Obunye Bobuciko Obukhethekile BaseMadagascar

UKUKHANGISWA okuhle kwamavazi, amabhodwe, kanye namapani okwenziwe ngobumba kwasikhanga njengoba sasihambahamba emakethe yaseAntsirabe ekhaya lethu eliyisiqhingi saseMadagascar. Nakuba wonke amabhodwe ayensundu, ayenamabala amakhulu amnyama ayebonakala eshiselwe. Ukulangazelela ukwazi kwasiphoqelela ukuba sibuze umfana omncane wasemaphandleni owayewadayisa ukuthi sasiqagela kahle yini.

Wathi, “Yebo, kuye kwadingeka ukuba omiswe ngomlilo ukuze abe njena. Kodwa asinabo ohavini besimanje, abaphucukile njengasemadolobheni. Sisebenzisa izindlela zakudala esazifundiswa obaba.”

Nakuba umfana aphendula neminye imibuzo yethu ngomusa, amazwi akhe amane nje avusa isifiso sethu sokuzibona ngokoqobo izinto ezinjalo zobumba zenziwa. Ngakho sahamba ngemoto saya endaweni eqhelile esemaphandleni lapho abantu basemaphandleni beyizingcweti zokubumba ngobumba. Bonke babenomusa futhi benomoya wokwamukela izihambi. Bejabulile ngokuthi abantu basedolobheni banesithakazelo emisebenzini yabo, babezimisele kakhulu ukusibonisa izimfihlo zabo.

Okokuqala nje, sathola ukuthi ubumba abalusebenzisayo alulona neze ubumba oluvamile. Bathi, ubumba oluvamile luqhekeka kalula lapho lushiswa. Ngakho basebenzisa ubumba olubizwa ngokuthi itanimanga (ngokwezwi nezwi, lisho “umhlaba oluhlaza”), olutholakala kuphela emaphandleni nasosebeni lwemifula noma imifudlana. Omunye umfana wasiyisa osebeni lomfudlana futhi wamba phansi. Cishe phansi ngokujule ngamasentimitha angu-30, kwavela inhlabathi emanzi, empunga​—⁠itanimanga! Nokho, ngokungafani negama layo, kwezinye izindawo itanimanga imnyama noma ngisho ibe nombala osaphuzi. Nakuba kunjalo, ngaso sonke isikhathi iyehluka emhlabathini obomvu ngokusawolintshi okulengxenye emaphakathi yesiqhingi.

Ngalesosikhathi enye indoda yasitshela ukuthi ukuze yenze amavasi noma amabhodwe amaningi, ihlanganisa isaka elilodwa letanimanga kanye nesigamu sesithathu sesaka lesihlabathi esicolisekile, naso esitholakala osebeni lwemifula. Emva kwalokho inezela amanzana athile ukuze ithambise lengxube. Angakanani “athile”? Akulandelwa izilinganiso eziqondile. Eqondiswa ulwazi lokuhlangenwe nakho, umbumbi uyayeka ukuthela amanzi lapho esenomuzwa wokuthi ingxube isijiye kahle​—⁠ingaqini kakhulu noma ithambe kakhulu.

Ngokulandelayo, lengxube yobumba, isihlabathi, kanye namanzi ibekwa kumata wenhlabathi ehlanzekile engenawo amatshe kanye notshani. Khona-ke umbumbi ube eseyigandaya isikhathi eside. Lokhu kuqinisekisa ukuthi ubumba luhlanganiswe kahle nesihlabathi, okuyisihluthulelo samavasi noma amabhodwe aqinile. Kunamagama amaningi olimi lwesiMalagasy achaza lesinyathelo esibalulekile sokwenza izinto ngobumba: hitsahina, disahina, tehafina, volavolaina, totoina. Nokho wonke abhekisela enqubweni efanayo​—⁠ukugandaya ingxube yobumba. Lapho ababumbi sebeqiniseka ukuthi ingxube isilungile, balungela ukuqalisa ukubumba izinto zobumba ngokoqobo.

Baqale bahlukanise ingxube ibe amabhola alingana nenqindi yakho. Ukuze bakhe isinqe sebhodwe, bathatha ibhola elilodwa futhi balicindezele phansi entweni elolongayo​—⁠ngokuvamile kuba ibhodwe elidala neseligugile lobumba⁠—​ukuze bakhe isimo salo. Ngemva kokuba sebelikhiphile ibhodwe lokubumba, basebenzisa elinye ibhola lobumba ukuba bakhe umlomo webhodwe. Phakathi nalenqubo, ababumbi bayacophelela ukuba bangavumeli ingxube yome kakhulu, ngoba ingaqhekeka kalula.

Manje amabhodwe ayekwa ukuba ome elangeni usuku lonke. Kuba yilapho kuphela lapho esuke eselungele khona isinyathelo sokugcina: ukomisa ngomlilo. Kodwa ngisho nalokhu kwenziwa ngokwezigaba zakho. Wonke amabhodwe namavasi afakwa utshani kanye namaqabunga omisiwe bese elaliswa phansi ngohlangothi. Lokhu okufakwe ngaphakathi kuthungelwa ngomlilo futhi kuyekwe imizuzu engu-10 noma engu-15 ukuba kushe. Lokhu kuqinisa ubumba.

Ngemva kwalokho kushiswa kokuqala, amabhodwe abekwa kwenye indawo embozwe ngotshani namaqabunga omile. Nokho, kulokhu amabhodwe abekwa ngendlela yokuba imilomo yawo ibhekane. Khona-ke ababumbi babe sebewamboza amabhodwe ngotshani kanye namaqabunga omile kuze kube yilapho engasabonakali. Babe sebekokelezela lendawo ngamagabade enhlabathi ukuze babambe umlilo ugcine kulendawo futhi bavimbele ukuba amabhodwe angagiqiki. Kube futhi sekuthungelwa lezinto ezishayo ukuba zishe okungenani imizuzu engu-30 noma kuze kube yilapho umlilo uzicimela ngokwawo. Ngemva kokuba amabhodwe esepholile, ayasuswa emlotheni futhi asuke esekulungele ukusetshenziswa.

Uma siwabhekisisa lamabhodwe, manje sasiwaqonda lamabala amnyama asemabhodweni. Kwakuyizingxenye ezazishiswe umlilo ngokuqondile. Lonke ibhodwe lalinombala ovamile wobumba olushisiwe​—⁠onsundu ngokusawolintshi.

Lobuciko bokwenza amabhodwe buye badluliselwa ezizukulwaneni ngezizukulwane. Sahlangana nomuntu owayesebenza embonini enkulu yezindwangu edolobheni kodwa owayezenzela enye imali futhi ngokwenza futhi adayise izinto zobumba. Lobuciko wayebufunde kuyise, naye owayebufunde kuyise. Futhi siyaqiniseka ukuthi lensizwa ngeke iphunyukwe ithuba lokufundisa izingane zayo.