ARTÍCULO NI GUISUIDYNO 32
CANCIÓN 44 Una súplica ferviente
Jehová raniiny láabu que guiránac buñ gac arrepentir
«Jehová […] diti nainy láabu que ni toib guinitló, xalagary ngú, raniiny láabu que guiráto gac arrepentirto» (2 PED. 3:9).
TEMA
Guienno xi raduʼdy diitz gac arrepentir buñ, xigony raquiin gony buñ láani, né ximod racné Jehová buñ par gac arrepentir.
1. ¿Xí láani rony toib buñ ni rac arrepentir?
ÓRNI ronyno toib cós mal, nigolú rasac gac arrepentirno. Mod ná la Biblia, buñ ni ma góc arrepentir, rasaló rianladxbu cós mal ni bunybu, ma diti ronybu láani né ragoʼbu guicbu diti gonybu láani más (bibiʼ ro ná «arrepentimiento» ni sieed ló Glosario).
2. ¿Xigony guiráno non guisuidyno xí láani ngú gac arrepentir buñ? (Nehemías 8:9-11).
2 Guiráno non guienno xi láani ngú gac arrepentir buñ. ¿Xigony? Portín guirá dzú rachéno. Sieelno de xfamil Adán né Eva, por ngú guiráno ronyno galkié né raityno (Rom. 3:23; 5:12). Diti noʼ chú ralaa de galkié ni bisiané Adán né Eva lóono. Dada buñguieeu ni gopgoluʼ fe, xomod Pablo, buny xiroʼ xtem par diti ñonybu galkié (Rom. 7:21-24). Per ngú diti raduʼdy diitz que guirá ór guisac malno por ni nacno buñ galkié. Jehová natzayxatbu por ngú nainy láabu guibanyno nakit. Gonyno pensary ló buñ judíos ni bibany ló xtzú Nehemías (bíil Nehemías 8:9-11). Jehová diti goniiny nadudy midid nasac nabannyibu por xcalkiéyibu, xalagary ngú, nabaladxyibu órni ñenyibu Dios. Láabu nanbu que órni rac arrepentirno rabanyno nakit né por ngú rasuidybu lóono xi raduʼdy diitz gac arrepentir buñ. Nantzayno que Bixiosno, ronladxgoluʼ lóono, né satudybu scásiʼ xcalkiéno pal rac arrepentirno.
3. ¿Xí guisuidyno ló artículo reʼ?
3 Ló artículo reʼ sabiʼno xi láani bisuidy Jehová gudx Israel, mod gac arrepentiryibu. Después, sanino ximod gocné Jehová buñ ñac arrepentir. Né último, sasuidyno xi láani bisuidy Jesús xpiin mod gac arrepentiryibu.
¿XÍ LÁANI BISUIDY JEHOVÁ GUDX ISRAEL MOD GAC ARREPENTIRYIBU?
4. ¿Xí láani bisuidy Jehová xcudxbu Israel mod gac arrepentir buñ?
4 Órni Jehová golú gudx Israel par gac xcudx, bunybu toib acuerdo né layibu. Jehová biduʼdy xtiitz que ñan layibu né pal nasobyibu, Jehová naduʼdy xcalnasác layibu. Né Jehová góoch layibu ndeʼ: «Portín ni cayoni mandary looy dzureʼ diti nagangoluʼni par looy, nili noʼni sit» (Deut. 30:11, 16). Per pal diti nasobyibu né ñenyibu stipnés dioxh, ma diti nacacuent Jehová layibu né narecanéyibu láani. Pal scú ñacni ¿naduʼdy ngú diitz que ma diti nacacuent Jehová layibu stoib la? Yaca, portín Ley bisetlani que labúu nabiguetyibu ronoʼ Jehová stoib né nasobyibu ni nábu (Deut. 30:1-3, 17-20). Ló stoib diitz, labúu ñac arrepentiryibu. Né pal ñonyibu láani, Jehová nacacuent né naduʼdy xcalnasác layibu stoib.
5. ¿Ximod bislooy Jehová que diti bialadxbu xcudxbu? (2 Reyes 17:13, 14).
5 Gudx ni golú Jehová góc nayaʼyibu xidal buelt. Diti nosi bienyibu Dioxh falz, láaca bunyibu stipnés cós mal. Né godudyibu ló galrrioʼob xtolni. Per Jehová diti bialadx layibu, xalagary ngú, bixelbu xidal profetas pal labúu ñac arrepentiryibu né nabiguetyibu ronoʼ Jehová (bíil 2 Reyes 17:13, 14).
6. ¿Ximod biquiin Jehová profetas par bisuidybu xcudxbu balaati rasac gac arrepentir buñ? (Láaca bibiʼ dibuj).
6 Jehová guirá ór bixelbu profetas xtunybu par ñaiby xcudxbu xi nasacloyibu pal diti nasobyibu, né par ñony corregir layibu. Por ejemplo, biquiimbu Jeremías par ñaiby layibu ndeʼ: «Bibiguet ronoʼya gudx Israel ni nayaʼ […]. Diti sadzutzi guibiʼya lóoto […]. Diti sanéya xian por tipzó. Nosi biduʼdy cuent que bichélo, portín góc nayaʼlo né Jehová» (Jer. 3:12, 13). Láaca biquiimbu Joel par naniʼ ndeʼ: «Colguibiguet ronoʼya né guidopy xcalnabanyto» (Joel 2:12, 13). Né bunybu que Isaías naniʼ: «Colguisiá lóoto; colcueʼ nislóya cós mal ni ronyto; ma diti gonyto cós mal» (Is. 1:16-19). Né xcalrracné Ezequiel gonabdiitzbu ndeʼ: «¿Xí rioladxi gaity buñ mal la? […] ¿Xí diti más rioladxi guisianyibu néz mal né guibanyibu la?». «Diti rioladxi gaity ni toib buñ […]. Por ngú colguibiguet ronoʼya né colguibany» (Ezeq. 18:23, 32). Jehová nigolú rioʼ nakit órni buñ rac arrepentir de galkié ni buny, portín raniiny láabu guibanyibu tipzó. Mod ma bisuidyno, Jehová diti raguʼuch ña né rabésbu dada órni buñ galkiécu coʼ guic guibiguet, né órcu gacnébu buñcu. Guibiʼno stipnés ejemplos.
Jehová biquiin xidal profetas xtuny par gocnébu xcudxbu ñac arrepentir de xcalkié. (Bibiʼ párrafos 6 né 7).
7. ¿Xí bisuidy Jehová xcudx né xcalrracné Oseas né tzeʼel?
7 Guicáano cuidad xi bisuidy Jehová xcudx né xcalrracné profeta Oseas né tzeelbu, Gómer. Gonaʼcu buny galyoxh né bidxin midid bisiambu tzeelbu Oseas né golesnébu stipnés buñguieeu. ¿Bialadx Jehová láabu la? Jehová labúu rabiʼbu lainy galnabany, né gochbu Oseas ndeʼ: «Goyee stoib, gondxiʼ buñgonaʼ ni stoib buñguieeu nadxiʼ né ni cayony galyoxh, xomodca nadxiʼ Jehová gudx Israel laʼga layibu rienyibu stipnés dioxh» (Os. 3:1; Prov. 16:2). Guisetnaladxno que órcu Gómer cayonyra galkié rodann. Per, Jehová gochbu Oseas, ñeebu nayopybu tzeelbu, natuʼdybu scásiʼ ni bunybu né nabesnébu tzeelbu stoib.a Né ejemplo xtuny Oseas, Jehová bisuidybu xcudxbu que láabu diti ma bialadxbu layibu. Ná bunyrayibu galkié rodann, Jehová binladxsa layibu né bixelrabu profetas ronoʼyibu, né gocnérabu xcudxbu par ñac arrepentir né natzaʼ mod nabany. ¿Raduʼdy ndeʼ diitz que Jehová, «ni rabiʼtzay guirá galnabany», sayopy mod par gacnébu toib buñ ni cayonyra galkié rodann gac arrepentir la? (Prov. 17:3). Guisuidyno láani.
¿XIMOD RACNÉ JEHOVÁ BUÑ GALKIÉ PAR GAC ARREPENTIR?
8. ¿Xí láani buny Jehová par gocnébu Caín ñac arrepentir? (Génesis 4:3-7; láaca bibiʼ dibuj).
8 Caín góc xiin lagol Adán né Eva. Né golaa xcalkié bixiosbu né xinaʼbu láabu. Né láaca, la Biblia ná que «bunybu cós mal» (1 Juan 3:12). Pentzi por ngú, órni biduʼdybu toib galrrascad, Jehová «diti cuacuentbu Caín nili galrrascad ni biduʼdybu». Per, xalagary natzaʼbu mod nacbu, «Caín nigolú bidzuitz né bioʼobni láabu». ¿Xí buny Jehová? Jehová goniné láabu (bíil Génesis 4:3-7). Né galrronladx goniné Jehová láabu. Gochbu Caín que labúu nacacuentbu Caín stoib, né xi riesga ñoʼbu pal diti natzaʼbu mod nacbu. Nabanni, Caín diti bicadiag Jehová, nili biduʼdybu lagary ñacné Jehová láabu par ñac arrepentirbu. ¿Xí buny Jehová órni Caín diti gosaguel nasob? ¿Goloʼbu guicbu ma dipa ñacnébu ni toib buñ par gac arrepentir la? ¡Yaca!
Né galrronladx goniné Jehová Caín. Gochbu Caín que labúu nacacuentbu Caín stoib, né ló xi riesga ñoʼbu pal diti natzaʼbu mod nacbu. (Bibiʼ párrafo 8).
9. ¿Ximod gocné Jehová a David par ñac arrepentir?
9 Jehová nigolú binladx rey David. Né goniʼbu de David ndeʼ: «Nacbu toib buñguieeu ni rioladx xcalnabani mod nac» (Hech. 13:22). Per, David buny galkié rodann, bunybu galyoxh né bigaitybu buñ, né mod ná Ley, non ñaitybu (Lev. 20:10; Núm. 35:31). Per, Jehová ni natzaayxat, bixel profeta Natán par naniné láabu, ná David diti bislooy que cayac arrepentir.b Natán biquiin toib comparación par bidxinbu lainy xcalnabany David. Órcu David biduʼdy cuent que bichébu nisló Jehová né góc arrepentirbu (2 Sam. 12:1-14). Bicaʼbu toib salmo, ro goniʼbu balaati bioʼobni láabu ni bunybu (Sal. 51, ro rasalóni) Salmo reʼ ma bisialdóni xidal buñ ni buny galkié né ma bichiinni layibu par góc arrepentiryibu. ¿Nigolú rabaladxno ni Jehová né galrronladx gocnébu David par ñac arrepentir ja?
10. ¿Ximod rasaclo ni nanlo que Jehová nap paseins lóono né ratuʼdybu scásiʼ xcalkiéno?
10 Jehová diti rioladx ni toib clas galkié, xalagary ngú rianladxbu guirá galkié (Sal. 5:4, 5). Per nanbu que guiráno nacno buñ galkié né ronladxbu lóono, por ngú racnébu lóono gonyno gan galkié. Guirá ór rayopybu mod gacnébu guirá buñ, dada buñ ni buny galkié rodann, gac arrepentir né guibigax ronoʼbu. ¡Balaati rasialdó ndeʼ lóono! Órni ronyno pensary ló xpaseins Jehová, né mod ratuʼdybu xcalkié buñ scásiʼ, ndeʼ rachiin lóono par dipa guisianno láabu, né nimaca gac arrepentirno órni gonyno toib galkié. Nigoreʼ guisuidyno ni bisuidy Jesús xpiin mod rony Jehová né buñ ni rac arrepentir.
NI BISUIDY XPIIN JESÚS MOD GAC ARREPENTIR BUÑ
11, 12. ¿Xí parábola biquiin Jesús par bislooybu que Bixiosbu guirá ór noʼbu puext par guituʼdybu scásiʼ xcalkiéno? (Bibiʼ dibuj).
11 Ló siglo primero bidxin dzú par nadxin Mesías. Mod ma bisuidyno ló artículo ni godudy. Jehová biquiimbu tanli Juan ni Ragonis né Jesús par nasuidyibu buñ balaati rasac gac arrepentir buñ (Mat. 3:1, 2; 4:17).
12 Órni Jesús buny xchiin Dios ló Gudxlio reʼ, bisuidybu buñ que Bixiosbu puextca noʼ par guituʼdy scásiʼ xcalkié buñ. Nayadit golexabu láani órni goniʼbu parábola xtuny mbioxhlas ni bisian lidx. Mbioxhlas reʼ bisiambu lidxbu né cuenunysi bibanybu. Per, después «goyoʼ xcalrriembu» né bibiguetbu lidx bixiosbu. ¿Ximod buny bixiosbu? Jesús goniʼ que órni mbioxhlas reʼ «noʼsabu sit, bixiosbu bibiʼ láabu né gorudxaʼbu. Bixonybu ronoʼ xiimbu, goduʼuchbu né biduʼdybu bixit xiimbu». Mbioxhlas reʼ cayonyrabu pensary gaibybu bixiosbu guiduʼdy lagary gacbu xomós bixiosbu. Per bixiosbu goniiny natuʼdy scásiʼ ni bunybu né nacacuentbu xiimbu lidxbu stoib. Goniʼbu: «Xiingaʼna [...] binitbu né ma bidzeldo láabu» (Luc. 15:11-32). Antes ni ñeed Jesús ló Gudxlio, xidal buelt bibiʼbu mod bislooy Jehová galrronladx buñ galkié ni góc arrepentir, por ngú labúu bislooybu de toib mod sacróyen xcalrronladx Bixiosno.
Ló parábola ni goniʼ Jesús, bixios mbioxhlascu raxony par cuʼudx xiin ni ma bibiguet lidx. (Bibiʼ párrafos 11 né 12).
13, 14. ¿Xí láani bisuidy Pedro mod gac arrepentir buñ, né xí láani bisuidybu stipnés de tema reʼ? (Láaca bibiʼ dibuj).
13 Por mod buny Jesús, apóstol Pedro bisuidy xidal lesiony mod gac arrepentir buñ né tudy xcalkié buñ scásiʼ. Pedro bichébu xidal buelt, né Jesús goyoʼ puext natuʼdy xcalkiébu scásiʼ. Por ejemplo, tzón buelt goniʼbu que diti bimbubu Jesús, né después bioʼobni láabu por ni bunybu (Mat. 26:34, 35, 69-75). Per después ni biás Jesús, bireʼbu lóo Pedro, ralooyni órni goyoʼbu toibbu (Luc. 24:33, 34; 1 Cor. 15:3-5). Jesús gonbu que Pedro ma góc arrepentir, por ngú bisialdóbu xcalnabany Pedro né bislooybu que ma bituʼdybu xcalkié Pedro scásiʼ (bibiʼ Marcos 16:7 né nota de estudio «y a Pedro» ló Biblia dixtil).
14 Pedro bibiʼ xi raduʼdy diitz gac arrepentir buñ né tudy scásiʼ xcalkié buñ. Por ngú labúu bisuidybu stipnés buñ de tema reʼ. Después de Lanii Pentecostés, goloʼbu toib discurs ro goyoʼ xidal buñ judíos, né gochbu guirá biinreʼ que layibu bigaityibu Mesías, per né galrronladx goniʼbu ndeʼ: «Por ngú, colgac arrepentir né colguisian mod nacto par guinitló xcalkiéto, modcu sadudy Jehová galrrasaladx lóoto» (Hech. 3:14, 15, 17, 19). Né guirá diitzreʼ, bislooybu que buñ ni rac arrepentir, non guisianyibu mod nacyibu, ni raduʼdy diitz, guitzaʼyibu mod ronyibu pensary, guisianyibu cós mal ni ronyibu né gonyibu cós tzaay ni rioladx Dios. Apóstol reʼ goniʼ que Jehová natuʼdy scásiʼ xcalkié buñ né dipa nasetnaladxbu láani. Né, xidal íz después, golexabu: «Nacbu paseins né lóoto portín diti nainy láabu que ni toib guinitló, xalagary ngú, raniiny láabu que guiráto gac arrepentirto» (2 Ped. 3:9). ¡Nigolú sacró ni nanno que Jehová labúu guituʼdy xcalkiéno scásiʼ, ná nacni toib galkié rodann!
Apóstol Pedro góc arrepentir, por ngú Jesús bituʼdybu scásiʼ xcalkiébu né bislooybu que binladxbu Pedro. (Bibiʼ párrafos 13 né 14).
15, 16. a) ¿Ximod bisuidy Pablo mod ratuʼdy Jehová scásiʼ ni rony buñ? (1 Timoteo 1:12-15). b) ¿Xí guisuidyno ló artículo ni sieed?
15 Goxeʼsi buñ rac arrepentir por xidal galkié xomod Saulo de Tarso. Diti gopbu laxtima órni cuanalbu né bigaitybu xpiin Cristo. Por ngú, casi guirá xpiin Jesús, bunyibu pensary que Saulo diti labúu natzaʼ. Per Jesús diti buny pensary modcu. Xomodca Bixiosbu, bibiʼbu cualidades sacróyen ni gop Saulo. Jesús goniʼ: «Naʼ caquiinna láabu par guiniʼbu de naʼ a stipnés gudxrop» (Hech. 9:15). Dada biquiimbu toib galrradziguiaʼ par gocnébu Saulo góc arrepentir (Hech. 7:58–8:3; 9:1-9, 17-20). Después, órni Saulo bidxin góc cristiano né ma bimbu buñ láabu xomod apóstol Pablo, xidal buelt biduʼdybu guixquix por galnatzaay né galrronladx ni bislooy Jehová né Jesús láabu (bíil 1 Timoteo 1:12-15). Bisuidybu buñ que Jehová nigolú ronladxbu buñ, né por ngú rayopybu mod gac arrepentir buñ (Rom. 2:4).
16 Toibtica dzú, Pablo gon que goyoʼ buñ ni buny galyoxh lainy congregación ni goyoʼ Corinto. ¿Xí láani buny Pablo? Ni bunybu rasuidyni lóono galnadxiʼ xtuny Jehová né mod rony corregirbu buñ, né balaati rasac guislooy buñ galrronladx. Ló artículo ni sieed sasuidyno láani nanoydiguieʼ.
CANCIÓN 33 Echa sobre Dios tu carga
a Toibsi buelt góc ni gosaclóo Oseas. Ló naareʼ órni tzeʼel toib buñ rony galyoxh, Jehová diti raibybu buñ ni ditcu nap dool cuesnérabu tzeelbu. Né, Jehová buny que Xiimbu nabexa que buñ ni ditcu nap dool, labúu nachílbu xcaltzeelbu pal nainy láabu (Mat. 5:32; 19:9).
b Bibiʼ artículo ni laa «¿Qué significa para usted el perdón de Jehová?», ni bireʼ ló Guiich ni caniʼ 15 de noviembre íz 2012, páginas 21 a 23, párrafos 3 a 10.