Sanduki Asanahe

◼ Ya mo rẽhe arẽ nga agu agumbapai i ade afugoho nga gu awirina amangaha naatanga dagbarani?

Ho i naamanga gumbapai ni, si nanyakasa rani na kini ngarasi rani angarasa. (Amo. 15:32) Sidu tie, ani ima rengba ka bihe nga ngbaha angba ani fuhe fu agu awirinarani naadunga ho si amanga ni ya tipa i gihe a tigayo. Wa duhe nga aũdefugo ima nge areme, si nitaatapai tipa boro defugo gumbapai na ki fuhe fu kura boro. Gu kura aboro na badungu agumbapai beyo i abandaha, kodihe na agu agumbapai i aima mangaha dungu agarã akusayo. Mbiko gu wene sino du yó nani, i ima rengba ka gama agi agumbapai re fu awirinayo. Aguyo na kina bangiriba beyo a rogo Internet i amaa agi agumbapai re rogoho tipa aboro naadiaha yo.

A wa du sino aboro, si agberanga te ka si du nga ani nadefugo gumbapai tipa ka mangasunge nani watadu tipa gaani aborokporo nagiaha. Kurigure, abaakumba rengbe arengba ka manga mbakadapai tipa i defugo gumbapai fu agu awirina adunga gene beyo ka ye tipa adunguratise ya, nga aguyo du ni gbarigbari yo. Ono tie, wene ndupai kinaho si aidanga ti ni ani mbu agu agumbapai de yo fugoho si naatanga dagbarani ya.

Wa duhe nga agu agumbapai i namangaha dedede naandu sa na agu apai si aidaha rogo adungurati, ani ima rengbe ka inga saka rogo gupai i amangi gu gumbapai re ti ni ti gu regbo i adefugo ho, mbiko wa ani ainongo ndu gupai nasa gupai nga i mangi gu gumbapai re ti ni ya. Kurigure, si ima rengbe kadu furani nimbumbupai ani ini gu boro namangi gu gumbapai re na gu regbo ní amangihe ti ni, mbiko wa ka ani ruho ka du naa kido nga gupai gumba ní he re, si nandu nzunzu na gu vovo giarogopai du awere watadu si niruruhe. (Ruka 1:1-4) Kurigure a, agu agumbapai i ade afugoho rengbe arengba ka gbeberã aboro sa gu boro namangihe watadu ka sa yó i nafu irisa funi.​—1 Kor. 3:5-7.

Ruru kangara moyambu namanga ome kakaka tipa ka fu gu riahe nga ga toro furani ti kina “ragoho.” (Ruka 12:42) Gi mbakadapai re nakoda gu mbakadapai du tipa manga agumbapai rogo adungurati gbiati gu dede afugo rengbe ani ka gbiaha rogo gu gaani bangiriba nga ga Internet nga jw.org. Ani naa kido nga ruru kangara moyambu gbiati gaha Riigbu Bipasunge nikaa ndu kindi kumbatayo nafu gu riahe rengbe ka sa rani ani ru ngutete rogo idapase yo.​—Amo. 16:4, 5.