WIRIKAPAI 17

Gini Ngbatunga Boro Nga Yesu?

Gu du Tipa Kusaha ni Waraga

Wa ani kaa wirika agu apai Yesu ana gumbaha na kini mangihe auru kpotosende, ani nika ye ka ino agu asino nga gu nambedisa rani na ko gbiati Bako nga Yekova. Gi bete wene asino re nga gine? Na wai du rengbe ani ka wirika Yesu rogo gaani raka yo?

1. Rogo gini agene du Yesu wa kina Bako?

Ngbangbaturũ yo, Yesu anaabi gu Bako nga boro nyemuse na ki ni wirikipai beko tipa abirioni agarã. Ni sangbana gipai re, ga ko aberãpai, abipai, gbiati mangaapai wakina ga Bako. (Mo gedi Yoane 5:19.) Nirengo, Yesu awiriki kina agu asino nadu ti Bako ziazia si du ko aya ti ni we: ‘Gu ni bi re ni bi Buba.’ (Yoane 14:9) Wa mo ni kaa wirikapai tipa asino Yesu, mo nika ye ka ino Yekova wenengai ki susi. Ni kpiapai, gu nunga aboro du ti Yesu nayugo wai du ga Yekova bipai tipa ro.

2. Wai du Yesu ayuguhe nga ko ima kpinyemu Yekova?

Yesu aya: ‘Aboro ini aina zegino ya mi nakpi nyemu Buba, wa Buba afu rugute fere, kina wo mi amanga.’ (Yoane 14:31) Ho Yesu adu ni auru kpotosende, ko ayugu gako nyemuse tipa Bako ni gia ko sangba ko zavura tigu regbo si aima du ni kpakarakpakaraha ka mangaha wo. Yesu aima kpinyemu fura tipa Bako na ki undo kura aboro i sonosi wene pa bakure na Ko.—Yoane 14:23.

3. Wai du Yesu nayuguhe nga ko ima kpinyemu aboro?

Baibiri nape gupai nga rago angba ti Yesu ‘mbiko awiri aboro.’ (Asanza 8:31) Ko ayugu gako nyemuse ni ngarasako aboro na kini undo yo zanga gbangbati. Ko amangi iiriwoapai nga gu naayugonga kina gako ome sa ya, ono gako nunga a. (Marako 1:40-42) Ko anaamangapai na aboro rogo weneringise yo zanga kparakaro. Gako afugo afu wasa gbiati maabangirise fu agu aboro dunduko naadu na wene ngbaduyo yo naadegatuyo. Yesu aima ida ka rungo na ki kpi mbiko gako nyemuse tipa aboro dunduko. Ono ko nakpinyemu agu yo gbe napeka fuo gako ayugopai.—Mo gedi Yoane 15:13, 14.

MO WIRIKI KURA DUNGU APAI

Mo wiriki dungu apai tipa asino Yesu. Na ki bi wai rengbe mo ka yugo nyemuse gbiati wene asino wa gu ko amangihe.

4. Yesu ima kpinyemu Bako

Ga Yesu kpiapai nayugo wai furani rengbe ani ka yugo nyemuse tipa Mbori. Mo gedi Ruka 6:12 na Yoane 15:10; 17:26. Tifuo geda mo averesi ni basasa, mo sakipai tipa gi sanahe re:

Ni wirika ani Yesu, wai du rengbe ani ka yugoho nga ani ima kpinyemu Yekova?

Yesu namanga kparakpee. — Yesu aima kpinyemu Bako du ngbangbaturũ yo na ko anaakpara fu ko dedede

5. Yesu naberãpa agu aboro aberã du rogo zingo

Yesu anaamaa pa agu azingo nga ga kura aboro mbatayo fu gako. Zavura tigu regbo ko ani du na mbugo, ko anaamangasunge na gako regbo gbiati ome ka undo aboro. Mo gedi Marako 6:30-44, na tifuoho, mo ki sakipai tipa agi asanahe re:

Rogo gi pangbanga re, gini bete agene Yesu ayugu gupai ngbaha nga ko naberãpa aboro aberã?—Mo bi agu averesi nga 31, 34, 41, na 42.
Ginipai nafõ Yesu ko undo aboro?—Mo bi veresi 34.
Wadu he nga Yesu ayugu asino Yekova, ginipai agi apai re ayugoho dunduko foro tipa Yekova?
Gini bete agene rengbe ani ka wirika gu gene Yesu anaaberãpa aboro ngbaha?

Yesu nariga akutu aboro ngba iiriwo gene nikiiso ko agu akpakuto du bisue gbiati rukutu atio ue. Abawiriki kparaka gi riahe re fu akumba, adee gbiati agude.

6. Yesu nga boro gamahe

Yesu anaagamahe agama wa si avura du vurũ nga aũborose anaangenga beko te, na ko nangarasa rani ani ni gamuhe a. Mo gedi Amokedi 20:35, na tifuoho, mo sakipai tipa gi sanahe re:

Ringbisihe kuti Yesu, wai du rengbe ani ka du na ngbarago?

Mo bi gu VIDIO re, na tifuoho, mo ki sakipai tipa agu asanahe ngbefuoho.

VIDIO: “Fu He Ngba ti Dia Ha”—Paparaha (4:00)

Gini bete agene rengbe ani ka gamahe ngbaha ka si vura du vurũ nga dungu aũborose berani te?

Ya mo mo iningo gipai re?

Baibiri nayugo gupai nga si naida ani kpari fu Yekova ti rimo Yesu. (Mo gedi Yoane 16:23, 24.) Ho ani amanga kparakpee ni ngba gi gene re, ani nayugoho nga ani na tambuahe tipa gupai Yesu namangihe ka undo rani ani da ni abakurea Yekova.

GU KURA ABORO NAPE GUPAI NGA: “Mbori aberãnga pa gaani arungo te.”

Wa duhe nga Yesu nayugo kina agu asino du ti Bako, wai du gako mangapai ayugo gupai nga Yekova naberãpa rani aberã?

GINIPAI MO NAWIRIKIHE?

Yesu ima kpinyemu Yekova na ko ima kpinyemu aboro a. Wadu he nga Yesu nayugo kpia agu asino du ti Bako, wa mo nikaa inoko wenengai kina wo a mo nika ye ka ino Yekova.