Kungani UNkulunkulu Evumela Ububi?

NOMAPHI lapho ubheka khona, ubona ububi nokuhlupheka. Izimpi zibulala kwasani, amasosha nabantu abangekho empini. Ubugebengu nobudlova yizinto zemihla ngemihla. Kungenzeka ukuthi muva nje nawe uye wabandlululwa noma waphathwa ngendlela engenabulungisa. Ngokwalokho ozibonele futhi wazizwela khona, kungenzeka ukuthi uke wabuza, ‘Kungani uNkulunkulu evumela ububi?’

Awumusha lo mbuzo. Eminyakeni engaba ngu-3 600 edlule, inceku kaNkulunkulu ethembekile uJobe yabuza: “Kungani ababi beqhubeka bephila?” (Jobe 21:7) Ekhathazwe izenzo ezimbi zabantu bakubo, umprofethi uJeremiya wekhulu leminyaka lesi-7 B.C.E. wabuza: “Kungani kuye kwaba yindlela yababi ephumelele, futhi kungani bonke abakhohlisayo kuyibo abangakhathazekile?” (Jeremiya 12:1) Bobabili uJobe noJeremiya babazi ukuthi uNkulunkulu ulungile. Noma kunjalo, babezibuza ukuthi kungani kwakunobubi obungako. Mhlawumbe nawe kuyakuxaka lokhu.

Abanye abantu basola uNkulunkulu ngobubi nangokuhlupheka. Abanye bayazibuza: ‘Uma uNkulunkulu enawo wonke amandla, elungile futhi enothando, akabuqedi ngani ububi nokuhlupheka? Kungani eye wavumela ububi baqhubeka kwaze kwaba usuku lwethu?’ Isihloko esilandelayo sixoxa ngezimpendulo zale mibuzo kanye neminye ebalulekile.

[Umthombo Wesithombe ekhasini 3]

AP Photo/Adam Butler