginihe Nga Mbisimo?” (Gu kekeapai du rogo gaani bangiriba nga ga Internet)

Mo bingoho singia Mbori namangasunge na we ka mbusa gbegberẽ aboro.

Ya Mo Iferno Nga Ndikidi Ba I Arungosi Aboro Rogoho? (3:07)

Ya mo si naida ani gunde be agu aboro naima kpiko?

Atoro Kpikpi Aboro​—Ya Mo I Rengbe ka Undo Ro Watadu ka Imisa Ro? Ya Mo I Naraka? (burosua)

Mo bingo wai kumba agbia wasa ho ko awiriki rengo ni tipa gupai namanga ho ani akpi ni.

“Kina Ngbare Nazere Be Gu Wene Ruru Karagapai Nga ga Baibiri” (Ngbaõbambu Sinziri, Wegebe 1, 2015)