Ya mo Mo Ini gu Kparakparapai du Dagba Rengo na Ziree?

1. Ga bipai nga gine tipa rengo?

GA YEKOVA aboro ima kpinyemu gu rengo du rogo Fugo Mbori yo. Ani namaa mburu gaani idapase riihe. (Rom. 10:17) Ani ima ye ka ida kuti gupai nga Yekova namoi mburu gu dungurati nga ga aKristano na ko nga “songodi rengo na nduhe.” (1 Tim. 3:15) Ani na ngbarago ka giasangba agu “abaakumba” du dagba rani nangbembatayo rogo apai yo wa i asaka gu rengo furani nga ga Baibiri nga gu naundo rani ani mangi gupai Mbori akpinyemuhe.​—Eb. 13:17.

2. Ringbisihe kuti Yakoba 5:19, gini kpakarapai rengbe ani ka gbiaha tingbafuo ani wiriki rengo?

² Ono tie, zavura tingbafuo ani idi rengo na kini pekefuo agu arugapai naye be ga Mbori riigbu, i ima rengba ka ingisa rani. (Oni gedi Yakoba 5:19.) Satana naida gupai nzunzu nga ani mbu kido kuti Baibiri watadu agu arugapai ani agbiaha be ga Mbori riigbu.​—Ef. 4:14.

3. Tipagine si aida ani kakuti rengo ti ni nyanyaki? (AEfeso 6:13, 14)

³ Oni gedi AEfeso 6:13, 14. Barambeda, Bakitingbanga nika mangasunge na aziree tipa ka nanga aboro rogo zegino dunduko tipa ka i songodingo pai ku bara Yekova yo ya. (Yugo. 16:13, 14) Ani ima ino gupai a nga Satana nika manga ome nyanyaki tipa ka nanga ga Yekova aboro. (Yugo. 12:9) Si du duhe ti ni ni nyanyakipai ka raba tirani ka bi gu kparakparapai du dagba rengo na ziree na ki nye ni ruru rani fu rengo. (Rom. 6:17; 1 Pet. 1:22) Gipai re na nyanyakipaha tipa ka bata ti regbo bakere gberãngbi!

4. Ginipai ani nika sakapai tipaha rogo gi kekeapai re?

⁴ Rogo gi kekeapai re, ani nika bi asino ue nga gu ani aida na ni si undo rani ani ini rengo nga gu naye rogo Baibiri yo na ki idi agu arugapai naye be ga Yekova riigbu. Tifuoho, ani nika sakapai tipa apai biata nga gu si aida ani mangihe tipa kaa ndu kumbatayo kindi kaa kakuti rengo nyanyaki.

AGU ASINO SI AIDA ANI DU NA NI TIPA KA INO RENGO

5. Waigu rengbe gunde ti Yekova ka undo rani ani ini rengo?

⁵ Oni gunde ti Yekova. Rogo gupai yo nga ka gunde ti Yekova nga ka kpinyemu ko ni bakerehe gbe, si ki sa gupai nga ka ani mangingo gupai nika ba gberãrago tiko ya. Ani nga regerege ka wirika gu kparakpara pai du dagba rurupai na irairaha, rengo na ziree tipa gupai nga Yekova rengbe ka ida na ani. (Snz. 2:3-6; Eb. 5:14) Si aidanga ani mbu gunde be aboro si du ni nyanyakihe ki susi gaani gunde ti Yekova te, bambiko gupai nangba ti aboro dedede si naba gberãrago ti Yekova.

6. Waigu gunde be aboro asa agu abamoirago naadu bawe nga ga aYisaraere yo ka i penga rengo ya?

⁶ Ka si du nga ani tona kaa gunde be aboro kisusi Mbori, si ima rengbe ka sarani ani idi kuti gupai nga gu ayengo be Yekova ya. Oni bingo gu kpiapai nangia ga agu bamoirago naadu 12 naandu ka bi gu ringara Yekova akidopaha fu awiri aYisaraere. Tipa agu abamoirago naadu bawe, gayo gunde be aKanano adu ni nyanyakihe susi gayo nyemuse koyo du Yekova ni. I aya fu awirinayo aYisaraere we: “Ani arengba nga ka ndu sa agu aboro te re; bambiko i nyaki ki susi rani.” (Geda 13:27-31) Ringbisihe kuti gu bipai nga ga wiri aboro, aKanano aima nyaka kisusi aYisaraere​—na gipai re angia kina rengo. Ono ai gu boro nape gupai nga ka aYisaraere dinga be avurayo te, aaberãnga pa Yekova te. Si aida agu abamoi naadu bawe re moiberã yo kuti gupai nga gu Yekova aaida aYisaraere mangihe. Si aaida a i berẽkurii gupai Yekova amangihe fuyo barambeda kusayo. Sidu, ka i aima rengba ka ino gupai nga gu ome du ti aKanano ni wiri toonihe ringbisihe kuti gu ome du Yekova nga Mbori tandu apai dũ na ni. Yosua na Kareba aadunga wa agi abamoirago naadunga na idapase tiyo re ya te, i aida ka manga gupai nga gu Yekova aidaha. I ape gupai fu aboro nga: “Ka ani ngba ti Yekova, ko ayé na ani ku rogo gu ringara re, ki fu he fu rani.”​—Geda 14:6-9.

7. Waigu rengbe ani ka nyakasa gaani gunde ti Yekova? (Oni bi sura a.)

⁷ Tipa ka nyakasa gaani gunde ti Yekova, si naida ani moiberãrani tipa gupai rengbe ka sa ngbarago ti ko rogo agu adiaberã dunduko ani amangaha. (Tam. 16:8) Ho mo nikaa geda agu apangbanga ni nga ga Baibiri, mo sananga tiro nga, ‘Ka si adu nga mi du naadu rogo gu bangiriba re, gini diaberã ka mi amangihe?’ Ni kpiapai, mo bingo tiro nga mo nadegaturo kaa gia gupai agu abamoirago naadu bawe apehe fu aYisaraere nga i arengbanga ka diabe aKanano te. Ya mo ka mo aidi kuti gu pangbanga re na ki tona ka gunde be aboro, watadu ka gamo nyemuse tipa Yekova asa ro mo du na nyemu ka manga gupai nika ngba tiko? Gu riko aYisaraere naadu ti gu regbo re dunduko aidanga kuti gupai nga aYosua na Kareba aape rengo te. Ni sangbana gipai re, i azanga gu mamu nga ga rimo kurogo Ringara Mokido.​—Geda 14:10, 22, 23.

8. Gini sino si aida ani amangipai nyanyaki tipa ka sonosaha, na tipagine?

⁸ Umbasitise. Yekova nayugo bara rengo fu agu aboro du na umbasitise. (Mt. 11:25) Mbiko umbasitise, ani naida na gu undo nga ga wirika rengo. (Amo. 8:30, 31) Ono wa vura duhe wo, si naida ani du na rubangirise tipa zanga du na rũko. Ho du ani ni na rũko, ani ima rengba ka tona kaa bi gupai nga gaani abipai du ni ruruhe kina wai du agu abangua rengo nga ga Baibiri gbiati agu arugapai naye be ga Yekova riigbu.

9. Waigu rengbe ani ka bandapa gaani du na umbasitise?

⁹ Tipa ka nye na umbasitise, si naida ani tingidipa wai du ani tooni ka i ringbisi rani kuti Yekova. (Tam. 8:3, 4) Ani ima rengba a ka sana Yekova ko undo rani tipa ani du na umbasitise na ni agu aboro naida ka wirikapai. Yekova nika undo rani ani bi gako aberãpai na nyanyakipaha nga gu ani awirikaha vurube Fugoko na vurube gako riigbu susi gaani aberãpai. Ti regbo gamo geda Baibiri, mo ngere tipa agu agopai nayugo gupai nga Yekova nakpinyemu umbasitise na kini sogo rũko, zinga na enda. Na si naida mo asadi nyanyaki a ka du na umbasitise ho mo agbia gu sunge ni nga gu nasa ro mo du na pagbia bero watadu gu nika sa gupai nga dungu aboro inipai tipa ro.

WAIGU RENGBE ANI KA KAKUTI RENGO NYANYAKI

10. Ada du Yekova amangisunge na yo tipa i naafu rugapai fu gako aboro?

¹⁰ Oni naandu kumbatayo kindi kaa du na kido kuti agu arugapai naye be ga Yekova riigbu. Rogo gu ringara Yisaraere naadu mbata, Yekova amangisunge na Moize na tingbafuo gure, ko ki mangisunge na Yosua tipa kaa fu gako arugapai fu Gako aboro. (Yos. 1:16, 17) Apai aandu wenengai fu aYisaraere ho i aabi agi akumba re ni ni agu aboro naarukuba Yekova Mbori. Dungu kama agarã kusa ho i asigira gu dungurati ni nga ga aKristano, agu amokedi naadu 12 anaafu arugapai. (Amo. 8:14, 15) Na kusa gu badona re ada ni bakerehe ki kodi agu abaakumba naadu Yerusarema yo. Ni peka yo fuo agu arugapai naye be gi ruru akumba re, “akanisa ki nyaki rogo idapase yo, ki nge ange na uru.” (Amo. 16:4, 5) Rogo gi gaani regbo re, Yekova nafu maku furani a ho ani apekafuo agu arugapai ni naye be gako riigbu. Ono waigu rengbe Yekova kadu ka si du nga ani ká agu aboro ko nasia yo i naangbembatayo rogo apai yo? Tipa ka karagapai kuti gu sanahe re, ani sakingo pai tipa gupai namangi ho aYisaraere aandu ni kurogo Ringara Mokido.

11. Ginipai namangi Yisaraere yo tipa agu aboro nasamungu kuti gu pagbia nangia ga Moize? (Oni bi sura a.)

¹¹ Ti gu regbo aYisaraere aandu nunguro kurogo Ringara Mokido, agu akumba naadu na asunge beyo aidanga kuti gu ngbembatayo na gu sunge Yekova afuhe fu Moize te. I aya: “ Rimbasa aboro [angianga kina Moize ya] ni kparakpara yo ziazia dunduko, i ni ba sa sa dunduko, Yekova du dagba yo.” (Geda 16:1-3) Wa vura duhe nga, kina rengo du nangiaha nga bangiri Mbori “rimbasa aboro” dunduko adu ziazia, Yekova asia Moize tipa ko naangbembatayo fu Gako aboro. (Geda 16:28) Ho agu abasamungu re abisira Moize ni, gure adu nzunzu nga i aabisira kina boro Yekova. I aamaanga berãyo tipa gupai Yekova aida na ni te; i amoi berãyo tipa gupai i aida na ni​—bakere pagbia na worimo. Mbori aimi agu aboro naangbembatayo rogo gu samungu re, gbiati gu dungu kutu aboro nangbe na yo. (Geda 16:30-35, 41, 49) Areme, ani ima rengba kadu na gu kido nga Yekova aidanga na agu aboro du na zanga irisa tipa agu aboro nangbembatayo rogo gako riigbu te.

12. Tipagine rengbe ani ka banda gaani kido ti ni kuti ga Yekova riigbu?

¹² Ani ima rengba ka banda gaani kido kuti ga Yekova riigbu. Ho daha ni ziazia nga si naida i mangi ariapai rogo gaani giarogopai yo nga ga gu rengo nga ga Baibiri watadu pai tipa wai ani airiso Yekova, agu aboro nangbembatayo na ndundu tipa ka manga aˈariapai te. (Snz. 4:18) I namanga gipai re wo bambiko gupai nyakipaha gbe fuyo nga, i naida ka sa ngbarago ti Yekova. I namanga ome nyanyaki a tipa ka maa mburu gayo adiaberã rii Fugo Mbori, nga gupai ga Yekova aboro naima rengba ka mangapai kutini.

13. Ginihe nga “gu wene apai,” na ginipai si aida ani mangihe na ni?

¹³ ‘Mo ká kuti kpia wene apai.’ (2 Tim. 1:13) “Gu wene apai” fura yo ane tipaha re nabi agu ayugopai nga ga aKristano du mburuhe rii Baibiri. (Yo. 17:17) Ngbatunga agu ayugopai re nga mburu agu apai dunduko ani naidi kutini. Ga Yekova riigbu ima yugo gupai furani nga si naida gaani aida du rii mburu agi apai re. A wa ani kaa mangaha wo, kina wo a ani nikaa gbia amaku.

14. Waigu gu kura aKristano azanga kakuti ‘kpia wene apai’?

¹⁴ Ginipai rengbe ka manga ka si du nga ani amaanga mburu gaani aida berewe rii ‘wene apai’ te? Oni bingo gi kpiapai re. Rogo bambata sa kama agarã, gu kura aKristano aagbaraga ziree apangbanga nga ga Yekova uru ima da. Si rengbe kadu nga waraga adu kinaho​—nga gu si adu wa ka i ya gu mokedi nangia Pauro nakehe​—nga gu nape ngbatunga pai wa gure. Kura aKristano Tesaronike yo adianga regbo tipa ka wisigo gi waraga re wenengai te, i aidi kuti gu ziree re na i ki tona pehe a fu kura aboro. Ka i atingidi agu apai Pauro ayuguhe fuyo ho ko adu ni na yo, ka i adunga nga ni nanginangi yo te. (2 Tesa. 2:1-5) Pauro afu zahe fu awirinako nga ka idinga kuti agu apai dunduko i agiaha ya. Na tipa ka undo yo kumbatayo, Pauro adigisi gako ue waraga fu agu awirina naadu Tesaronike yo re na agi afugo re: “Gimi paa kuti boro du re, nga Pauro, ni kina bere, si nga ngbaanga ti keke awaraga dunduko; wo mi nake he.”​—2 Tesa. 3:17.

15. Waigu rengbe ani ka banda tirani be gu ziree nangera wa ka i ya rengo du ngaha? Oni funga kpiapai. (Oni bi sura a.)

¹⁵ Ginipai rengbe ani ka wirikaha ti afugo Pauro fu aTesaroniko? Ho ani agia gupai ni nga gu adu na ngbanya kuti agu apai ani nawirikihe rogo Baibiri yo ya watadu gu pangbanga du ni iiriwoho, si naida ani mangipai na tatamana. Rogo gu Soviet Union naadu mbata, avurarani afu waraga fu awirina nga gu i aya si aye rogo rii-basunge nga ga zegino. Gu waraga re aangarasa awirina i kusi kura riigbu nga gu naadu kia. Gu waraga re aangera wa ka i ya kina boro rengo du si apehe nzunzu. Ono i ananganga agu awirina naadu ni ruru yo te. I abi gupai nga gupai naadu rogo gu waraga re yo adunga na ngbanya na gupai i awirikihe te. Areme, avura rengo namangasunge ti kura aregbo na ahe wa Internet na aũfugo dagbase ka ye na vunduvundu apai ku dagba rani na ka kparaka rani. Kuba gupai nga ka ‘wó ti gaani berã,’ ani nabanda tirani ni wisigi ani pai sirisiri singia gupai ani agiaha na kini gedihe na ngbanya dagbaha na agu arengo ani awirikihe.​—2 Tesa. 2:2; 1 Yo. 4:1.

16. Ringbisihe kuti ARomo 16:17, 18, ginipai si aida ani mangihe ka si du nga boro kpara ti ni kusayo ti rengo?

¹⁶ Oni nye ni kodikodi roni kuti agu aboro du ni ruruyo koyo du Yekova ni. Mbori naida ani du ni kodikodi rani na awirinarani wa ani airiso ko. Ani nika nye ni kodikodi rani ka si du nga ani kakuti rengo. Gu boro nagbaraga gu pangbanga nga gu adunga nga rengo ya, ni naye na kparakaro kurogo dungurati, na Mbori na zarani nga ‘ani kpára tirani tiyo.’ Ka si adunga wo ya, ani ima rengba ka tona ka ida kuti agu apai angianga rengo ya na ani ki tona ka zanga du niruru rani fu Yekova.​—Oni gedi ARomo 16:17, 18.

17. Gini aundo ani gbiaha ti ino ani rengo na kini kakutini?

¹⁷ Ho ani aino rengo ni na ki kakuti ni, ani nika nye mbembedi na Yekova na ki banda gaani idapase ni nyanyakihe. (Ef. 4:15, 16) Ani nika du ni bandabanda rani be agu ayugopai nga ga Satana na gako takapande pa apai, na ani nika du mbembedi a na Yekova na ko nika banda rani ti regbo bakere gberãngbi. Oni naakakuti gupai nga rengo kindi, na “Mbori zereda ki du na oni.”​—Frp. 4:8, 9.