Wai ka Mangasunge na Dede Afugo
1. Kupati gaani awaraga, gini wene he berewe duho ani agbia undo behe?
1 Badungu aboro namangasunge na gaani bangiriba nga ga Internet nga jw.org ka geda gu wene apai nga ga rengo rogoho nga gu du ni ruruhe. (Batu. 12:10) Ono, ya mo oni namangasunge na dede afugo? Manga oni sunge na ni nika saroni oni naagia gu badungu apai du rogo gaani bangiriba nga ga Internet. Wai rengbe dede afugo ka undo rani?
2. Wai rengbe ani ka mangasunge na dede afugo tipa gaani wisigopai nisase watadu gaani wisigopai nga ga aborokporo?
2 Tipa Wisigopai Nisase Watadu Wisigopai Nga ga Aborokporo: Ho ani adegaturani ni kuti dede fugo Ziazia Kekeapai, amagazini, watadu abuku ho ani andu nunguro ni watadu ho ani amanga kura apai ni, si rengbe ka undo rani ani mangisunge na gaani regbo wenengai. (Ef. 5:15, 16) Ani ima rengba kaa gia dede afugo ti regbo gaani irisombori nga ga aborokporo, na kini pekefuoho rogo gu waraga i ade fugoho re. Mangasunge na dede afugo ti regbo wisigopai nisase ima rengba ka du na bakere undo ti ni, ka si du nga ani naida ka ino gedapai wenengai watadu ka wirika vovo fugo.
3. Ada rengbe ka gbia undo ti dede afugo rogo gaani dagbarago?
3 Tipa Tungusapai: Agu aboro du rogo gaani dagbarago adunga regbo beyo ka gedapai ya ima rengba ka kpinyemu gia gaani dede afugo. Watadu ani ima rengba ka gbia agu aboro nape kura fugo kia nga aguyo naima rengba ka gia wene pangbanga ka i tungusihe fuyo rogo “payo yo.” (Amo. 2:6-8) Rogo kura aba, degatue nga nyanyakipa papara sino aboro. Ni kpiapai, gu tunga nga Hmong du Asia yo, sinoyo ningia peka agu apangbanga naamangi kusayo fu awiriyo na i kini zihe ku riyo yo wenengai. Badungu agu atunga du vuru Afirika naaida kaa wirikapai ti apaturẽ.
4. Gini asanahe rengbe ani ka sana tirani na ni nibipa undo aboro rogo gaani dagbarago?
4 Ya mo oni rengbe ka maa ngbatunga dede fugo fu irakporo rogo gaoni dagbarago ni gihe rogo gani fugo? Ya mo ani rengbe ka keda dede fugo fu boro rogo Internet ni ki gbia undo ti ni? Ya mo ani rengbe ka kusa dede fugo ku rogo CD ki fuhe fu gu boro du na nyemupai, kodihe na gu waraga i nade fugoho re? Ka ani fu dede fugo buku, burosua, magazini watadu trakte fu boro gene tungusapai yo, si naida ani ke paha ake rogo gaani ripoti. I nambakada dede afugo furani tipa ani mangisunge na ni ho ani amanga wisigopai ni nisase na tipa ani mangisunge na ni ka rũ gu tunga nga ga Kindo.—1 Kor. 3:6.