Waigu I Atungusa Wene Pangbanga?

Barambeda vurube ga Yekova Kindo, ko nika dia agu akpakarapai dunduko nambusa rani. Gu wene pangbanga re ima ngba na si naida aboro dunduko gihe. Yesu aaida gupai nga apefuoko tungusi gi wene pangbanga re fu aboro dunduko! (Matayo 28:19, 20) Waigu aDezire Yekova amangapai kuti ga Yesu zinahe?

1. Waigu Matayo 24:14 adigisotihe areme?

Yesu aya: ‘Gi wene pangbanga nga ga ngbi re i atungusa ha rogo zegino dunduko.’ (Matayo 24:14) ADezire Yekova na ngbarago ka manga gi nyanyakipa sunge re. Ani natungusa wene pangbanga rogo zegino dunduko rogo afugo niima susa 1,000! Gi bakere sunge re naida namanga ome ni bakerehe na si naida riigbu duadu ho tipaha. Ka gipai re mangingo zanga ga Yekova undo te.

2. Gini aome ani amangaha tipa ka tungusapai fu aboro?

Ani natungusapai rogo agu aba rengbe ani ka gbia aboro rogoho. Wakina agu aKristano naadu rogo bambata sakama agarã, ani natungusapai rogo ‘akporo.’ (Amokedi 5:42) Gi birĩ gene tungusapai sirisiri re nasarani ani tungusipai fu amirioni aboro rogo agarã yo ni basasa. Wa duhe nga aboro naadunga dedede kporo te, ani naatungusapai a rogo gu dungu aba aboro naadunguratiyo kurogo ho. Dedede ani naagbata amamu ka fura fu aboro tipa Yekova gbiati gako ringbisapai.

3. Da du na gu tindiro beni nga ka tungusa wene pangbanga?

AKristano dunduko du na gu tindiro beyo nga ka tungusa wene pangbanga fu kura aboro. Ani nabi gi gaani sunge re na nyanyakipaha. Ani natungusapai kakaka a wa rengbe agu apai du tipa rani ka mbu gene furani bambiko ani ima ino gupai nga raka aboro ngbapai. (Mo gedi 1 Timoteo 4:16.) I atumongo rani atumo tipa ani mangi gi sunge re te, bambiko Baibiri naya: ‘Wa i nafuku ahe fu roni gbe, oni fúku he tigaoni kina wo.’ (Matayo 10:7, 8) anga aboro dunduko nadia gaani wene pangbanga ku gume te, ono ani nandu kumbatayo kindi na ni mbiko tungusapai nga papara gaani irisombori na si nasa ngbarago ti Yekova.

MO WIRIKI KURA DUNGU APAI

4. Ani namangasunge kakaka tipa ka tungusapai fu aboro dunduko

VIDIO: Tungusapai da ku “Digida Sende Yo” (7:33)

• Ginipai ngba tiro gbe tipa agu asadatise aDezire Yekova amangaha tipa ka tungusapai?

Mo gedi Matayo 22:39 na ARomo 10:13-15, na tifuoho, mo ki sakipai tipa agi asanahe re:

• Waigu gaani sunge tungusapai ayugo gupai nga ani ima kpinyemu gaani amurakporo?

• Ga Yekova bipai nga gine tipa agu aboro natungusa wene pangbanga?—Mo bi Veresi 15.

5. Ani nga ga Mbori abadiasunge

Dungu apangbanga ima yugo gupai nga Yekova du nanungusa gaani sunge tungusapai. Ni kpiapai, wirina du rimoko nga Paul New Zealand yo agbia dee ho ko aatungusapai ni kporo na kporo rogo kura bebere uru sa. Rogo gu wiso re, gu dee re akpari fu Mbori ni manga ri sunge na rimo Mbori nga Yekova, ri asana Yekova ko kedi boro fuori. Paul aya, “Fuo asa biata kusa, mi ada ngbadimo kpuri.”

Mo gedi 1 AKorindo 3:9, na tifuoho, mo ki sakipai tipa gi sanahe re:

• Waigu ngbatunga apangbanga wa gu namangi New Zealand re ayugo gupai nga Yekova du nanungusa sunge tungusapai?

Mo gedi Amokedi 1:8, na tifuoho, mo ki sakipai tipa gi sanahe re:

• Tipagine ani aida ga Yekova undo ti ni tipa ka manga gaani sunge tungusapai?

Ya mo mo iningo gipai re?

Rogo aposo yo dunduko, ti regbo agu adunguratise nga ga bebere poso, ani ni naagbia rabahe tipa si undo rani ani tungusipai. Ka si du nga mo ima du pati dunguratise sa dagba agi adunguratise re, gini bipai du mo na ni tipa agu arabahe i afuhe yo?

6. Ani nagiasangba gu ga Mbori zinahe du tipa tungusapai

Rogo bambata sakama agarã, asogo Yesu aasadi ka rugusa apefuoko ti tungusapai. Agu aKristano nadumbata asongodi gu gayo rengo nga ka tungusa wene pangbanga ni “banda” yo “wene pangbanga.” (AFiripoio 1:7) Kina gu bangisapai re aDezire Yekova amangaha areme.a

VIDIO: I Asongodipai ku Bara Wene Pangbanga Yo (2:28)

Mo gedi Amokedi 5:27-42, na tifuoho mo ki sakipai tipa gi sanahe re:

• Tipagine si aidanga ani mbu sunge tungusapai ti ni ya?—Mo bi averesi 29, 38, na 39.

GINIPAI MO NAWIRIKIHE?

Yesu arugu apefuoko i tungusi wene pangbanga fu aboro dunduko. Yekova naundo gako aboro i mangi gi sunge re.

Fugöpai

• Waigu i atungusa gi wene pangbanga re rogo zegino dunduko?

• Waigu gaani sunge tungusapai ayugo gupai nga ani ima kpinyemu gaani amurakporo?

• Ya mo mo nabihe nga sunge tungusapai rengbe ka sa ngbarago tirani? Tipagine?

MO WETEKE GU KURA APAI

Mo bingo wai aDezire Yekova atungusapai fu aboro rogo kikindigi agbata.

Kparakpara Gene Tungusapai Rogo gu Ba du na Dungu Aboro Rogoho Paris Yo (5:11)

Ginipai aDezire Yekova namangihe tipa ka undo ayeaye?

Mbiisa gu Zingo Nga ga Toro Nga ga Ayeaye (5:59)

Mo ginga wai ngba mangasunge kindo ti aregbo dũ ngba gu boro namangaha.

Mi na Ngbarago Nga Mi Asia gu Sunge Re (6:29)

Mo wirikinga pai tipa gaani adiabese ngbanga yo nga gu nasa gupai nga sunge tungusapai gbataka kumbatayo.

“Abatungusipa Kindo Ndu ku Ngbaanga Yo” (Ga Mbori Kindo Nazogarago!, kapita 13)