Eyesibili YamaKhosi
8 U-Elisha wathi kowesifazane ayevuse indodana yakhe: + “Suka uhambe, wena nomndeni wakho, uyohlala kunoma yiliphi izwe ongahlala kulo, ngoba uJehova ubikezele ukuthi kuzoba nendlala + ezothatha iminyaka eyisikhombisa ezweni.” 2 Ngakho lona wesifazane wasuka wenza njengoba umuntu kaNkulunkulu weqiniso ayeshilo. Wahamba nomndeni wakhe wayohlala ezweni lamaFilisti + iminyaka eyisikhombisa.
3 Ekupheleni kweminyaka eyisikhombisa lona wesifazane wabuya ezweni lamaFilisti waya enkosini eyokhala ngendlu yakhe nangensimu yakhe. 4 Manje inkosi yayikhuluma noGehazi isikhonzi somuntu kaNkulunkulu weqiniso, ithi: “Ngicela ungilandise zonke izinto ezinkulu u-Elisha azenzile.” + 5 Njengoba ayesalandisa inkosi ukuthi u-Elisha wamvusa kanjani owayefile, + owesifazane ondodana yakhe yayivuswe ngu-Elisha wafika enkosini ezokhala ngendlu yakhe nangensimu yakhe. + Ngaso leso sikhathi uGehazi wathi: “Nkosi yami, nguye-ke lo wesifazane, futhi yiyo le indodana yakhe eyavuswa u-Elisha.” 6 Inkosi yambuza lo wesifazane, wabe eseyilandisa le ndaba. Ngemva kwalokho inkosi yathuma isikhulu segceke, yathi: “Buyisela konke okungokwakhe, umkhokhele nemali abezoyithola ngesivuno sakhe kusukela ahamba ezweni kuze kube manje.”
7 U-Elisha wafika eDamaseku + ngesikhathi uBheni-hadadi + inkosi yaseSiriya egula. Ngakho watshelwa, kwathiwa: “Umuntu kaNkulunkulu weqiniso + ufikile lapha.” 8 Inkosi yathi kuHazayeli: + “Thatha isipho uhambe uye kumuntu kaNkulunkulu weqiniso, + umcele angibuzele kuJehova ukuthi ngizolulama yini kulokhu kugula?” 9 UHazayeli waya kuye ephethe izipho, yonke inhlobo yezinto ezinhle zaseDamaseku, zithwelwe amakamela angu-40. Wafika wama phambi kwakhe wathi: “Inceku yakho uBheni-hadadi, inkosi yaseSiriya, ingithume kuwe, ithi, ‘Ngizolulama yini kulokhu kugula?’ ” 10 U-Elisha wathi kuye: “Hamba, uthi kuye, ‘Uzolulama nakanjani,’ kodwa uJehova ungibonisile ukuthi uzofa nakanjani.” + 11 U-Elisha wamgqolozela emehlweni uHazayeli waze waba namahloni. Ngemva kwalokho umuntu kaNkulunkulu weqiniso wakhala. 12 UHazayeli wathi: “Ikhalelani inkosi yami?” Waphendula wathi: “Ngoba ngiyabazi ububi ozobenza kuma-Israyeli. + Izinqaba zawo uzozishisa ngomlilo, izinsizwa zawo ezingamaqhawe uzozibulala ngenkemba, abantwana bawo uzobaphahlaza babe yizicucu nabesifazane bawo abakhulelwe uzobaqhaqha.” *+ 13 UHazayeli wathi: “Inceku yakho, eyinja nje, ingayenza kanjani into enjalo?” Kodwa u-Elisha wathi: “UJehova ungibonisile ukuthi wena uzoba yinkosi phezu kweSiriya.” +
14 Ngemva kwalokho wasuka ku-Elisha wabuyela enkosini yakhe, yona yathi kuye: “Utheni u-Elisha kuwe?” Wathi: “Ungitshele ukuthi uzolulama nakanjani.” + 15 Kodwa ngosuku olulandelayo, uHazayeli wathatha indwangu yokumboza umbhede wayicwilisa emanzini wamboza ngayo ubuso benkosi yangakwazi ukuphefumula yaze yafa. + UHazayeli wabusa esikhundleni sayo. +
16 Ngonyaka wesihlanu kaJehoramu + indodana ka-Ahabi inkosi yakwa-Israyeli, uJehoramu + indodana kaJehoshafati waba yinkosi yakwaJuda, ngesikhathi uyise uJehoshafati eseyinkosi. 17 Wayeneminyaka engu-32 lapho eba yinkosi, wabusa iminyaka engu-8 eJerusalema. 18 Wahamba endleleni yamakhosi akwa-Israyeli, + njengoba nje babenzile abendlu ka-Ahabi, + ngoba wayeshade nendodakazi ka-Ahabi; + waqhubeka enza okubi emehlweni kaJehova. + 19 Kodwa uJehova akafunanga ukumchitha uJuda ngenxa kaDavide inceku yakhe, + ngoba wayemthembise ukuthi kwakuyohlale kubusa inzalo yakhe eJerusalema. +
20 Ezinsukwini zakhe u-Edomi wavukela uJuda + wayesebeka eyakhe inkosi. + 21 Ngakho uJehoramu wawelela eZayiri nazo zonke izinqola zakhe, wavuka ebusuku wanqoba ama-Edomi ayemhaqile nezinduna zezinqola; amabutho abalekela ematendeni awo. 22 Kodwa u-Edomi akazange ayeke ukuvukela uJuda kuze kube namuhla. ILibhina + nalo laqala ukuvukela ngaleso sikhathi.
23 Wonke omunye umlando kaJehoramu, konke akwenza, kulotshiwe encwadini yomlando wamakhosi akwaJuda. 24 Ekugcineni uJehoramu wafa wangcwatshwa nokhokho bakhe eDolobheni LikaDavide. + U-Ahaziya indodana yakhe + wabusa esikhundleni sakhe.
25 Ngonyaka ka-12 kaJehoramu indodana ka-Ahabi inkosi yakwa-Israyeli, u-Ahaziya indodana kaJehoramu inkosi yakwaJuda waba yinkosi. + 26 U-Ahaziya wayeneminyaka engu-22 lapho eba yinkosi, wabusa unyaka owodwa eJerusalema. Igama likanina kwakungu-Athaliya + umzukulu* ka-Omri inkosi + yakwa-Israyeli. 27 Wahamba endleleni yendlu ka-Ahabi, + waqhubeka enza okubi emehlweni kaJehova, njengoba kwakwenza indlu ka-Ahabi, ngoba wayehlobene nendlu ka-Ahabi. + 28 Ngakho wahamba noJehoramu indodana ka-Ahabi beyokulwa noHazayeli inkosi yaseSiriya eRamoti-gileyadi, + kodwa amaSiriya amlimaza uJehoramu. + 29 INkosi uJehoramu yabuyela eJizreyeli + ukuze kuphole amanxeba eyayiwathole kumaSiriya eRama ngesikhathi belwa noHazayeli inkosi yaseSiriya. + U-Ahaziya indodana kaJehoramu inkosi yakwaJuda wehla waya eJizreyeli eyobona uJehoramu indodana ka-Ahabi, ngoba wayelimele.*