‘Wa Yekova Avu Roni’

“Gu boro aidanga ka mbupai fu akurani ya, ní ima kuo gu tanga si aida ní si ti ni.” Gere nga afugo gu ga aNgirisi bakeke kuru apangbanga nangia Edward Herbert naraki rogo 17 kama agarã. Agi afugoko re nayugo ndu gupai si aida ti ni ani mbupai fu kura aboro mbiko kinawo ani ka sana gu kura aboro i mbupai furani a. (Matayo 7:12) Ono tie, nyanyaki ndupai kinaho si aida ani mbupai ti ni susi gure. Ani bingo agu afugo gu Mokedi nangia Pauro du rogo AKorosaio 3:13.​—Oni gedihe.

Mbiko wa duhe nga ani dunduko nga aboro ingapai, ani ima rengba ka imisa akuarani watadu i rengbe ka manga kina gu bangisapai re furani. (ARomo 3:23) Wai rengbe ani ka banda zereda dagbarani na akuarani? Ga Mbori toro adu kugii Pauro ko rugu rani tipa ani mbupai fu akuarani. Gu rugute re ni wenehe areme kina wai si adu agarã kutu ue kusayo ti gu regbo i akehe. Ani wisigingo agu afugo Pauro re awere.

“Nihi pai fu akuaroni.” Kura waraga sa aya aKristano nayugo gi sino re ni “du yo na nyemu ka mbupai fu akurayo tipa gayo aingahe watadu agu asinoyo angbanga tiyo ya.” Gu fugo nga “akuaroni” nayugo gupai nga gipai nga sino aboro te. Gipai re nayugo gupai nga, ho ani atingida gupai ni nga ani na agu asino rengbe ka ba gberarago ti kura aboro, si aidanga ani mbu agu apai ani aidanga ha tipa yó ya tipa si gbarasi gaani pazereda dagbarani nayo ya te. Oni ginipai rengbe ka manga ka si du nga kura aboro ingipai kuti rani?

“Nivu akuaroni.” Ringbisihe kuti gu kura wene bawirikipai sa, gu pa-Giriki du rogo gu Ziazia Kekeapai nga ga pa-Zande nga “nivu” si nga “gu nyanyakipa fugo nanyakasapa inopai fu akuarani.” Rogo gu kura ba, i furayo tipa gi fugo re nga “ka manga gupai nafu ngbarago, inapai, watadu undo.” Ani na inopai fu akuarani ni mbu ani pai fuyo “ka pai du bangiri gu boro kuti kura ni.” Ono tipagine si aida ani inipai ti ni fu boro wa gure? Tipa ndupai sa nga, ani naida gu boro re inipai a furani ni mbu ní pai furani.

“Wa Gbia [Yekova] avu roni, kina wo oni ka manga.” Gere nga gu nyanyaki ndupai si aida ti ni ani mbupai fu kura aboro nga: Mbiko Yekova Mbori nambupai furani a. (Mika 7:18) Ani berẽnga tipa gu bakere inopai Yekova namangihe fu agu aboro saberã yó. Yekova wa ani namanga ingapai te. Ono wa vura duhe wo, ko na nyemu ka mbupai na ngbadukoyo dunduko fu agu aboro saberã yó wa vura duhe nga ko ima inoho nga ko aidanga i inipai fuko ni mbuyo pai fuko te. Nirengo, Yekova nga gu bambata boro nambupai fu aboro ingapai!

Gu inapai nga ga Yekova nambedisa rani koyo du ko ni na si nafõngbaduraniyo tipa ani wiriki gako kpiapai. (AEfeso 4:32–5:1) Si naida ani sana tirani nga, ‘Wa duhe nga Yekova nainopai fere, tipagine mi aká ti ni na mbupai fu gu kuare ingipai kuti re ni ima saberã ní ti gupai ní namangi re na ni?’​—Ruka 17:3, 4.