Izinhlobo Zezitshalo Ziyanyamalala —Kungani?
ECHINA, kwakunezinhlobo ezicishe zibe ngu-10 000 zikakolweni ezazilinywa ngo-1949. Nokho, ngawo-1970, zazingu-1000 kuphela ezazisekhona. E-United States, ezinhlotsheni ezingu-7098 zama-apula okuthiwa zazilinywa phakathi no-1804 no-1904, cishe ezingamaphesenti angu-86 azisekho. Ngaphezu kwalokho, ngokwe-Report on the State of the World’s Plant Genetic Resources for Food and Agriculture, “amaphesenti angu-95 eklabishi, angu-91 amasimu ommbila, angu-94 kaphizi, nangu-81 ezinhlobo zikatamatisi ngokusobala awasekho.” Kubikwa izibalo ezifanayo emazweni omhlaba wonke. Kungani kunokwehla ngokungazelele kangaka? Abanye bathi imbangela eyinhloko ukwanda kokulimela injongo yezentengiselwano okulandelwa ukuphela kwepulazi lomkhaya elincane okuye kwaphumela ekupheleni kwezilimo zemvelo, eziyizinhlobo eziningi kakhulu.
Ukuphela kwezinhlobo zezitshalo kungabangela ukukhinyabezeka okwandayo kwesivuno emasimini. Ngokwesibonelo, cabanga ngokuntuleka okukhulu kwamazambane e-Ireland ngo-1845-49, okwabulala abantu abangu-750 000 ngendlala lapho isifo sezitshalo siqothula ingxenye enkulu yesivuno samazambane. Yayiyini imbangela engokwesayensi yalenhlekelele? “Ukufana kwezakhi zofuzo,” kusho umbiko weNhlangano YeZizwe.
Kuye kwakhiwa izindawo zokugcina izakhi zofuzo ezingaphezu kuka-1000 emhlabeni wonke phakathi nawo-1970 nawo-1980 ukuze kuqongelelwe futhi kugcinwe imithombo yezakhi zofuzo yezitshalo. Kodwa eziningi zalezi zindawo zokugcina izakhi zofuzo ziwohloka ngesikhulu isivinini, futhi ezinye zazo sezivaliwe kakade. Kubikwa ukuthi, cishe amazwe angu-30 kuphela manje anezindawo ezifanelekayo nezivikelekile zokugcina nokulondoloza imbewu yezitshalo isikhathi eside.
IBhayibheli lithembisa ukuthi ngaphansi kokubusa koMbuso kaKristu, uJehova “uyakwenzela abantu bonke idili lokukhulupheleyo . . . idili lewayini elinenhlese, okukhulupheleyo okunomnkantsha.” (Isaya 25:6) Yeka indlela esingabonga ngayo ngokuthi uJehova uNkulunkulu, “onika inyama yonke ukudla” noMdali wezakhi zofuzo ezinhlobonhlobo, uyokwanelisa zonke izidingo zabantu zokudla!—IHubo 136:25; Genesise 1:29.