Paye Na ‘Wene Pangbangaa Weneapai’
‘Nangbaa ndu gu boro naye na wene pangbangaa ri abaagangara yo, nga guni naye na wene pangbangaa wene ahe.’—YESAYA 52:7.
1, 2. (a) Gini kereapai namanga na aʹuru dunduko? (b) Ginipai aboro amangaha ho i agia gbegbere apangbangaa ni zanga piriga?
ROGO zegino dunduko areme, aboro naberã gupai nga omeyo nabata abata be gia gbegbere apangbangaa. Ho i azaka aradio ni, i nagia kina agu apangbangaa nafu gunde fuyo nga agu apangbangaa du tipa gu kere akaza naimisa aboro auru kpotosende. I nabi agu apangbangaa namanga i nigumbaha rogo aterevizioni na kini bi kpia agu agude nakoba be gomoro nakpara tipa undo, nga gu kpia agude agonga kusayo riyo yo ya. I nadia waraga pangbangaa na ki gedipai rogoho tipa agu agumbura watadu kere abundu i abafaha nagburuwa abambu, kini imi dungu aboro zanga nduhe.
2 Ii, kereapai namanga amanga na aʹuru dunduko. Zanga kapa, agu apai du rogo gi zegino re naʹariatihe aʹaria nirengo nigbegberehe gbe. (1 AKorindo 7:31) Gu magazini nga ga apangbangaa du Putu yo pavuruhe ku Dioyo ayawee, ti kura aregbo, zegino naabaha “nawira wa si nandu ka digo adigo.” Si airiwonga te si du nga ndu gupai du dungu aboro ti ni bangeyo akio kina kumbatayo na gberarago tiyo! Zanga kapa, ho i asasana aboro ni tipa gayo aberã tipa agu apangbangaa i agbandakaha Amerika yo rogo terevizioni, guni sa agumba gupai rengbe areme ngba dungu aboro ki yaa: ‘Fuo gia mi apangbangaa rogo terevizioni na ki biki kpia agu apai namanga, kina rago nigbere tire nikerehe. Si dunduko naabaha nga kina gbegbere apangbangaa. Omere ima bata behe.’
Gu Pangbangaa Si Aida Aboro Dunduko Gihe
3. (a) Gini wene pangbangaa Ziazia Kekeapai atakapandehe? (b) Tipagine oni abi gu wene pangbangaa nga ga Kindo ti ni na kikiipaha?
3 Rogo gi zegino du aboro adu rogoho na bakere gberarago re, ya mo aboro rengbe ka gia wene pangbangaa? Ii, i rengbe arengba nirengo! Si nafu wasa ka ino gupai nga, Ziazia Kekeapai natakapande wene pangbangaa. Gu wene pangbangaa re ngawee ga Mbori Kindo nika dia akaza, gomoro, kuondiko, avura, na angbatunga arungo dunduko kusayo. (Atambuahe 46:9; 72:12) Anga gupai re nga gu wene pangbangaa si aida aboro dunduko gihe tee? Wo gu nirengo aDezire Yekova aberãha. Sidu, aboro ini yo rogo arago dunduko tipa gu gayo asadatise i andu nani kina kumbatayo rogo gbaraga gu wene pangbangaa du tipa ga Mbori Kindo nifura yo na aboro tipaha dagba rikaaboro dunduko.—Matayo 24:14.
4. Gini apapara gaani sunge tungusapai ani ka wisigoho rogo gi papara kekepai re, na ginigu ani ka wisigoho rogo gu paparaha naye fuo gere?
4 Ono tie, ginipai rengbe ani ka mangaha tipa ani naandu kumbatayo kindi kaa takapande gi nyanyakipa wene pangbangaa re fu aboro, zavura rogo agu aba aboro aidanga ha rogoho gbe ya? (Ruka 8:15) Pa ngera ani berewe niguruhe rii gaani nyanyakipa apapara sunge tungusapai biata nika undo rani zanga kapa. Nibambatapai, ani rengbe ka wisigo gaani ndu mangaapai, watadu ndu gupai ani atungusapai ti ni; (2) ka wisigo gaani pangbangaa, watadu gupai ani atungusaha; na (3) ka wisigo gaani asino tungusapai, watadu wai ani atungusapai. Nimbu ani gaani ndu mangaapai si du niziaziaha, gaani pangbangaa kidu ziazia, na gaani agene tungusapai kidu niwenehe, si nika sa rani ani rengbe tie ka fu mamu fu bakere bange aboro gbe i gi gu pangbangaa ngbaa kisusi, nga gu wene pangbangaa du tipa ga Mbori Kindo.a
Ndu Gupai Ani Atungusa Wene Pangbangaa ti Ni
5. (a) Nibambatapai, gine nafõngbaduraniyo ani guari ka tungusapai? (b) Tipagine rengbe ani ka ya ti ni wee pa irisa ani gu zinahe nga ga Ziazia Kekeapai du tipa tungusapai nga yuguyugu gaani nyemuse tipa Mbori?
5 Ani wisiginga gu bambata paparaha, nga gaani andu tungusapai. Tipagine ani atungusa wene pangbangaa ti ni? Tipa kina gu bangisa nduhe Yesu anaatungusapai ti ni. Ko ayaa: “Mi nakpi nyemu Buba.” (Yoane 14:31; Atambuahe 40:8) Nibambatapai, gaani nyemuse tipa Mbori nafõngbaduraniyo ani guari ka tungusapai fu aboro. (Matayo 22:37, 38) Ziazia Kekeapai nakoda nyemuse tipa Mbori kuti sunge tungusapai, mbiko si nayaa: “Gi nga du [ani] na nyemu Mbori re, nga ka ani kuti gako rugute.” (1 Yoane 5:3; Yoane 14:21) Ya mo ga Mbori arugute nakoda gu du tipa ‘ndu ka sa aboro ni abawiriki’? (Matayo 28:19) Ii. Rengo ngaha nga, Yesu du nagumba agu afugo re, ono tie si aenge yo du Yekova ni. Wai duhe wo? Yesu asakirogoyo ki yaa: “Mi amanga nga pai ni tire . . . wa sa te, kina gu Buba ayugu fere, si mi agumba.” (Yoane 8:28; Matayo 17:5) Sidu, ho ani airisa gu zinahe ni du tipa tungusapai, gure nga ani nayugo gupai fu Yekova nga ani nakpinyemu ko.
6. Rogo gini agene nyemu Mbori afõngbaduraniyo ani naatungusapai fu aboro?
6 Kurii gure, nyemuse tipa Yekova nafõngbaduraniyo ani tungusipai bambiko ani naida ka dia gu ziree kusayo Satana aurugoho tipa ko. (2 AKorindo 4:4) Satana akusi sakapai watadu kango tipa padu ga Mbori zogarago niruruhe. (Bambata Pai 3:1-5) Wa du ani ni aDezire Yekova, ani na nyemu ka koda berani ka kusa ga Satana gbegbere akitangbaangase kuyangura na ka ziasi rimo Mbori kubangiri ngbatunga aboro dunduko. (Yesaya 43:10-12) Kurii gure, ani natungusapai bambiko ani ima ino asino Yekova na gako agene. Ani na dawedawe pagume dagbarani naako, na si kini sa rani ani duna bakere nyemu ka fura tipa ko nga gaani Mbori fu kura aboro. Nirengo, ga Yekova weneringise gbiati gako ruru agene naye na ngbatunga gu ngbarago fu rani ka mbunga rani ani ongo aonga ki zanga fura tipa ko ya. (Atambuahe 145:7-12) Agi apai re nafõngbaduraniyo ani naataasa rimoko na kaa fura tipa “wene sino[ko]” fu agu aboro nika degatuyo.—1 Petero 2:9; Yesaya 43:21.
7. Kupati kpinyemu Mbori, gini kura nyanyaki ndupai berewe ani atungusapai ti ni?
7 Gu kura ndupai kinaho tipa kaa ndu na sunge tungusapai kindi kumbatayo: Ani naida nirengo ka ye na ziga watadu wasa fu agu aboro gu gbegbere pangbangaa anyasanga ya naima fu rii omeyo, na fu agu aboro narungo be gu kura anduhe ka duho. Rogo manga gipai re, gure nga ani namanga asadatise ka wirika mangapai wa Yesu. Nikpiapai, oni binga gupai ringbisi yo paha rogo Marako kapita 6.
8. Gine gu pangbangaa du rogo Marako kapita 6 ayugoho tipa ga Yesu aberã tipa aboro?
8 Rogo kura uru sa, amokedi akaragatiyo gene gu tua yo nangia ga tungusapai na ki gumbapa agu apai dunduko fu Yesu i amangihe na ki yuguhe. Yesu akparia gupai nga, gi gako amokedi re aduna mbugo tiyo, na ko ki ya fuyo wee i ndu naako “ka ongoda toni.” Sidu, i kini mo ka zora ku kurungba yo ki ndu kurogo gu ba nadu nisaha. Ono tie, aboro apefuo yo, kini oro tingba gango ime, na ka fuöho aturanga ya i ki gbia yo. Ginipai Yesu amangihe? Kekepa gu pangbangaa re nayaa: “[Ko] ki bi bakere rimbasa, nungayo ki nimangi ko amanga bambiko i adu wa agu akandoro adu nga na babandara ti ra ya; ko ki tona ka yugo dungu apai fu yo.” (Marako 6:31-34; gu kekeapai du nibibirihe na nikikindigihe re, ani du kehe wo.) Nunga afõngbadu Yesu yo ko ki susi kumbatayo kindi kaa tungusa wene pangbangaa wa ko avura duna mbugo vurũ. Si tie ziazia nga, Yesu aima duna bakere nunga tipa agi aboro re. Rungo aboro anaamanga ko amanga.
9. Gine ani awirikaha be gu pangbangaa du rogo Marako kapita 6 tipa ruru ndu tungusapai?
9 Gine ani awirikaha be gi pangbangaa re? Wa du ani ni aKristano, ani nabihe niruru dingisoro ka tungusa wene pangbangaa na ka sa aboro ni abawiriki. Ani ima inopa gu gaani tindiro du rirani nga ga takapande wene pangbangaa, mbiko gupai Mbori akpinyemuhe nga “aboro bati dunduko.” (1 Timoteo 2:4) Ono tie, anga ani namanga gaani sunge gbua mbiko si nigu tindiro si aida ani tindihe te, ono ani namangaha a mbiko gu nunga-aboro du tirani. Kangia rungo aboro namanga rani wa gu si amangi Yesu, pai afõ rani afõ ngbaduraniyo ani mangi agu apai dũ rengbe ani ka mangaha tipa ka susa kumbatayo kaa takapande wene pangbangaa fuyo. (Matayo 22:39) Padu ani na ngbatunga gu wene ndu mangaapai tipa tungusapai re nika fõngbaduraniyo ani naatungusa wene pangbangaa zanga manga nyomoro ti ni.
Gu Pangbangaa Ani Atungusa, Si Nga gu Wene Pangbangaa Du Tipa ga Mbori Kindo
10, 11. (a) Wai sangba Yesaya aringbisapa gu pangbangaa ani atungusaha? (b) Wai Yesu aye na wene pangbangaa nga ga wene apai, na wai ga Mbori aboro apefuo ga Yesu kpiapai ti gi gaani regbo re?
10 Ginipai tigaha tipa gu ue papara gaani sunge tungusapai nga, gaani pangbangaa? Gine ani atungusaha? Gu nebi nangia Yesaya afu gi wene ringbisapai re tipa gu pangbangaa ani atakapandehe ki yaa: “Na ngba ndu gu ko naye na wene pangbanga ri abaagangara yo, nga gu ni nataka pande pa zereda, naye na wene pangbanga wene ahe, nataka pande pa bata a, naya fu Siona, ‘Ga Mbori nazoga arago.’ ”—Yesaya 52:7.
11 Gu banguapai du rogo gu veresi re nga, “ga Mbori nazoga arago,” natingida rani naapa gu pangbangaa si aida ani tungusihe nga, gu wene pangbangaa du tipa ga Mbori Kindo. (Marako 13:10) Oni kparia gupai a nga, gi veresi re nayugo gu memepai nafu maabangirise du rogo gaani wene pangbangaa. Yesaya amangisunge na ngbatunga agu afugo duwa “bata,” “wene pangbanga,” “zereda,” na “wene ahe.” Rogo bambata sa kama agarã F.B.K., fuo susa dungu akama agarã fuo rago Yesaya, Yesu Kristo adigisi gi sangbanebi re ngba iiriwo gene nimaa ko kpiapai nga ga ngara rogo takapande weneapai, nangia paye gu Kindo nga ga Mbori. (Ruka 4:43) Rogo gi gaani regbo re, gbe natona rogo gu garã nangia 1919, aDezire Yekova aima digo nipefuo gu kpiapai nangia ga Yesu rogo takapande gu wene pangbangaa du tipa ga Mbori Kindo i aima sigiraha gbiati pangbangaa agu amaku si ka ye nani.
12. Gine nga sangbana gu pangbangaa nga ga Kindo kurii agu aboro nadiaha kugume?
12 Gine nga sangbana gu wene pangbangaa nga ga Kindo re kurii agu aboro nakaragapai kuti ni? Areme, a wa si adu ti rago Yesu, wene pangbangaa nafu maabangirise gbiati wasa fu aboro. (ARomo 12:12; 15:4) Si nafu maabangirise fu agu aboro duna ruru ngbaduyo yo bambiko i nawirika gupai nga, nyanyaki goapai kinaho tipa i idi kuti gupai nga, weneapai watadu wene aregbo kina kumbatayo naye. (Matayo 6:9, 10; 2 Petero 3:13) Ngbatunga gu maabangirise re naundo agu aboro nga agunde ti Mbori i duna ruru bipai tipa apai. Bake apapara Atambuahe ayawee i “agunde nga be gbigbita pangbanga te.”—Atambuahe 112:1, 7.
Gu Pangbangaa Nahusa “agu Aboro Narungo Kpotoyo Yo”
13. Wai gu nebi nangia Yesaya aringbisipa agu amamu naye fu aboro kina boro awere, nga agu aboro nadia wene pangbangaa kugume?
13 Kurii gure, gu wene pangbangaa ani atungusaha, si naye na ziga gbiati amaku kina boro awere fu agu aboro nadegatuyo kuti ni. Wai si aye nani? Gu nebi nangia Yesaya afura tipa bete agu amaku re ho ko afura ni tipa pai kumbatayo ki yaa: “Ga Gbia Mbori Toro du ti re, bambiko Yekova nambedi re ni nzeme mi nitungusi wene pangbanga fu rungorungo aboro; ko kedi re mi vodi agu yo ngbaduyo akua [“mi vodi agu aboro narungo kpotoyo yo,” NW ], ka taka pande pa raniri fu zizi yo, na pa za ngbadimo bambukisa fu agu yo du ni vodivodi yo; ka taka pande pa garã ga Yekova weneringise, na rago irabape nga ga gaani Mbori; ka ngarãsa agu yo dunduko nakpara kpenunga.”—Yesaya 61:1, 2; Ruka 4:16-21.
14. (a) Gine gu fugo du tipa ‘voda agu aboro duna rungo kpotoyo yo’ ayugoho tipa gu pangbangaa nga ga Kindo? (b) Wai ani ayugokpiapai tipa ga Yekova berã tipa agu aboro narungo kpotoyo yo?
14 Nitungusa Yesu wene pangbangaa ringbisihe kuti gu sangbaanebi re, si adu nga ko nika ‘voda agu aboro narungo kpotoyo yo.’ Nangbaa gu ringbisapa pai na afugo Yesaya agumbaha re! Ringbisihe kuti sangba buku sa nga gu nasakarogo afugo Ziazia Kekeapai, gu fugo Ebere i asaha nga ‘voda,’ “i namangasunge nani dedede tipa ‘voda oro,’ sidu si kini yugupa maa ziga ku bangiri oro yo na kini husi gu boro nao.” Gu boro nangerafuo aborokaza, ni rengbe ka vo gu papara boro o na ũvoda oro tipa ka bandaha. Teketeke a, ho agu abatungusipai nangerafuo aboro atungusa gu pangbangaa nga ga Kindo ni fu agu aboro nadiaha kugume, gure nga i nasongoda agu aboro narungo ngba kura agene. Na nisongoda yo agu aboro du rogo azingo, gure nga i nayugokpiapai tipa ga Yekova berã tipa aboro. (Yezekere 34:15, 16) Bake apapara Atambuahe afura tipa Mbori ki yaa: “Ko nahusa agu yo du na rungo kotoyo yo, ki vodi gayo aoro a.”—Atambuahe 147:3.
Gu Kparakparapai gu Pangbangaa Nga ga Kindo Amangaha
15, 16. Gini ndikidi kpiaapai nga ga raka nayugo wai gu pangbangaa nga ga Kindo asongoda agu aboro nirengo du rogo azingo na kini nyakasi yo?
15 Dungu gu ndikidi kpiaapai nga ga raka duho nayugo wai gu pangbangaa nga ga Kindo asongoda agu aboro nirengo narungo kpotoyo na kini nyakasi yo. Ani makianga gupai nadu tipa Oreanna, nga sosono dee naraka Amerika yo ku Sudiyo, nga gu dee rago agbere tiri ka ri adunga berewe na nyemu ka raka ya. Boro sa dagba aDezire atona nduge kaa bi Oreanna na kini gedi Ziazia Kekeapai furi na gu buku nga My Book of Bible Stories.b Nibambatapai, gi dee rago aima gbera tiri re anaadegaturi kuti gu gedapai re baraho ri anipi api ni auru gari barame na bangiiri nikisikisihe, na kini ukaga omeri ti kura aregbo. Ono tie, mbata fu atihe turu, ri atona ka manga bakere asadatise ka sungo asungo rii gari barame ti regbo gedapai. Fuo bete regbo kusa, ri atona kaa sungo auru kiti rogo gu vurubambu aboro naasungo rogoho, kini pidi gari nayugupai nga ga Ziazia Kekeapai ri ye. Fuo gure, gi dee re atona kaa ndu kupati agu adunguratise nga ga aKristano tii Bambu Kindo yo. Wa agu apai ri aawirikaha ti regbo agu adunguratise re angarasi ri, ri atona kaa fuka agu abuku du mburuhe rii Ziazia Kekeapai fu agu aboro nanaasusa ti gene pati kpuri. Fuo gure, ho garã Oreanna adani ti 93, ri azi bapatiza ki sa tiri niboro sa dagba aDezire Yekova. Gu pangbangaa nga ga Kindo azambuasi gari nyemu raka berewe.—Asanza 15:30; 16:24.
16 Gu pangbangaa nga ga Kindo nafu nyanyakipa undo fu aboro zavura aguyo ini ya kaza ima mbeda ka digiso gayo raka. Ani dinga kpiapai tipa gu dee nangia Maria naaraka Putu yo pavuruhe ku Dioyo. Ri aawoka be gu kaza naandu na ri sa kina kpio na ka wiri maabangirise adunga berewe beri ya. Ri aduna bakere gberarago tiri ho aDezire Yekova agbia ri ni. Ono tie, ho ri awirikipai ni tipa ga Mbori aringbisapai, gari raka ada berewe furi na rogoyo ti ni. Ri azi bapatiza na kidu zaaza rogo sunge tungusapai. Vuru gu yangara agarã ue nangia ga gari raka, bangiri ri anaayugopa gu maabangirise gbiati ngbarago ri adu nani. Maria akpi na nyanyaki maabangirise tipa zingabekpio.—ARomo 8:38, 39.
17. (a) Wai gu pangbangaa nga ga Kindo amanga kparakparapai rogo gu raka nga ga agu aboro nadiaha kugume? (b) Rogo gini agene kina boro oni nabi wai Yekova ‘atumba agu aboro dunduko nanugadi’ kusande?
17 Ngbatunga agu atingidapai re nga dezirepai tipa gupai rengbe gu pangbangaa nga ga Kindo ka mangaha rogo gu raka nga ga agu aboro duna nyemu agu arengo nga ga Ziazia Kekeapai tiyo. Agu aboro nibasasa narungo be pakpio badiangbayo nagbia ome ho i awirikapai ni tipa gu maabangirise du tipa zingabekpio. (1 ATesaroniko 4:13) Agu aboro naraka rogo rungo tipa aũzegino na kini sota asota ka riga gayo aborokporo, i nagbia vovo irisa gbiati ngara ho i aino gupai ni nga Yekova ambunga yo te ka i du niruru yo fuko. (Atambuahe 37:28) Mbiko gu undo Yekova afuhe, dungu agu aboro omeyo nabati be bakere gberarago natona tooni tooni ka sonosa gu ome si aida si du beyo tipa i sovura nani kuti apai, na tipa kura aboro, i nadia adia be gu kaza re. (Atambuahe 40:1, 2) Nirengo, mbiko gu ome Yekova afuhe rogo Fugo ko, ko ‘natumba agu aboro atumba dunduko nanugadi’ kusande kina boro awere. (Atambuahe 145:14) Wa ani abi wai gu wene pangbangaa nga ga Kindo aye na wasa fu agu aboro narungo kpotoyo yo du rogo agu aba ani atungusapai rogoho na rogo gu dungurati nga ga aKristano, si natingida rani dedede na gupai nga, gu pangbangaa du berani re, si nga gu bawenehe kisusi apangbangaa dũ areme!—Atambuahe 51:17.
‘Gupai Mi Akpara fu Mbori Tipa Yo ti Ni’
18. Wai pa ká aYuda wene pangbangaa afudi Pauro, na tipagine?
18 Wa vura duhe nga gaani pangbangaa nga gu bawene pangbangaa kisusi duho, dungu aboro aidanga ha te. Ginipai rengbe gipai re ka manga rani nani? Kina ngba gu bangisa gene si amangi gu mokedi nangia Pauro rogoho. Ko anaatungusapai dedede fu aYuda, ono dunguyo naká gu pangbangaa aká nga ga bata re. Pa ká yo ho aima fuda Pauro bakere gbe. Ko ayaa: “Nunga ti re bakere na ima du kindi kpotore yo.” (ARomo 9:2) Pauro aduna nunga agu aYuda tiko ko atungusapai fuyo. Pa ká yo wene pangbangaa aima fu gberarago fuko.
19. (a) Tipagine ini ani gupai ti ni nga rago rengbe arengba ka gbera tirani ti kura aregbo? (b) Gine naundo Pauro ko naandu kindi kumbatayo na gako sunge tungusapai?
19 Ani a wo, nunga aboro nasa rani ani naatungusa wene pangbangaa fuyo. Sidu, rago rengbe arengba ka gbera tirani ho dungu aboro aká gu pangbangaa nga ga Kindo ni. Padu ani na gberarago tirani wa gure, nayugo gupai nga ani naberãpa agu aboro aberã ani atungusapai fuyo kini idi i du wenengai rogo toroyo. Ono tie, si naida ani tingidi gu kpiapai nangia ga gu mokedi nangia Pauro. Gine naundo ko ko naandu kumbatayo kindi na gako sunge tungusapai? Wa si avura du nga pa ká aYuda ki zanga dia wene pangbangaa kugume aye na bakere arungo fu Pauro gbiati ima, ko ambunga yo kini berẽ gupai nga gene undoyo ima kiso te. Gu maabangirise ko adu nani angia wee beteyo adu kinaho kindi nika dia Kristo adia kugume. Sidu, nibipa ga Pauro berã tipa aYuda nibasasa, ko akepai ki yaa: “Gu pai du nyemu he kpotore yo mi akpara fu Mbori tipa yo ti ni si nga, i bati.”—ARomo 10:1.
20, 21. (a) Nibipa gaani sunge tungusapai, wai rengbe ani ka pefuo ga Pauro kpiapai? (b) Gini papara gaani sunge tungusapai ani ka wisigoho rogo gu papara kekepai naye fuo gere?
20 Oni kparianga agu apai ue Pauro anyakasipaha. Gupai nyemuhe adu ngbadukoyo nga pa gbata gene tipa bete aYuda gbia bata, na ko ki kpari fu Mbori tipa gupai re. Ani napefuo ga Pauro kpiapai areme a. Ani nabanda gupai ku ngbaduraniyo kindi nga ga gbia agu aboro duna nyemu gia wene pangbangaa tiyo. Ani kpatagaranga kuti kpee kindi fu Yekova tipa ko undo rani ani gbia ngbatunga agu aboro du nibasasa re tipa wa ka ani undoyo i naandu ngba gu gene nika ndu naayo sa bata.—Asanza 11:30; Yezekere 33:11; Yoane 6:44.
21 Ono tie, tipa ani rengbe ka gbia dungu aboro nibasasa a wa rengbe omerani nani ka gbia yo na gu pangbangaa nga ga Kindo, anga si naida ani moiberã rani kina fuo ndu gupai ani atungusapai ti ni na gupai ani atungusaha sa te, ono si naida a ani moiberã rani kuti wai ani atungusapai. Ani nika wisigi gipai re rogo gu papara kekepai naye fuo gere.
[Gu rukutu kekeapai du bandu kpewaraga yo]
a Ani nika wisigo gu bambata apaparaha du ue rogo gi papara kekepai re. Fugo gure, ani awisigo gu biataha rogo gu papara kekepai naye fuo gere.
b Si nga gu buku aDezire Yekova akusihe.
Ginipai Wiriki Oni He?
• Gini nduapai duho ani atungusapai ti ni?
• Gine nga gu bangua pangbangaa ani atungusaha?
• Gini amaku agu aboro agbiaha nadia gu pangbangaa nga ga Kindo kugume?
• Gine nika undo rani ani naandu kumbatayo na tungusapai kindi?
[Gu kpiahe du ti kpewaraga 26]
Kparakpee naundo rani ani naamanga asadatise kindi kaa gbata agu aboro duna nyemu gu rengo nga ga Ziazia Kekeapai tiyo