Abayona Ingxenye Yezwe?

NGUMLOBELI WE-PHAPHAMA! EJALIMANE

“ABAYONA ingxenye yezwe, njengoba nje nami ngingeyona ingxenye yezwe.” (Johane 17:16, NW) Ngalamazwi uJesu wachaza isimo sokungathathi-hlangothi ngokuphelele sabalandeli bakhe ngokuphathelene nezindaba zezombangazwe. Ingabe labo abathi bangamaKristu namuhla bayayifinyelela lendinganiso?

Cabangela lokhu kuphawula kwamaphephandaba okulandelayo ngokuphathelene nokuhileleka kweLobukholwa kulokho okwakuyi-German Democratic Republic (GDR), leyo eyayibuswa umbuso wobuKhomanisi kwaze kwaba yilapho ihlakazeka ngo-1990.

• “Njengoba iSonto LamaLuthela e-GDR seliye lajabulela udumo okwesikhashana lokuba umsunguli wokuvukela okunokuthula, ukuthandwa kwalo umphakathi kubonakala sengathi kuncipha ngokushesha. Kwabaningi libonakala sengathi liye laba insika yokusekela umbuso nenkundla ye-Stasi (Umnyango Wombuso Wezokulondeka).”—Die Zeit, November 1991.

• “AmaSonto aseLuthela ahlukahlukene asesifundeni . . . aye azwakalisa ukudideka ngenxa yokuhileleka kwezisebenzi zasesontweni namalungu esonto kuyi-Stasi.”—Evangelische Kommentare, January 1991.

• “Abaholi beSonto [baseLuthela] bezwa izikhalo zokuthi abefundisi abasabanakekeli abantu babo njengoba babenza ngaphambili, njengoba sebematasa kwezombangazwe.”—Süddeutsche Zeitung, February 1990.

• “UWeizsäcker [owayengumongameli wase-Federal Republic of Germany] wathi iSonto [laseLuthela] ngaso sonke isikhathi lalinendima ewusizo ebuhlotsheni bezombangazwe balamaZwe aseJalimane amabili.”—Wetterauer Zeitung, February 1992.

Ukugxambukela kwezombangazwe akugcinanga nakancane eSontweni laseLuthela. “Amanxusa e-Stasi angena kancane kancane cishe kuwo wonke amaqembu amasonto [amaProthestani],” kubika i-European. UManfred Stolpe, i-European emchaza ‘njengomkhulumeli oyinhloko wesonto lamaProthestani kuziphathimandla zamakhomanisi,’ wathi lapho ezivikela: “Ngangingamxhawula uDeveli uma lokho kwakuthuthukisa izisusa zethu.”

I-Guardian yaseLondon yabika ngobuhlobo obuseduze obuphakathi kwabefundisi neQembu Lezigelekeqe elise-Italy. Yathi: “ISonto liye lahlalisana ngokuthula neCosa Nostra isikhathi eside kangangokuba isonto limangalelwa kaningi ngokuhlanganyela ebubini.”

I-Toronto Star yayinesihloko esikhuluma ngokusebenzelana kwabefundisi abathile bobu-Orthodox baseRussia nalokho okwakuyi-KGB. Lombiko uthi: “Ukudalulwa kokusebenzelana kwesonto nombuso wobukhomanisi kuyigalelo elibhubhisa kunawo wonke. . . . Ukwaziswa okuvela ezinqolobaneni zokugcina imilando ze-KGB . . . kusikisela ukuthi izikhulu eziphakeme zesonto azigcinanga nje ngokulahla izimiso zazo, kodwa futhi zazizimisele ukululaza abaholi benkolo abasemazweni akude.”

Njengoba amasonto eLobukholwa eqhubeka egxambukela kwezombangazwe, amaKristu angempela anamathela emyalweni kaJesu wokungabi ingxenye yezwe.