Oni Nye Rogo Ga Yekova Ngboongboorago Nga Ga Bandahe

1, 2. Gini ndikidi vura nika manga barambeda awere, na ginipai ani nika manganga ha ya ti regbo gu vura re?

ROGO Tanvuo 30, rogo gu garã nangia 1938, amirioni aboro aadegatuyo kuti drama rogo radio. Ti regbo gu drama re, agu aboro naangi gu drama re rogo radio atingidi gupai fu aboro nga gu kura kusikusiahe naye rogo gu papara zegino nga Mars ka gbarasa Kpotosende. Wa i avura pehe fu aboro nga mbaro du i angihe rogo radio, dungu aboro aberẽhe tigayo nga boro ndikidi vura du na i ki tona ka gunde. Agu akurayo atona ka mbakadatiyo nibasa tipa agu avurayo i aberãpa yó nga i naye re.

² Barambeda, ndikidi vura nika manga. Ono tie, badungu aboro ambakadanga tiyo tipaha te. Gi vura re nga Aramegido nga ga Mbori vura tipa ka nyasa riipa gbegberẽ apai dunduko auru kpotosende kusayo. Anga kungbo pangbanga gbua nga gipai re te. Ani ini gupai nga gi vura re nika manga amanga bambiko Mbori ima gumbapaha rogo Fugoko nga Ziazia Kekeapai. (Yugo. 16:14-16) Ani asonga vura ti regbo gu vura re te. Kuba gure, Yekova nika mangasunge na gu ome du ko nani tipa ka batasa rani ngba iiriwo gene.

3. Gini sangbanebi ani nika wisigoho, na tipagine duhe ti ni na nyanyakipaha furani?

³ Gu sangbanebi du rogo Zekaraya kapita 14 nafura tipa gu vura nga Aramegido. Wa vura duhe nga i akehe agarã wa 2,500 kusayo, gi sangbanebi re na ome kurii gaani raka. (Rom. 15:4) Badungu agu apai du yo nafura tipa agu apai namangi ga Mbori aboro natona tigu regbo i asigira gu Kindo nga ga Masiya ngbangbaturũ yo rogo 1914, na gu wene apai nika manga barambeda kumbatayo. Gu nyanyaki papara sangbanebi re nakodapa “babakere ngboongboorago” na wai “unga ime” afu. (Zek. 14:4, 8) Gi ngboongboorago re namanga nyanyakipa pai nga ka banda airisi Yekova. Na ho ani ka ino gupai ni unga ime arukubaha furani, anga ani nika bi kina gupai gbua nga si naida ani mbirihe te ono ani nikadu adu na nyemu ka mbiraha. Si niwenepai ani moiberã rani fuo gi sangbanebi re.—2 Pet. 1:19, 20.

“GU RAGO NGA GA YEKOVA” TONA

4. (a) “Gu rago nga ga Yekova” atona ti gini regbo? (b) Dungu agarã mbata 1914, ginipai airisi Yekova atakipandehe, na waigu agbia zegino amangipai kutini?

⁴ Zekaraya kapita 14 natona na gu fugo nga “gu rago nga ga Yekova.” (Oni gedi Zekaraya 14:1, 2.) Gine nga gu rago re? Si nga “rago Gbia,” na si atona ho “gu ngbi [watadu kindo] nga ga kpotosende” adani ni “gu ngbi [kindo] nga ga gaani Gbia, na ga gako Kristo.” (Yugo. 1:10; 11:15) Gu rago re atona rogo 1914 nga gu regbo gu Kindo nga ga Masiya atona zogarago ti ni ngbangbaturũ yo. Dungu agarã mbata fu 1914, airisi Yekova aatungusa gupai fu aboro nga ‘rago aGendiria nika nyasa’ rogo gu garã re na zegino nikadu rogo akpakarapai. (Rk. 21:24) Waigu aboro amangipai sa gipai re? Kuba gupai nga aboro mangipai sa gi zahe re, aboro-birĩ zogarago na abarumbatayo rogo pambori aasawia gi zaaza abatungusi wene pangbanga re asawia na kini rungosiyo. Pa manga yó ho wo ayugu gupai nga i asawia gu Mbori Duna Tanduapai Dũ, bambiko agu abatakipande pa Kindo re angia mbedimbedi aKristano naarukuba gu ‘Yerusarema nga ga ngbangbaturũ’ nga gu Kindo nga ga Masiya nga gu du yó nipaparaha.—Eb. 12:22, 28.

5, 6. (a) Ginipai si adu nga aboro nika manga “bakporo” nani gbiati avuruhe? (b) Ada nga “gu yangara aboro”?

⁵ Zekaraya agumba gupai si adu nga aboro amangaha ki yaa: ‘I adia gu bakporo nga Yerusarema.’ Gu “bakporo” re narukuba ga Mbori Kindo du tiibe Masiya. Yangara mbedimbedi aKristano nga avuruhe, i narukubaha auru kpotosende ane. (Frp. 3:20) Ti regbo Bambata Vura Nga ga Zegino, i ‘azi’ agu aboro naadu na atindiro beyo rogo ga Yekova riigbu na ki kedi yó kurogo gu bambukiso naadu Atlanta, Georgia, Amerika yo. Agi avura mbedimbedi aKristano re amangiyo gbegberẽ ki rugusi yó ti mangasunge na gayo awaraga na ki rugusi yó a ti sunge tungusapai. Gipai i amangihe re adu wa ka i ‘gbu abambu’ watadu ka airadĩ dĩ ahe vuru bambu.

⁶ Wa si avura du nga i amangi ga Mbori amoyambu gbegberẽ, ki bisirapa yó na ki rungosiyo, i aarengbanga ka gberesapa ndikidi irisombori te. “Gu yangara aboro” adu kinaho nangia gu mbedimbedi aKristano nga aguyo “i aroga nga yo ku sa yo bakporo yo” ya.

7. Gini kpiapai mbedimbedi aKristano namoihe furani areme?

⁷ Ya mo gi sangbanebi re adigisitihe ti digido Bambata Vura Nga ga Zegino? Oó. Avura mbedimbedi aKristano aarungosiyo kindi nibakerehe gbiakuti agu abadiangbayo du na maabangirise ka raka auru kpotosende ane. (Yugo. 12:17) Nikpiapai, i arungosi awirina nikerehe rogo Ue Vura Nga ga Zegino. Gu kpiapai nga ga gu ruru mbedimbedi aKristano re nangarasa rani areme ani hi agu aˈasada rengbe ani ka gbiatirani nani kodihe na agu arungosiro ani agbiaha be agumerani, abadiasunge, watadu agu aboro nasawia rani tipa gaani idapase sukuru yo. (1 Pet. 1:6, 7) Ka si vura du nga ani naraka kina rogo gini ba vurũ, ani ima diaberã ka ‘ru nyanyaki rogo toro yo sa’ na ani ‘agundenga be avurarani te.’ (Frp. 1:27, 28) Ono tie, waigu rengbe ani kadu nibandabanda rani rogo gu zegino nasoga rani asoga re?—Yo. 15:17-19.

YEKOVA MANGI “BABAKERE NGBOONGBOORAGO”

8. (a) Ginipai rengbe abaagangara ka rukuba ha rogo Ziazia Kekeapai? (b) Ginipai “bagangara Eraya” arukubaha?

⁸ Wa duhe nga gu “bakporo” nga Yerusarema narukuba gu Yerusarema nga ga ngbangbaturũ, “bagangara Eraya nga gu wagi barangba Yerusarema,” si naru a kuba gu kurapai. Ginipai gi bagangara re arukubaha? Wai gu si nika ‘sára rogo ho’ na ki da ni abaagangara ue? Tipagine Yekova aya ti ni wee “gimi abaagangara”? (Oni gedi Zekaraya 14:3-5.) Rogo Ziazia Kekeapai, abaagangara rengbe ka rukuba akindo watadu azogarago. Berewe a, Ziazia Kekeapai nayaa amaku gbiati bandahe naye ri ga Mbori bagangara yo. (Tam. 72:3; Yes. 25:6, 7) Sidu, gu bagangara Eraya nga gu Mbori aru riihe bara ku Yerusarema yo ku uroyo, si narukuba gu ga Yekova bakere pagbia rengbe na arago dunduko.

9. Rogo gini gene “bagangara Aeraya” asari ngbaha?

⁹ Ginipai pa sára gu bagangara nga ga Eraya ayugoho? Gu bagangara naadu Yerusarema uroyo asari rogo gu gene nga, Yekova asigira kura zogarago tipa kurapai kia. Gi ue zogarago re nga gu Kindo nga ga Masiya du vurube Yesu Kristo. Si nga ndu gupai Yekova afura ti ni tipa agu abaagangara ue nakuru mbikopa sara “bagangara Aeraya” ki ya “gimi abaagangara.” (Zek. 14:5) Si dunduko ue nga gako.

10. Ginipai gu “babakere ngboongboorago” du dagba abaagangara ue arukubaha?

¹⁰ Ho gu bagangara re asari ni, paparaha sa adu ku nodiyo gu kuraha kidu ku sudiyo, na ndu Yekova ki nye riihe dunduko ue. “Babakere ngboongboorago” kidu dagba ndu Yekova yo. Gi ngboongboorago re narukuba gu bandahe ga Yekova amoyambu agbiaha tii gako bakere pagbia rengbe na arago dunduko gbiati gu nga ga Wiriko Kindo nga Masiya. Yekova ambunga ziazia irisombori aboro gberesi he te. Gini regbo bagangara Eraya asari ti ni? Si asari ho i asigira gu Kindo nga ga Masiya ni ho rago aGendiria anyasi ni rogo 1914. Gini regbo ndikidi airisimbori atona ka ora kurogo gu ngboongboorago re?

GA MBORI ABORO ATONA KA ORA KU ROGO NGBOONGBOORAGO

11, 12. (a) Gini regbo aboro atona ka ora kurogo gu ngboongboorago re? (b) Gine nayugo gupai nga be Yekova nyanyaki na kina gako aboro?

¹¹ Yesu aya fu apefuoko wee: “Rika aboro asóga roni asoga dunduko tipa rimore.” (Mt. 24:9) Natona rogo 1914, gu sogote re nakio kina kumbatayo rogo gu yangara aregbo nga ga gi sino raka re. Wa si avura du nga avura mbedimbedi aKristano aaida ka nyasa riipa yó ti regbo gu Bambata Vura Nga ga Zegino, i aimongo yó dunduko te. Rogo gu garã nangia 1919, ga Mbori aboro aadunga niziziyo fu ziree pambori nga Bakere Babera te. (Yugo. 11:11, 12)a Si nangia gu regbo aboro atona ka ora kurogo ga Yekova ngboongboorago nga ga abaagangara.

¹² Natona rogo gu garã nangia 1919, Mbori aima digo nibanda ndikidi airisiko rogo gi ngboongboorago re auru kpotosende. Tipa dungu agarã rogo dungu papara zegino, i aima rugusa sunge tungusapai na gu ga aDezire Yekova awaraga du mburuhe rii Ziazia Kekeapai. Gipai re namanga kindi rogo kura aringara. Ka aboro vura manga kina gini asadatise wai vurũ i adunga na diabese ka nyasa riipa ndikidi irisombori te! Be Yekova nikadu nyanyaki na kina gako aboro.—Pa Rug. 11:2.

13. Waigu ani asungo rogo ga Yekova ngboongboorago nga ga bandahe, na tipagine duhe ti ni awere ninyanyakipa pai ka sungo yo?

¹³ Ka ani kpatakara kuti Yekova ki ru rogo rengo yo ngutete, ko gbiati Wiriko nga Yesu Kristo mbunga gene fu ai boro watadu ai pai si ‘tuka rani beyo yo te.’ (Yo. 10:28, 29) Yekova ti aregbo dunduko tipa ka undo rani ho ani aida undo ni tipa wa ka ani gisangbako wangia ko Bakindo Zegino dunduko na ki nye niruru azogo nga ga gu Kindo nga ga Masiya. Si ninyanyakipa pai ani nye rogo gu ngboongboorago nga ga bandahe re, bambiko gu ngboongboorago re na nyanyakipaha fu ndikidi airisimbori wa bakere gberãngbi ambeda.

GU ‘RAGO NGA GA VURA’ DA

14, 15. Ti ‘rago ga Mbori vura’ kuti avurako, ginipai nikadu tipa agu aboro adunga rogo ngboongboorago ya?

¹⁴ Wa digido gi zegino re ambeda kada, Satana nikaa zubo ga Yekova amoyambu kina kumbatayo. Fuani, ga Mbori ‘rago nga ga vura’ nika ye kurii avurako. Gure nikangia gu yangada zubohe Satana nika zuboho Yekova ki gberesi ko. Nigu rago re, Bakere Bakindo nga ga haurago ko aduna diabese rogo gako taarimo susi gu ko adu nani tigu ‘rago sovura’ nadumbata.—Zek. 14:3.

¹⁵ Ti rago ga Mbori vura, ginipai nikadu tipa agu aboro adunga rogo gu “babakere ngboongboorago” nga ga bandahe re ya? Gu “imarago” nga ga inapai akingo kuriyo te. Ti ‘rago gu vura’ naye re, ‘afarasi, abaadongi, akameri, adongi, na angbatunga agu anyaa’ dunduko narukuba agu aũvura nga ga aboro, si adunga na sunge ti ni te. Yekova nika mangasunge na ririakaza na “gberãngbi.” Ani ainongo ho te singia ndikidi kaza nikadu, ono gi gberãngbi re asayo ka i mangingo pai ya. Nigu rago re, ‘bangiriyo na mirãyo agbidigira,’ du rogoyo nga i asovura kina ku bitimo na fugoyo adunga ti ni te. (Zek. 14:6, 7, 12, 15) “Abakindo zegino, na gayo arikavura” dunduko nika duna Satana. Ono ka i vura du kina boro wari vurũ auru kpotosende i duwa ka i gberesi yó. (Yugo. 19:19-21) “Agu yo Yekova ka imo yo ti gu uru re kangbayo adu tona ti digida kpotosende ku bani ki da ku bani.”—Yere. 25:32, 33.

16. Gini asanahe si aida ani berẽkuriihe nibipa gu rago vura nga ga Mbori niima mbeda kada, na ginipai si aida ani mangihe?

¹⁶ Vura naye na rungo fu aboro, zavura agu aboro duna diabese vurũ. Zingo riahe rengbe kadu. Pa ga aboro ahe rengbe ka gberã. Raka rengbe ka gberã. Aboro arengbanga kadu na ranirii gbe te. Ka kereapai wa gure mangi rani, ani mangi wai? Ya mo ani mangi mbangirimbangiri? Ya mo ani mbupa gaani idapase be agi apai re? Ya mo rago agberã tirani ani ki mbupa gaani maabangirise? Nairiwo wai si nikadu ninyanyakipa pai ti regbo bakere gberãngbi ani du naa kido kuti Yekova na ki nye rogo gako ngboongboorago nga ga bandahe!—Oni gedi Abakuka 3:17, 18.

‘UNGA IME AFÚ YO KPUA’

17, 18. (a) Gine nga “unga ime”? (b) Ginihe gu baime du ku uroyo na gu du ku dioyo arukubaha? (d) Ginipai oni nadiberã ka mangaha tipa kumbatayo?

¹⁷ Tifuo Aramegido, “unga ime” nikaa fú kindi rogo gu Kindo nga ga Masiya. Gi “unga ime” re nga ga Yekova mbakadapai tipa raka. Ga Zekaraya sangbanebi fura tipa Baime Tikpo ku uroyo na gu kuraha ku dioyo, gu du ku dioyo nga Mediterena. Si dunduko ue narukuba aboro. Baime Tikpo narukuba agu aboro du rogo amurö yo. Wa duhe nga Mediterena nga unga ime, si narukuba gu “bakere rimbasa” nika bata ti regbo Aramegido. (Oni gedi Zekaraya 14:8, 9; Yugo. 7:9-15) Gi badona aboro du ue re dunduko nika mbira “unga ime” rogo gu ‘di nga ga ime unga re’ Nisangbana gipai re, i dunduko nika da nirengberengbeyo na ki raki nyeanye kindi.—Yugo. 22:1, 2.

¹⁸ Ho Yekova nika gberesa gi zegino re ni, ko nika banda rani na ki rimisi rani kurogo gako vovo zegino. Wa vura duhe nga aboro dunduko nasoga rani, ani dinga berã adia ka nye niruru azogo nga ga ga Mbori Kindo, na ki diberã ka nye kina rogo ga Yekova ngboongboorago nga ga bandahe.