Yebo, Yiwo Impela Umagazini Ofundwayo Lo!
Siyihlele kabusha indlela umagazini ofundwayo obukeka ngayo ukuze ukhange futhi unisize ngokwengeziwe ekutadisheni iZwi likaJehova leqiniso eliyigugu.—IHu. 1:2; 119:97.
Saqala eminyakeni emine edlule ukunyathelisa omagazini ababili be-Nqabayokulinda, owomphakathi nowethu sonke—oFakazi BakaJehova nezifundo zethu zeBhayibheli ezithuthukayo.
Ngokuphathelene nomagazini ofundwayo, enye inceku kaJehova engumakad’ ebona yabhala: “Iyamangalisa futhi ifinyelela inhliziyo—yilowo umbono engaba nawo nge-Nqabayokulinda yokuqala efundwayo. Ulimi lwayo olungokomoya olujulile lwakhuluma ngokuqondile nenhliziyo yami. Siyabonga kakhulu ngaleli lungiselelo elisha elimangalisayo.” Omunye umzalwane wabhala: “Ngihlale ngibheke phambili ekutadisheni lo magazini ngokujulile ngisebenzisa i-Reference Bible.” Sethemba ukuthi nawe uzizwa ngendlela efanayo.
Njengoba nazi, INqabayokulinda ibilokhu inyatheliswa kusukela ngo-1879, futhi lokhu kuye kwenzeka kuphela ngenxa yomoya nesibusiso sikaJehova. (Zak. 4:6) Phakathi nale minyaka engu-133, isembozo salo magazini siye sashintsha izikhathi eziningana. Umagazini ngamunye ka-2012 uzoba nesembozo sesithombe esidwetshiwe esinemibala egqamile esinabantu abashumayelayo ukuze sisikhumbuze ngomyalo esiwunikwe uNkulunkulu wokunikeza ubufakazi obuphelele ngoMbuso kaJehova. (IzE. 28:23) Ekhasini lesibili, uzothola isithombe okuthathwe kuso leso esisesembozweni, kanye nencazelo emfushane yalokho okwenzekayo nendawo okwenzeka kuyo. Phakathi nawo wonke unyaka, lokhu kuzosikhumbuza ukuthi abantu bakaJehova bashumayela izindaba ezinhle “emhlabeni wonke owakhiwe.”—Math. 24:14.
Yiluphi olunye ushintsho oluye lwenziwa kulo magazini? Ibhokisi lokubukeza selisekuqaleni kwesihloko ngasinye esifundwayo. Lokhu kuzoqokomisa amaphuzu abalulekile okufanele niwabheke njengoba nifunda futhi nitadisha isihloko. Yebo, abaqhubi beSifundo Se-Nqabayokulinda basazoqhubeka besebenzisa le mibuzo ekupheleni kwesifundo ukuze kubukezwe lokho obekufundwa. Nizoqaphela ukuthi izikhala ezisemaceleni kwamakhasi zenziwe zaba banzi kancane nezinombolo zamakhasi nezigaba sezigqamile.
Njengoba kuchaziwe kulo magazini wale nyanga, sekufakwe isici esisha esithi “Ezivela Ezinqolobaneni Zethu,” ukuze kuboniswe izenzakalo eziphawulekayo emlandweni woFakazi BakaJehova banamuhla. Kuzoba futhi nokuhlangenwe nakho kwezindaba zokuphila ezizovela ngezikhathi ezithile esihlokweni esithi “Bazinikela Ngokuzithandela.” Lezi zihloko zizoyichaza ngokucacile intokozo, ukwaneliseka nenjabulo abafowethu nodadewethu ababe nayo lapho bekhonza lapho kunendingeko enkulu khona yabamemezeli boMbuso.
Kwangathi ningasijabulela ngokugcwele isikhathi enisichitha nitadisha iZwi likaNkulunkulu ngosizo lwalo magazini.
Abanyathelisi
[Isithombe ekhasini 3]
1879
[Isithombe ekhasini 3]
1895
[Isithombe ekhasini 3]
1931
[Isithombe ekhasini 3]
1950
[Isithombe ekhasini 3]
1974
[Isithombe ekhasini 3]
2008