ARTÍCULO NI GUISUIDYNO 23
CANCIÓN 2 Tu nombre es Jehová
Balaati non guisac laa Jehová par lóono
«Lóoto nacto testigos xtuni—ná Jehová—» (IS. 43:10).
TEMA
¿Ximod labúu gapno xiroʼgolu respet laa Jehová né guislooyno que ni goniʼ Buñdzab de láabu diti nigolúni?
1, 2. ¿Ximod nanno que par Jesús diti noʼ stoib cós ni más gosac que laa Jehová?
PAR Jesús más gosac laa Jehová que stipnés cós. Láabu rony defenderbu laa Bixiosbu. Mod bisuidyno ló artículo ni godudy, gosaguelbu goitybu por laa Jehová, né modcu bislooybu que ni goniʼ Buñdzab de Bixiosbu diti nigolúni (Mar. 14:36; Heb. 10:7-9). Né después ni gony mandarybu ló Tipmil Íz, sasaguelbu guidxiguetbu galmandarycu Bixiosbu portín nainy láabu que buñ gonyxiroʼ Jehová (1 Cor. 15:26-28). Guirá ni ma buny Jesús né ni gonyrabu por laa Jehová raslooyni balaati nadxiʼbu Bixiosbu.
2 Jesús bieedbu ló Gudxlio ló laa Bixiosbu (Juan 5:43; 12:13). Bisuidybu laa Bixiosbu xpiimbu (Juan 17:6, 26). Bisuidybu buñ né bunybu galrradziguiaʼ ló laa Jehová (Juan 10:25). Ló toib oración, gonabbu lóo Jehová por xpiimbu: «Gon layibu por laalo» (Juan 17:11). Por ngú, pal laa Jehová nigolú gosacni par Jesús, ¿Ximod nga toib buñ ni diti rimbu né diti raquiin laa Jehová labúu guiniʼ que nacbu cristiano?
3. ¿Xí guisuidyno ló artículo reʼ?
3 Lóono ni nacno cristianos ni nigolú, ronyno rutirigaʼlni lóono par guisuʼno Jesús, né por ngú laa Bixiosbu nigolú rasacni par lóono (1 Ped. 2:21). Ló artículo reʼ, guisuidyno que ni raniʼ «diitz sacró xtuny Gobierno» rinéyibu laa Jehová (Mat. 24:14). Láaca sabiʼno balaati non guisac laa Jehová par tigaagano.
«TOIB GUDX NI RINÉ LAABU»
4. a) ¿Xí láani góoch Jesús xpiin antes de nabiguetbu guibá? b) ¿Xí galrranabdiitz guicapyno?
4 Dzú ni mápa mer guibiguet Jesús guibá, gochbu xpiimbu: «Sacaʼto galnadip órni espíritu santo guidxin loguiaʼto. Né sacto testigos xtuni lainy gudx Jerusalén, né ló guidopynac Judea né Samaria, né dada lagary ni noʼ más sit ló gudxlio» (Hech. 1:8). Por ngú, diitz sacró reʼ diti nosi naniʼyibu láani lainy gudx Israel, xalagary ngú buñ de stipnés lagary labúu nadxinyibu ñacyibu xpiin Jesús (Mat. 28:19, 20). Per guicáno cuidad ni goniʼ Jesús: «Sacto testigos xtuni». ¿Raduʼdy ndeʼ diitz que guirá discípulos copyreʼ nosi ñacyibu testigos xtuny Jesús, o láaca naquiin nimbuyibu laa Jehová la? Capítulo 15 xtuny Hechos racnéni lóono guicapyno galrranabdiitz reʼ.
5. ¿Ximod bislooy xpiin Jesús né ancianos de gudx Jerusalén que nigolú rasac guimbu buñ laa Jehová? (Láaca bibiʼ dibuj).
5 Ló íz 49, apóstoles né ancianos de gudx Jerusalén bidopyibu par goniʼyibu xi non ñony guirá buñ ni diti nac judíos par nadxin ñacyibu cristianos. Órni ma guilox reunióncu, Santiago, buch Jesús, goniʼbu: «Symeón ma golexatzay ximod Dios por primer buelt cuacuentbu buñ ni diti nac judíos par cueʼbu lad buñreʼ toib gudx ni riné laabu». ¿Chú laa? Órcu bisetlabu ni goniʼ Amós, goniʼbu: «Modreʼ ni riaʼan lad buñgudxlio guiyopyibu Jehová, toibsi né buñ ni diti nac judíos, buñ ni siné laaya, ná Jehová» (Hech. 15:14-18). Por ngú, guirá xpiin Jesús ni nicopy diti nosi nimbuyibu de Jehová, xalagary ngú láaca ninéyibu laa Dios. Ló stoib diitz, buñ nimbu layibu né laa reʼ né naniʼyibu laa Dios.
Apóstoles né ancianos xtuny gudx Jerusalén bienyibu que guirá cristianos non nasuidyibu buñ laa Jehová né buñ nimbu layibu por ni sanéyibu laa Dios. (Bibiʼ párrafo 5).
6, 7. a) ¿Xigony bieed Jesús ló Gudxlio? b) ¿Xí razón ni más rasac noʼ ni bieed Jesús ló Gudxlio?
6 Guisetnaladxno que laa Jesús rarexani «Jehová ngú ni ralaa». Né scú gocni: Jehová biquiimbu Jesús par nalaabu guirá buñ ni nap fe. Jesús bieed ló Gudxlio par ñaitybu por buñgudxlio (Mat. 20:28). Por ni goitybu, guiránac buñ labúu guiaa xcalkiéyibu né labúu guibanyibu tipzó (Juan 3:16).
7 Per, ¿xigony biquiin buñgudxlio que ñoʼ toib ni nalaa layibu? Por ni góc lainy lagary móz ni góc laa Edén. Mod bisuidyno ló artículo ni godudy, bixiosno, Adán né Eva, diti bisobyibu Jehová né por ngú bisnityibu oportunida ni gopyibu de nabanyibu tipzó (Gén. 3:6, 24). Per ni guilaa buñgudxlio diti tampa gosacni, noʼ stoib cós ni más gosac: goyoʼ toib ni bigotz falz Jehová (Gén. 3:4, 5). Por ngú guiránac buñ non ñan que Jehová diti buny cós mal né que nadxiʼbu buñ. Né Jesús ngú ni labúu ñony láani portín gócbu representante xtuny Bixiosbu né bunybu guirá ni gonab Jehová láabu ñonybu.
¿Ximod nga toib buñ ni diti rimbu né diti raquiin laa Jehová labúu guiniʼ que nacbu cristiano?
8. ¿Xí láani non ñen né nacacuent guirá buñ ni nadxin ñac xpiin Jesús?
8 Guiránac buñ ni ñac xpiin Jesús, tanli judíos né ni diti nac judíos, non ñenyibu né non ñonyibu crer que ni nalaa layibu ngú Bixios Jesús, Jehová (Juan 17:3). Láaca, xomodca Jesús, ninéyibu laa Dios. Láaca non ñenyibu balaati rasac gac nayaa laa Jehová. Raquiin ñonyibu láani par labúu nalaayibu (Hech. 2:21, 22). Por ngú, guiránac xpiin Jesús non nasuidyibu de Jehová né de Jesús. Por ngú biloxbu oración xtunybu né diitz ni radzelno ló Juan 17 ni ná: «Naʼ ma bisudi laalo layibu, né sasuidyraya láani buñ, modreʼ galnadxiʼ ni naplo naʼ tzoʼ né layibu né naʼ tzoʼya toibsi né layibu» (Juan 17:26).
«LÓOTO NACTO TESTIGOS XTUNI»
9. ¿Ximod non guibiʼno laa Jehová lóono ni nacno cristianos ni nigolú?
9 Mod ma bisuidyno ni gony nayaano laa Jehová, ngú ni más guisac par cristianos ni nigolú (Mat. 6:9, 10). Par lóono, laa Jehová ngú ni más rasac que laa stipnés buñ. Né non guislooyno láani por mod ronyno. ¿Xí labúu gonyno par guislooyno que guirá ni goniʼ Buñdzab de láabu diti nigolúni?
10. Mod ná capítulos 42 a 44 de libro xtuny Isaías, ¿xí láani rony Testigos? (Isaías 43:9; 44:7-9; láaca bibiʼ retrat).
10 Ló capítulos 42 a 44 de libro xtuny Isaías, rasuidyno xi labúu gonyno par gac nayaa laa Jehová. Ló capítulos cu Jehová ranabbu buñ ni diti rony adorar láabu naslooybu que xtioxhyibu nigolú noʼyibu. Per diti noʼ ni toib ni labúu rony láani (bíil Isaías 43:9; 44:7-9).
Bixelcaʼbu lóono par guinino laabu. (Bibiʼ párrafos 10 né 11).
11. Mod ná Isaías 43:10-12, ¿xí raiby Jehová xpiin?
11 (Bíil Isaías 43:10-12). Jehová raibybu xpiimbu: «Lóoto nacto testigos xtuni [...], né naʼ naca Dios». Ranabbu xpiimbu guicapy galrranabdiitz reʼ: «¿Xí noʼ stoib Dios xomod naʼ la?» (Is. 44:8). Lóono napno privilegio de guicapyno galrranabdiitz reʼ. Né ni ranino né ni ronyno, raslooyno que Jehová nac Dios ni nigolú né laabu noʼ más guiá que laa stipnés dioxh. Né mod nabanyno raslooyno que nigolú nadxiʼno Jehová né dipa rasianno láabu ná Buñdzab nigolú ragoʼ galnagan ronoʼno. Modcu racnéno gac nayaa laa Jehová.
12. ¿Ximod birebuʼ ni ná profecía xtuny Isaías 40:3, 5?
12 Isaías láaca goniʼbu que ñoʼ toib ni naxal néz, «xinés Jehová» (Is. 40:3; nota). ¿Ximod birebuʼ profecía reʼ? Juan ni Ragonis bunytzaaybu néz par nadxin Jesús, ni bieed ló laa Jehová né goniʼbu ló laa Jehová (Mat. 3:3; Mar. 1:2-4; Luc. 3:3-6). Isaías láaca goniʼ: «Gloria xtuny Jehová sareʼni loguiaʼ» (Is. 40:5). ¿Ximod birebuʼ diitzreʼ? Dzú ni bieed Jesús ló Gudxlio, bislooytzaybu modpa nac Jehová né modreʼ gocni suusi Jehová ñeed ló Gudxlio (Juan 12:45).
13. ¿Ximod labúu guisuʼno Jesús?
13 Órni racnéno laa Jehová, rasuʼno Jesucristo. Xomodca láabu, nacno testigos xtuny Jehová Dios. Sanéno laa Jehová né raibyno guirá buñ guirá cós sacróyen ni ronybu. Per, par gacno toib galán testigo xtuny Jehová láaca non gaibyno buñ guirá ni ma buny Jesús par gony nayaabu laa Jehová (Hech. 1:8). Jesús nac testigo xtuny Jehová ni más rasac né lóono rasuʼno láabu (Apoc. 1:5). Per, ¿balaati non guisac laa Jehová par tigaagano?
¿BALAATI RASAC LAA JEHOVÁ PAR LÓONO?
14. Mod ná Salmo 105:3, ¿xí rasacno por laa Jehová?
14 Riatzno por laa Jehová (bíil Salmo 105:3). Jehová nigolú rioladxbu órni riatzno ranino laabu (Jer. 9:23, 24; 1 Cor. 1:31; 2 Cor. 10:17). Ni riatzno de Jehová raduʼdyni diitz que riatzno portín Jehová nac Dios xtunyno. Par lóono nacni toib privilegio rodann ni gonyxiroʼno laabu né gacnéno par guiaa laabu. Dipa non guitoyno guinino que nacno testigos xtuny Jehová, ló dxiin, ro rioʼno scuel, lagary ro rabésno o rotísi lagary ronoʼno. Buñdzab raniiny láabu diti guisuidyno buñ laa Jehová (Jer. 11:21; Apoc. 12:17). Né láabu né profetas falz xtunybu nainy layibu que buñ guialadx laa Jehová (Jer. 23:26, 27). Per lóono nigolú nadxiʼno laabu por ngú nainy lóono gonyxiroʼno láani «guirá dzú» (Sal. 5:11; 89:16).
15. ¿Xí raduʼdy diitz guiniʼ buñ laa Jehová?
15 Guirága ór ranino laa Jehová (Joel 2:32; Rom. 10:13, 14). Ni ranino laa Jehová diti nosi raguiñani guimbuno né guiquiinno laabu. Raguiñani guimbuno ximod nac Dios, gapno confianz lóbu né guiyopyno xcalrracnébu par conésbu lóono (Sal. 20:7; 99:6; 116:4; 145:18). Né láaca raguiñani gaibyno stipnés buñ laabu né cualidades xtunybu, né gony animarno layibu gac arrepentiryibu né guitzaʼyibu mod nacyibu par guicacuent Jehová layibu (Is. 12:4; Hech. 2:21, 38).
16. ¿Ximod labúu guislooyno que Buñdzab rascú?
16 Rasaguelno tudyno ló galrrioʼob por laa Jehová (Sant. 5:10, 11). Órni diti rasianno Jehová ná radudyno ló galrrioʼob, raslooyno que Buñdzab rascú. Ló xtzú Job, Buñdzab goniʼbu galrrascú de guirá xpiin Jehová: «Buñ saduʼdy guirá ni nap par labúu guilaa» (Job 2:4). Buñdzab biduʼdy diitz que buñ nosi ñony xchiin Jehová laʼga ñeeni galán layibu, per órni nacalóyibu galnagan nasianyibu Jehová. Per Job dipa bisiambu Jehová, né modcu bislooybu que Buñdzab rascú. Né lóono láaca napno oportunida par guislooyno que, ná racalóno galnagan xtol Buñdzab, dipa sasianno Jehová. Nantzayno que Jehová guirá ór sanbu lóono por laabu (Juan 17:11).
17. Mod ná 1 Pedro 2:12, ¿xí stoib mod labúu gonyxiroʼno laa Jehová?
17 Raslooyno respet laa Jehová (Prov. 30:9; Jer. 7:8-11). Lóono rinéno né ranino laa Jehová, por ngú ni ronyno labúu gonyxiroʼni o gony buidyni laabu (bíil 1 Pedro 2:12). Por ngú, guirá ór nainy gonyno rutirigaʼlni lóono par gonyxiroʼno laa Jehová né ni ranino né ni ronyno. Modreʼ, ná nacno buñ galkié labúu racnéno par gacxiroʼ laabu.
18. ¿Xí stoib mod labúu guislooyno que laa Jehová nigolú rasacni par lóono? (Láaca bibiʼ ni ná ñeʼ guiich).
18 Más rioʼno galrrasaʼ guiniʼ buñ sacró de Jehová que ni guiniʼ buñ sacró de lóono (Sal. 138:2). ¿Xigony ranino láani? Portín por ni nadxiʼno laa Jehová, ronyno ni rioladxbu. Per rioʼ ór ngú rony que buñ guixiich o guiniʼ mal de lóono.a Jesús gosaguelbu ñaitybu, mod raity toib buñ mal, par naslooybu que napbu respet laa Jehová. Mod ná Hebreos 12:2-4, bunybu láani «ná godudybu ló galnatoy», ndeʼ raduʼdy diitz, que diti goyoʼbu galrrasaʼ xi naní buñ de láabu. Más goyoʼbu galrrasaʼ ñonybu ni ná Dios (Mat. 26:39).
19. ¿Xí rasaclo por laa Jehová, né xigony?
19 Riatzno por laa Jehová né nacni toib privilegio par lóono ni rimbu buñ lóono xomod testigos xtuny Jehová. Por ngú diti rioʼno ló galrrasaʼ pal stipnés raxiich o raniʼ mal de lóono. Portín par lóono laa Dios ngú ni más rasac que laacano. Por ngú, ma goloʼno guicno gonyxiroʼno láabu ná coʼ Buñdzab galnagan ronoʼno. Né modcu, xomodca Jesús, saslooyno que diti noʼ stoib cós ni más rasac par lóono que laa Jehová.
CANCIÓN 10 ¡Alabemos a nuestro Dios, Jehová!
a Dada Job goyoʼbu más galrrasaʼ xi naniʼ buñ láabu órni tzón ximigbu goniʼ mal de láabu. Nigolú, primer, órni bisnitbu xiimbu né guirá cós ni rasac ni gopbu, diti bichébu «nili goniʼbu que Dios buny cós mal» (Job 1:22; 2:10). Per, órni goyoʼ ni góoch láabu que cadudybu ló galrrioʼob por cós mal ni bunybu, ma cuenunysi bunybu pensary né goniʼbu cós ni diti non naniʼbu. Más goyoʼbu galrrasaʼ naniʼbu cós sacró de láabu, xalagary naniʼbu cós sacró de Dios (Job 6:3; 13:4, 5; 32:2; 34:5).