WIRIKAPAI 42
Ginipai Baibiri Apehe Tipa Agu Aboro Amanganga Rogatise ya na Aguyo Mangi Rogatise?
Rogo gu kura angbatunga, aboro idi kuti gupai nga boro arengbanga kadu na ngbarago te, kina gu sa ka ni mangi rogatise. Ono tie anga arogotise dunduko du na ngbarago watadu agu aboro amanganga rogatise ya dunduko du na ngbarago te. Gu rengo du ho nga, Baibiri nafura tipa zanga manga rogatise na tipa manga rogatise nga si dunduko nga gamahe.
1. Gini bete aundo du ti du zanga manga rogatise?
Baibiri naya: ‘Guni nafu ngasuni sa rogatise, ní namanga wenengai; ono guni afunga ha ya, ní namanga wenengai susi.’ (Mo gedi 1 AKorindo 7:32, 33, 38.) Rogo gini agene rengbe agu aboro amanganga rogatise ya ka manga “wenengai susi”? Agu aboro amanganga rogatise ya nga aKristano na abadiarogatise beyo si aida i ngerefuoyo te. Rogo gi gene re, i na bakere ranirii beyo. Ni kpiapai, beteyo na rengba beyo ka kiiso gayo sunge tungusapai rogo dungu agene, wa gu nga ka ndu kurogo kura ringara ka tungusa wene pangbanga yo. Gu susi asusa tie gbe nga, i ima rengba kaa dia bakere regbo tipa ka mbeda na Yekova.
2. Gini bete aundo du ti manga rogatise ringbisihe kuti andiko?
Rogatise a wakina du zanga manga rogatise si nayeaye na gaha akpakarapai gbiati aundo. Baibiri nagumba gupai nga ‘du aboro ue ngba ti du boro sa.’ (Batungusipai 4:9) Gipai re gbe nga rengo tipa agu aKristano namangapai kuti gu bangua arengo nga ga Baibiri rogo gayo rogatise. Agu aboro namanga rogatise ringbisihe kuti ndiko namanga mozunga ka kpinyemu tiyo, ka irisa tiyo, na ka bi pa akurayo na nyanyakipaha. Ni sangbana gipai re, gayo rogatise nadu ni bandabandaha susi agu arogotise naraka gbua kina sa zanga manga ndikidi rogatise. Na rogatise nasa gupai a nga aboro sonosi agude ngba wene gene.
3. Gini bipai du Yekova na ni tipa rogatise?
Ho Yekova akusi bambata arogotise ni, ko aya: ‘Si du boro nihe bani ti ni na nani, ki ka kuti diani.’ (Bambata Pai 2:24) Yekova naida kumbakudee gbiati diakumba kpinyemu tiyo na ki kpatagara kuti tiyo wa i nikaa raka kindi ni ungayo. Ko nambu gene fu mbutise sa kinaho boro sa dagba arogotise amanga bäri ni. Rogo ngbatungapai wa gure, Yekova nafu siapai fu gu badiarogatise i naingi kutini ni diberã singia ni naida mbutise.a (Matayo 19:9) Yekova aidanga gupai nga ga roga dungu adee fu aKristano te.—1 Timoteo 3:2.
MO WIRIKI KURA DUNGU APAI
Mo bingo wai rengbe mo ka du na ngbarago—na ka sa Yekova ko du na ngbarago—singia bakuparanga nga mo watadu arogotise.
4. Mo mangisunge na gu gamahe nga ga du ni bakuparanga ngba wene gene
Yesu anaabi padu ni bakuparanga ni gamahe. (Matayo 19:11, 12) Mo gedi Matayo 4:23, na tifuoho, mo ki sakipai tipa gi sanahe re:
Waigu Yesu amangisunge na gu gamahe nga ga padu ni bakuparanga ka mangasunge fu Bako na ka undo kura aboro?
AKristano ima rengba ka gbia ngbarago ti mangasunge na padu yo ni abakuparanga wa gu Yesu amangihe. Mo bi gu VIDIO re, na tifuoho mo ki sakipai tipa gu sanahe ngbefuo ho.
Rogo gini agene rengbe aKristano ka mangasunge na padu yo ni abaku-paranga na ki gbia mosoro?
Ya mo mo iningo gipai re?
Baibiri agumbanga pa gu garã si aida boro mangi rogatise ti ni te. Ono tie si nangarasa aboro i sungudi mbata no daho regbo ‘parangayo’ nika susa ni nga gu regbo bakere nyemu kodaba naima rengba ka sa paranga aboro ka i mangingo wene siapai ya.—1 AKorindo 7:36.
5. Mo sia gamo badiarogatise na tatamana
Pasia gamo badiarogatise nga gu nyanyaki pa diaberã kisusi dagba adiaberã yo mo nika mangaha. Mo gedi Matayo 19:4-6, 9, na tifuoho, mo ki sakipai tipa gi sanahe re:
Tipagine si aidanga Kristano gba agba sa rogatise ti ni ya?
Baibiri ima rengba ka undo ro mo ini agu asino si aida mo ngere ti ni ti badiarogatise. Gu susi asusa tie gbe nga, mo ngere tipa gu badiarogatise kpinyemu Yekova.b Mo gedi 1 AKorindo 7:39 na 2 AKorindo 6:14. Na tifuoho mo ki sakipai tipa agi asanahe re:
Tipagine si aida ani mangi rogatise ti ni sa na kina kuarani Kristano?
Mo naberãha nga Yekova rengbe ka du wai ka si du nga ani mangi rogatise na gu boro akpingo nyemuko ya?
Ka i kpamia anya ue du ni bakiakia kurogo basa, si nadu fura ni pa rungo. Wakina gure a, gu Kristano namanga rogatise na gu boro angianga idipase ya, nika gbia tini agbia na akpakarapai
6. Mo bi rogatise wa gu Yekova abihe
Rogo gu ringara aYisaraere nadu mbata, kura akumba anaambu adiayo mbiko gu nduapai nga ga gbangbati. Mo gedi Maraki 2:13, 14, 16, na tifuoho, mo ki sakipai tipa gi sanahe re:
Tipagine Yekova nasogo gu mbutise ti ni andunga kuti Baibiri ya?
Bári gbiati mbutise naye na imisiri fu gu badiarogatise nga boro wene sa gbiati agude
Mo bi gu VIDIO re, na mo ki sakipai tipa gu sanahe ngbe fuoho.
Ka si dunga mo mangi rogatise na gu boro angianga idipase ya, ginipai rengbe mo ka mangaha ka sa gamo rogatise si du na diabese?
7. Mo mangipai kuti gu ga Yekova arugute du tipa rogatise
Si ima rengba ka ida gupai nga boro mangi bakere asadatise tipa ka mangapai kuti gu ga Yekova arugute du tipa rogatise.c Ono tie, Yekova nafu maku afu fu agu aboro namangaha wo. Mo bi gu VIDIO re.
Mo gedi AEbere 13:4, na tifuoho mo ki sakipai tipa agi asanahe re:
Ya mo mo nabihe nga ga Yekova arugute tipa rogatise rẽarẽ? Tipagine mo abihe ti ni wo? Watadu tipagine mo abingo ho ti ni wo ya?
Yekova naida gupai be aKristano nga i kepa gayo rogatise na pa gayo mbutise, rogo dungu aringara agbia-ngbii du naida aboro kepa gayo rogatise na pa gayo mbutise. Mo gedi Tito 3:1, na tifuoho mo ki sakipai tipa gi sanahe re:
Ka singia mo ima manga rogatise, ya mo agbia-ngbii inipa gamo rogatise?
KURA BORO RENGBE KA SANAHE NGA: “Tipagine si aida boro mangi rogatise ti ni? Ya mo agu aboro ata manganga rogatise ya ka i arakanga kina sa te?”
Gamo karagapai nga gine?
GINIPAI MO NAWIRIKIHE?
Padu ni bakuparanga singia pa manga rogatise si dunduko nga gamahe be Yekova. Si dunduko niima rengba ka ye na ngbarago gbiati rengbabepai ka boro araka ringbisihe kuti gupai Yekova akpinyemuhe.
Fugöpai
Waigu rengbe boro ka mangasunge na gani padu ni bakuparanga ngba wene gene?
Tipagine Baibiri agumba gupai ti ni nga boro di kina kurani Kristano sa?
Ginipai Baibiri apehe nga si nga gu yangara ndupai rengbe ka ye na mbutise?
MO WETEKE GU KURA APAI
Ginipai pa manga rogatise “rogo Gbia yo” ayugoho?
Mo bingo yuguyugu akpiapai ue nga gu rengbe ka undo ro mo mangi wene adiaberã tipa mbakada pa rogatise na tipa rogatise.
Mo bingo gu ndupai wirina sa abi gupai ti ni nga gupai Yekova namangihe fuko, paha ima nyaka ki susi agu apai dunduko ko ambupa ha.
Gini bete apai si aida boro wisigihe mbata fu ni berẽpa mbutise watadu kparaka?
“Oni Irisi ‘Guhe Mbori Nakpamia Ha’” (Ngbaõbambu Sinziri, Banduru 2018)
a Mo bi gu 4 Rukutu Kekeapai du ti Digido gi Buku Re du tipa kparaka ho du he ni nga gu kura boro amanganga bäri te.
b Rogo kura angbatunga, avunguagude du nasia abadiarogatise fu awiriyo akumbagude watadu adegude. Ho du pai ni wa gure, anga gupai agu avunguagude du na nyemuse awisigoho nga padu gu boro nika dia wiriyo re na marã watadu pa wo rimo ni te, ono singia ri watadu ko ima kpinyemu Yekova.
c Ka mo aaraka na gu boro oni ata manganga rogatise na ni ya, singia mo nambu ni watadu ka diani gure gamo diaberã du.