Ya mo ga Mbori Sapangbanga Nayugopa du ko na Gbegberẽ Sino?

TIPA ani karagapai kuti gi sanahe re, ani bingo akpiapai ue rogo Ziazia Kekeapai nayugopa ga Mbori sapangbanga, gu Ime Akangbii naadu ti rago Noa gbiati pa gbarasa aKanano.

GU IME AKANGBII NAADU TI RAGO NOA

GUPAI ABORO AGUMBAHA: “Mbori angia gbegberẽ sino boro ti gu regbo ko aimi aboro na Ime Akangbii ki batasi kina Noa sa na gako aborokporo.”

GUPAI ZIAZIA KEKEAPAI AGUMBAHA: Mbori ayaa: “Rago angba nga ti re tipa kpio gbegberẽ boro te, ono gu ngba nga gbegberẽ boro sa tini ti gani pai ki nye ni ungani.” (Yezekere 33:11) Pa gbarasa Mbori gbegberẽ aboro ti rago Noa aafunga ngbarago fuko wagu tooni te. Tipagine tie ko amangihe ti ni?

Ziazia Kekeapai nayaa ho Mbori ayeni na sapangbanga kurii agu azanga sinombori nadumbata, si adu nikpiapai ‘fu aguyo nakpinyemu kadu ni azangasinombori.’ (2 Petero 2:5, 6) Gini kpiapai Mbori amoihe?

Bambatapai nga, Mbori ayuguhe nga wa vura duhe nga rago angbanga tiko tipa imo aboro te, ko nabi agu aboro abi naimisi akurayo na kini saringbanga yó. Fuo bete regbo, ko nika nyasa riipa iraira mangapai na arungo kusayo.

Uepai nga, gu ga Mbori mangapai nadumbata nayugo gupai nga ko naza aboro aza mbata fu ko sapungbanga yó. Noa angia batungusi rurupai, ono aboro adeganga tuyo fuko te. Ziazia Kekeapai nayaa: “Ka i aina nga ha ya daho ngirimo akangbi aye ni ki nirogo yo dunduko ku sa yo.”—Matayo 24:39.

Ya mo sino Mbori kindi kina wo? Ii. Nikpiapai, ko aza gako aboro nangia aYisaraere nga ka i amanga gbegberẽpai wa agu aboro naadu patiyo, ko nika mbu avurayo i gbarasi gayo ringara na gayo bakere gbata nangia Yerusarema na ki ga naayo nizizi yó. AYisaraere atona ka manga gbegberẽ apai na kini fu awiriyo ni motumo. Ya mo Yekova amangipai kuti gipai re? Ii, ono fuo keda ko gako anebi bara dunguhe tipa i zayo wa ka i aria gayo sino raka mbata fu ko gbarasi yó. Ko ape gupai a nga: “Ni rengo Yekova Mbori amanga nga pai te, zanga kusa gako rondo fu gako amoyambu nga anebi” te.—Amosa 3:7.

GU GENE SI AKODA RANI NGBAHA: Agu sapangbanga Yekova amangihe kusayo nafu maabangirise furani nga ko nika sapangbanga agu aboro asapa namanga gbegberẽ apai. Ziazia Kekeapai nayaa: “I agbandaka amangi gbigbitapai agbandaka . . . Ono bayee aboro adía kumbo ringara, ki du na ngbarago tipa gu wenepia du kpaima.” (Atambuahe 37:9-11) Ginipai mo aberãha tipa gu sapangbanga nika dia arungo ti aboro kusayo? Ya mo gbegberẽ sino du watadu inopai?

PA GBARASA AKANANO

GUPAI ABORO AGUMBAHA: “Pa gbarasa aKanano angia kere vura wakina agu avura aboro asoho areme tipa nyasa riipa tunga aboro kpäkäyä.”

GUPAI ZIAZIA KEKEAPAI AGUMBAHA: “Gako [ga Mbori] apai dunduko du ni ruru sarangbanga. Mbori nga irayososopai zanga irairapai.” (Pa Fu Rugute ni Ue he 32:4) Ka i ringbisinga ga Mbori ruru sarangbanga kuti gu vura nga ga aboro te. Tipagine? Bambiko Mbori wa aboro te, ko ima rengba ka ino gupai du kpoto aboro yo.

Nikpiapai, ho Mbori asaringbanga ni kuti agu agbata nangia Sodomo na Amora na ki diberã tipa ka gbarasaha, gu ruru kumba nangia Abarayama aida ka ino singia ga Mbori diaberã niruruhe. Si aima kpakara bangiriko nga Mbori rengbe ka ‘gbarasa ruru aboro na gbegberẽ aboro’ wa sa. Mbori akido ko nga ka ruru aboro du Sodoma yo bawe, ko gbarasinga gu gbata re te. (Bambata Pai 18:20-33) Si tie ziazia nga, Mbori aima wisigo ngbadu agu aboro yo re na ki bi kina gbegberẽ mangapai yo.—1 Pekapai 28:9.

Wakina gure a, Mbori abi aKanano nigbegberẽ aboro ko ki ya i gbarasiyo. AKanano aima gasa be manga gbegberẽ apai, naakoda zo awiriyo nimotumo.a (2 Abakindo 16:3) AKanano aima inoho nga Yekova aima zinahe fu aYisaraere nga i di gu ringara re dunduko. Aguyo nanye rogo gu ringara re ka sovura kuti aYisaraere, anga kina aYisaraere i aasovura kutiyo te, ono kuti Yekova nga gu boro naima yugoho nga ko nangerafuo gako aboro.

Kurigure, Mbori aima inopai fu agu aKanano naambu gayo gbegberẽ mangapai na ki idi ka raka kuti gako arugute du tipa ruru mangapai. Nikpiapai, Mbori abatasi gu natakuari nangia Raba na gari aborokporo. Berewe a, ti gu regbo agu aKanano naaraka Gibona yo agbata ga Mbori inopai, Mbori abatasiyo na awiriyo dunduko.—Yosua 6:25; 9:3, 24-26.

GU GENE SI AKODA RANI NGBAHA: Ani rengbe ka wirika nyanyakipa pai ti wai Mbori asaringbanga aKanano. Ani nambeda kuti “rago sapangbanga na rago gbarasa azangasinombori.” (2 Petero 3:7) Ka ani akpinyemu Yekova, ani gbia mosoro agbia tigu regbo ko nika dia arungo na agu aboro kusayo nasoga gako ruru zogarago.

Yekova natingida rani nga gu diaberã avunguagude amangaha na ome kurii awiriyo. Fugoko nayaa: ‘Oni sia unga, oni ki nye niungaroni, oni na awironi a, ka kpinyemu Yekova gaoni Mbori, ka gia fugoko, ka kakuti ko.’ (Pa Fu Rugute ni Ue he 30:19, 20) Ya mo agi afugo re nga afugo gu Mbori nga gbegberẽ sino boro watadu si nga afugo gu Mbori nakpinyemu aboro na kini idi i mangi wene siapai?