“Wasicindezela Ukuba Sihambe Naye”

UKUNGENISA IZIHAMBI kuyisiko emazweni aseMpumalanga. Ngokwesibonelo, kwelaseNdiya umkhaya ungakhetha ukungadli ukuze nje isivakashi ebesingalindelwe siphiwe ukudla. E-Iran, njalo umama ugcwalisa isiqandisi ngokudla ukuze akwazi ukupha izivakashi ezingase zifike zingalindelwe.

Umoya onjalo wokupha wawubonakala naphakathi kwabantu abaningi okukhulunywa ngabo eBhayibhelini. Esinye isibonelo esivelele esikaLidiya, mhlawumbe owayengumJuda ongumproselithe owayehlala eFilipi, inhloko-dolobha yesifunda saseMakedoniya. Ngolunye usuku kuyisabatha, umphostoli uPawulu nabangane ayehamba nabo bathola uLidiya nabanye abesifazane bebuthene eceleni komfula ngaphandle kwaseFilipi. UJehova wavula inhliziyo yakhe ngenkathi uPawulu ekhuluma. Ngenxa yalokho, wabhapathizwa kanye namalungu omkhaya wakhe. Wabe esenxusa lezi zihambi: “Uma nina madoda niye nangahlulela njengothembekile kuJehova, ngenani endlini yami nihlale.” Umngane kaPawulu uLuka uthi: “Wasicindezela ukuba sihambe naye.”—IzEnzo 16:11-15.

NjengoLidiya, amaKristu namuhla abonisa umoya wokungenisa izihambi kwamanye amakholwa, njengababonisi abajikelezayo nomkabo. Ababamukelayo ‘bayabacindezela ukuba bahambe nabo.’ Labo ababonisa umoya wokungenisa izihambi bayabusiswa ngezingxoxo ezakhayo nangobudlelwane obungokomoya. Nakuba iningi loFakazi BakaJehova lingacebile, ‘lilandela inkambo yokungenisa izihambi.’ (Roma 12:13; Hebheru 13:2) Umoya walo wokupha ulenza lijabule. Ngempela uJesu wayeqinisile lapho ethi: “Kukhona injabulo eyengeziwe ekupheni kunasekwamukeleni.”—IzEnzo 20:35.