UmShumayeli

6 Kukhona nenye inhlekelele engiyibonile phansi kwelanga futhi ivamile kubantu: 2 UNkulunkulu weqiniso unika umuntu ingcebo nodumo ukuze angasweli lutho alufisayo; nokho uNkulunkulu weqiniso akamenzi akwazi ukukujabulela, nakuba umuntu oyisihambi engase akujabulele. Lokhu kuyize nokuhlupheka okukhulu. 3 Uma umuntu engazala abantwana abayikhulu, aphile iminyaka eminingi aze aguge, kodwa angazijabuleli izinto zakhe ezinhle ngaphambi kokuba aye ethuneni,* mangisho ukuthi ingane ezalwe isishonile ingcono kakhulu kunaye. + 4 Ngoba ukuzalwa kwayo bekuyize, yafela ebumnyameni, negama layo limbozwe ubumnyama. 5 Ngisho noma ingakaze ilibone ilanga noma ingazanga lutho, isengcono kakhulu kunalowo muntu. + 6 Kunanzuzoni ukuphila iminyaka eyizinkulungwane ezimbili kodwa ungayitholi injabulo? Abayi yini endaweni efanayo bonke? +

7 Wonke umsebenzi onzima womuntu uwukuba agcwalise isisu sakhe; + kodwa akasuthi. 8 Unanzuzoni ohlakaniphile kunoyisiphukuphuku, + noma kuzuzisa ngani ukuthi umuntu ohluphekayo uyakwazi ukuziphilisa? 9 Kungcono ukujabulela izinto amehlo azibonayo kunokufisa izinto ongeke ube nazo. Nalokhu futhi kuyize, ukugijimisa umoya.

10 Noma yini ekhona isinalo kakade igama, futhi kuyaziwa ukuthi umuntu uyini; akakwazi ukuphikisana* nomuntu onamandla kunaye. 11 Lapho kunamazwi* amaningi, kukhona izinto eziningi eziyize, futhi zimzuzisa ngani umuntu? 12 Ubani owaziyo ukuthi yini engcono kakhulu ngomuntu ukuba ayenze phakathi nezinsuku ezimbalwa zokuphila kwakhe okuyize akuchitha njengethunzi? + Ngoba ubani ongatshela umuntu ukuthi yini ezokwenzeka phansi kwelanga lapho engasekho?