Zisebenzise Ngokunenzuzo Izincwadi Ezindala
1 Kuwo wonke amagumbi omhlaba, umuntu uye wagcina izigidi zezincwadi ezindala emitatsheni yezincwadi. Noma kunjalo, ziye zaba nayiphi inzuzo ehlala njalo emkhayeni wesintu? (UmSh. 12:12) Izincwadi ezibalulekile yilezo ezigxila eMbusweni kaNkulunkulu nalokho ozokwenzela isintu. Amabandla amaningi anezinhlobonhlobo zezincwadi ezinjalo esitokweni, ezanyatheliswa ngaphambi kuka-1986. Njengoba lena kuyinyanga yokugcina yomkhankaso wensimu engabelwe, kufanele siqikelele ukuthi siyazihambisa lezi zincwadi ezindala kubantu.
2 Zinenzuzo Yangempela: Nakuba abanye kithina bengase babe nomuzwa wokuthi lezi zincwadi sezeqiwe isikhathi uma ziqhathaniswa nezintsha, kumelwe sikhumbule ukuthi ziqukethe iqiniso elingokomBhalo. Ngakho-ke, kufanele senze umzamo owengeziwe wokuzisebenzisa ngokunenzuzo lezi zincwadi ezindala ensimini yebandla nasensimini engabelwe.
3 Okuhlangenwe nakho kowesifazane owazuza ifa lezincwadi eziningi ezindala ze-Watch Tower kugogo wakhe, kugcizelela ukuba yinzuzo kwazo. UFakazi wabuza lona wesifazane ukuthi wayazi yini ukuthi zizuzisa kangakanani lezi zincwadi. Owesifazane waphendula: “Angazi, kodwa ngingakwazi kanjani lokho?” Lona wesifazane wasivuma isifundo seBhayibheli, wangena eqinisweni, futhi kamuva waba yigugu kuyena umtapo kagogo wakhe. Yeka ifa eliyigugu lezo zincwadi ezindala ezaba yilo!
4 Zisakaze: Ngaphandle kokuhambisa izincwadi ezindala endlini ngendlu nasensimini engabelwe, qikelela ukuba uzihambise lapho wenza izimpindelo kubantu owaziyo ukuthi bayakujabulela ukufunda izincwadi zethu, kuhlanganise nalabo abanezikhokhelo ze-Nqabayokulinda ne-Phaphama! nabasemzileni wakho kamagazini. Kulabo ofunda nabo iBhayibheli, izincwadi ezithile ezindala zingabanikeza ulwazi oluyisisekelo oluyokwandisa ukuqonda kwabo iqiniso. Ungakhohlwa ukuzitholela noma iziphi izincwadi ezindala ezingekho emtatsheni wakho siqu.
5 Kunokuba sizigcine izincwadi zethu ezindala, masizisebenzise ngokunenzuzo ukuba sishukumise abantu esihlangana nabo ukuba ‘besabe uNkulunkulu, bagcine imiyalo yakhe.’—UmSh. 12:13.