UHezekeli

12 Izwi likaJehova laphinde lafika kimi, lithi: 2 “Ndodana yomuntu, uhlala endlini edlubulundayo. Banamehlo okubona kodwa ababoni, banezindlebe zokuzwa kodwa abezwa, + ngoba bayindlu edlubulundayo. + 3 Wena ndodana yomuntu, zenzele umthwalo ozoya nawo ekudingisweni. Bese kuthi emini lapho bebuka uye ekudingisweni. Iya ekudingisweni usuke endlini yakho uye kwenye indawo lapho bebuka. Mhlawumbe bazonaka nakuba beyindlu edlubulundayo. 4 Khipha umthwalo wakho opakishelwe ukuya ekudingisweni emini lapho bebuka, bese kuthi kusihlwa lapho bebuka uhambe njengomuntu oyiswa ekudingisweni. +

5 “Lapho bebuka, bhoboza imbobo odongeni, ukhiphe izimpahla zakho ngayo. + 6 Ngesikhathi bebuka, tshatha izimpahla zakho ehlombe uzikhiphe ngobumnyama. Mboza ubuso bakho ukuze ungawuboni umhlaba ngoba ngikwenza ibika endlini ka-Israyeli.” +

7 Ngenza njengoba nje ngangiyaliwe. Emini ngawukhipha umthwalo wami njengokungathi ngiya ekudingisweni, kusihlwa ngabhoboza imbobo odongeni ngesandla. Lapho sekumnyama ngakhipha izimpahla zami, ngazitshatha ehlombe bebuka.

8 Izwi likaJehova laphinde lafika kimi ekuseni, lithi: 9 “Ndodana yomuntu, indlu ka-Israyeli, indlu edlubulundayo, ayikubuzanga yini ukuthi, ‘Wenzani?’ 10 Yithi kubo, ‘Yilokhu iNkosi EnguMbusi uJehova ekushoyo: “Lesi simemezelo sithinta isikhulu + eJerusalema nayo yonke indlu ka-Israyeli ephakathi kwedolobha.” ’

11 “Yithi, ‘Ngiyibika kini. + Njengoba nje ngenzile, kuyokwenziwa kanjalo kubo. Bayoya ekudingisweni, ekuthunjweni. + 12 Isikhulu esiphakathi kwabo siyotshatha izimpahla zaso ehlombe sihambe ngobumnyama. Siyobhoboza imbobo odongeni sikhiphe ngayo izimpahla zaso. + Siyomboza ubuso baso ukuze singawuboni umhlaba.’ 13 Ngiyokwelulela inethi lami kuso, sibanjwe inethi lami lokuzingela. + Ngiyobe sengisiletha eBhabhiloni, ezweni lamaKhaledi, kodwa ngeke silibone; siyofela khona. + 14 Bonke abasizungezile, abasisizayo namaviyo aso empi, ngiyobahlakazela kuzo zonke izindawo; + ngiyohosha inkemba ngibajahe. + 15 Bayokwazi ukuthi nginguJehova lapho ngibasakazela phakathi kwezizwe futhi ngibahlakazela phakathi kwamazwe. 16 Abambalwa kubo ngiyobasindisa enkembeni, endlaleni nasesifweni esiwumshayabhuqe ukuze baxoxele izizwe abayoya kuzo ngayo yonke imikhuba yabo enengekayo; bayokwazi ukuthi nginguJehova.”

17 Izwi likaJehova laphinde lafika kimi, lithi: 18 “Ndodana yomuntu, kufanele udle isinkwa sakho ngokuthuthumela, uphuze amanzi akho ngokwesaba nangokukhathazeka. + 19 Yithi kubantu bezwe, ‘Yilokhu iNkosi EnguMbusi uJehova ekushoyo kwabakhe eJerusalema ezweni lakwa-Israyeli: “Bayodla isinkwa sabo ngokukhathazeka, baphuze amanzi abo ngokwesaba okukhulu, ngoba izwe labo liyobhujiswa ngokuphelele + ngenxa yobudlova babo bonke abahlala kulo. + 20 Amadolobha ahlala abantu ayobhujiswa, izwe libe ihlane eliyincithakalo; + niyokwazi ukuthi nginguJehova.” ’ ” +

21 Izwi likaJehova laphinde lafika kimi, lithi: 22 “Ndodana yomuntu, siyini lesi saga eninaso kwa-Israyeli, nithi, ‘Izinsuku ziyadlula, yonke imibono ayigcwaliseki’? + 23 Ngakho yithi kubo, ‘Yilokhu iNkosi EnguMbusi uJehova ekushoyo: “Ngiyobangela ukuba lesi saga siphele futhi ngeke besasisebenzisa njengesaga kwa-Israyeli.” ’ Kodwa yithi kubo, ‘Izinsuku sezisondele, + yonke imibono izogcwaliseka.’ 24 Ngoba ngeke usaba khona umbono wamanga noma ukubhula okukhohlisayo phakathi kwendlu ka-Israyeli. + 25 ‘ “Ngoba mina Jehova ngizokhuluma. Noma yini engiyikhulumayo iyokwenziwa ngaphandle kokulibala. + Ezinsukwini zakho, + O wena ndlu edlubulundayo, ngiyokhuluma izwi futhi ngiligcine,” kusho iNkosi EnguMbusi uJehova.’ ”

26 Izwi likaJehova laphinde lafika kimi, lithi: 27 “Ndodana yomuntu yilokhu okushiwo abantu* bakwa-Israyeli, ‘Umbono awubonayo uyogcwaliseka ngemva kwesikhathi eside kusukela manje futhi uprofetha ngesikhathi esisekude kakhulu.’ + 28 Ngakho yithi kubo, ‘Yilokhu iNkosi EnguMbusi uJehova ekushoyo: “ ‘Engikushoyo kuyokwenziwa ngokushesha; noma yini engiyishoyo iyokwenziwa,’ kusho iNkosi EnguMbusi uJehova.” ’ ”