Oni Ini Gipai Re?

Waigu Setefano arengbe ka onga kii ho i aarungosi ko ni?

SETEFANO agbiatiko na kere akumba. Agu abasapungbanga naadu 71 dagba ga aYudo aboro rondo adu na bakere ome beyo gbe rogo ringara. Gu gbiamotumo nangia Kayafa ayambu yo koyo du ko ni, nga gu ko naangera kurii Bambu gumba-ngbanga bete adiwi kusayo ho i asaringbanga Yesu ni kuti kpio. (Mt. 26:57, 59; Amo. 6:8-12) Wa aboro aaye kaa kitangbanga timburukuraha, i abi gupai tipa Setefano kina ngbayo azere mbikoho—kpakpuko yo aangera “wa kina kpakpu maraika.”—Amo. 6:13-15.

Waigu ka Setefano arengbe ka onga kii na kidu zezeredi ti gi kere regbo re? Mbata fu i ye na Setefano fu ga aYudo agbia-ngbanga, ko aima futiko na ome ko dunduko tipa ka manga gu sunge i afuhe fuko mbiko gu ome nga ga ga Mbori toro. (Amo. 6:3-7) Ho ko adu ni rogo asada, gu toro re aamangasunge na ko, kini fu wasa fuko na kini sako ko tingidi apai. (Yo. 14:16) Ho Setefano aanyakasapai ni kubarako yo na wingbaduse, a wa duhe ni kekehe rogo Amokedi kapita 7, ziazia toro asako ko tingidi kekeapai 20 watadu susi gure rogo Kuru Ndika yo. (Yo. 14:26) Ono ga Setefano idapase aye ka nyaka berewe gbe ho ko abi Yesu ni rogo yuguyugupai yo ko naru ku kumbabe Mbori yo.—Amo. 7:54-56, 59, 60.

Ani ima rengba ka gbiatirani ti kura aregbo na aserekpohe gbiati arungosiro. (Yo. 15:20) Ani rengbe ka mbu ga Yekova toro si mangisunge na ani ho ani ageda Fugo Mbori ni dedede na ho ani amanga sunge tungusapai ni zaaza. Manga ani he wo a nika nyakasa rani ani ru nyanyakii barabangiri aˈasada na ani kini banda gaani zereda nga ga berãse yo kindi.—1 Pet. 4:12-14.