Gop confianz que Jehová ma bituʼdybu scásiʼ xcalkiélo

1, 2. ¿Xí rony Jehová órni rac arrepentirno, né ximod rasacno? (Láaca bibiʼ dibuj ni sieed).

REY David nigolú bioʼobni láabu galkié ni bunybu (Sal. 40:12; 51:3; ro rasalóni). Per, góc arrepentirbu né guidopy xcalnabanybu né Jehová bituʼdy scásiʼ ni bunybu (2 Sam. 12:13). Órni David biembu que Dios bituʼdy scásiʼ ni bunybu, goyoʼ nakitbu né bialdó xcalnabanybu (Sal. 32:1).

² Lóono láaca labúu tzoʼ nakitno né guialdó xcalnabanyno xomod David. Rasacno sacró ni nanno que Jehová ratuʼdy scásiʼ xcalkiéno ná nacni galkié rodann, pal rac arrepentirno né guidopy xcalnabanyno, rasetno xcalkiéno né ronyno dada rutirigaʼlni lóono par diti gonyno láani stoib (Prov. 28:13; Hech. 26:20; 1 Juan 1:9). Nigolú rialdó xcalnabanyno ni nanno que órni ratuʼdybu scásiʼ xcalkiéno, ranitlóbu láani, nacni suusi dipa bunyno láani (Ezeq. 33:16).

3, 4. ¿Ximod gosac Jennifer? ¿Xí guisuidyno ló artículo reʼ?

³ Per, pentzi rioʼ ór rasacnaganno gonyno crer que Jehová ma bituʼdy scásiʼ ni bunyno. Guibiʼno ni gosaclóo Jennifer. Láabu goniʼsbu ló galnigolú, per dzú gócbu mbioxhlasien gosalóbu bunybu cós mal né diti gon bixiosbu né xinaʼbu láani. Íz después, bibiguetbu ronoʼ Jehová né conforma godudy tiemp labúu goyonisbu. Nábu: «Gondxiʼya bidxiich né buni galyoxh. Láaca gosodxi né nigolú góca buñdzuitz. Ná goona que xcalgoity Cristo ma bisiá naʼ, portín ma gonaba Jehová natuʼdy scásiʼ ni buni né ma góc arrepentir de galkié ni buni. Per lainy xcalnabani diti buni crer láani».

⁴ ¿Rasacnaganlo gonylo crer lainy xcalnabanylo que Jehová ma bituʼdy scásiʼ ni bunylo la? Guisetnaladxno que Jehová raniiny gapno confianz ni gop David que láabu raslooybu galnadxiʼ lóono né ratuʼdybu scásiʼ ni bunyno. Ló artículo reʼ sasuidyno xigony nigolú rasac gapno confianz que Jehová ma bituʼdybu scásiʼ ni bunyno né xi sacné lóono gapno confianz cu.

¿XIGONY NIGOLÚ RASAC GAPNO CONFIANZ QUE JEHOVÁ MA BITUʼDY SCÁSIʼ XCALKIÉNO?

5. ¿Xí láani nainy Buñdzab gonyno crer? Bisetlaa toib ejemplo.

⁵ Pal napno confianz que Jehová ma bituʼdy scásiʼ ni bunyno, diti siabno ló xtramp Buñdzab. Guisetnaladxno que Buñdzab sonybu nitísi cós par galsitno de Jehová. Por ejemplo, toibtica tramp ni raquiimbu láani ngú, ni rayopybu mod gonyno crer que Jehová dipa satuʼdy scásiʼ toib galkié rodann ni ma bunyno. Gonyno pensary ló buñguieeu ni goyoʼ gudx Corinto ni biab ló galyoxh né por ngú bireʼbu lainy congregación (1 Cor. 5:1, 5, 13). Después góc arrepentirbu. Per Buñdzab goniiny láabu que herman diti natuʼdy ni bunybu scásiʼ né diti naduʼdyibu lagary nabiguetbu lainy congregación. Pal ñac ni goniiny Buñdzab, buñguieeu reʼ ñonybu crer que ni bunybu diti ma bituʼdy Dios láani scásiʼ. Né ngú ñony que ñoʼbu ló galrrasaʼ né nasac nabambu né nasiambu Jehová. Buñdzab diti ma bitzaʼbu mod ronybu par cueganbu lóono. Diti riabno ló xtrampbu «portín nantzayno guirá xcalmañósbu» (2 Cor. 2:5-11).

6. ¿Xí sacné lóono par ma diti guisacno mal por galkié ni bunyno?

⁶ Pal napno confianz que Jehová ma bituʼdy scásiʼ ni bunyno, ma diti sasacno mal por galkié ni bunyno. Wal rasacno mal órni ma bunyno toib galkié (Sal. 51:17). Galán pal rasacno modcu, portín órcu xcalrrienno sachiinni lóono guitzaʼno mod nacno né gonyno xinésni (2 Cor. 7:10, 11). Per, pal radudy midid rasacno mal por ni bunyno ná ma góc arrepentirno, labúu guireʼganno. Órni napno confianz que Jehová ma bituʼdy scásiʼ ni bunyno, ma diti rasacno mal né rialadxno láani. Modcu sonyno xchiin Jehová mod raniiny láabu: né toib galrrien nayaa né xiroʼ galrrabaladx (Col. 1:10, 11; 2 Tim. 1:3). Guibiʼno nigoreʼ xi sacné tigaagano gapno confianz que Jehová ma bituʼdy scásiʼ ni bunyno.

¿XÍ LABÚU SACNÉ LOOY GAPLO CONFIANZ QUE JEHOVÁ MA BITUʼDYBU SCÁSIʼ NI BUNYLO?

7, 8. ¿Ximod goniʼ Jehová mod nacbu ló Éxodo 34:6, 7, né xí confianz raduʼdyni lóono?

⁷ Buny pensary ximod Jehová goniʼbu mod nacbu. Cuá cuidad xi láani góoch Jehová Moisés laidy dainy Sinaí (bíil Éxodo 34:6, 7).a De guirá cós ni labúu ñaiby Jehová láabu de láacabu, ¿xí goleʼ loguiaʼbu de láacabu? Bioladxbu naniʼbu que nacbu toib Dios «ni nap galrronladx né ni rien xi rasac buñ». Por ngú, ¿ronylo pensary que diti natuʼdybu scásiʼ ni ma buny toib buñ ni nadxiʼ láabu né ni ma góc arrepentir la? Jehová dipa ñony ngú, diti nagudx xcalnabanybu.

⁸ Órni Jehová ná que napbu galrronladx, labúu gonyno crer ni nábu, portín láabu diti rascúbu (Sal. 31:5). Por ngú, pal rasacnaganlo gonylo crer que Jehová ma bituʼdy scásiʼ ni bunylo, buny pensary ló ndeʼ. Pal naplo confianz que Jehová nap galrronladx né rien mod rasac buñ, né por ngú ratuʼdybu scásiʼ ni rony guirá buñ ni rac arrepentir, labúu gaplo confianz que láaca ratuʼdybu scásiʼ ni ronylo.

9. ¿Xí rasuidy Salmo 32:5 lóono mod ratuʼdy Jehová scásiʼ xcalkié buñ?

⁹ Buny pensary ximod ná la Biblia que ratuʼdy Jehová scásiʼ xcalkiéno. Por ejemplo, David gochbu Jehová: «Looy bituʼdylo xcalkiéya scásiʼ» (bíil Salmo 32:5). Diitz hebreo ni ló versículo reʼ rac traducir xomod tudy scásiʼ xcalkié buñ, raduʼdyni diitz «guilís» o «tzané». Por ngú, órni Jehová bituʼdybu scásiʼ ni buny David, gocni suusi nalísbu né nabeʼbu laidy David toib guix nanaʼ né ninébu láani. Né ngú buny que David ñoʼ nakit né ñaldó xcalnabany (Sal. 32:2-4). Pal rac arrepentirno né guidopy xcalnabanyno, labúu guisacno xomodca David. Diti noʼ xi portín gooyrano xcalkiéno, portín ma diti noʼni laidyno; Jehová ma golís né ma sané láani.

10, 11. ¿Xí rasuidy Salmo 86:5 lóono de Jehová?

¹⁰ (Bíil Salmo 86:5). David goniʼ que Jehová noʼbu puext guituʼdybu scásiʼ xcalkié buñ. Ndeʼ raduʼdy diitz que Jehová diti nimaca radzuitzbu órni rachéno, né que guirá ór raniiny láabu guituʼdybu scásiʼ ni rony buñ ni rac arrepentir. ¿Xigony natzayxatbu né buñ ni rac arrepentir? Versículocu náni: «Naplo xiroʼ galnadxiʼ ni diti radzaʼ a guirá buñ ni rayopy looy». Por ngú, pal ronyno toib galkié né rac arrepentirno Jehová raslooybu xcalnadxiʼbu ni diti radzaʼ né ratuʼdybu scásiʼ xcalkiéno (Is. 55:7). Pal rasacnaganlo gaplo confianz que Jehová ma bituʼdy scásiʼ ni bunylo, buny pensary ló ndeʼ: Pal ronylo crer que Jehová noʼ puext par guituʼdybu scásiʼ ni rony guirá buñ ni rac arrepentir né ranab xcalrronladxbu. Labúu gaplo confianz que Jehová ma bituʼdybu scásiʼ ni bunylo órni gonablo xcalrronladxbu.

¹¹ La Biblia láaca rasuidy lóono que Jehová nan ximod goyaʼno né riembu que nacno buñ galkié, né ngú nigolú rasialdó xcalnabanyno (Sal. 139:1, 2). Gonyno pensary ló tema reʼ ló stoib salmo ni goniʼ David, ni sacné lóono gapno confianz que Jehová raniiny guituʼdybu scásiʼ ni ronyno.

BISETNALADX NI RASETNALADX JEHOVÁ

12, 13. Mod ná Salmo 103:14, ¿xí láani rasetnaladx Jehová, né xí rachiinni láabu gonybu?

¹² (Bíil Salmo 103:14). David goniʼ que Jehová «rasetnaladxbu que nacno yoo». Né diitzreʼ biduʼdybu toib razón xigony noʼ Dios puext guituʼdy scásiʼ ni ronyno pal rac arrepentirno: guirága ór rasetnaladxbu que nacno buñ galkié. Guisuidytzayno versículo reʼ.

¹³ David bicaʼbu que Jehová «rimbutzaaybu ximod goyaʼno». Bisaʼbu Adán «de yoo», né nanbu xi raduʼdyni diitz: ná buñgudxlio diti ñap galkié diti labúu ñonyibu guirá cós né nacaʼyibu buu, ñooyibu né ñaisyibu (Gén. 2:7). Per, desde dzú biché Adán né Eva, ni «nacno yoo» raguiñani stoib cós: guiráno nacno xiin Adán né Eva né por ngú bianéno galkié né ronyno cós mal. Per, David diti nosi goniʼbu que Jehová nan que nacno buñ galkié, láaca «rasetnaladxbu» láani. Diitz hebreo ni ló Salmo 103:14 rac traducir «rasetnaladxbu» diti nosi raduʼdyni diitz que noʼni ló xpensary Jehová, xalagary ngú, láaca raduʼdyni diitz que rachiinni láabu gonybu cós tzaay por lóono. Por ngú, ló stoib diitz, versículo reʼ raduʼdyni diitz que Jehová riembu que rioʼ ór rachéno, per pal rac arrepentirno, ngú sachiin láabu gonladxbu lóono né guituʼdybu scásiʼ ni ma bunyno (Sal. 78:38, 39).

14. a) ¿Xí rasuidy Salmo 103:12 lóono mod ratuʼdy Jehová scásiʼ xcalkié buñ? b) ¿Ximod raslooy ejemplo xtuny David que Jehová ratuʼdybu scásiʼ xcalkié buñ? (Bibiʼ cuadriyen ni laa, «Jehová ratuʼdybu scásiʼ xcalkié buñ né rialadxbu láani»).

¹⁴ ¿Xí más rasuidy Salmo 103 lóono mod ratuʼdy Jehová xcalkiéno scásiʼ? (Bíil Salmo 103:12). David goniʼ que, órni Jehová ratuʼdy scásiʼ xcalkiéno, rinébu xcalkiéno nigolú sit, «xomod sit noʼ ro ralainy govitz né ro riaʼis govitz». Niis roʼ ralainy govitz né ro riaʼisni, nigolú sit noʼni de saʼni. ¿Xí rasuidyno de láani? Toib biblista rabexa que pal galkié noʼni nigolú sit, labúu gapno confianz que ma binitlóni né que Jehová ma diti rasetnaladx láani (El tesoro de David, de Charles Spurgeon, volumen 2, traducción de Samuel Vila). Rioʼ ór nosi raquiin xpuu toib cós par guisetnaladx buñ láani. Per, órni Jehová ratuʼdy scásiʼ xcalkiéno, rialadxbu láani, dada xpuuni, né ma diti rasetlabu láani lóno stoib (Ezeq. 18:21, 22; Hech. 3:19).

15. ¿Xí labúu gonyno pal rasacno mal por galkié ni ma bunyno?

¹⁵ Pal rioʼobsani looy galkié ni bunylo, ni gonylo pensary ló Salmo 103 sacnéni looy gaplo confianz que Dios ma bituʼdybu scásiʼ ni bunylo. Gonabdiitz ndeʼ looy: «Pal Jehová rasetnaladx que naca buñ galkié né noʼbu puext guituʼdybu scásiʼ xcalkiéya portín ma góca arrepentir, ¿xí diti non nasetnaladxi láani láaca la? Né, pal Jehová ma bialadx galkié ni buni né diti rasetlabu láani lóoya, ¿xí diti non guialadxi láani láaca la?». Láabu ma diti ronybu pensary ló galkié ni ma bituʼdybu scásiʼ, ¿xigony diti ronylo ngúca? (Sal. 130:3). Órni ma naplo confianz que Jehová ma bituʼdybu scásiʼ xcalkiélo, looy láaca satuʼdylo láani scásiʼ né sonyralo xchiimbu.

16. ¿Xigony nacni toib riesga tudy midid gonyno pensary ló galkié ni ma bunyno? (Láaca bibiʼ retrat).

¹⁶ Bisetnaladx que pal guirága ór ronylo pensary ló galkié ni ma bunylo, nacni suusi nabiʼlo ló spej xtuny camión né guirá ór nabiʼlo xi láani noʼ nixitz. Diti mal láani guibiʼlo ló spej par ganlo pal noʼ riesga nixitz, né modcu labúu guilaalo. Per, pal nainy looy diti noʼ xi saclólo órni caxonylo camión diti guiañ guibiʼlo niis ro seelo. Modcuca, galán láani que nagabga ór gonylo pensary ló galkié ni ma bunylo par guisuidylo de láani, né gonylo rutirigaʼlni looy par diti gonylo láani stoib. Per, pal radudy midid ronylo pensary loni, nigolú sasaclo mal né ma diti sonylo xchiin Jehová nakit. Por ngú, bibiʼ ni noʼ nislólo: néz ni riné looy ló gudxlio copy, ro ma diti sasetnaladxlo cós ni ma godudy (Is. 65:17; Prov. 4:25).

BUNYRA QUE XCALNABANYLO GAP CONFIANZ

17. ¿Xigony non gonyno que xcalnabanyno gap confianz que Jehová ronladx lóono né ratuʼdybu scásiʼ ni ma bunyno?

¹⁷ Guiráno non gonyrano que xcalnabanyno gap confianz que Jehová ronladx lóono né que guirá ór noʼbu puext guituʼdybu scásiʼ ni bunyno (1 Juan 3:19). ¿Xigony? Portín Buñdzab sayopyra mod gonyno crer que Dios diti ronladx lóono né que dipa satuʼdybu scásiʼ xcalkiéno. Nainy láabu que ma diti gonyno xchiin Jehová. Buñdzab nan que ma goxeʼsi tiemp napbu, por ngú, sonybu rutirigaʼlni láabu par galsitno de Jehová (Apoc. 12:12). ¡Dipa guiduʼdyno lagary gonybu gan, dipa guisianno gonyno xchiin Jehová!

18. ¿Xí labúu gonylo par gaplo confianz que Jehová ronladx looy né que ma bituʼdybu scásiʼ ni ma bunylo?

¹⁸ Ló artículo ni godudy bisuidyno xi sacné looy gaplo confianz que Jehová ronladx looy. Né ló artículo reʼ bisuidyno xi labúu gonylo par gonylo que xcalnabanylo gap confianz que Jehová ma bituʼdybu scásiʼ xcalkiélo. Buny pensary ximod goniʼ Jehová que nacbu né mod rasetlaa la Biblia mod ratuʼdybu scásiʼ xcalkié buñ. Dipa guialadxlo que láabu guirá ór rasetnaladxbu que naclo buñ galkié né raslooybu galrronladx looy. Né bisetnaladx que órni Dios ratuʼdy scásiʼ xcalkié buñ rialadxbu láani. Pal ronylo guirá ndeʼ, labúu guiniʼlo né confianz diitz ni goniʼ David: ¡Raxquixi looy Jehová, portín «bituʼdylo xcalkiéya scásiʼ»! (Sal. 32:5).