Anga Ũvura Ho Aboro Ka Mbakadaha Kuti Roni Nikadu Na Diabese Te

“Gu ũvura i ka mbakada ha kuti ro si adía nga be ro wa sa te.”​—YESAYA 54:17.

1, 2. Wai gu kpiapai du tipa agu aDezire Yekova du Albania yo ayugo gupai nga, sangba Yesaya 54:17 nga kina rengo?

DUNGU agarã kusayo, rogo gu ringara abaagangara du Putu yo ku uroyo, aKristano adu yo nadu na wingbaduse. Gu zogarago i adu tiibehe amangi asadatise rogo apai dunduko ka nyasa riipayó. Ono wa si avura du nga i anaarungosiyo, na kini kedi yó kurogo agu abataya zizi aboro i anaamanga nyanyaki asunge rogoho, na kini kiti ngbangayo niwia, agi akare re aarengbanga ka nyasa riipayó te. Ada nangia agu aKristano re? I angia agu aDezire Yekova nadu rogo gu gbata nga Albania. Wa vura duhe nga pa nduyo tipa adunguratise gbiati tungusapai adu nikpakarapai, gayó hipai vuru gu dungu agarã re aima tumba gu pambori nga ga aKristano kuari na ki ye na taarimo fu Yekova. Rogo gu garã nasusi nga 2006, ti gu regbo i akpara gayó vovo mekemeke abambu fu Yekova, wirina sa nadu niruruko tipa gbanga regbo ayaa: “Ka Satana vura manga ome kina wai vurũ, ko adunga na diabese te, kina Yekova sa nikadu na diabese!”

² Agu apai re dunduko nga gopai tipa rengo ga Mbori kidohe tipa gako aboro a wa duhe nikekehe rogo Yesaya 54:17. Si nayaa: “Gu ũvura i ka mbakada ha kuti ro si adía nga be ro wa sa te, gu mirã aboro dunduko nikazinga kuti ro rago sarangbanga mo akíta ngbanga ha akita [mo agbarasa ngbanga agbarasa fuyó].” Kuru apangbangaa nayugo nani nga, anga he ho rengbe ga Satana zegino ka mangaha tipa ka nyasa riipa gu irisombori ga Yekova Mbori amoyambu amangaha nga aguyo naima kparatiyo fuko te.

Gu Zanga Diabese Nga ga Satana

3, 4. (a) Gini ahe nga ga Satana aũvura? (b) Rogo gini gene ga Bakitingbanga aũvura aadunga na diabese ya?

³ Agu aũvura i amangasunge nani kuti ndikidi airisimbori, si nga rugusa sunge tungusapai, manga yó na zuũ, kisoyo ku bambukiso yo, na ‘kaa tabura fudifudiapai nirũ yó ndiko’ kutiyó. (Atambuahe 94:20) Nirengo, rogo gu kura aringara, zavura ti gi regbo aDezire Yekova awisigo gi papara kekepai re, i ‘naʹasada’ gi ndikidi aKristano re nibipa gayo kakuti ruru mangapai fu Mbori.​—Yugoti 2:10.

⁴ Nikpiapai, be-basunge sa nga ga aDezire Yekova atingidi gupai nga, vuru garã yo sa, i azubo ga Mbori amoyambu na kpata bara 32 gene tungusapai yo. Kurigure, aborisi azi aDezire Yekova bara 59 ho i aatungusapai ni, nga sosono aDezire Yekova na parangayo, akumba na adee. I amoi aba-wiri-bee awirina kurogo ime-kepai na ki dokaha rii kpewaraga tipa ka kusa azehe, i ki dekpiaha, na ki moihe giiyo yó si niiyugu yó wa agu aboro nga abakuondiko. I anaagundesi gu kurayo na abundu. Rogo gu kura ringara sa, awaraga-angbangaa awere ho naima susa 1,100 nga gu du tipa pa zioyo aDezire Yekova, pa kisoyo ku bambukiso yo, watadu pa taka yó. Angbangaa bangehe nasusi 200 du tipa agu apai namangi ti agu aregbo i anaadunguratiyo tipa ka tingida pakpio Yesu! Wa vura duhe wo, ga Yekova toro aima undo gako aboro i bati wa si avura du vurũ nga ome apai aima fu riyo rogo gu ringara re na agu akura aringara a. (Zekaraya 4:6) Gu bakere zinga du asogorani nani arengbanga ka rugusa rani ti taasarimo Yekova te. Nirengo, ani naa kido nga ũvura ho nika diabe ga Mbori ringbisapai te.

Ziree Kitangbaangase

5. Gini zire kitangbaangase nakuru kuti ga Yekova amoyambu rogo bambata sa kama agarã?

⁵ Yesaya aima gumba sangbanebi kumbatayo ki yawee ga Mbori aboro aidanga na gu mirãse nika zinga kutiyó te. Rogo bambata sa kama agarã, i anaakitangbangaa aKristano dedede na kini biyo wa agu aboro namanga gbegberẽ apai. Agu afugo du rogo Amokedi 16:20, 21, si nga ngbatunga agu akitangbaangase re. Si nayaa: “Agi aboro re, . . . i nafuda aboro rogo gaani bakporo bakere gbe, ki yugu agu asino aru nga dia ani he ki mangi he nga aRomo ya.” Ti gu kura regbo, abarumbatayo rogo pambori aʹasadi ka zomia abazogo tipa i zingi kuti ga Kristo abawiriki. I ayaa: “Agi aboro nagbarasi zegino re i ye kono a. Yasona ki di yo ku gume; i namanga akia ti agu andika nga ga Kaisara dunduko.” (Amokedi 17:6, 7) I anaabi gu mokedi nangia Pauro ni “kere boro” na nigu boro nangbembatayo rogo samungu dagba aboro rogo “zegino dũ.”​—Amokedi 24:2-5.

6, 7. Gini gene dagba akuraha ndikidi aKristano agbarasa ngbaanga ngbaha kuti agu aboro nagumba azire kutiyó?

⁶ Mbiko agi apai re, anga iiriwopai ngaha ka bi gupai nga ndikidi aKristano areme nagbiatiyo na kere gbaraga ziree tipa yó, na gbarasarimo yó te. Tipagine rengbe ani ti ni ka yawee ani nagbarasa ngbanga fu agu aboro nasogote rani?​—Yesaya 54:17.

⁷ Ngbatunga agu akitangbaangase gbiati mera na ziree ti rimo aDezire Yekova re, gayó wene sino mangapai nasovura aso kuti ni. (1 Petero 2:12) Ho aKristano araka ni ni agu aboro-ringara nairisa andiko kini ne wasiwasi mangaapai, na kini berẽpa akurayo aboro, ngbatunga agu akitangbaangase re nakura nikina ziree. Gaani wene sino mangaapai nasarangbangaa furani. Ho aboro abi gaani hipai ni wa ani amanga wene asunge, si nasayo i taasirimo Barani du ngbangbaturũ na ki sa yó i inipa gu bawene raka airisoko arakaha.​—Yesaya 60:14; Matayo 5:14-16.

8. (a) Ginihe rengbe ka undo rani ti gu kura aregbo tipa ani nyakasipai kubara gaani idapase yo du mburuhe rii Ziazia Kekeapai? (b) Wa ani apekafuo gu kpiapai nga ga Kristo, wai ani agbarasa ngbaanga fu agu aboro nasogote rani?

⁸ Kupati gaani sinombori, ngbaha angba ani nyakasipai kubara gaani idapase yo nga gudu mburuhe rii Ziazia Kekeapai. Gene sa dagba agu akuraha nga ka ndu fuo agbiangbangaa tipa ka fura naayó tipa bandahe. (Esetere 8:3; Amokedi 22:25-29; 25:10-12) Ho Yesu aduni auru kpotosende ane, ti gu kura aregbo, ko anaafura gbaiga fu agu aboro nanaabisirapa gako mangaapai, na ko kini gbadi agu aziree i anaagumbaha tipa ko. (Matayo 12:34-37; 15:1-11) Niwirika ani gu kpiapai nga ga Yesu, ani namangasunge na gu momu du berani ka sakarogopaiyo tipa gaani idapase fu kura aboro. (1 Petero 3:15) Si aidanga ani mbu aboro sukuru yo, basunge yo, watadu rogo gaani akporo i rugusi rani ti yugo ani gu rengo du rogo Fugo Mbori te.​—2 Petero 3:3, 4.

Yerusarema “Wa Rõrõi Mbia”

9. Gini Yerusarema narukuba gu “rõrõi mbia” furayo tipaha rogo Zakaraya 12:3, na ada narukubaha auru kpotosende ane?

⁹ Gu sangbanebi nga ga Zakaraya nayugo ndu gupai arikaaboro asoga ndikidi aKristano ti ni. Oni kparianga gupai Zakaraya 12:3 agumbaha kini yaa: “Ti gu rago re mi asá Yerusarema wa rõrõi mbia fu aboro dunduko.” Gini Yerusarema gi sangbanebi re afura tipaha? Gu sangbanebi nga ga Zakaraya nafura tipa gu ‘Yerusarema nga ga ngbangbaturũ,’ nga gu Kindo nga ga ngbangbaturũ yambuyo mbedimbedi aKristano kurogoho. (AEbere 12:22) Yangara gu mbedimbedi aKristano nga adikumbo gu Kindo nga ga Masiya re, i kindi kina auru kpotosende ane. Wadu yó dunduko na agu abadiangbayo nga “kura akandoro,” i nayamba aboro i ye kadu ni azogo nga ga ga Mbori Kindo wa du regbo adu koyo kindi. (Yoane 10:16; Yugoti 11:15) Ga aboro karagapai nga gine kuti gi yambahe re? Na gini ngbatunga undo Yekova afuhe fu ndikidi airisiko areme? Si naida ani iningo gipai re wa ani ka wisigo Zakaraya kapita 12. Pa manga ani he wo rengbe ka sa rani ani du naa kido nga, ‘anga ũvura ho i ka mbakadaha’ kuti ga Mbori mbedimbedi aboro gbiati abadiangbayo nikadu na diabese te.

10. (a) Tipagine i azubo ga Mbori aboro ti ni? (b) Ginipai namangi agu aboro naʹasadi ka tumba “rõrõi mbia” ngba gayó gene?

¹⁰ Zakaraya 12:3 nayugo gupai nga, arikaaboro ‘naimisa tiyo gbe.’ Wai gipai re amanga? Mbori aima rũ andiko nga gu wene pangbangaa nga ga Kindo, si duwa ka i tungusihe. ADezire Yekova nabi gu sunge tungusapai re ninyanyakipa sunge. Ono tie, wa vura du gu pangbangaa du tipa Kindo nigu bangisa maabangirise du fu rikaaboro, si fuyó nikina “rõrõi mbia.” I naaʹasada tiyó ka diaha kusayo nisoga yó agu aboro natungusapa gu Kindo re. Pa mangayó ho wa gure nasa gupai nga gu rikaaboro nasogote gu pangbangaa nga ga Kindo re ‘imisi tiyó aimisa gbe,’ na ki ogõ akpotoyo dunduko. I aima gbarasa rimoyo na ki payasipayo. I arengbanga ka rugusa ndikidi airisimbori nga aguyo nakpinyemu ka takapandepa gu “nyenye pangbanga” nga ga gu Kindo nga ga Masiya mbata fu gi zegino re digi te. (Yugoti 14:6) Ho babanda zizi aboro sa abi gu rungosi ni i aarungosi ga Yekova amoyambu nani rogo ringara sa Afirika yo, si asako ko yaa: ‘Oni nagbarasa gaoni regbo agbarasa gbua kaa rungosi agu aboro re. I ambunga gayó idapase te. I nikaa nge kina kumbatayo.’

11. Wai Yekova abanda gu gako kidohe du rogo Zakaraya 12:4?

¹¹ Oni gedi Zakaraya 12:4. Ka pepai nimasaku, Yekova ayawee ko nika vurasi bangiri agu aboro nasovura kuti agu aboro natakapande gako Kindo na ki sa yó i ‘kigi.’ Ko aima manga gupai re. Nikpiapai, rogo gu kura ringara sa i arugusi sunge tungusapai rogoho, agu aboro naasoga ga Mbori aboro re, i aarengbanga ka ká na gu riahe nga ga toro be ga Mbori amoyambu te. Waraga pangbangaa sa ayawee aDezire Yekova namangasunge na baroni (nga utukpo-utukpo kandi) tipa ka tinda agu abuku du mburuhe rii Ziazia Kekeapai kurogo gu kura aringara! Ga Mbori kidohe fu gako ruru amoyambu nga kina rengo nga: “Mi azá bangire . . . ho mi ka fu vurari ni fu afarasi dunduko nga ga aboro ra.” Gu zinga du avura Kindo nani, si nakisi bangiriyo ka i ainongo gini gene ka i ndu ngbaha ya. Ono wa vura duhe wo, ani naa kido nga Yekova nika banda gako aboro abanda wa du yó nibadona na ki ngere fuoyo tipa i du wenengai.​—2 Abakindo 6:15-19.

12. (a) Rogo gini gene Yesu agindo we ti gu regbo ko adu auru kpotosende ane? (b) Wai mbedimbedi aKristano aziga we, na asangbanaha nga gine?

¹² Oni gedi Zakaraya 12:5, 6. Gu fugo nga “Agbia aYudo” re, si tipa agu aboro nangerakurii apai dagba ga Mbori aboro. Yekova nasa gi gako aboro nga agbia re i niigbi wa we tipa agu apai ko aidaha tipa gako Kindo auru kpotosende. Ti kura regbo sa, Yesu aya fu gako abawiriki wee: “Mi ye ka ba we ku sende no.” (Ruka 12:49) Ka pepai nimasaku, ko aima gindo we nirengo. Tungusapa gu pangbangaa nga ga gu Kindo nga ga Mbori nangia gu nyanyakipa sunge Yesu anaamangaha kakaka. Si amoi we rogo gu rikaaboro yo nangia aYuda dunduko. (Matayo 4:17, 25; 10:5-7, 17-20) Teketeke a, apefuo Yesu areme “wa ngariangaria akoro dagba nyake yo, wa mirãwe nzinga dagba vodivodi zende ahe.” Buku sa i akusihe rogo gu garã nangia 1917, si afura tipa gu biriki nga ga agu akanisa i aya tipaha wee si nga ga aKristano. (The Finished Mysterya) Gupai re asa abarumbatayo rogo pambori i zingi bakere gbe. Barambeda kusayo, Gu Pangbangaa Nga ga Kindo Na. 37, riihe adu nga “Digido Zire Pambori Ima Mbeda Kada!,” si aima sa aboro i diberã singia i nika songoda ga Mbori Kindo watadu i nikaa sogotehe asogote.

Batasa “agu Abamburoko Nga ga aYudo”

13. Rogo gu fugo nga “agu abamburoko nga ga aYudo” nga gine, na tipagine Yekova abatasa agu aboro ti ni naraka tiihe?

¹³ Oni gedi Zakaraya 12:7, 8. Rogo gu ringara aYisaraere nadumbata, bamburoko angia kparakparahe rogo ringara, kina ababanda avusende na abasopobino sa nanaamangasunge nani. Agu aboro nanaaraka rogoho, i nangia gu bambata aboro nanaaida i niundo yó ti regbo fudifudiapai watadu ti gu regbo aboro naye ka zubo Yerusarema. Ka pepai nimasaku, gu fugo nga “agu abamburoko nga ga aYudo,” si nayugo gupai nga, mbedimbedi aKristano areme wakina agu aboro du rogo gu ba adunga bandahe rogoho ya, rogo gu ba du kpanangbara. Yo du yó ni kini songodi gu Kindo nga ga Masiya zanga gunde. Yekova nga ga arimbasa ko, ko aazanganga banda “agu abamburoko nga ga aYudo mbata” te, bambiko agu aboro naraka tiihe, i nga gu bambata aboro Satana naazubo yó.

14. Wai Yekova abanda agu aboro du rogo “agu abamburoko nga ga aYudo” ka i dunga rurungbura ya?

¹⁴ Nirengo, kuru apangbangaa nayugo nani nga Yekova nasongoda gu gako mbedimbedi amokedi asongoda du tipa gako Kindo re rogo gayó “abamburoko” zegiyo.b Ko nabanda yó ka i ‘rurungburanga’ ya rogo gu gene nga ko nasayo i ru nyanyakii na kidu na wingbaduse wakina Davide nangia kere basovura.

15. Tipagine Yekova “agbáta pa gbarasa arikaaboro dunduko” ti ni, na ti gini regbo ko nika mangaha wo?

¹⁵ Oni gedi Zakaraya 12:9. Tipagine Yekova “agbáta pa gbarasa arikaaboro dunduko” ti ni? Si wo mbiko i dunduko nasovura kuti gu Kindo nga ga Masiya. Mbiko gu gberarago i afuhe fu ga Mbori aboro na kini rungosiyo, si du Mbori aida ka sapangbangaa yó ti ni. Fuo bete regbo kumbatayo, Satana na gako aboro nika so yangara vura kuti ndikidi airisimbori, nga gu nika ndu naayó kuti gu vura Ziazia Kekeapai ayambaha nga Aramegido. (Yugoti 16:13-16) Bakere Basapungbangaa nika karagapai kuti gayó zubohe re ki songodi gako amoyambu na ki taasirimoko dagba arikaaboro.​—Yezekere 38:14-18, 22, 23.

16, 17. (a) Gine nga “gu pai nikadu tipa agu amoyambu nga ga Yekova yo”? (b) Gaani hipai nayugo ginipai tipa ga Satana zubohe?

¹⁶ Anga ũvura ho be Satana rengbe ko ka rungburasi gu idapase nga ga ga Mbori aboro rogo zegino dunduko nani watadu ka rungburasi yó ti gayó sunge te. Gu gaani zereda nga ga toro, naye mbiko ga Yekova ome du tipa batasa aboro, si nga “gu pai nikadu tipa agu amoyambu nga ga Yekova yo.” (Yesaya 54:17) Anga boro ho rengbe ka dia gaani zereda berani ngbaome te, naapa du ani wenengai rogo toroyo te. (Atambuahe 118:6) Satana naaʹasada tiko kindi ka ye na sogote kuti rani na kini ipisi gberãngbii. Pa hi ani pai niruru rani nga gu gopai nayugo nani nga, ga Mbori toro kina tirani. (1 Petero 4:14) Gu wene pangbangaa nga ga Yekova Kindo i aima sigiraha, ani natakapandehe rogo zegino dunduko. Wakina gu ũvura i naamangasunge nani tipa ka bagunde ti gu kura aboro, wo dungu ‘awiri mbia barioko’ arukuba agu arungosi nga gu ninaamanga ga Mbori aboro. Wa vura duhe wo, Yekova nanyakasa gako amoyambu tipa i naadiabe agu ambia re, na ka sangbanaha adunga ti ni ya. (Zekaraya 9:15) Anga boro ho nika rugusa yangara mbedimbedi aKristano gbiati abadiangbayo ti gayó sunge te!

¹⁷ Ani nangera kumbatayo tipa ka bata be agu azubohe dunduko nga ga Bakitingbanga. Nairiwo gu wasa ani agbiaha mbiko ino ani gupai nga, ‘gu ũvura i ka mbakadaha kuti rani si adianga berani wasa te, na gu mirã aboro dunduko nika zinga kuti rani rago sarangbanga,’ ani agbarasa ngbanga agbarasa fu airaha!

[Gu rukutu kekepai du bandu waraga yos]

Gaoni Karagapai Nga Gine?

• Gine nayugo nani nga agu aũvura nga ga Satana, si na diabese te?

• Wai gu Yerusarema nga ga ngbangbaturũ ada “wa rõrõi mbia”?

• Wai Yekova abatasi “agu abamburoko nga ga aYudo?

• Gini kido si aida ani du nani wa ani ambeda koyo du Aramegido ni?

[Gu sura du ti kpewaraga 23]

Gu ga Yekova aboro du Albania yo anye niruruyó wa Satana avura kaa rungosi yó vurũ

[sura du ti kpewaraga 25]

Yesu aima sovura kuti zire kitangbaangase

[sura du ti kpewaraga 26]

Anga ũvura ho aboro ka mbakadaha kuti agu aboro natungusa wene pangbangaa nikadu na diabese te