Wari Ani Aenge Ni?

Gu mbata buku nga ga Ziazia Kekeapai nga Bambata Pai, nasakapa enga zegino ki ya: “Ho rago aenge ni Mbori afu ngbangbaturũ na kpotosende.” (Bambata Pai 1:1) Fuo Mbori kusi kurukuru ahe na anya, ko akusi bambata aboro nangia Adamu na Eva. I adu kia ti anya bambiko aboro na bete asino Mbori tiyo kodihe na ranirii ka siapai. Si du Mbori arengbe ti ni ka sarangbanga yó tipa gu siapai ka i amangihe. Ka i agi ga Mbori arugute, si ka sayo i du rogo ga Mbori ringbisapai nangia i du ni bambata avungurani na ki gbia zereda, na wene raka auru kpotosende nyeanye kindi.

Ono tie, kura maraika sa amangisunge na gu momu re tipa ka sa aboro i mangi gupai nangba tiko. Ko ada ni Satana, du rogoyo nga “Gu boro nasovura kuti kurani.” Satana afura rogo wo yo tipa ka nanga Eva, na ki pe gupai furi nga ri ni kadu wenengai zanga ga Mbori arugute. Adamu na Eva apekefuo Satana, ki gbarasi gayo pagume na Bakusiyo. Mbiko ga bambata avungurani gbegberẽ siapai, i azanga nyenye unga na ki fu ingapai furani dunduko na kpio.

Fuo gipai re nibasa, Mbori apepa gu bipai ko adu na ni tipa ka mbakada gupai re na ki fu gene fu awiri Adamu i gbia nyenye unga. Mbori afura tipa pai ku mbatayo ki ya ‘tita dee’ nika gbarasa Satana na ki nyasi riipa gu rungo Satana, Adamu, na Eva aye na ni. (Bambata Pai 3:15) Da naaye kadu nga gu ‘tita dee’ re? Si adu nga arakoyo abihe.

Ti kina gu regbo re, Satana aasada kindi ka gbarasapa ga Mbori wene ringbisapai. Gbegberẽ aboro atona ka nge kina ku mbatayo. Mbori adiberã ka gbarasapa yó na ime akangbii. Ko arugu gu ruru kumba nangia Noa ko mbakadi kurungba ka batasa tiko na gako aborokporo, kodihe na agu anya Mbori aya ko rogodi ra ku kurungba yo.

Fuo susa garã sa fuo ime akangbii tona, Noa na gako aborokporo akuru rogo kurungba ku rogo gigiri kpotosende. Ono gu ‘tita dee’ re akuranga ti gu regbo re te.

​—Mburu agi apai re rii Bambata Pai kapita 1-11; Yuda 6, 14, 15; Yugoti 12:9.