UZakariya
1 Ngenyanga ka-8 ngonyaka wesibili kaDariyu, + izwi likaJehova lafika kumprofethi uZakariya *+ indodana kaBherekiya indodana ka-Ido, lathi: 2 “UJehova wabathukuthelela kakhulu oyihlo. +
3 “Yithi kubo, ‘Yilokhu uJehova wamabutho akushoyo: “ ‘Buyelani kimi,’ kusho uJehova wamabutho, ‘nami ngizobuyela kini,’ + kusho uJehova wamabutho.” ’
4 “ ‘Ningabi njengoyihlo, abaprofethi basendulo abamemezela kubo, bathi: “Yilokhu uJehova wamabutho akushoyo, ‘Ngicela nishiye izindlela* zenu ezimbi nezenzo zenu ezimbi.’ ” ’ +
“ ‘Kodwa abalalelanga futhi abanginakanga,’ + kusho uJehova.
5 “ ‘Baphi-ke oyihlo? Ingabe abaprofethi baphila phakade? 6 Nokho, amazwi ami neziqondiso zami engayala ngako izinceku zami, abaprofethi, oyihlo abakubonanga yini ukugcwaliseka kwako?’ + Ngakho babuya kimi bathi: ‘UJehova wamabutho wenze kithi ngokwezindlela zethu nezenzo zethu, njengoba nje ayenqumile.’ ” +
7 Ngosuku luka-24 lwenyanga ka-11, okungukuthi, inyanga kaShebhati,* ngonyaka wesibili kaDariyu, + izwi likaJehova lafika kumprofethi uZakariya indodana kaBherekiya indodana ka-Ido, lathi: 8 “Ngabona umbono ebusuku. Kwakunendoda egibele ihhashi elibomvu, imi phakathi kwezihlahla zombomvana ezisesigodini; ngemva kwayo kunamahhashi abomvu, ansundu namhlophe.”
9 Ngakho ngathi: “Bangobani laba, nkosi yami?”
Ingelosi eyayikhuluma nami yathi kimi: “Ngizokubonisa ukuthi laba bangobani.”
10 Indoda eyayimi phakathi kwezihlahla zombomvana yathi: “Laba yibo uJehova abathumile ukuba bahlole umhlaba.” 11 Bathi engelosini kaJehova eyayimi phakathi kwezihlahla zombomvana: “Siwuhlolile umhlaba, bheka! wonke umhlaba unokuthula futhi awunasiphazamiso.” +
12 Ngakho ingelosi kaJehova yathi: “O Jehova wamabutho, kuyoze kube nini ungasibonisi isihe eJerusalema nasemadolobheni akwaJuda, + owathukuthelele le minyaka engu-70?” +
13 UJehova waphendula ingelosi eyayikhuluma nami ngamazwi anomusa naduduzayo. 14 Ingelosi eyayikhuluma nami yathi kimi: “Memeza uthi, ‘Yilokhu uJehova wamabutho akushoyo: “Ngizolilwela iJerusalema neZiyoni ngentshiseko, yebo ngentshiseko enkulu. + 15 Ngizithukuthelele ngentukuthelo enkulu izizwe ezikhululekile, + ngoba ngangithukuthele kancane + kodwa zona zanezela enhlekeleleni.” ’ +
16 “Ngakho-ke yilokhu uJehova akushoyo: ‘ “Ngizobuyela eJerusalema ngesihe + nendlu yami izokwakhiwa kulo,” + kusho uJehova wamabutho, “intambo yokukala izokwelulelwa phezu kweJerusalema.” ’ +
17 “Phinda umemeze, uthi: ‘Yilokhu uJehova wamabutho akushoyo: “Amadolobha ami azophinde achichime ubuhle; uJehova uzophinde aliduduze iZiyoni + futhi usazolikhetha iJerusalema.” ’ ” +
18 Ngaphakamisa amehlo ami ngabona izimpondo ezine. + 19 Ngakho ngabuza ingelosi eyayikhuluma nami: “Yizini lezi?” Yathi kimi: “Lezi yizimpondo ezahlakaza uJuda, + u-Israyeli + neJerusalema.” +
20 Ngemva kwalokho uJehova wangibonisa izingcweti ezine. 21 Ngabuza: “Zizokwenzani?”
Wathi: “Lezi yizimpondo ezahlakaza uJuda kwaze kwangaba khona noyedwa owakwazi ukuphakamisa ikhanda lakhe. Lezi ezinye zizofika zizesabise, ziziwise phansi izimpondo zezizwe eziphakamisele izwe lakwaJuda izimpondo ukuze zilihlakaze.”