ARTÍCULO NI GUISUIDYNO 33
CANCIÓN 4 «Jehová es mi Pastor»
Gop confianz que Jehová ronladx looy
«Bixelcaʼya looy ronoʼya né galnadxiʼ ni diti radzaʼ» (JER. 31:3).
TEMA
¿Xigony rasac gapno confianz que Jehová ronladx lóono né xí sacné lóono gapno confianz cu?
1. ¿Xigony góc dedicarlo Jehová? (Láaca bibiʼ retrat).
¿RASETNALADXLO dzú ni góc dedicarlo Jehová la? Bunylo láani portín bidxin bimbulo né gondxiʼlo láabu. Por ngú biduʼdylo xtiitzlo láabu, que ni más guisac ló xcalnabánylo láani ngú gonylo xchiimbu né que guirá ór gandxiʼlo láabu né guidopy xcalnabanylo, guidopynaclo, guidopy xpensarylo né xfuerslo (Mar. 12:30). Desde órcu, galnadxiʼ ni naplo láabu caniʼsni más. Pal ñoʼ ni nanabdiitz looy «¿Nandxichlo que nigolú nadxiʼlo Jehová la?, nimaca nacapylo: «¡Scú! Diti noʼ stoib cós nili buñ ni nadxiʼya xomod láabu».
¿Rasetnaladxlo balaati gondxiʼlo Jehová órni góc dedicarlo láabu né goyonislo la? (Bibiʼ párrafo 1).
2, 3. ¿Xí nainy Jehová? (Jeremías 31:3). ¿Xí guisuidyno ló artículo reʼ?
2 Per, ¿xí nacapylo pal ñoʼ ni nanabdiitz looy ndeʼ «¿Naplo confianz que Jehová nadxiʼ looy la?»? Pentzi órcu rasacnaganlo guicapylo, portín lainy xcalnabanylo ronylo pensary que diti non gandxiʼ Jehová looy. Toib hermana ni gosac que diti goyoʼ ni gondxiʼ láabu dzú gócbu mbiox goniʼ: «Naʼ nadxiʼya Jehová, naana láani. Per, xidal buelt ranabdidza naʼ pal láabu ronladxbu naʼ». Per ¿xí rasac Jehová por looy?
3 Jehová nainy láabu gaplo confianz que nadxiʼbu looy (bíil Jeremías 31:3). Goniiny láabu gaclo ximigbu né por ngú bixelcaʼbu looy ronoʼbu. Né, órni góc dedicarlo né goyonislo, biduʼdybu looy toib cós ni nigolú rasac: xcalnadxiʼbu ni diti radzaʼ. Ngú raduʼdy diitz que láabu nadxiʼdotbu looy né que diti sasiambu looy. Por galnadxiʼcu par láabu nigolú rasaclo (Mal. 3:17). Jehová diti nainy láabu gonylo pensary que diti nadxiʼbu looy, xalagary ngú, gaplo confianz ni gopca apóstol Pablo, ni bicaʼ: «Nandxichi que ni galgoity ni galnabány, ni ángeles ni gobiernos, ni cós ni casaclono nigoreʼ ni cós ni sietra, ni galnadip, ni cós ni noʼ guiaʼ ni cós ni noʼ guet, nili ni toib cós ni goyaʼ labúu cuestzoo lóono de xcalrronladx Dios» (Rom. 8:38, 39). Ló artículo reʼ, sasuidyno xigony nigolú rasac gapno confianz que Jehová nigolú ronladx lóono né xi sacné lóono gapno confianz cu.
¿XIGONY NIGOLÚ RASAC GAPNO CONFIANZ QUE JEHOVÁ RONLADX LÓONO?
4. ¿Xí tramp raquiin Buñdzab, né ximod labúu guicalóno láabu?
4 Pal napno confianz que Jehová ronladx lóono, labúu guisagaʼdxichno né diti siabno «ló xtramp Buñdzab» (Efes. 6:11). ¿Xí tramp raquiin Buñdzab par gonybu que ma diti gonyno xchiin Dios? Rayopybu mod gonyno pensary que Jehová diti nadxiʼ lóono. Dipa guialadxno que Buñdzab raniiny guiabno ló xtrampbu. La Biblia ná que Buñdzab nac xomod toib betz ons (1 Ped. 5:8, 9). Betz ons roomu nimal guitz né nimalien ni diti labúu racaló láamu. Scúca, Buñdzab xidal buelt racalóbu lóono órni caxoʼno, cadzagno noʼno nabann por galrrioʼob ni godudyno ló, cacalóno galnagan nigoreʼ o radzuibyno xi láani gac né lóono ló dzú ni sietra (Prov. 24:10). Par gony guantaryno galnagan ni ratuʼdybu lóono né par diti gonybu gan lóono, non guicalóno láabu né gonyno rutirigaʼlni lóono gapno confianz que Jehová nadxiʼ lóono (Sant. 4:7).
5. ¿Xigony nigolú rasac guisacno que Jehová ronladx lóono né que rasacno par láabu?
5 Pal napno confianz que Jehová nadxiʼ lóono, sabigaxno más ronoʼbu. ¿Xigony ranino ngú? Jehová bisaʼ lóono par labúu gandxiʼno né guisacno que noʼ ni ronladx lóono. Órni noʼ buñ ni raslooy que ronladx lóono, láaca rachiinni lóono gonladxno láabu. Scúca, laʼga más rasacno que Jehová nadxiʼ lóono né que rasacno par láabu, más sandxiʼno láabu (1 Juan 4:19). Né, laʼga más nadxiʼno láabu, más sandxiʼbu lóono, portín la Biblia ná: «Colguibig ronoʼ Dios né láabu sabigbu ronoʼto» (Sant. 4:8). Nigoreʼ guibiʼno xi láani gacné tigaagano gapno confianz que Jehová ronladx lóono.
¿XÍ LÁANI SACNÉ LOOY GAPLO CONFIANZ QUE JEHOVÁ RONLADX LOOY?
6. ¿Xí labúu guinablo Jehová pal rasacnaganlo gonylo crer que ronladxbu looy?
6 Gonab Jehová guirága gacnébu looy guienlo xigony nadxiʼbu looy (Luc. 18:1; Rom. 12:12). Pentzi raquiin guinablo láabu xidal buelt ló tipdzú gacnébu looy, guibiʼlo looyca xomod rabiʼbu looy. Pal xcalnabanylo diti ná gony crer que Jehová ronladx looy, bisetnaladx que láabu más xiroʼbu que xcalnabanylo (1 Juan 3:19, 20). Láabu más rimbubu looy que looyca (1 Sam. 16:7; 2 Crón. 6:30). Por ngú, góoch láabu guirá ni rasaclo né gonab láabu gacnébu looy gaplo confianz que nadxiʼbu looy (Sal. 62:8). Né de ngú, buny dxiin loguiaʼni. Guibiʼno tipnés cós ni labúu gonylo.
7, 8. ¿Ximod racné Salmos lóono gapno confianz que Jehová ronladx lóono?
7 Gop confianz ló ni ná Jehová. Dios biquiimbu espíritu santo xtunybu par ñacnéni guirá ni bicaʼ la Biblia nacaʼyibu cualidades xtunybu. Por ejemplo, bibiʼ diitz sacróyen reʼ ni goniʼ David: «Jehová noʼ gaxtiguié de buñ ni cayoʼob xcalnabany; né ralaabu buñ ni nogoluʼ nabann» (Sal. 34:18). Pal rasaclo modreʼ, pentzi ronylo crer que diti noʼ chú rien looy né que diti noʼ chú labúu gacné looy. Per Jehová raduʼdy xtiitz tzoʼbu né looy portín nanbu que órni rasaclo modreʼ más raquiinlo láabu. Ló stoib salmo, David bicaʼ: «Goloʼ nís ni rareʼ bisalóya lainy odre xtunylo» (Sal. 56:8). Toib odre gocni toib buʼur ni biquiin buñ ni goyee viaj par goloʼyibu nís. Né tigaaga biniʼ ni goyoʼ lainy odre cu nigolú gosacni par layibu. Scúca láani, órni radudyno ló galrrioʼob xtol galnagan ni cacalóno, rioʼobni Jehová, labúu guinino que ragoʼtzaybu nís ni rareʼ bisalólo par guislooybu que nigolú rioʼbu galrrasaʼ por looy. David láaca gochbu Jehová: «Rimbutzaaylo guirá xinésa» (Sal. 139:3). Jehová rabiʼ guirá xinéslo, guirá cós ni ronylo, né ragoʼbu guicbu ló cós tzaay ni ronylo (Heb. 6:10). ¿Xigony? Par láabu nigolú rasac guirá ni ronylo par coʼ nakitlo láabu.a
8 Jehová raquiimbu guirá versículos reʼ par guislooybu que ronladxbu looy, nacni suusi ñaibybu looy: «Nainy naʼ ganlo que nigolú ronladxi looy né que rioʼya galrrasaʼ por looy». Per, mod ma bisuidyno, Buñdzab ná que gonylo crer que Jehová diti ronladx looy. Por ngú, pal rioʼ ór ranabdiitzlo looyca pal Jehová ronladx looy, labúu gonylo pensary: ¿Chú láabu gony crer: «bixios guirá ni rascú» la o «Dios ni diti rascú»? (Juan 8:44; Sal. 31:5).
9. ¿Xí láani raiby Jehová guirá ni nadxiʼ láabu? (Éxodo 20:6).
9 Buny pensary ló ni rasac Jehová por buñ ni nadxiʼ láabu. Por ejemplo, buny pensary ló ni gochbu Moisés né israelitas (bíil Éxodo 20:6). Dios raduʼdybu xtiitzbu que saslooyrabu xcalnadxiʼbu ni diti radzaʼ buñ ni diti nadxiʼ láabu. Láabu nacbu leal, por ngú dipa siaabu xcalnadxiʼbu buñ ni nadxiʼ láabu (Neh. 1:5). Por ngú, pal rioʼ ór guisac naganlo gonylo crer pal nigolú ronladx Jehová looy, gonabdiitz ndeʼ looy: «¿Ronladxi Jehová la?». Né después buny pensary ló ndeʼ: pal looy nadxiʼlo láabu né ronylo rutirigaʼlni looy par coʼ nakitlo láabu, gop confianz que láabu láaca nadxidoʼtbu looy (Dan. 9:4; 1 Cor. 8:3). Ló stoib diitz: pal naplo confianz que Jehová nigolú nadxiʼ looy, láaca labúu gaplo confianz que láabu ronladxbu looy né dipa sasiambu looy.
10, 11. ¿Ximod nainy Jehová guibiʼlo xcalgoity Xiimbu? (Gálatas 2:20).
10 Buny pensary ló xcalgoity Jesús. Xcalgoity Jesús nacni galrrascad ni más xiroʼ ni biduʼdy Jehová buñgudxlio (Juan 3:16). Per diti nosi bunycuentbu Xiimbu par ñaity por guiránac buñ, láaca goitybu por looy. Buny pensary ló apóstol Pablo. Antes ni ñacbu cristiano bunybu xidal cós mal né después bunyrabu rutigoygaʼlni láabu par ñonybu gan debilidad xtunybu (Rom. 7:24, 25; 1 Tim. 1:12-14). Ná scú, bibiʼbu xcalgoity Jesús xomod toib galrrascad ni biduʼdy Jehová láabu (bíil Gálatas 2:20). Bisetnaladx que Dios biquiin espíritu xtuny par nacaʼ Pablo diitzreʼ, né pal diitzreʼ sieedni ló la Biblia nacni portín noʼ ni nainy Jehová guisuidy lóono (Rom. 15:4). Raniiny láabu que looy láaca guibiʼlo xcalgoity Jesús xomod toib galrrascad ni ma biduʼdybu looy. Órni guibiʼlo láani modcu, saplo confianz que Jehová nadxiʼ looy.
11 Nigolú raduʼdyno guixquix Jehová por ni bixelbu Xiimbu goity por lóono. Per Jesús diti bieedbu ló Gudxlio por ngúsi. Láaca bieedbu par guisuidybu buñ ximodpa nac Dios, né xi rasac Dios por buñgudxlio, mod guisuidyno nigoreʼ (Juan 18:37).
JESÚS BISUIDY QUE JEHOVÁ RONLADX LOOY
12. ¿Xigony labúu gapno confianz ló ni goniʼ Jesús de Jehová?
12 Dzú ni goyoʼ Jesús ló Gudxlio, bioladxbu bisuidybu buñ xi clas buñ nac Jehová (Luc. 10:22). Né labúu gapno confianz que guirá ni goniʼbu mod nac Bixiosbu nigolúni. Diti noʼ stoib ni rimbu Jehová xomod rimbu Jesús láabu, portín láabu ma goyoʼbu cueʼ Bixiosbu lainy guibá xiroʼgolu tiemp (Col. 1:15). Ma gosacbu né ma bibiʼbu galnadxiʼ ni rasac Jehová por xiimbu ni nac fiel, tanli ni noʼ lainy guibá né ni noʼ ló Gudxlio. Guibiʼno ximod ni bisuidy Jesús racnéni lóono gapno confianz que Jehová ronladx lóono.
13. ¿Ximod nainy Jesús guibiʼno Jehová?
13 Jesús raniiny láabu guibiʼno Jehová xomod láabu rabiʼbu Jehová: xomod Bixiosno ni ronladxgoluʼ lóono. Ló tap Evangelios xidal buelt goniʼ Jesús que Jehová nac Bixiosbu. Né órni goninébu xpiimbu biquiimbu diitz xomod «Bixiosto» (Mat. 5:16; 6:26). Nota de estudio xtuny Mateo 5:16 ni sieed ló la Biblia ló dixtil rabexani que xpiin Dios ni bibany ló dzú ni see biquiinyibu xidal títulos xirop órni goniʼyibu de Jehová né goninéyibu Jehová, xomod: ni nap Xiroʼ galnadip, Ni noʼ Guiaʼ né ni Bisaʼ guirá ni noʼ. Per, Jesús xidal buelt biquiimbu diitz «Bixiosa», «Bixiosto», né ngú goleʼ loguiaʼ que buñ ni rony adorar Jehová radzaktzay láabu. Gonyno pensary ló chop buelt ni biquiin Jesús diitz «Bixiosa» né «Bixiosto» órni goniʼbu de Jehová.
14. ¿Ximod bislooy Jesús que tigaagano nigolú rasacno par Jehová? (Mateo 10:29-31; láaca bibiʼ dibuj).
14 Primer, guibiʼno diitz ni goniʼ Jesús ló Mateo 10:29-31 (bíil láani). Cú goniʼbu que Bixiosno nanbu órni toib manybiguin riab layoo. Pal láabu racábu cuidad guirá nimalien reʼ, ni diti rony adorar láabu nili nadxiʼ láabu, gonyno pensary balaati rioʼbu galrrasaʼ por tigaaga xpiimbu ni rony adorar láabu por galnadxiʼ. Né ló la Biblia ló dixtil, ló versículo 30 radzelno toib nota de estudio xtuny diitzreʼ «guitzguic guirácato láaca ma bigapni», nota cu rabexa que, ni Jehová rimbu dada cós mitien de lóono raslooyni balaati rioʼbu galrrasaʼ por tigaaga xpiin Cristo. Riendxichni que Jesús nainy láabu gapno confianz que tigaagano nigolú rasacno par Bixiosno ni noʼ guibá.
Pal Jehová nan pu ór riab toib manybiguin layoo, bunysi pensary balaati ronladxbu looy, por ni ronylo xchiimbu né galnadxiʼ. (Bibiʼ párrafo 14).
15. ¿Xí rasuidyni looy de Jehová ni ná Juan 6:44?
15 Ló stoib buelt Jesús biquiin Diitz «Bixiosa» Juan 6:44 (bíil láani). Bixioslo ni noʼ guibá bixelcaʼ looy né galrronladx portín bibiʼbu que natzaay xcalnabanylo (Hech. 13:48). Nota de estudio xtuny Juan 6:44 ló la Biblia ló dixtil raniʼni que Jesús sigory goniʼbu ni bicaʼ Jeremías ló texto temático xtuny artículo reʼ: «Bixelcaʼya looy ronoʼya né galnadxiʼ ni diti radzaʼ». Versículo reʼ láaca labúu gac traducirni modreʼ, bislooyriya galnadxiʼ ni diti radzaʼ looy (Jer. 31:3; bitzak láani né Oseas 11:4). Bunysi pensary ló ndeʼ: Bixiosno ni noʼ guibá diti rasian de randxiʼbu, ngú raduʼdy diitz que rabiʼrabu cualidades tzaay ni naplo ná looy diti rabiʼlo láani.
16. a) ¿Xí casuidy Jesús lóono, né xigony labúu gapno confianz lóbu? b) ¿Xí sacné lóono gapno confianz que Jehová nac Bixiosno? (Bibiʼ cuadriyen «Bixiosno ni raquiinno»).
16 Nacni xomod ñaiby Jesús lóono: «Jehová diti nosi nacbu Bixiosa; láaca nacbu Bixioslo. Né raduʼdi xtiidza looy que ronladxbu looy né riogoluʼbu galrrasaʼ por looy». Por ngú, pal rioʼ ór rasacnaganlo gonylo crer que Jehová nadxiʼ looy, gonabdiitz ndeʼ looy: «¿Napa xidal razón par gapa confianz lóo Jesús, ni guirá ór raniʼ ni nigolú né rimbutzaay Bixiosno ja?» (1 Ped. 2:22).
BUNY RUTIRIGAʼLNI LOOY PAR GONYXIROʼLO CONFIANZ NI NAPLO QUE JEHOVÁ RONLADX LOOY
17. ¿Xigony guirá dzú gapno confianz que Jehová nadxiʼ lóono?
17 Mod ma bisuidyno, Buñdzab nac toib enemig ni nigolú naní guic né sonybu guirá rutirigaʼlni láabu par guisianno de gonyno xchiin Jehová. Toibtica tramp ni raquiimbu par gonybu gan lóono láani ngú, gonyno crer que Jehová diti ronladx lóono. ¡Diti guiduʼdyno lagary guirebuʼ ni noʼ guicbu gonybu! (Job 27:5). Por ngú, non gonyno rutirigaʼlni lóono par gapno confianz guirá dzú que Jehová nadxiʼ lóono.
18. ¿Xí láani labúu gacné looy par gonyxiroʼlo confianz ni naplo que Jehová ronladx looy?
18 Ló artículo reʼ, bunyno repas tipnés cós ni labúu gacné looy gaplo más confianz que Jehová ronladx looy. Por ejemplo, labúu guinablo láabu gacnébu looy guibiʼlo looyca xomod rabiʼbu looy né gonylo pensary ló textos ni sieed ló la Biblia ni raslooy balaati nadxidoʼtbu xpiimbu. Láaca galán guisetnaladxlo que láabu dipa siaabu xcalnadxiʼbu buñ ni nadxiʼ láabu. Dipa guialadxlo que labúu guibiʼlo xcalgoity Jesús xomod toib galrrascad ni biduʼdy Jehová looy. Né goló guiclo que, xomod goniʼ Jesús, Jehová nac Bixioslo. Modcu, pal rioʼ ni ranabdiitz looy «¿Naplo confianz que Jehová nadxiʼ looy la?», nimaca sacapylo: «¡Scú, napa confianz que Jehová nadxiʼ naʼ! Né roni rutirigaʼlni naʼ guirá dzú par guislooya láabu que nadxiʼya láabu».
CANCIÓN 154 Ndeʼ galrronladx