Oni Naabanda Tironi be Asada

1-2. (a) Gini zahe Yesu afuhe fu gako abawiriki? (b) Tipagine abawiriki ambu Yesu ti ni? (Oni bi asura a.)

“MBISIMORONI nakpi nyemu he ni rengo, bororoni anyaka nga ya.”a (Mt. 26:41b) Yesu ayugu gupai na agu afugo re nga, ko aima rugatiko na gupai nga ani nga kpakpa aboro na ani nikaa manga aingahe amanga. Ono ko afu agu zahe a nga: Ani du na rubangirise nibipa bakere kido kuti tirani. Bete asaa kusayo mbata fu Yesu pe agi afugo re, gako abawiriki akido ko nga i ambunga ko te. (Mt. 26:35) I aaida ka manga gupai naadu ni ruruhe. Ono i aaberãnga gupai nga ti kpakarakpakara regbo, si taata tipa i rungbura ki mangi gupai du ni irairaha kuba gupai du ni ruruhe te. Si du nga ndu gupai Yesu afu gu zahe ti ni nga: “Oni ngére ki nikpari, oni ka rima ku rogo asada.”​—Mt. 26:41a.

² Si tie ni pa gberãrago nga, abawiriki aanyenga kaa ngera angera kindi te. Ho i azi Yesu ni, ya mo i anye na ko watadu i adu na gunde na ki oro kusayo patiko? Mbiko pa zanga yo kaa ngera angera kindi, i amangi kina boro gupai i aya ka i mangingo ho te nga​—ka mbu Yesu.​—Mt. 26:56.

3. (a) Tipa ka nye ni rururani fu Yekova, tipagine si aida ani zanga du na bakere kido ti ni kuti tirani? (b) Gini apai ani nika sakapai tipaha rogo gi kekeapai re?

³ Si aidanga ani niberẽ gupai nga, ani nika du ti aregbo dunduko nyanyaki ka manga gupai du ni ruruhe te. Rengo ngaha nga, ani ima diaberã ka zanga mbu ai pai si di rani kusayo ti Yekova. Wa vura duhe wo, ani a nga kpakpa aboro na ani ima rengba kadu ni asadiasadi rani ka manga gupai du ni irairaha. (Rom. 5:12; 7:21-23) Ani ima rengba kadu ni asadiasadi rani ka manga gupai du ni irairaha zanga ani inihe aino. Tipa ka nye ni rururani fu Yekova na Wiriko, si naida ani pekefuo gu ga Yesu zahe du tipa kaa ngera angera kindi ka zanga ti kurogo ingapai. Gi kekeapai re ima rengba ka undo rani ani amangi gupai re. Ni bambataha, ani nika sakapai tipa gini abangiriba si aida ani naabanda tirani abanda kindi rogoho. Tingbafuo gure, ani nika sakapai tipa wai rengbe ani ka banda tirani be aasada. Niyangaraha, ani nika bi gupai rengbe ani ka mangaha tipa ka nye kaa ngera angera kindi.

ONI NAANGERA ANGERA KINDI​—ROGO GINI ABANGIRIBA?

4-5. Tipagine duhe ni nyanyakipa pai ti ni ani bandatirani zavura ti manga agu aingapai du ni rukutuhe?

⁴ Kura aingapai kinaho du ni rukutuhe adunga ni kerehe ya, ono si ima rengba ka rungburasi gaani pagume na Yekova. Berewe a, si ima rengba ka sarani ani mangi kere aingapai.

⁵ Ani dunduko nidu adu ni asadiasadi rani ka manga ingapai. Ono ani dunduko du na gaani arungbura ni bakiakia, sidu, kuraapai kinaho rengbe ka sarani ani mangi gupai du ni irairaha. Ni kpiapai, kura boro ima rengba kaa sovura kuti nyemu manga wasiwasi kodaba. Gu kura boro ima rengba kaa sota ka sovura kuti manga gupai du ni bibiriko ho, wagu nga zapada barangbase watadu bi kpia kundiri aboro. Na kura boro ima rengba kaa sota ka mbu zizinga niipo, du na rukö, watadu ndundu ka manga gupai du ni ruruhe mbiko ni nagunde be gupai aboro aberãha tipa ni. Ani ima rengba ka bi gu ndupai Yakoba ape gupai ti ni nga, ‘boro du ni asadiasadi ni, ho gu nyemuhe ata gbe ni ni nga ga borose ku sa yo, ki ninangi ni.’​—Yak. 1:14.

6. Ginipai si aida ani pe rengo tipaha?

⁶ Ya mo mo ini agu abangiriba duhe foro taata tipa mo du ni asadiasadi ro rogoho? Si ni kerepai ka zanga mangapai kuti gaani arungbura watadu kaa berã gupai nga ani nyanyaki ka ani mangingo ingapai te. (1 Yo. 1:8) Oni tingidi gupai nga Pauro aya, zavura agu aboro “nga ga Toro aboro” watadu agu aboro du na gu inohe nga ga toro ima rengba kadu ni asadiasadi yo ka si du nga i abanda nga tiyo te. (Gara. 6:1) Si naida ani pe kina rengo fu tirani na ki ini agu abangiriaba ani anyakanga rogoho ya.​—2 Kor. 13:5.

7. Ginipai si aida ani gbe berãrani kuti ni? Oni yugungo ho na kpiapai.

⁷ Bara sa kindi ani aino agu apai du ani ni asadiasadi rani ka mangaha gbe, ginipai si aida ani mangihe? Ani mangi ome nyanyaki tipa kadu na rengba ka kà agu aasada re! Tipa ka yugoho na kpiapai, ti agu aregbo i aake Baibiri ti ni, gu papara ngapa bakporo si aanidu taata tipa gbegberẽpai rimi ku bakporo yo rogoho angia angbadimo ho. Si du nga ndu gupai dungu ababandarago aanidu ti ni ngbadimo tipa ka bandaha. Wakina gure a, si naida ani gbe berãrani nyanyaki kuti gaani arungbura tipa wa ka ani du na rengba ka kà asada.​—1 Kor. 9:27.

WAI KA BANDATIRANI TI MANGA GUPAI DU NI IRAIRAHA

8-9. Waigu gu paranga i nasakipai tipa ko rogo Asanza kapita 7 arengbe ka ne manga kere ingapai? (Asanza 7:8, 9, 13, 14, 21)

⁸ Waigu rengbe ani ka bandatirani? Oni bingo gupai rengba ani ka wirikaha ti gu paranga kumba i nafura tipa ko rogo Asanza kapita 7. Ko amangi wasiwasi kodaba na debäri. Veresi 22 nape gupai furani nga, gu paranga re andu fuo ri “ni ba sa.” Ono agu averesi ye mbata fuhe nayugo gupai nga, ko aima manga dungu adiandue yeeye nga gu nasako ko mangi ingapai.

⁹ Ginipai gu paranga re amangihe mbata fu ko ti kurogo ingapai? Bambatapai nga, tingba nyemu, ko asusi “ti gene mbembedi pati tukpu [ga debäri] bambu.” Tingbafuo gure, ko ki ndu ngba gu gene nandu ku kpuri yo. (Oni gedi Asanza 7:8, 9.) Fuo gure, ho ko abi gu dee re ni, ko aakaraganga tiko kusayo te. Kuba gure, ko aima mbu tiko tipa ri nyoro ngbako na ko ki degetuko kuti pa agu amotumo zereda ri afuhe, isoke, mbiko gupai nga ri aaida ko berẽhe nga ri aangianga gbegberẽ boro te. (Oni gedi Asanza 7:13, 14, 21.) Ka si adu nga ko aamanganga agi amumungo adiandue re te, ka ko aima ne gu asada nasako ko mangi gupai du ni irairaha na ki mangi ingapai.

10. Waigu rengbe boro areme ka manga kina gu bangisa ingahe gu paranga i nafura tipa ko rogo Asanza amangihe?

¹⁰ Gu pangbanga du tipa Soromo nayugo gupai rengbe ka manga ai gu boro nairiso Yekova. Ni ima rengba ka manga ingapai na kini bihe kusa nga agu apai re dunduko amangi ni “ni ba sa” watadu ni tunguotunguoho. Watadu ni ima rengba ka ya, “Mi ainongo wai si amangi te.” Na wa vura duhe wo, ka ni berẽ nzunzu kurii gupai namangi, ni ima rengba ka bi gupai nga ni aima manga mumungo adiaberã mbata fu ni mangi kere ingapai. Isoke, ni aima sia agu abakure akpingo nyemu Yekova ya, watadu si rengbe kadu nga bete agu aũngbarago ni asia, agu abangiriba nga ga Internet ni andu ku rogoho, watadu agu aba ni adu rogoho aadunga ni wenehe fu Kristano te. Isoke, ni aima mbu manga kparakpee, geda Baibiri, nduge tipa adunguratise, watadu tungusapai. Wakina gu paranga i nafura tipa ko rogo Asanza, ko amangi ingapai mbiko ko aima manga badungu gbegberẽ adiaberã mbata.

11. Tipa ka zanga ti kurogo ingapai, ginipai si aida ani nehe?

¹¹ Ginipai ani awirikaha ti gipai re? Anga gu yangarapai si aidaha nga ani ne ingapai nitihe te, ono si naida aida ani ne agu adiandue rengbe ka ndu na ani sa ingapai. Gere nga kina boro gupai Soromo asakipai tipaha nibasa tingbafuo ko sakipai tipa gupai namangi gu paranga kumba re na gu debäri re. Ko afu gu rugute nga: ‘Ka oni ndú nga ngbuongbuo ngba gari agene ya.’ (Snz. 7:25) Na zavura ko ape gupai a nga: ‘Oni gbísi gaoni apai tuturũ ti ri ku sa yo, ka oni nimbédi nga ku pa ngbadimo gari bambu ya.’ (Snz. 5:3, 8) Tipa ka bandatirani ti manga ingapai, si naida ani ne manga agu apai watadu ka ne agu abangiriba rengbe ka ndu na ani ani mangi gupai du ni irairaha.b Gipai re nayugo gupai nga, zavura gupai adunga ni gbegberẽhe fu aKristano ya, ani ima rengba ka mbu mangaha ka si du nga ani nabihe nga si ima rengba ka asada rani na ki sarani ani mangi gupai du ni irairaha.​—Mt. 5:29, 30.

12. Gini diaberã Eyobo amangihe, na waigu si aundo ko tipa ko banda tiko ti ti kurogo asada? (Eyobo 31:1)

¹² Tipa ka ne agu apai rengbe ka ndu na ani sa ingapai, si naida ani diberã nyanyaki kaa ngera angera kindi. Gure du nga gupai Eyobo amangihe. Ko “azunga he na [bangiriko]” tipa ka zanga ngana kura adee na nyemuyo. (Oni gedi Eyobo 31:1.) Pa mangako gupai ko adiberã tipaha re aundo ko tipa ka ko du nga ni asadiasadi ko ka manga bäri ya. Ani ima rengba a ka ne ai gupai rengbe ka ndu na ani sa asada.

13. Tipagine si aida ani banda gaani aberã ti ni? (Oni bi asura a.)

¹³ Si naida ani banda gaani aberã a. (Gate 20:17) Kura aboro naberã gupai nga, gbegberẽpai nga ni tipa i naaberãpa tiyo nga i namanga gupai du ni irairaha te wa duhe nga i amanganga ha amanga nzunzu te. Ono ngbatunga agu aberã re ni irairaha. Gu boro nanye kaa berãkurii gupai du ni gbegberẽhe ima rengba kadu na bakere nyemu ka manga gupai ni aberãha re. Ka ni mangi gipai re, gure nga ni nasaha taata tipa ka manga gupai du ni irairaha. Rengo ngaha nga, gbegberẽ aberã nikaa ye aye ti kura aregbo ku berãraniyo. Ho gupai re nika manga ni, gu nyanyakipa pai si nika ida ani mangihe nga ka kà agu aberã re nibasa na ki moi wenehe kubaha. Ho ani amangaha ni wo, ani nabanda tirani ti manga kere ingapai, bambiko ani ambunga gene fu gbegberẽ berã tipa si du na maapai kurirani te.​—Frp. 4:8; Koro. 3:2; Yak. 1:13-15.

14. Gini kurapai rengbe ka undo rani ani bandatirani ti asada?

¹⁴ Gini kurapai rengbe ani ka mangaha tipa ka bandatirani ti aasada? Si naida ani idi kuti gupai nga si ti aregbo dunduko ni wenepai furani ka giasangba ga Yekova andiko. Ti kura aregbo, si ima rengba kadu ni kpakarakpakaraha furani tipa ka berã na kini bipai ngba gu gene Yekova aidaha berani. Ono ka ani mangi ome nyanyaki tipa ka mangaha wo, nirengo, ani nika duadu na ndikidi ngbarago.

15. Waigu pa sonosa ani ruru nyemuapai narengbe ka undo rani tipa ani bandatirani ti asada?

¹⁵ Si naida ani sonosi ruru nyemuapai. Ka ani wiriki ka ‘sóga gbigbitapai, ki nikpi nyemu wenepai,’ ani nika nyakasa gaani diaberã tipa ka manga gupai du ni ruruhe na ki ne agu abangiriba rengbe ka ndu na ani sa ingapai. (Amosa 5:15) Ho du ani ni na ruru nyemuapai, si nika du a taata furani tipa ani kà aasada ho ani nika bi tirani ni rogo agu abangiriba ani aambakada nga tirani ambakada tipaha ya watadu ani arengbanga ka nehe ha ya.

16. Waigu pa manga ani agu asunge nga ga toro narengbe ka undo rani ani naangera angera kindi? (Oni bi asura a.)

¹⁶ Waigu rengbe ani ka sonosa ruru nyemuapai? Ani rengbe ka mangaha wo ni nye ani kaa manga agu apai rengbe ka nyakasa gaani nyemuse tipa Yekova. Si taata furani ani mangi gupai du ni irairaha ho du ani ni ba agu adunguratise nga ga aKristano watadu gene tungusapai yo te. Kuba gure, ani nanyakasa gaani nyemu ka sa ngbarago ti Yekova. (Mt. 28:19, 20; Eb. 10:24, 25) Ho ani ageda Fugo Mbori ni na kini berẽkuriihe, ani nanyakasa gaani nyemuse tipa manga gupai du ni wenehe na ki sogo gupai du ni gbegberẽhe. (Yos. 1:8; Tam. 1:2, 3; 119:97, 101) Oni tingidi gupai nga, Yesu ape gupai fu gako abawiriki nga: “Oni ngére ki nikpari, oni ka rima ku rogo asada.” (Mt. 26:41) Ho ani akpara ni fu gu Barani du ngbangbaturũ yo, ani nafu momu fuko tipa ko undo rani na ani ki nyakasi gaani diaberã ka sa ngbarago ti ko.​—Yak. 4:8.

ONI NAANGERA ANGERA KINDI

17. Gini rungbura Petero aadianga behe ya?

¹⁷ Si nawiraha nga, ani ima rengbe ka diabe bete kura gaani arungbura dunduko. Ono ani ima rengba ka nye kaa sovura kindi kuti kura gaani arungbura tipa gbanga regbo. Oni bingo gupai nadu tipa gu mokedi nangia Petero. Ko aoro rimo Yesu bara biata bambiko ko aagunde agunde be aboro. (Mt. 26:69-75) Kusa, si aangera wa ka i ya Petero aima diabe gako gunde ho ko atungusipai ni na wingbaduse barabangiri ga aYudo aboro rondo. (Amo. 5:27-29) Ono tifuo bete agarã kusa, ko ambu rihe na agu aKristano naangianga aYudo ya bambiko ko aagunde agunde be gupai ‘agu yo nangia aYudo’ nika berãha tipa ko. (Gara. 2:11, 12) Petero aima tona gunde berewe. Isoke, ko aadianga behe dunduko te.

18. Ginipai rengbe ka manga nibipa kura iraira nyemuapai?

¹⁸ Wakina Petero, ani ima rengba ka sovura kuti gu rungbura nga gu ani aberẽhe nga ani aima diabehe. Ni kpiapai, kura wirina sa ape gupai nga: “Mi aima mbu bi agu ahe nazingisa nyemu kodaba tipa agarã bawe na mi ki ima du na gu kido nga mi ima diabe he. Ono rogo kura abangiriba, mi adu ni asadiasadi re tipa ka bihe berewe.” Si nipa ngbarago tie nga, gi wirinarani re anye kaa sovura kindi kuti gu gako rungbura re. Ko aini gupai nga, si naida ko namangapai na aˈuru dunduko tipa ka sovura kuti gako rungbura na kini bi gupai nga si naida ko namanga gipai re rogo gako raka yo naabaha dũ rogo gi gbegberẽ zegino re. Na gu undo nga ga diako gbiati gako abaakumba rogo dungurati, ko adi nyanyaki diandue tipa ka kà bi agu ahe nazingisa nyemu kodaba.

19. Ginipai rengbe ani ka mangaha ka si du nga rungbura kinaho ani ata dianga behe dunduko ya?

¹⁹ Ginipai rengbe ani ka mangaha tipa gu rungbura nga gu ani ata dianga behe ya tipa ka si sanga rani ani mangi gupai du ni irairaha ya? Si naida ani mangi gupai Yesu apehe furani nga: “Oni ngére,” du rogo yo nga ka bandatirani be aasada. Zavura ti agu aregbo mo abihe nga mo nyanyaki, mo naandu kindi kumbatayo kaa bandatiro ti agu abangiriba rengbe ka sa ro mo ti kurogo asada. (1 Kor. 10:12) Mo nye kaa manga agu apai nga gu niima undo ro mo sovura kuti gamo rungbura. Asanza 28:14 naya: ‘Boro maku nga gu boro nagunde ti Yekova na uru.’​—2 Pet. 3:14.

GU UNDO ANI AGBIAHA HO ANI ANYE NI KAA NGERA ANGERA KINDI

20-21. (a) Gini amosoro ani nika gbia ngbarago ti ni wa ani nikaa bandatirani be asada? (b) Ka ani mangi gaani paparaha, ginipai Yekova nika mangaha furani? (2 AKorindo 4:7)

²⁰ Ani ima rengba kadu na gu kido nga, pa banda ani tirani be aasada ti aregbo dunduko ni wenehe furani. Ho ani amanga ingapai ni, ani ima rengba ka “ngi tipa rago ngbutuko” ono ho ani araka ni ngba gu gene Yekova aidaha, ani nika du na bakere ngbarago. (Eb. 11:25; Tam. 19:8) Si wo bambiko gupai nga i akusi rani ani raki ringbisihe kuti gako agene. (Bam. P. 1:27) Ho ani araka ni ringbisihe kuti gupai nasa ngbarago ti Yekova, ani nadu na wene sangbakpotoseyo na ani kidu na rengba ka raka nyeanye kindi.​—1 Tim. 6:12; 2 Tim. 1:3; Yuda 20, 21.

²¹ Ni rengo, “bororoni anyaka nga ya.” Ono gere ayugongo gupai nga gene berani tipa ani mangipai kuti gaani arungbura te te. Yekova nga regerege ka fu gu ome furani ani aida na ni. (Oni gedi 2 AKorindo 4:7.) Ono tie, oni tingidi gupai nga, Mbori nafu gu ome furani susi. Ono si naida ani mangipai na omerani dunduko tipa ka sovura kuti asada. Ka ani mangi gaani paparaha, ani ima rengba kadu na gu kido nga Yekova nika karagapai akaraga kuti gaani akparakpee tipa bakere ome ho ani nikaa ida ni na ni. (1 Kor. 10:13) Ii, na ga Yekova undo, ani ima rengba ka bandatirani be asada.